Mataio 4 - Tokelauan New Testament

Ko nā Fakaohoohoga o Iehu

¹ Oi tataki ai ia Iehu e te Agaga ki te vao ke fakaohooho e te Tiāpolo.

² E fagafulu ia ao ma pō nae fakalāina ai ia Iehu, oi na lagona ai e ia te fia kaia.

³ Oi hau ai te Tiāpolo kua lea vē atu ki a Iehu, “Kāfai ko koe te Ataliki o te Atua, fakatonu la nā fatu iēnei ke liu ma falaoa.”

⁴ Ka kua tali atu ia Iehu, “Lea mai te tuhituhiga paia, ‘E hē ko nā meakai oioti e ola ai te tagata, kae ko nā kupu uma e vāgana mai ai te Atua.’ ”

⁵ Oi kave ai ia Iehu e te Tiāpolo ki Ieluhalema te Kakai Paia, kua fakatū i luga o te mea pito maualuga o te Mālumalu,

⁶ oi lea vē atu ai te Tiāpolo ki ei, “Kāfai koe ko te Ataliki o te Atua, oho la ki lalo, auā lea mai te tuhituhiga paia: ‘Ka fakatonu e te Atua ana agelu ke kikilagia koe; ka hapahapaia koe e ki lātou i o lātou lima, kae ke pa foki lava ki ō vae ka hē mafai ke ogohia i he fatu.’ ”

⁷ Kua tali mai ia Iehu, “E lea mai foki te tuhituhiga paia, ‘Nahe kē tofotofoa te Aliki tō Atua.’ ”

⁸ Oi toe kave ai e te Tiāpolo ia Iehu ki luga o he mauga maualuga, kua fakahino ki ei nā mālō uma o te lalolagi ma te tūkehe o nā mamalu o ki lātou.

⁹ Kua lea atu te Tiāpolo, “Ko nā mea uma lele iēnei ka fōki atu e au mo koe, kāfai koe e tōtuli ki lalo oi ifo mai ki a te au.”

¹⁰ Oi tali mai ai ia Iehu, “Hātani, fano kehe! E lea mai te tuhituhiga paia, ‘Ifo atu ki te Aliki tō Atua ma kaukauna oioti ki a te ia!’ ”

¹¹ Oi fano kehe ai te Tiāpolo, kae kua ōmamai nā agelu oi fehoahoani ki a Iehu.

Kua Kāmata te Gāluega a Iehu i Kalilaia

¹² I te lagonaga e Iehu ko Ioane kua kave ki te falepuipui, oi fano ai ki Kalilaia.

¹³ E hēki nofo i Nahaleta kae kua fano oi nofo i Kapenaumi, he tamā kakai i tafa o te Vaitūloto ko Kalilaia, i te kogāfenua o Hepulona ma Nafatali.

¹⁴ Na tupu te mea tēnei ke taunuku ai te kupu a te pelofeta ko Ihaia,

¹⁵ “Te fenua o Hepulona ma te fenua o Nafatali, i te auala ki te tai, i tētahi itū o te Iolitana, Kalilaia te fenua e nonofo ai ia tagata nukukehe!

¹⁶ Ko nā tino e nonofo i te pōuliuli ka ki lātou kiteagia he mālamalama lahi. Ko ki lātou e nonofo i te fenua pōuli o te oti, ka huluia i te mālamalama.”

¹⁷ Mai te taimi tēnā na kāmata ai oi fai te tālakiga a Iehu e vē; “Liliu kehe mai autou agahala, auā kua pili mai te Mālō o te lagi.”

Kua Filifilia e Iehu nā Tino Faifaiva e Toka Fa

¹⁸ E havali atu ia Iehu i tafa o te Vaitūloto ko Kalilaia kae ia kitea atu he kau uho e toka lua, ko Himona (ko tētahi ona igoa ko Petelu) ma tona uho ko Anitelea, e togi to lā kupega i te vai; auā ko ki lāua ni tino faifaiva.

¹⁹ Kua vāgana atu ia Iehu ki a te ki lāua, “Mulimuli mai ki a te au oi fakaako atu ai koulua e au, ke fai ma tino faifaiva ke maua ai ia tagata.”

²⁰ I te taimi lava tēnā na tuku ai loa o lā kupega, kae mulimuli ki a Iehu.

²¹ Kua fano kehe atu ia Iehu mai kinā, oi ia kitea ai hētahi kau uho e toka lua, ko Iakopo te ataliki o Hepetaio ma Ioane tona uho, e i luga o to lātou vaka ma to lā tamana, e fonofono o lātou kupega. Kua kalaga atu ki ei ia Iehu,

²² oi tuku ai loa e ki lāua te vaka ma to lā tamana, kae kua mulimuli ki a Iehu.

Kua Akoako, Tālaki ma Fakamālōlō e Iehu ia Tagata

²³ Kua fano ia Iehu ki nā koga uma o Kalilaia oi akoako ki tagata i loto o nā hūnako, ma tālaki atu te Tala Lelei e uiga ki te Mālō o te Atua, ma fakamālōlō nā tino e maua i nā itūkāigā tauale kehekehe.

²⁴ Kua halalau te tala e uiga ki a Iehu ki nā itū uma o te fenua ko Hulia, ma na ōmamai ai ia tagata ma kaumai ki a te ia nā tino e maua i nā itūkāigā tauale kehekehe; nā tino e ulufia e tēmoni, nā tino tauale tete ma nā tino e mate iētahi o lātou itū — kua fakamālōlō uma ki lātou e Iehu.

²⁵ Ma na mulimuli ki a te ia ni kaifenua e tokalahi mai Kalilaia, mai nā Kakai e Hefulu, mai Ieluhalema ma Iutea, vēnā ma te kogāfenua i tētahi itū o te Iolitana.