Mataio 5 - Tokelauan New Testament

¹ Kua kitea atu e Iehu te kaifenua oi fano ai ki luga o he mauga. Kua nofo ki lalo i kinā, oi ōmamai ai nā hoko o ia ki ona tafa.

² Oi kāmata ai kua akoako atu e ia ki lātou:

Ko te Fiafia Moni

³ “Amutia nā tino e ki lātou iloa to lātou mātitiva i nā mea tau ki te Atua; auā e o ki lātou te Mālō o te lagi!

⁴ Amutia nā tino e fakanoanoa; auā ka fakamāfanafanagia ki lātou e te Atua!

⁵ Amutia nā tino e loto maulalo; auā ka maua e ki lātou nā fakamanuiaga kua uma te folafola mai e te Atua!

⁶ Amutia nā tino e fakahilihili i o lātou loto te fakatinoga o nā mea e fofou ki ei te Atua; auā ka fakamaliegia kātoatoa ki lātou e te Atua!

⁷ Amutia nā tino e alolofa atu ki iētahi tino; auā ka alofagia ki lātou e te Atua!

⁸ Amutia nā tino e loto mamā; auā ka kitea e ki lātou te Atua!

⁹ Amutia nā tino e fakatupua te fīlēmū; auā ka takua ki lātou he fānau e a te Atua!

¹⁰ Amutia nā tino e maua i nā fakahāuāga ona e fai e ki lātou te finagalo o te Atua; auā e o ki lātou te Mālō o te lagi!

¹¹ “Amutia koutou kāfai koutou e fakamātagā ma fakahāuāgia e tagata, ma ki lātou faia ni talapepelo kino kehekehe e uiga ki a te koutou, ona ko koutou ni hoko e ōku.

¹² Koutou ke olioli ma fiafia, auā e i te lagi te koutou taui lahi. Nae vēnā foki lava nā fakahāuāga nae fai e tagata ki nā pelofeta i nā aho kua teka.

Māhima ma te Mōlī

¹³ “Ko koutou e vē ko he māhima ki tagata uma o te lalolagi. Kae kāfai te māhima kua uma tona kokona, e mafai vēhea nei ke toe fakakokona? E hē toe aogā ki he mea kae nā ko te togi lava ki fafo ma holi i vae o tagata.

¹⁴ “Ko koutou e vē ko he mōlī mo tagata uma o te lalolagi. Ko he kakai e fau i luga o he mauga, e hē mafai ke hē kitea.

¹⁵ E hēai foki he tino e ia tutua he mōlī oi tuku ai ki lalo o he tānoa; kae e tuku e ia ki luga o he tugāmōlī, te mea e māina ai ki nā tino uma i loto o te fale.

¹⁶ Ke vēnā foki oi māina atu tau mōlī ki tagata, kae ke kitea ai e ki lātou au mea lelei e fai, ma vīkia ai te koutou Tamana i te lagi.

Akoakoga e uiga ki te Tūlāfono

¹⁷ “Ia koutou nā vēakē ko au na hau ke tatala te Tūlāfono a Mohe ma nā akoakoga a te kau pelofeta. Ko au e hēki hau ke tatala, kae ke taunuku ai a lātou akoakoga.

¹⁸ Auā e takutino atu e au ki a te koutou, ka ko hēki mavae atu te lagi ma te lalolagi, e hēai he mea e tōkehea mai i te Tūlāfono, ke pa lava ki he koma pe he mataituhi — heiloga kua taunuku nā mea uma.

¹⁹ Ko te mea ia, ko ai lava e hē uhitaki, e tuha lava pe ko te fakatonuga ia e pito hili ona taigole tona tāua, ma akoako e ia iētahi tino ke fakatakitaki ake ki a te ia, ka kavea ia ma tino e hili atu te hē tāua i te Mālō o te lagi. Kae ko ai lava e uhitaki ma akoako e ia iētahi tino ke fakatakitaki ake ki a te ia, ka kavea ia ma tino e tāua lahi i te Mālō o te lagi.

²⁰ Auā e lea atu au ki a te koutou, e fātoā mafai oioti koutou ke hao atu ki te Mālō o te lagi, pe kāfai e hili atu te koutou fakamāoni i te tauhi ki nā Tūlāfono, i lo nā faiakoga o te Tūlāfono ma te kau Falehaio.

Akoakoga e uiga ki te Ita

²¹ “Kua fakalogo koutou ki nā akoakoga nae fai ki tagata i nā aho kua leva, ‘Koutou nahe tāmate tino; ko te tino e fai e ia te mea tēnei, ka kave ki te fakamahinoga.’

²² Kae ko au e lea atu nei ki a te koutou, ko ai lava e ita ki tona uho, ka kave ki te fakamahinoga; ko ai lava e lea vē ki tona uho, ‘E hēai hō aogā!’ ka kave ki te Taupulega, ma ko ai lava e taku e ia tona uho ko he mea valea, e ono togi ki loto o te afi o kēna.

²³ Kāfai la kua hāuni atu tau tāulaga ki te Atua i te fata faitāulaga kae manatua e koe i kinā, e i ei he mea e hē fiafia ai tō uho ki a te koe,

²⁴ tuku tau tāulaga i mua o te fata faitāulaga kae fano oi fakalelei muamua ma tō uho, oi fātoā hau ai oi ofo atu tau tāulaga ki te Atua.

