1 Kroniku 15 - ICIGHAN BIBILO

¹ Davidi maa ayou sha ci na ken gar u Davidi; shi a sôr ijiir sha ci u areki u Aôndo kpaa, a tim un tenti.

² Tsô Davidi kaa er: Doo u hanma or nana̱ gba tôôn areki u Aôndo ga, saa Mbalevi, gadia ka ve je Aôndo tsuwa ve er ve̱ tôôn areki u Aôndo shi ve̱ eren Un tom gbem ye.

³ Nahan Davidi kohol Iserael cii ken Yerusalem sha u za van a areki u TER hen ijiir na i i ser un la.

⁴ Davidi kohol ônov mba Aron kua Mbalevi.

⁵ Ônov mba Kohati yô, lu Uriel orhemen, man anmgbianev nav ior deri man ikundu;

⁶ ônov mba Merari yô, lu Asaia orhemen, man anmgbianev nav ior deri uhar man ikundu;

⁷ ônov mba Gershon yô, lu Yoel orhemen, man anmgbianev nav ior deri man ikundugber;

⁸ ônov mba Elisafan yô, lu Shemaia orhemen, man anmgbianev nav ior deri uhar;

⁹ ônov mba Heberon yô, lu Eliel orhemen, man anmgbianev nav ior akunduanyiin;

¹⁰ ônov mba Ushiel yô, lu Aminadabi orhemen, man anmgbianev nav ior deri man pue kar uhar.

¹¹ Tsô Davidi yila upristi Sadoki man Abiatar; man Mbalevi: Uriel, Asaia, Yoel, Shemaia, Eliel, kua Aminadabi,

¹² a kaa a ve er: Ne mba mbahemenev sha uya mba uter mba Mbalevi, nahan yô, wanger nen ayol a en, ne kua anmgbianev enev, sha u ne̱ va a areki u TER, Aôndo u Iserael né va ver hen ijiir i m ser un yô.

¹³ Gadia ka sha ci u ne tôô un tsuaa la ga, man TER, Aôndo wase, ta num sha a vese yô, gadia se ker Un sha gbenda u vough ga.

¹⁴ Nahan upristi man Mbalevi wanger ayol a ve sha u vea va a areki u TER, Aôndo u Iserael, yô.

¹⁵ Nahan Mbalevi tôô areki u Aôndo sha avande a ve sha igbo er Mose wa tindi sha imo i TER nahan.

¹⁶ Shi Davidi kaa mbahemenev mba Mbalevi er, ve̱ ver anmgbianev vev, mbawanatsam mbala, a ityogholov, mbaadiguve man umolo man ukwen, ve̱ kuhwan taver, taver ve̱ kende imo a iember.

¹⁷ Nahan Mbalevi ver Heman wan u Yoel; man ken anmgbianev nav yô, ve ver Asav wan u Berekia; man ken ônov mba Merari, anmgbianev vev, Etan wan u Kushaia,

¹⁸ kua anmgbianev vev mba ve gbire sha a ve, lu: Sekaria man Ben man Yaashiel man Shemiramoti man Yehiel man Uni man Eliabi man Benaia man Maaseia man Matitia man Elifelehu man Mikeneia; man Mbakuranhunda yô, lu Obedi-edom man Yeiel.

¹⁹ Man mbawanatsam, Heman man Asav man Etam, ve lu a ukwen mba togula er ve̱ kuhwan taver taver,

²⁰ man Sekaria man Ashiel man Shemiramoti man Yehiel man Uni man Eliabi man Maaseia man Banaia, a mbaadiguve mba i ver sha imo i ukase yô,

²¹ man Matitia man Elifelehu man Mikeneia man Obedi-edom man Yeiel man Asashia, a umolo er ve hemen sha imo i nomso.

²² Man Kenania, orhemen u Mbalevi lu tesen er i̱ wa icam sha inja, gadia a fa kwagh la dedoo.

²³ Man Berekia man Elkana lu mbakuranhunda hen ape areki lu la.

²⁴ Man upristi Shebania man Yoshafati man Netanel man Amasai man Sekaria man Benaia man Elieser, ve tôngo ikor sha ishigh ki areki u Aôndo la; man Obedi-edom man Yehia lu mbakuranhunda hen ape areki lu la.

²⁵ Nahan Davidi man mbatamen mba Iserael man mbahemenev mba lun a ior dubu dubu sha ikev la, ve mough sha u za tôôn areki u ikuryan hen ya u Obedi-edom a iember.

²⁶ Tsô zum u Aôndo wase Mbalevi mba ve tôô areki u ikuryan i TER la yô, ve na nagh sha abua ataankarahar kua iyôngo itiankarihiar.

²⁷ Davidi haa riga u ikondo i pupuu i kôngor, kua Mbalevi cii kpaa mba ve tôô areki la, man mbawanatsam man Kenania orhemen u tesen mbawanatsam icam; Davidi lu a efodi u ikondo i pupuu iyol.

²⁸ Kape Iserael cii, ve va a areki u ikuryan u TER a awer a gbiren kondo kondo sha imo i amar a tôngon man ikor man ukwen, er ve lu kuhwan taver taver sha mbaadiguve man umolo.

²⁹ Tsô er areki u ikuryan u TER va nyôr ken gar u Davidi yô, Mikal wan u Saulu ta ashe hen ianiyoughough za nenge tor Davidi lu vinen amar, numben yô, tsô a laha un ken ishima na.