1 Kroniku 20 - ICIGHAN BIBILO

¹ Tsô sha inyom i he, sha shighe u utor ka ve zaan ityav la yô, Yoabi mough a akumautya a ageegh, due a ve, za vihi tar u Mbaamon, shi za kase Raba sha utya. Kpa Davidi gema lu ken Yerusalem. Yoabi hemba Raba, tim un.

² Tsô Davidi bugh tor ve la idyer i tor kera, a kar myohom ma i, kuma talenti u zenaria môm, iwen i injaa lu sha mi; i gema i i cir Davidi sha ityou; a kura ishar i ken gar la, ngee je zua ga.

³ A due a ior mba ve lu ker la, a na ve tom u eren sha uzerto man sha ucanca mba iyôô kua sha azembe. Kape Davidi er a agar a Mbaamon cii la. Tsô Davidi a ior cii ve hide.

⁴ Tsô ken masejime la, ityav shi mough ken Geser a Mbafiliti; hen shighe la Shibekai Orhusha wua Shipai, u a lu môm ken ônov mba Rafa; ve hingir sha ikev ve.

⁵ I shi i nôngo ityav a Mbafiliti; tsô Elhanan wan u Yair wua Lahami anngô u Goliati, Orgiti, u ihande i iwange na lu er igaikondo nahan la.

⁶ Shi i nôngo ityav hen Gati, orgen lu ker u taven tsung, ahôaveegh a na kua ahôangahar a na lu ikundu kar anyiin, ataratar sha hanma uwegh, man shi ataratar shin hanma nguhar kpaa; un kpaa a lu wan u Rafa.

⁷ Er a lu lahan Iserael yô, Yonatan wan u Shimea anngô u Davidi wua un.

⁸ Mban lu ônov mba Rafa ken Gati; Davidi man mbayev nav ve wua ve.