Mataio 26 - Tokelauan New Testament

Ko nā Taupulepulega ke Tāmate ia Iehu

¹ Kua uma te akoako atu e Iehu o nā mea uma iēnei, oi vāgana atu ai ki ona hoko,

² “E vē ona koutou iloa, toe lua ia aho oi pa ki te Kaiga Fakamanatu o te Pāheka, ma ko te Ataliki o te Tagata ka tuku atu ke fakahātaulo.”

³ Oi fakapotopoto ai te kau ohitāulaga hili ma te kau toeaina ki te fale o Kaiafa te Ulu Ohitāulaga,

⁴ ma taupulepule ke puke munimuni ia Iehu ma tāmate.

⁵ Kua lea vē ki lātou, “E hē tatau ke fai e tātou te mea tēnei i te taimi o te Pāheka, auā e i na ka fakatupu ai he vevehi lahi o tagata.”

Kua Fakauku ia Iehu i Petania

⁶ Ko Iehu nae i Petania i te fale o Himona, he tamāloa nae maua i he tauale kino o te kili.

⁷ E kai ia Iehu kae hau ki a te ia he fafine ma he fagu e gaohia i te alapaha e tumu i nā lolo manogi taugatā, oi liligi ki tona ulu.

⁸ Kua kitea atu e te kau hoko te mea tēnei, oi na feita lele ai ma lea vē atu ki te fafine, “He ā te kua fakamāumau ai?

⁹ Ko nā lolo manogi na tatau ke fakatau ke maua mai ai he tupe lahi, ma kave ai te tupe ma nā tino mātitiva!”

¹⁰ Kae kua hāfia e Iehu te mea e lea ai ki lātou, oi vāgana atu ai ki ei, “He ā te fakalavelave ai koutou ki te fafine tēnei? Ko he mea e gali ma manaia te kua fai e ia mo au.

¹¹ Ka i ei pea lava nā tino mātitiva ma koutou, kae ka hē i ei pea lava au ma koutou.

¹² Kua liligi e ia te lolo manogi tēnei ki luga o toku tino ke hāuni ai mo toku tanuga.

¹³ E takutino atu e au ki a te koutou, ho he mea lava e tālaki ai te tala lelei tēnei i te lalolagi kātoa, ko te mea na fai e te fafine, ka fakailoa ki tagata ke manatua ai pea lava ia.”

Kua Malie ia Iuta ke Fakalata e ia ia Iehu

¹⁴ Oi fano ai tētahi o te kau hoko e toka hefululua — ko Iuta Ihikaliota tona igoa, ki nā ohitāulaga hili,

¹⁵ ma fehili vē atu ki ei, “He ā te koutou fōki maia kāfai e kō tukulima atua ki a te koutou ia Iehu?” Oi totogi ai e ki lātou ia Iuta i nā tupe hiliva e toluhefulu.

¹⁶ Oi na kāmata mai ai lava i te taimi tēnā te tautuku e Iuta o he avanoa, ke ia tukulima atua ai ia Iehu ki a te ki lātou.

Kua Kakai fakatahi ia Iehu ma ona Hoko i te Kaiga Fakamanatu o te Pāheka

¹⁷ I te aho muamua o te Kaiga Fakamanatu o te Falaoa Hē Fakafefetea, na ōmamai ai te kau hoko ki a Iehu ma lea vē atu ki ei, “Ko fea te fofou koe ke hāuni ai e ki mātou te kaiga o te Pāheka mo koe?”

¹⁸ Kua lea atu ia Iehu ki a te ki lātou, “Olo ki he tamāloa i te kakai ma lea vē ki ei: ‘Lea mai te Faiakoga, Ko toku taimi kua pa mai; ko oku hoko ma au ka oatu mo te Kaiga Fakamanatu o te Pāheka i tō fale.’ ”

¹⁹ Oi fai ai e nā hoko e vē ona fakatonu ai ki lātou e Iehu, ma na ki lātou hāunia ai loa te kaiga o te Pāheka.

²⁰ Kua pa ki te pō, oi nonofo ai ki lalo ia Iehu ma ona hoko ke kakai.

²¹ Ka koi fai te lātou kaiga, kae lea atu ia Iehu, “E takutino atu e au ki a te koutou te meamoni, e i ei te tino o koutou ka ia fakalatagia au.”

²² Na lagona e te kau hoko te fakanoanoa lahi, ma kāmata ai oi fehilihili tau tokatahi atu ki lātou ki a Iehu, “Te Aliki, e hē ko au ni, te lea ai koe?”

²³ Kua tali mai ia Iehu, “Ko te tino e lolō tana falaoa ki loto o te ipu fakatahi ma au, ko ia tēnā te ka ia fakalatagia au.

²⁴ Ko te Ataliki o te Tagata e oti lava e vē oi lea mai ai nā Tuhituhiga Paia, kae hāloa la te tino e ia fakalatagia te Ataliki o te Tagata. Na hili lele atu mo te tino tēnā, anei ake e hēki fānau mai ki te lalolagi”

²⁵ Oi lea atu ai ia Iuta, tē ka ia fakalatagia ia Iehu, “Te Faiakoga, e hē ko au ni, te lea ai koe?” Ka kua tali atu ia Iehu, “Ko tēnā lava e lea ai koe.”

Ko te Kaiga a te Aliki

²⁶ Ka koi kakai ki lātou, oi tago ai ia Iehu ki te falaoa, kua fakafetai ki te Atua, oi tavaevae ai ma fōki ki ona hoko ma vāgana atu ki ei, “Puke mai ma kakai ki ei. Ko toku tino tēnei.”

