Mataio 27 - Tokelauan New Testament

Kua Tukulima atu ia Iehu ki a Pilato ke Fakamahino

¹ I te taeaopō o te aho na hohoko ai, na fai ai te tonu a nā ohitāulaga hili ma te kau toeaina uma, ke tāmate ia Iehu.

² Oi fakatonu ai e ki lātou ke noanoa ia Iehu ma takitaki kehe mai kinā, ma tukulima atu ki a Pilato te kōvana Loma, ke fakamahino e ia.

Ko te Mate o Iuta

³ Kua iloa e Iuta te fakalata ko Iehu kua fakahala, oi lagona ai e ia tona halamō lahi, ma fano ai kua toe fakafoki nā tupe hiliva e toluhefulu ki nā ohitāulaga hili ma te kau toeaina.

⁴ Kua lea vē atu ia Iuta, “Ko au kua agahala ona kua kō fakalatagia he tino e hēai hana agahala, ma ka oti tauanoa ai ia.” Kua tali mai ki lātou, “E hēai lele he mātou fekau ki ei. Faitalia lava koe ma te mea tēnā.”

⁵ Kua togi e Iuta nā tupe hiliva ki lalo i loto o te Mālumalu, oi fano kehe ai; kua fano oi hihi lava ia.

⁶ Kua fakaputuputu e nā ohitāulaga hili nā tupe hiliva ma lea vē, “Ko te tupe tēnei o te fakamaligi toto ma e fakahā i te Tūlāfono ke tuku ki nā fakaputuga tupe o te Mālumalu.”

⁷ I te umaga o te lātou talanoaga, na maua ai te lātou tonu ke fakaaogā te tupe ke fakatau ai te fenua o te tino gaohi ipu ōmea, ke fai ma fenua tanu o tagata nukukehe.

⁸ Ko te mea ia na fakaigoa ai te kelekele tēnā ko te “Fenua o te Toto” ke pa mai lava ki nā aho nei.

⁹ Oi na taunuku ai te kupu a te pelofeta ko Ielemia na lea ai vē, “Na kave e ki lātou nā tupe hiliva e tolu hefulu, te tau o tē na fuafua tona tau i te māliliega a iētahi o tagata o Ihalaelu,

¹⁰ kua fakatau ai te fenua o te tino gaohi ipu ōmea, e vē ona fakatonu mai ai au, e te Aliki.”

Kua Fehiligia ia Iehu e Pilato

¹¹ Kua kave ia Iehu ki mua o te kōvana, ma kua fehili atu te kōvana ki ei, “Ko koe moni ko te tupu o tagata Iutaia?” Kua tali mai ia Iehu, “Ko koe tēnā e lea ai.”

¹² Kae i te mōliaga o ia e nā ohitāulaga hili ma te kau toeaina, e hēki tali lele ki ei.

¹³ Oi lea atu ai ia Pilato ki a te ia, “E kē lagona atu pe fia ia mea kua mōlia ai koe e ki lātou?”

¹⁴ Kae kua hē fofou ia Iehu ke tali ki ei i he kupu e fokotahi, ma na kavea tēnā ma mea na ofo lahi lele ai te kōvana.

Kua Fakahala ia Iehu i te Oti

¹⁵ E i ei te faiga nae māhani ai lava te kōvana Loma i te taimi o te Kaiga Fakamanatu o te Pāheka, e tatala e ia ho he pagotā e fokotahi, e fofou te kaifenua ke ia fakahaolotoa.

¹⁶ I te taimi tēnā, nae i ei he pagotā lauiloa e igoa ki a Palapa.

¹⁷ Kua maopoopo mai te kaifenua, oi fehili atu ai ki ei ia Pilato, “Ko ai te fofou koutou ke kō tatala fakahaolotoa mo koutou? Ko Palapa pe ko Iehu, tē e takua ko te Mehia?”

¹⁸ Auā kua ia iloa lelei lava ko te lotokino o nā takitaki o tagata Iutaia, na ki lātou kavakea ai ia Iehu ki a te ia.

¹⁹ Ka koi nofo ia Pilato ma māfaufau ki hana fakaikuga, kae kaumai ki ei te faifekau mai tana āvaga: “Nahe i ei lele hau mea e fai ki te tino tēnā e hēai hana agahala, auā ko au na puapuagā lele i taku miti na fai i te pō, e uiga ki a te ia.”

²⁰ Kua tauanau e nā ohitāulaga hili ma te kau toeaina te kaifenua, ke lea ki a Pilato ke tatala ake ia Palapa, kae ke tāmate ia Iehu.

²¹ Kua fehili atu ia Pilato ki te kaifenua, “Ko ai o te toka lua tēnei e fofou koutou ke kō tatala atua mo koutou?” Kua tali mai ki lātou, “Ko Palapa,”

²² “Ko he ā la te tatau ke kō faia ki a Iehu, tēia e takua ko te Mehia?” kua fehili vēnā atu ia Pilato. Kua tali mai ki lātou, “Fakahātaulo te tino tēnā!”

