1 Kroniku 21 - ICIGHAN BIBILO

¹ Tsô Satan mough hendan a Iserael, a tor Davidi ityô er a̱ ôr iyenge i Iserael.

² Nahan Davidi kaa a Yoabi man atiator a ior er: Za, za ôr nen iyenge i Iserael hii nen hen Bersheba zan zan za ar nen hen Dan; yô, i̱ va ôrom, sha er me fa iyenge ve yô.

³ Tsô Yoabi gema kaa er: TER A̱ seer iyenge i ior Nav zan zan ve̱ hemba mba hegen kwa deri je. Ku! terem tor, ve cii ka mbayev mba terem gaa? Man ka nyi kwagh ne a sar tereme? Ka nyi man á haa Iserael ibo iyol nahana?

⁴ Kpa imo i tor hemba i Yoabi. Tsô Yoabi mough zende ken Iserael cii, hide va ken Yerusalem.

⁵ Nahan Yoabi va na Davidi iyenge i ior mba i ôr ve la; kohol nomsombaiorov mba Iserael mba tsuwan sanker cii, lu dubu deri pue kar môm; man Yuda yô, lu dubu deri unyiin man akunduatargber, mbatsuwan sanker.

⁶ Kpa iyenge i Levi man Benyamin yô, a ôr i ga, gadia imo i tor la lu Yoabi kwagh u ndôhôrshima.

⁷ Kwagh ne vihi Aôndo ishima, nahan A tsaha Iserael tsung.

⁸ Tsô Davidi kaa a Aôndo er: M er zegekwaghbo er m er kwagh ne yô; kpa shi de wanakiriki Wou ibo na; gadia m er kwagh u ibume tsô.

⁹ Tsô TER ôr kwagh a Gadi ornengenakaa, u Davidi la, A kaa er:

¹⁰ Za, za ôr kwagh a Davidi kaa un wer: TER ngu kaa nahan er: M ver u akaa atar, tsuwa kwagh u M̱ er u yô.

¹¹ Nahan Gadi va hen Davidi va kaa a na er: TER ngu kaan nahan er: U̱ tsuwa kwagh u a lu u guda yô;

¹² Shin ka ijen anyom atarou; shin ka u iwer itiar ú lu yevese mba ve hendan a we, man sanker u mbaihomov ou a̱ nzughul a we shinii; shin sanker u TER ayange atar, ka bouange ken tar je la, er ortyom u TER a̱ va tim ken tar u Iserael cii la ase? Yô, hen kwagh u me za kaa a u A tindim la yô,

¹³ Davidi kaa a Gadi er: Kondom iyol kpishi; yô me gba sha ikev i TER tsô, gadia mhôônom Nam ma zungwen ma vese, de rumun wer m̱ gba sha ikev i or ga.

¹⁴ Tsô TER tindi bouange sha Iserael; nahan ior kpe dubu akunduatargber ken Iserael.

¹⁵ Shi Aôndo tindi ortyom hen Yerusalem kpaa er a̱ za tim un; er a sôôn u timin un yô, TER nenge, nahan mhôônom kôr Un sha kwagh u bo la, A gema A kaa a ortyom u timin la er: Kuma ve; hide a uwegh ough ijime. Ortyom u TER la gema tile hen vande u gbiren alakema u Ornan, Oryebushi la.

¹⁶ Davidi kenden ashe sha yô, a nenge a ortyom u TER tile hen ato, undu inya shin undu aôndo Sha, a tsuwa sanker, lu a mi sha uwe, a naregh sha Yerusalem. Tsô Davidi kua mbatamen va gure, ve kuma ishiv vev inya a akondo uya.

¹⁷ Nahan Davidi kaa a Aôndo er: Ka mo m ne zwa mer, i̱ ôr iyenge i ior gaa? Een, ka mo m er kwaghbo, m er kwagh u vihin tsung ye; kpa iyôngo ingin ne yô, ka nyi i ere? Yô, TERE, Aôndo wam, shi de uwegh Ough ku̱ lu num a mo kua ya u terem kpaa, bouange a̱ de lu sha ior av ga.

¹⁸ Tsô ortyom u TER kaa a Gadi er a̱ kaa Davidi er, a̱ kôndo, a̱ za ta TER atse a nanden nagh sha mi, sha vande u gbiren alakema u Ornan, Oryebushi la.

¹⁹ Tsô Davidi kôndo sha imo i Gadi a kaa ken iti i TER yô.

²⁰ Tsô Ornan gema ashe nenge a ortyom la; ônov nav unyiin mba ve lu a na yô, ve yer; Ornan lu gbiren alakema.

²¹ Davidi ngur van hen Ornan yô, Ornan ta ashe za nenge a Davidi nahan a mough hen vande u gbiren alakema, a ngurum a wa ityough inya sha ishigh ki Davidi.

²² Tsô Davidi kaa a Ornan er: Nam vande u gbiren alakema ne sha u me ta atse a nanden TER nagh sha mi heregh, nam sha ishe na vough, sha u bouange a̱ de u eren ior yô.

²³ Kpa Ornan kaa a Davidi er: Gba ngohol tsô ga! Terem tor, a̱ er kwagh u a doo un yô; nenge, m na u abua ne sha ci u iniav mbi nanden, kua ikav mbi gbiren alakema a mi kpaa, mbi̱ lu ikon i keer usu a min, man alakema kpaa sha ci u nagh ku sha samuyia; m na u cii.

²⁴ Kpa Tor Davidi gema kaa a Ornan er: Ei; saa me yam sha ishe na vough, gadia m rumun u tôôn kwagh u a lu u wou, nan TER ga, me na nagh ku nanden sha kwagh u m ngohol a ngohol gbilin ga.

²⁵ Nahan Davidi na Ornan ushekel mba zenaria deri ataratar sha ci u vande la.

²⁶ Davidi ta atse a nanden TER nagh sha mi heregh, a na iniav mbi nanden man iniav mbi bem, a vaa a TER; Un kpaa A rumun sha usu u senen Sha, sha atse a nagh ku nanden la.

²⁷ Tsô TER kaa a ortyom er, a̱ hide a sanker na a̱ shindi ken var.

²⁸ Tsô hen shighe la, zum u Davidi kar, er TER rumun imo na hen vande u gbiren alakema u Ornan, Oryebushi la yô, a na nagh her.

²⁹ Gadia tabernakel u TER u Mose er ken toho la, man atse a nagh ku nanden lu sha igungu u hen Gibeon hen shighe la.

³⁰ Kpa Davidi fatyô u zan hen a, sha u za pinen Aôndo kwagh ga, gadia a lu cian sanker u TER la.