1 Kroniku 17 - ICIGHAN BIBILO

¹ Tsô er Davidi tema ken iyou na yô, Davidi kaa a profeti Natan er: Nenge, mo m ngu teman ken iyou i ikon i sedar, kpa areki u ikuryan u TER yô, gema ngu ken tenti.

² Tsô Natan kaa a Davidi er: Er kwagh u a lu u ken ishima cii, gadia Aôndo ngu a we.

³ Tsô hen tugh mbula je, kwaghôron u Aôndo va hen Natan er:

⁴ Za, za kaa wanakiriki Wam Davidi wer: TER ngu kaan nahan er: De maan Mo iyou sha u M̱ tema kimi ga,

⁵ gadia hii sha iyange i M due a Iserael la je zan zan nyian M ngu a tema ken ma iyou ga, kpa M lu ken tenti tsô, man ken utabernakel.

⁶ Sha ajiir a M lu zenden a Iserael imôngo cii, M shi ôr kwagh a ma orjir u Iserael u M ver nan sha u nana̱ kura ior Av la, Mer: Ka nyi ne maam iyou i sha ikon i sedar ga, kpa?

⁷ Yô, za kaa wanakiriki Wam Davidi nahan wer, TER, u akum a Sha ngu kaan nahan er: M tôô u hen ijiir i ilev yan toho henpe u lu kuran iyongo la, Mer, hingir orhemen u ior Av Iserael.

⁸ M lu a we kpaa, her ape u zenden cii, M tim mbaihomov ou sha ishigh you kera cii, man shi Me er iti you ia za gwa er iti i uzegembaiorov mba ve lu sha won nahan.

⁹ Man shi Me ver ijiir sha ci u ior Av Iserael, Me môôr ve sha u ve̱ tema hen ijiir ve ayol a ve, á kera num ve ga, ônov mba mbaaferev kpaa vea kera er ve ican er tsuaa la nahan ga,

¹⁰ er hii sha ayange a M ver mbaajiriv Mer, ve̱ nengen sha ior Av Iserael la; Me gema Mbaihomov ou cii vea var inya. Man shi M ngu kaan we, TER Una maa u ya.

¹¹ Tsô zum u ayange ou aa kuma a ú za kohol uter ou yô, Me ver vor wou, á lu ma wan wou je, Me taver tor u nan.

¹² Ka nan nana maam iyou ye, Me ver ikônough ki torough ki nan kia lu gbem.

¹³ Me lu TER u nan, nan di nana lu wan Wam; Me kar a erdoo Wam sha a nan kera ga, er lu M kar a mi hen un u a vande lun a we la kera nahan ga;

¹⁴ kpa Me ver nan ken iyou Yam man ken tartor Wam kpaa, gbem sha won; ikônough ki torough ki nan kpaa kia lu her gbem sha won.

¹⁵ Ka sha akaaôron ne cii kua mpase ne cii, Natan a ôr kwagh a Davidi ye.

¹⁶ Tsô Davidi nyôr za tema sha ishigh ki TER, a kaa er: Mo m ngu nyi TER, Aôndo; man ya wam yô, ngu di nyi je, er U korom zan zan hegene?

¹⁷ Kwagh ne kpaa ka kwagh u kiriki sha ashe Ou tsô, Aôndo; U shi U ter kwagh u ya u wanakiriki Wou, sha ayange a ken hemen ca je, man shi U nenge a kwagh wam ken hemen er ka nongo u ior nahan, TERE, Aôndo.

¹⁸ Ka nyi je Davidi una shi á seer kaan We sha kwagh u icivir i U ne wanakiriki Wou ne? Gadia U fa wanakiriki Wou.

¹⁹ TERE, ka sha ci u wanakiriki Wou ne je, shi ka sha ishima You kpaa, U er zegekwagh ne, U pase akaa a vesen ne cii ye.

²⁰ TERE, ma or u kuman sha a We nan ngu ga, ma Aôndo ugen kpaa ngu ga, saa We, sha akaa a se ongo sha ato ase cii.

²¹ Ka hanma ikurior igen sha won i lu er ior Ou Iserael nahana, i Aôndo A za yem i er i̱ hingir ior Nav, sha u iti You i̱ za sha won, sha uzegembaakaav mba cier iyol, er U zenda akuraior sha ishigh ki ior Ou kera, mba U yem ve ken Igipiti la?

²² Gadia U gema ior Ou Iserael ve hingir ior Ou gbem sha won; We TER, U hingir Aôndo ve.

²³ Yô, TERE, shi na kwaghôron u U er sha wanakiriki Wou kua ya na la, a̱ lu nahan gbem, er kwagh u U kaa la.

²⁴ Een, i̱ kure un sha er á kende a iti You sha gbem sha won yô, er ior vea kaan er: TER u akum a Sha, Aôndo u Iserael, ka Aôndo u Iserael je; ya u wanakiriki Wou Davidi kpaa, una lu sha ishigh You taveraa,

²⁵ Gadia Aôndo Wam, U pase wanakiriki Wou Wer, Ú maa un ya, ka nahan man wanakiriki Won a sen kwagh sha ishigh You vangertiôr ne ye.

²⁶ Hegen yô, TERE, ka We U lu Aôndo ye, man U tôndo zwa a wanakiriki Wou sha kwagh u doon ne;

²⁷ yô, doo U u veren ya u wanakiriki Wou dedoo sha u a̱ tsôr sha ishigh You gbem sha won, gadia We TERE, U na un iveren i dedoo, nahan una lu a iveren gbem sha won.