²³ Kae kua fehili atu ia Pilato, “Aiheā, ko he holitūlāfono ā ta ia kua fai?” Oi kāmata ai taukalalaga leo lahi ki lātou: “Fakahātaulo te tino tēnā!”

²⁴ I te kiteaga e Pilato kua hē aogā ke fakaauau pea, ona ko tagata kua tau hē mafai ke tāofiofi, oi tago ai ki nā vai kua fafano ai ona lima i mua o te kaifenua ma lea vē atu, “E mamā au ma te toto o te tagata tēnei! E a koutou lava te mea tēnei!”

²⁵ Kua tali uma mai te kaifenua, “Ke i luga o ki mātou ma a mātou fānau, te toto o te tagata tēnā!”

²⁶ Oi tatala fakahaoloto ai e Pilato ia Palapa ki a te ki lātou; kae kua fakatonu e ia ke kini ia Iehu, ma tuku atu ai loa ke fakahātaulo.

Kua Fakatauemu nā Fitafita ki a Iehu

²⁷ Oi kave ai ia Iehu e nā fitafita a te kōvana ki loto o te fale o te kōvana, ma kua fakapotopoto uma te vāega tēnā o nā fitafita fakatāmilo ia Iehu.

²⁸ Kua tatala kehe e ki lātou ona kofu, oi fakakofu ai i he kofu tatao lanu kukula mālohi.

²⁹ Oi fai e ki lātou he pale i nā lālā o he lākau tālatala, kua fakapale ai tona ulu. Kua tuku e ki lātou ki tona lima taumatau he mealākau; oi tōtutuli ai i mua o ia ma fakatauemu ki ei. Kua lea vē ki lātou, “Ke manuia te Tupu o tagata Iutaia”

³⁰ Oi tūfeanu ai ki lātou ki a te ia ma ta tona ulu i he mealākau.

³¹ Kua uma te fai o a lātou mea fakatauemu ki a Iehu, oi toe ui kehe ai e ki lātou te kofu tatao na ki lātou fakakofua ai, kae toe fakakofu lava i ona kofu. Oi takitaki ai e ki lātou ki fafo ke fakahātaulo.

Kua Fakahātaulo ia Iehu

³² Ka koi ōatu ki lātou ki fafo o te kakai, kae fetaui ma he tamāloa mai Kulene, ko Himona tona igoa. Oi fakamālohia ai e nā fitafita ia Himona, ke amo e ia te hātaulo o Iehu.

³³ Kua pa atu ki lātou ki te koga e takua ko Kolokota, ko te uiga o te igoa tēnei ko te, “Ulupoko.”

³⁴ I kinā na tuku atu ai e ki lātou ki a Iehu he uaina kua palu ki ei he mea kokona; kae na tofo oi oti ki ei, kae e hēki inu ki ei.

³⁵ Kua fakahātaulo e ki lātou ia Iehu, oi fai ai te lātou vili ke iloa ai te mea kofu o Iehu e maua e te tino.

³⁶ Kua uma te mea tēnā, oi nonofo ai lava i kinā, oi leoleo ia Iehu.

³⁷ I luga ake o tona ulu kua ki lātou tūhia ai te mea na mōlia ai e vēnei, “Ko Iehu tēnei, te Tupu o Tagata Iutaia.”

³⁸ Oi fakahātaulo ai e ki lātou ni tino kaihohoa e toka lua fakatahi ma Iehu, ko tētahi i tona itū taumatau ma tētahi i tona itū tauagavale.

³⁹ Ko nā tino na kui ake i kinā, kua lūlū o lātou ulu ma fai a lātou kupu fakatauemu ki a Iehu.

⁴⁰ Kua lea vē atu ki lātou, “Ko koe tēnā na lea e kē talepea ki lalo te Mālumalu, oi toe fakatū ai i nā aho e tolu? Fakaola lava la koe e koe. Kāfai ko koe ko te Ataliki o te Atua, fanaifo la ki lalo o te hātaulo!”

⁴¹ Kua vēnā foki oi fakatauemu nā ohitāulaga hili, nā faiakoga o te Tūlāfono ma te kau toeaina ki a Iehu ma lea vē,

⁴² “Na fakaola e ia iētahi tino, ka ko tē e hē ia mafaia oi fakaola ia ia lava! E hē ko ia nei ko te Tupu o Ihalaelu? Kāfai e ia mafaia oi fanaifo ki lalo o te hātaulo, oi fātoā talitonu ai ki tātou ki ei.

⁴³ E talitonu ki te Atua ma lea ko ia ko te Ataliki o te Atua. Tātou kikila la pe i na fofou te Atua ke fakaola ki a te ia i te taimi nei!”

