Tito 3 - Tokelauan New Testament

Ko te Āmio Kelihiano

¹ Fakamanatu ki nā tino ke talia e ki lātou te pule a aliki ma nā taupulega, ke uhitaki ki ei ma ke nonofo hāuni ke fai ho he gāluega lelei.

² Lea ki ei ke nahe ki lātou tautatala i ni kupu kino ki ho he tino, kae ke nonofo fīlēmū ma fealofani, ma ke fakaaloalo ki tagata uma.

³ Auā ko ki tātou foki nae vālelea, hē uhitaki ma nae hehē. Ko ki tātou nae fai ma pologa ki manakoga ma tuinanauga kehekehe. Ko ki tātou nae ola i he ōlaga tau fakakino ma te fuā; nae inohia ki tātou e tagata ma nae inoino foki ki tātou ki a te ki lātou.

⁴ Kae kua fakaali mai e te Atua to tātou Fakaola tona agalelei ma tona alofa,

⁵ ma kua fakaola ai ki tātou. E hē ona ni gāluega lelei na ki tātou faia, kae ona ko tona alofa fakahao mo ki tātou. E ala i te mana o tona Agaga na ia fakamamāgia ai ki tātou ma mafai ai ke toe fanaufougia ki tātou ma maua ai e ki tātou te ola fou.

⁶ Kua fōki fua mai e te Atua te Agaga Paia ki a ki tātou e ala ia Iehu Keliho to tātou Fakaola,

⁷ kae ke mafai ai ke fakalelei te va o ki tātou ma te Atua e ala i tona alofa tūnoa, ma maua ai e ki tātou te ola e fakavavau tēia e fakamoemoe ki tātou ki ei.

⁸ Ko te fakakupuga tēnei e hako. Ko au e fofou ko koe ke fakamākeke oi tautala i nā mea iēnei, kae ke mafai ai nā tino kua talitonu ki te Atua ke fano hako o lātou taimi ki te faiga o nā mea e lelei, ma fai ai e ki lātou ni gāluega e lelei ma aogā.

⁹ Kae kalo kehe mai nā tauaiga kupu valea, nā talagā gafa, nā fefīnauakiga, ma nā tauaimihaga e uiga ki te Tūlāfono. Ko nā mea iēnei e hēai he uiga ma hēai he aogā.

¹⁰ Lapataki fakafokotahi pe fakalua ki nā tino e fakatupua nā fekehekeheakiga, kā hēai lava oi tīaki vē loa nahe kē toe amanakiagia.

¹¹ E iloa e koe ko nā tino vēnei kua nunumi nā māfaufau, ma ko a lātou agahala e fakamāonia ai to lātou hehē i mua o te Atua.

Nā toe Fakahinoga

¹² Kua tonu ia te au ke uga atu he tino o Atemani pe ko Tuhiko. Kāfai e pa atu, fakamolemole taumafai ke fetaui ki tāua i Nikapoli, auā kua fuafua e au ko au ka nofo i kinā i te taumālūlū.

¹³ Kāfai ia Hena te loia ma Apolo e laga te faigāmalaga, fehoahoani ifo ko ki ei ke mautinoa e maua uma e ki lāua nā mea e fofou ki ei.

¹⁴ E tatau o tātou tagata Kelihiano i Kelete ke ki lātou iloa oi fakaaogā o lātou taimi ke fai ai ni gāluega lelei, kae ke mafai ai ke fehoahoani ki nā tino e fofou vave ki he fehoahoani; e hē tatau ke ola ki lātou i he ōlaga e hē tupu mai ai ni fua lelei.

¹⁵ E fakafeiloaki atu ki a te koe ki lātou uma e fakatahi ki mātou. E fakafeiloaki atu foki ki a mātou uō Kelihiano e alolofa mai ki a te ki mātou. Ke ia te koutou uma te alofa tūnoa o te Atua.