1 Kroniku 10 - ICIGHAN BIBILO

¹ Tsô Mbafiliti nôngo ityav a Iserael; ior mba Iserael yevese Mbafiliti, i wua ve ken utya sha uwo u Gilboa.

² Nahan Mbafiliti cir sha Saulu a ônov nav nombuloo. Mbafiliti wua ônov mba Saulu, Yonatan man Abinadabi kua Malkishua.

³ Ityav imbishi Saulu tsung, mbaavaanev tsule un ngegh; cier un iyol kpishi a mbaavaanev.

⁴ Tsô Saulu kaa a or u tilin un ikav mbi tswamev la er: Tsuwa sanker wou kumam i̱ due kera, sha er mbaipusuv mban ve̱ de va heen mo ga. Kpa or u tilin un ikav mbi tswamev la venda, gadia cier un iyol yum. Tsô Saulu ngohol sanker na ta sha mi pov.

⁵ Tsô er or u tilin un ikav mbi tswamev nenge er Saulu a kpe yô, un kpaa a ta sha sanker na maa a kpe.

⁶ Ka ape Saulu kpe a ônov nav utar la; nahan ya na cii kpe shighe môm.

⁷ Zum u ior mba Iserael cii mba ve lu shin pev la nenge er ve yevese yô, man shi er Saulu kua ônov nav ve kpe kera kpaa yô, ve yevese ve undu agar a ve, nahan Mbafiliti kar va tema ker.

⁸ Tsô kper nan er Mbafiliti va u va yan ishar i mbakpenev yô, ve kohol ikom i Saulu kua akom a ônov nav sha uwo u Gilboa.

⁹ Ve er un akondo, ve gber un ityough, ve kura ikav nav mbi utyav, ve tindi a mi ken tar u Mbafiliti ningir tser cii, sha u i̱ za yôô loho la hen akombo a ve kua hen ior kpaa.

¹⁰ Ve ver ikav nav mbi utyav ken iyou i mbaaôndo vev, ve mande ityough nagh ken iyou i Dagon.

¹¹ Kpa zum u ior mba Yabeshi-gileadi cii, ve ungwa kwagh u Mbafiliti ve er a Saulu la cii yô,

¹² anomaior cii mough, ve za tôô gundu u Saulu man akom a ônov nav, ve va a mi ken Yabeshi, ve va ii akuhe a ve hen itinekon i terebim ken Yabeshi, ve hôr kwaghyan ayange ataankarahar.

¹³ Kape Saulu kpe sha ci u kwaghbo u a er TER la, man sha ci u a wa imo i TER iko ga, man sha ci u a pine jijingi u orkpen kwagh,

¹⁴ a pine TER ga. Ka nahan man A wua un, A gema tor na la A na Davidi wan u Yese ye.