Tito 1 - Tokelauan New Testament

¹ Mai ia Paulo, he kaukauna e a te Atua ma ko he apohitolo e a Iehu Keliho. Ko au na filifilia ke fehoahoani ki tagata o te Atua ke tūmau to lātou fakatuatua ma takitaki ki lātou ki te meamoni e akoako e te tātou talitonuga,

² iē e fakavae i luga o te fakamoemoe mo te ola fakavavau. Ko te Atua e hē pepelo, ma na ia folafola maia te ola fakavavau tēnei ka ko hēki faia te lalolagi,

³ ma i te taimi tatau, na ia fakailoa ai te mea tēnei, e ala i tana kupu na tuku mai ki a te au, ma e kō folafolagia e tuha ai ma te fakatonuga a te Atua to tātou Fakaola.

⁴ Ki a Tito, toku ataliki moni e ala i te talitonuga kua talia fakatahi e ki tāua. Ke ia te koe te alofa tūnoa ma te fīlēmū o te Atua te Tamana ma Keliho Iehu to tātou Fakaola.

Gāluega a Tito i Kelete

⁵ Ko koe na tuku e au i Kelete kae ke mafai e koe oi tukutonu nā mea koi fakahētonu, ma tōfia ni toeaina mo nā Ekalehia i nā kakai takitahi uma. Ke manatua e koe nā mea na fakatonu atu e au:

⁶ ko te tino e tōfia ma toeaina e tatau ke lelei tana āmio; e tatau ke fokotahi oi oti tana āvaga, ma tatau tana fānau ke talitonu ki te Atua kae nahe ola i he ōlaga hē pūlea pe fakalogogatā.

⁷ Auā ko te takitaki o he Ekalehia e kikila e ia te gāluega a te Atua, ma e tatau ke lelei tana āmio. E hē tatau ke fakamaualuga pe māitaita, pe konā, pe fakahāuā, pe maetupe.

⁸ Kae ke loto alofa ki nā tino kehe, ma fiafia oi fai nā mea lelei. E tatau ko he tino e pūlea tona loto, e fai mea tonu, e āmio paia, ma e lava te onohai.

⁹ E tatau ke tāofi mau e ia te kupu moni e vē ona akoakogia ai ia, kae ke ia mafaia oi fakaako ia tagata i te talitonuga moni ma fakailoa te hehē o nā tino e teteke ki ei.

¹⁰ Auā e tokalahi nā tino, kae maihe lava ki lātou nae i te tāpuakiga faka-Iutaia, e teteke ma fakahehē ki iētahi tino, i nā kupu e hēai ni uiga e tautatala ai.

¹¹ Ko nā tino iēnei e tatau ke tāofi, auā ko a lātou mea e fai kae ke maua ai ni a lātou tupe, ma e fakalotovāivai lele ki nā kau kāiga kātoa ona e fai e ki lātou nā akoakoga e hē tatau ke ki lātou faia.

^12-13 Ko he tino foki lava mai Kelete, he pelofeta, te na tautala i te meamoni i te leaga vēia, “Ko nā tino Kelete ni tino talapepelo i taimi uma lava, ni manu fēkakai, ni tino kakai fakaatuatuvale ma paieē.” Ona ko te tūlaga tēnei, e tatau ai ke tautalagia lahi ki lātou, kae ke fakahako ai te mea e talitonu ki lātou ki ei,

¹⁴ ma hē toe tauhihi ai ki a lātou talakakai Iutaia mai te vavau, ma nā fakatonuga fakatetagata mai nā tino kua teteke ki te meamoni.

¹⁵ E mamā lava nā mea uma ki a te ki lātou e loto mamā; kae e hēai he mea e mamā ia te ki lātou e kino ma hē talitonu, auā ko o lātou māfaufau ma o lātou lotofuatia kua hē mamā.

¹⁶ Ko nā tino vēnei e lea e ki lātou iloa te Atua, kae e kitea ia lātou mea e fai te hē hako o tēnei fakakupuga. Ni tino e inohia ma hē fakalogo ki te Atua, ma e hē ki lātou mafaia oi fai he mea lelei e fokotahi.