1 Kroniku 19 - ICIGHAN BIBILO

¹ Tsô ken Masejime u kwagh la yô, Nahashi tor u Mbaamon kpe, wan na gema tema tor sha ityough nagh.

² Nahan Davidi kaa er: Me er a Hanun wan u Nahashi doo doo, gadia ter na lu eren a mo dedoo. Tsô Davidi tindi mbatyomov er ve̱ za yar un ku u ter na la. Mbayev mba Davidi mbala za nyôr ken tar u Mbaamon hen Hanun sha u yaren un ku.

³ Kpa atiator a Mbaamon kaa a Hanun er: U ngu fan wer, Davidi ngu civir teru je, sha er a tindi mbayaren we ku yôô? Mbayev nav kera va sha u vea va nenge aker ken tar ne man shi u hemban u man u fan akaa a ker gaa?

⁴ Nahan Hanun kôr mbayev mba Davidi mbala, hondo ve ishigh, tôndo ve uriga hen atô sha asenatôôgh je, tsô a na ve gbenda.

⁵ Tsô mbagenev yem za ôr Davidi kwagh u i er ior mbala yô. Nahan a tindi sha u i̱ za kegh ve gbenda; gadia kunya kôr ior mbala mimi. Tor kaa er: Hira lu nen ken Yeriko zan zan indyer yen i̱ kar menden, man né hide ye.

⁶ Zum u Mbaamon kav er ve gem ayol a ve ve hingir kwagh u duen Davidi ishima yô, Hanun man Mbaamon ve tindi utalenti mba azurfa dubu, er i̱ za goho akeke man mbaanyinyav ken Mesopotamia man ken Aram-maaka kua ken Soba kpaa.

⁷ Tsô ve goho akeke dubu ikundugber kar uhar, kua tor u Maaka a ior nav, ve va haa afo sha ishigh ki Medeba. Mbaamon kpaa due ken agar a ve, ve kohol, ve va ityav.

⁸ Zum u Davidi ungwa kwagh la yô, a tindi Yoabi a ikumutya cii, lu anomaior cii.

⁹ Tsô Mbaamon due, tange ityav hen hundagar; kpa utor mba ve va la yô, ve lu ijiir ve kposo ken ikôngo.

¹⁰ Zum u Yoabi kav er i himbir un sha utya ken hemen kua ken ijime kpaa yô, a tsuwa ior ken uicuwanmbaiorov mba Iserael cii a samber ve sha u ve̱ nôngo ityav a Mbashiria.

¹¹ Ior mba ve shi la, a gema a wa ve sha ikev i anngô na Abishai; ve di kpaa ve samber sha u nôngon ityav a Mbaamon.

¹² Nahan a kaa er: Aluer Mbashiria vea hemban mo yô, ú va wasem; kpa aluer Mbaamon vea hemban we yô, mo di me va wase u.

¹³ Yô, taver nen ishima, sé lu nen nomso sha ci u ior asev man sha ci u agar a Aôndo wase; TER A̱ er kwagh u a doo Un yô.

¹⁴ Nahan Yoabi a ior mba ve lu a na kporom hen Mbashiria sha u nôngon ityav; maa ve yevese un.

¹⁵ Zum u Mbaamon nenge Mbashiria mba ngur yevese yô, ve di kpaa ve yevese anngô na Abishai, ve za nyôr ken gar. Nahan Yoabi hide ken Yerusalem.

¹⁶ Zum u Mbashiria nenge er ve yina sha Iserael yô, ve tindi mbatyomov er ve̱ za va a Mbashiria mba ve lu Ifi yande la; Shofaki kurutya u akumautya a Hada-deser hemen ve.

¹⁷ I va ôr Davidi kwagh la, nahan a kohol Iserael cii, a per Yordan a za tser ve sha hemen, maa a cinge ityav a ve. Nahan er Davidi cinge ityav a ve yô, ve kpaa ve gba nôngon ityav a na.

¹⁸ Mbashiria gema yevese Mbaiserael; Davidi wua Mbashiria mba sha akeke ior dubu utaankaruhar man mbazanangahar ior dubu akunduahar, a wua Shofaki kurutya u akumautya a ve kpaa.

¹⁹ Zum u mbayev mba Hada-deser nenge er ve yina sha Iserael yô, ve hime iyôngo a Davidi ve hingir sha ikev na; nahan Mbashiria kera rumun u wasen Mbaamon ga.