1 Kroniku 14 - ICIGHAN BIBILO

¹ Tsô Hiram tor u Tiru tindi mbatyomov hen Davidi a ikon i sedar kua mbamaankwagh man mba gbanikon er ve̱ va maa un iyou.

² Nahan Davidi kav er TER A ver un tor sha Iserael yô, gadia i kende a tor na sha kpishi, sha ci u ior nav Iserael.

³ Davidi shi seer eren kasev mbagenev ken Yerusalem, man Davidi shi mar ônov mba nomso kua mba kasev.

⁴ Ati a ônov mba a zua a mi ken Yerusalem yô, ka: Shamua man Shobabi man Natan man Solomon

⁵ man Ibehar man Elishua man Elpeleti

⁶ man Noga man Nefegi man Yafia

⁷ man Elishama man Beeliada man Elifeleti.

⁸ Zum u Mbafiliti ungwa er i shighe Davidi mkurem i kôr un tor sha Iserael cii yô, Mbafiliti cii kôndo sha u va keren Davidi; tsô Davidi ongo nahan yô, a due sha u za nôngon ityav a ve.

⁹ Yô, Mbafiliti va va samber ityav shin pev u Refaim.

¹⁰ Tsô Davidi pine Aôndo kaa er: M̱ kôndo m̱ za nôngo ityav a Mbafiliti? Ú na ve sha ikev yam shinii? TER kaa a na er: Kôndo, gadia Me na ve sha ikev you.

¹¹ Nahan ve va hen Baal-perashim, Davidi hemba ve heregh. Tsô Davidi kaa er: Aôndo ande nyôr ken mbaihomov av sha uwegh agh, er ka m-ande u mnger yô. Ka nahan man i ii ijiir la iti er Baal-perashim ye.

¹² Ve undu mbaaôndo vev heregh, nahan Davidi na zwa er i̱ nande ve sha usu.

¹³ Kpa Mbafiliti shi va samber ityav shin pev la.

¹⁴ Nahan Davidi shi pine Aôndo, Aôndo kaa a na er: De kera zende ve ityô ga, wa nev, tsô ú za ta num sha a ve hen atine a balsem.

¹⁵ Tsô zum u ú ungwa acin sha ityouv mbi ikon i balsem yô, due nôngo ityav, gadia Aôndo kar hemen we sha u za hemban akumautya a Mbafiliti ve.

¹⁶ Nahan Davidi er er Aôndo kaa un nahan, ve hemba akumautya a Mbafiliti, hii hen Gibeon zan zan za ar hen Geser je.

¹⁷ Gwa u Davidi samber sha ityar ityar cii; TER er akuraior cii, a cian un.