⁴⁴ E pa foki lava kinā tino kaihohoa na fakahātaulo fakatahi ma Iehu, na fakatauemu foki vēnā ki a te ia.

Ko te Mate o Iehu

⁴⁵ Kua ta te itūlā e hefululua i te aoauli, oi pōulitia uma ai te lau fenua kātoa ke pa ki te tolu i te afiafi.

⁴⁶ I te tolu i te afiafi, na kalaga leo lahi ai ia Iehu, “Eli, Eli, lama hapatani?” ko tona uiga, “Toku Atua, toku Atua, he ā te kua kē tuku tiakia ai au?”

⁴⁷ Ko iētahi tino nae i kinā, na ki lātou lagona atu ana kupu na kalaga ai ma kua lea vē, “Ko te tagata nei e taukalaga ki a Elia!”

⁴⁸ I te taimi lava tēnā, na vili atu ai hētahi o ki lātou ma he oma kua uma te lolō ki he uaina taugōfie; kua tuku e ia ki te pito o he mealākau, ma hiki ake ke fakainu ai ia Iehu.

⁴⁹ Ka ko iētahi tino kua lea vē, “Fakatali! Tātou kikila pe i na hau ia Elia oi fakaola ia!”

⁵⁰ Oi toe kalaga leo lahi ai ia Iehu, ma to ai loa tana mānava.

⁵¹ Oi haelua ai te kie pupuni i loto o te Mālumalu, mai luga ke pa ki lalo. Kua lūlū foki te kelekele ma māvaevae nā papa,

⁵² kua mātalatala ia gutu o tugamau, ma e tokalahi ia tagata o te Atua na feoti, kae kua toe fakatutū ki te ola.

⁵³ Kua olo kehe mai o lātou tugamau, ma i te toe tū maiga o Iehu mai te oti, na olo ai ki te Kakai Paia, ma na kitea ki lātou e te tokalahi o tagata i kinā.

⁵⁴ I te kiteaga e te takitakikau o te toka helau fakatahi ma nā fitafita nae ki lātou leoleoa ia Iehu, te mafuie ma iētahi mea na tutupu, oi na ofo lele ai ki lātou ma lea vē, “E hako lava, ko ia tēnei ko te Ataliki o te Atua.”

⁵⁵ E tokalahi nā fafine nae mulimuli ki a Iehu mai Kalilaia ma fehoahoani ki ei, nae i kinā ma nae taukikila mamao atu.

⁵⁶ Ko iētahi o ki lātou iēnei, ko Malia te Makatala, ko Malia te mātua o Iakopo ma Iohefa, ma te āvaga a Hepetaio.

Ko te Tanuga o Iehu

⁵⁷ Kua pa ki te afiafipō, oi taunuku ifo ai he tamāloa maukoloa mai Alimatea; ko Iohefa tona igoa, ma ko hētahi foki ia o hoko o Iehu.

⁵⁸ Kua fano ki a Pilato ke tuku ake te tino o Iehu ke kave e ia. Oi fakatonu ai e Pilato ke fōki te tino o Iehu ki a Iohefa.

⁵⁹ Oi kave ai e Iohefa te tino o Iehu, kua āfīfī i he kie vavae mamā,

⁶⁰ ma tuku ki loto o te tugamau na fātoā uma te keli ki loto o he itū-mauga papa mo ia lava, ma ko hēki fakaaogā lele. Oi fuli ai e ia he fatupae lahi, kua pupuni ai te gutu o te tugamau, oi fano kehe ai loa.

⁶¹ Ko Malia te Makatala, ma tētahi Malia, nae nonofo i kinā fakahagahaga ki te tugamau.

Kua Leoleo te Tugamau e nā Fitafita

⁶² I te aho alafaki, ko te Hāpati tēnā, na olo ai nā ohitāulaga hili ma te kau Falehaio ki a Pilato

⁶³ ma lea vē ki ei, “Te kōvana, e ki mātou manatua ka koi ola tēnā tino talapepelo, na fai tana kupu vēia, ‘Ko au ka toe fakatū mai i te oti, kāfai e teka nā aho e tolu.’

⁶⁴ Fakatonu ko ke leoleo fakalelei tona tugamau ke pa ki te tolu o aho, kae ke hē mafai ai e nā hoko o ia oi kaihohoa tona tino, ma lea ai ki tagata, ko Iehu kua toe fakatū mai i te oti. Ko te talapepelo mulimuli tēnei, ka hili atu lele te kino, i lo te talapepelo muamua.”

⁶⁵ Oi lea atu ai ia Pilato ki a te ki lātou, “Kave ni fitafita ma olo oi fai te mea e koutou iloa, e malu lelei ai te puipuiga o te tugamau.”

⁶⁶ Oi olo ai loa kua fakamau lelei te fatu e tapuni ai te tugamau ma fakapipiki ki ei te fakailoga e fakahā ai he tino e tago ki ei, ma tuku ai nā fitafita ke leoleoa.