²⁵ “Kāfai he tino e fai hana tagi ma mōlia koe ki te fakamahinoga, teuteu vave te koulua va koi i ei he taimi ka ko hēki pa koulua ki mua o te fakamahinoga. Auā e pa loa koulua ki ei, oi ka tuku atu ai loa koe e ia ki te fakamahino, oi tuku atu ai koe ki leoleo, oi togi ai koe ki loto o te falepuipui.

²⁶ I kinā, e lea atu au ki a te koe, ka nofo ai pea koe ke pa lava ki te taimi e uma ai te totogi o te toe hene o tau hala.

Akoakoga e uiga ki te Mulilua

²⁷ “Kua fakalogo koutou ki nā akoakoga, ‘Koutou nahe mulilua.’

²⁸ Kae ko au e lea atu nei ki a te koutou: ko te tino e kikila ki he fafine ma nanau ki ei, kua agahala ia i te mulilua i tona loto.

²⁹ Ko te mea ia, kāfai ko tō mata taumatau te māfua ai oi agahala koe, gape kehe oi tīaki. E hili atu te māumau o hō itūtino i lo te togi o tō tino kātoa ki kēna.

³⁰ Ma kāfai ko tō lima taumatau te māfua ai oi agahala koe, tipi kehe oi tīaki. E hili atu te māumau o hō lima i lo te togi o tō tino kātoa ki kēna.

Akoakoga e uiga ki te Tatala Āvaga

³¹ “E lea mai foki nā akoakoga, ‘Ko te tino e tatala e ia tana āvaga, e tatau ke ia fōkia ki te fafine he pepa fakamāonia ko te lā āvaga kua tatala.’

³² Kae ko au e lea atu nei ki a te koutou: ho he tamāloa e tatala e ia tana āvaga i he māfuaaga e kehe mai i lo te kua hē fakamāoni o te fafine, kua fai e ia te mea e mulilua ai tana āvaga; ma ko ai lava e fakaipoipo ki he fafine kua tatala tana āvaga, kua agahala foki ia i te mulilua.

Akoakoga e uiga ki nā Tautōga

³³ “Kua fakalogo foki koutou ki nā akoakoga nae fai ki tagata i te kāloā, ‘Nahe kē tautō pepelo, kae fakatino nā mea kua uma tō tautō ki te Aliki e fai e koe.’

³⁴ Kae ko au e lea atu nei ki a te koutou: nahe koutou tautō kāfai e fai ni autou folafolaga. Nahe koutou tautō ki te lagi, auā ko te nofoāliki tēnā o te Atua;

³⁵ pe ko te lalolagi, auā ko te mea ia e mapu ki luga ona vae; pe ko Ieluhalema, auā ko te kakai tēnā o te Tupu hili.

³⁶ Nahe tautō foki ki outou ulu, auā e hē koutou mafaia oi fakahinā pe fakauliuli he lāulu e fokotahi.

³⁷ Kae lea oioti, ‘Io’ pe ‘Hēai’ — ko ho hētahi mea e lea ai koutou, e mai te Tiāpolo.

Akoakoga e uiga ki te Tauimahui

³⁸ “Kua fakalogo koutou ki nā akoakoga, ‘E hui te mata i te mata, ma te nifo i te nifo.’

³⁹ Kae ko au e lea atu nei ki a te koutou: nahe tauia e koutou he mea kino a he tino na fai ki a te koutou. Kāfai tō pakōkō taumatau e po e he tino, liliu ki ei tētahi pakōkō.

⁴⁰ Kāfai he tino e fai hana tagi ki te fakamahinoga ki tō kofutino, fōki foki mo ia tō peleue.

⁴¹ Kāfai koe e fakamālohia e he fitafita a he vaegākau mai he tahi atunuku kua pukea tō fenua, ke amo tana taga mo he maila, oi amo mo he lua maila.

⁴² Kāfai he tino e gogō atu ki hau mea, fōki ki ei; kāfai he tino e fia fakaaogā e ia hau mea, fōki ke fakaaogā e ia.

Alolofa ki nā Tino e fai koutou ma o lātou Fili

⁴³ “Kua fakalogo koutou ki nā akoakoga, ‘Alofa ki au uō, kae ita ki nā tino e fai koe ma o lātou fili.’

⁴⁴ Kae ko au e lea atu nei ki a te koutou: alolofa ki nā tino e fai koutou ma o lātou fili, ma tatalo mo ki lātou e fakahāuā atu ki a te koutou,

⁴⁵ kae ke kavea ai koutou ma fānau a te koutou Tamana i te lagi. Auā e fakapupula e ia te la ki tagata lelei ma tagata kino, ma fakamaligi ifo te ua ki a te ki lātou e āmiotonu ma ki lātou e āmiokino.

⁴⁶ Auā kāfai koutou e alolofa oioti ki nā tino e alolofa atu ki a te koutou, he ā te ka maua tauanoa ai he koutou taui? E pa foki lava ki nā aolāfoga e fai e ki lātou te mea tēnā!

⁴⁷ Ma kāfai koutou e fakataumuna oioti ki autou uō, kua koutou faia nei he mea e kehe mai nā mea e fai e iētahi tino? E pa foki lava ki tagata nukukehe e fai e ki lātou te mea tēnā!

⁴⁸ E tatau koutou ke lelei kātoatoa — ke vē ko te koutou Tamana i te lagi e kātoatoa tona lelei.