Mataio 28 - Tokelauan New Testament

Ko te Toetū o Iehu

¹ Kua teka te Hāpati ma kua tafa ia ata o te aho Hā, oi olo ai ia Malia te Makatala ma tētahi Malia, oi kikila ki te tugamau.

² Kae teki lava kua to te mafuie lahi; kua fanaifo he agelu a te Aliki mai te lagi, kua fēke kehe te fatupae ma nofo ai i luga.

³ Ko ona fōliga e huhulu e vē ko te napa a te uila, ma ona kofu e paepae e vē ko te kiona.

⁴ Kua tetete nā fitafita i te mātataku, ma kua vē ai ni tino kua oti.

⁵ Oi lea atu ai te agelu ki nā fafine, “Koulua nahe mātataku. E iloa e au ko Iehu tēia na fakahātaulo, ta koulua e hakili.

⁶ Kua hē i kinei; kua toe tū mai i te oti e vē lava ko te mea na lea ai ia. Ōmamai oi kikila ki te mea nae tuku ai tona tino.

⁷ Olo vave loa nei oi taku ki ona hoko, ‘Kua toe tū mai ia i te oti, ma ko ia e muamua atu ia te koutou ki Kalilaia; ka koutou kitea ia i kinā.’ Koulua e hē puli i te mea kua lea atu ai au ki a te koulua.”

⁸ Oi olo kehe vave ai loa ki lāua mai te tugamau ma te mātataku, kae na fakatumulia foki ki lāua i te fiafia lahi, ma kua fētutuli oi taku ki ona hoko.

⁹ Kae nā lava e teki kua fetaui ki lāua ma Iehu, oi vāgana atu ai ia Iehu, “Ke ia te koulua te fīlēmū.” Oi olo ai ki lāua ki a Iehu, kua paki ki ona vae ma ifo atu ki a te ia.

¹⁰ Kua vāgana atu ia Iehu, “Koulua nahe mātataku. Olo oi lea ki oku uho ke olo ki Kalilaia, ma ka ki lātou kitea au i kinā.”

Ko te Līpoti a nā Fitafita na Leoleoa te Tugamau

¹¹ Kua olo kehe nā fafine, ka ko iētahi o nā fitafita nae leoleoa te tugamau, kua olo ki te kakai oi taku ki nā ohitāulaga hili nā mea uma na tutupu.

¹² Oi fono ai nā ohitāulaga hili ma te kau toeaina ma taupulepule ai ki te lātou mea ka fai; kua fōki e ki lātou te tupe lahi ki nā fitafita

¹³ ma lea vēnei ki ei, “Lea ki nā tino, ‘Ko nā hoko o ia na ōmai i te pō oi kaihohoa tona tino, ka koi momoe ki mātou.’

¹⁴ Ma kāfai e iloa e Pilato te mea kua tupu, e ki mātou mafaia oi fakamalie ki ei, ma e hēai lele he mea e tatau ke popole ai koutou.”

¹⁵ Kua kave e nā fitafita te tupe, ma na ki lātou faia lava e vē oi fakatonu ai ki lātou. Ma ko tēnā te tala kua fakahalalau ki tagata Iutaia, ke pa mai lava ki te aho tēnei.

Kua Fakailoa ia Iehu ki ona Hoko

¹⁶ Kua olo nā hoko e toka hefulutahi ki te mauga i Kalilaia, ki te mea na poloaki ai ia Iehu ke olo ki ei.

¹⁷ I te ki lātou kiteaga o Iehu, oi ifo atu ai ki lātou ki ei, e ui lava nae i ei nā tino o ki lātou nae māhalohalo.

¹⁸ Kua hōhō atu ia Iehu ki o lātou tafa, oi vāgana atu ai ki ei, “Ko te pule kātoa i te lagi ma te lalolagi, kua tuku mai ki a te au.

¹⁹ Olo la oi fai ia tagata o mālō uma o te lalolagi ma oku hoko: papatiho atu ki a te ki lātou i te igoa o te Tamana, te Ataliki ma te Agaga Paia,

²⁰ ma akoako ki a te ki lātou ke mulimuli ki nā mea kua kō fakatonua ai koutou. Ma ko au ka fakatahi pea lava ma koutou, ke pa lava ki te gataaga o te ōlaga.”