Mataio 3 - Tokelauan New Testament

Ko te Tālakiga a Ioane te Papatiho

¹ I nā aho iēnā, na fano ai ia Ioane te Papatiho ki te vao o Iutea, kua kāmata oi fai ai tana tālakiga.

² Kua lea vē atu, “Liliu kehe mai autou agahala, auā ko te Mālō o te lagi kua tafapili mai!”

³ Ko Ioane tēnei te na lea ai te pelofeta ko Ihaia vēia: “Ko te leo o he tino e taukalaga i te vao; ‘Hāuni te auala o te Aliki; fakahakohako he auala mo ia ke kui ai!’ ”

⁴ Ko nā kofu o Ioane nae fai i nā fulufulu kāmela; nae fai tona fuhi pakumanu i tona taugātiti, ma ko ana meakai ko te hē akelihe ma te melivao.

⁵ Kua gāholo mai ki a te ia nā tino mai Ieluhalema ma te itūmālō uma o Iutea, vēnā foki ma nā kogāfenua uma e tafapili ki te vaitafe ko te Iolitana.

⁶ Kua tōlaulau atu a lātou agahala, oi papatiho ai ki lātou e ia, i loto o te vaitafe ko te Iolitana.

⁷ Kae i te kitea atuga e Ioane te tokalahi o te kau Falehaio ma te kau Hatukaio kua ōmamai ke papatiho ki lātou e ia, oi lea vē atu ai ki ei, “Koutou fānau a gata — ko ai te na lea atu e mafai koutou ke hao i te fakahalaga a te Atua kua tali pa mai?

⁸ Fai nā mea ke iloa ai ko koutou kua halamō i autou agahala.

⁹ Ma ia koutou lele nahe kāmata oi lea vē tētahi ki tētahi, ‘ko Apelaamo he tupuna e o ki mātou’; auā e lea atu au ki a te koutou, e mafai e te Atua oi fakaliu tino nā fatu iēnei ke fai ma lāpuna o Apelaamo.

¹⁰ I te taimi foki lava tēnei, ko te toki kua hāuni ke ta ki lalo nā lākau i nā aka; ko nā lākau uma e hē fua mai ai ni fua lelei, e ta ki lalo oi togi ki te afi.

¹¹ E kō papatihoa koutou i te vai ke iloa ai ko koutou kua halamō, kae ko tē e mulimuli mai ia te au, e hilihili kehe atu tona mamalu i lo au, ma e hē aogā au ke kō taukaveagia ona hēvae. Ka ia papatihoa koutou i te Agaga Paia ma te afi.

¹² Kua i tona lima tana huō tuihaito ke lūlū kehe ai nā atigi haito, ma fakaputu nā fuāhaito ki loto o tona falehaito; kae ka huhunu e ia nā atigi haito i te afi e hē mafai ke mate.”

Ko te Papatihoga o Iehu

¹³ Ko te taimi tēnā na pa ifo ai ia Iehu mai Kalilaia, ma na fano ai ki te vaitafe ko te Iolitana ke papatiho ia e Ioane.

¹⁴ Kae kua taumafai ia Ioane ke teteke ki ei, ma na lea vē atu ai ki a Iehu, “Ko au te tatau ke papatiho e koe, kae ko koe kua hau ke papatiho koe e au!”

¹⁵ Kae kua tali mai ia Iehu, “Fai vēia ko mo te taimi nei, kae ke fakatino ai nā mea uma kua finagalo ki ei te Atua.” Oi malie ai ki ei ia Ioane.

¹⁶ Na uma loa te papatiho o Iehu, oi fanake loa ki luga mai te vai. I te taimi lava tēnā na māvā ai te lagi, ma na ia kitea atu te Agaga o te Atua kua fanaifo ki lalo e vē he lupe, ma tū ki ona luga;

¹⁷ ma he leo e fanaifo mai te lagi e lea vē, “Ko toku Ataliki pele tēnei e fiafia lahi au ki ei.”