²⁷ Oi tago ai ki te ipu, kua fakafetai ki te Atua oi fōki ai ki a te ki lātou ma vāgana vē atu, “Feinu ki ei koutou uma,

²⁸ ko toku toto tēnei e fakamau fakailoga ai te feagaiga a te Atua, ka fakamaligi mo nā tino e tokalahi, ke fakamāgalo ai a lātou agahala.

²⁹ E lea atu au ki a te koutou, ka hē toe inu lele au ki te uaina tēnei, heiloga kua pa ki te aho e inu ai au i te uaina fou fakatahi ma koutou, i te Mālō o toku Tamana.”

³⁰ Kua uma te uhu o te lātou pehe e viviki ake ai ki te Atua, oi olo ai ki te Mauga o Ōlive.

Kua Vavalo e Iehu te Fakafiti a Petelu

³¹ Kua vāgana atu ia Iehu ki a te ki lātou, “Ko te pō lava tēnei ka hōhola kehe uma ai koutou kae tīaki au, auā e lea mai te tuhituhiga paia, ‘Ka tāmate e te Atua te leoleomāmoe, ma ko te lafu māmoe ka takape.’

³² Kae kāfai e uma te fakataunukuga o toku toetū mai te oti, ko au ka fano muamua ia te koutou, ki Kalilaia.”

³³ Kua lea atu ia Petelu ki a Iehu, “E hē kō tiakia lele koe, e tuha lava pe hōhola kehe uma tētahi vāega!”

³⁴ Oi lea atu ai ia Iehu ki a Petelu, “E takutino atu e au ki a te koe te meamoni, ka ko hēki vivini ia moa i te pō nei, ka kua fakafiti fakatolu koe, e hē kē iloa au.”

³⁵ Kua tali mai ia Petelu, “E hē mafai au ke lea vēnā, e tuha lava pe kāfai e oti ai au fakatahi ma koe.” Ma kua lea vēnā foki iētahi o te kau hoko.

Kua Tatalo ia Iehu i Ketehemane

³⁶ Oi olo ai ia Iehu ma ona hoko ki he koga e igoa ko Ketehemane, ma na vāgana atu ai ia Iehu ki a te ki lātou, “Nonofo i kinei ke hōhō atu au ki ko oi tatalo ai.”

³⁷ Kua kave e ia ia Petelu ma nā ataliki e toka lua o Hepetaio, ma na lagona e ia te fakanoanoa lahi ma te fakaatu.

³⁸ Oi lea atu ai ki a te ki lātou, “Ko au e vē he tino ka oti, i te fakanoanoa lahi o toku loto. Nonofo i kinei ma tautuku fakatahi ma au, nā he tino e hau.”

³⁹ Kua hēleka mālie atu ia Iehu ki mua, oi fakapakū fakapūlou ai ki te kelekele ma tatalo vē, “Toku Tamana, kāfai e mafai, kave kehe ko te ipu o puapuagā mai ia te au. Kae nahe faia toku loto kae fai tō finagalo.”

⁴⁰ Oi toe foki ai ia Iehu ki ona hoko e toka tolu, ma na ia maua atu e momoe. Oi lea atu ai ki a Petelu, “Oi, e hē koutou lavā lele oi tautuku fakatahi ma au mo he itūlā lava e fokotahi?

⁴¹ Tautuku lelei ma tatalo ke nahe maua koutou i ni fakaohoohoga; ko te loto e fofou ki ei, ka ko te tino e vāivai.”

⁴² Kua toe fano kehe ia Iehu ma tatalo vē, “Toku Tamana, kāfai tēnei ipu o puapuagā e hē mafai ke kave kehea heiloga ke inu au ki ei, e fai lava tō finagalo.”

⁴³ Kua toe liliu ia Iehu ki ona hoko ma na ia maua atu e momoe; kua hē mafai lava ke pupula o lātou mata i te fia momoea.

⁴⁴ Oi toe tukua ai foki e ia ki lātou kae fano oi tatalo, ma ko te fakatolu tēnei o taimi na tatalo ai, ma na fakaaogā e ia nā kupu lava na tatalo ai muamua.

⁴⁵ Oi toe liliu ai ia Iehu ki ona hoko ma lea vē atu ki ei, “Ko koutou koi momoe lava ma mālōlō? Kikila, kua pa mai te itūlā e tukulima atu ai te Ataliki o te Tagata ki te pule a tagata agahala.

⁴⁶ Tutū mai loa ki luga keina tātou olo. Kikila atu, kua i kinei te tino e ia fakalatagia au!”

Kua Puke Fakapagotā ia Iehu

⁴⁷ Ka koi tautala ia Iehu, kae pa mai ia Iuta, tētahi o te kau hoko e toka hefululua. Na ōmamai fakatahi ma he kaifenua o tagata e tokalahi ma nā pelu ma nā pōvai, na uga mai e te kau ohitāulaga hili ma te kau toeaina.

⁴⁸ Oi fakatonu ai e te tino ka ia fakalatagia ia Iehu nā tino, kua lea vē atu ki a te ki lātou, “Ko te tino e hogi au ki ei ko ia tēnā e puke e koutou.”

⁴⁹ Oi havali hako atu ai loa ia Iuta ki a Iehu ma lea vē atu ki ei, “Mālō ni te Faiakoga!” ma hogi atu ki ei.

⁵⁰ Kua tali mai ia Iehu, “Te uho, fai loa te mea na hau ai koe!” Oi ōmamai ai kua puke e ki lātou ia Iehu.

⁵¹ Kua heki ake te pelu a hētahi nae fakatahi ma Iehu, ma ta ai e ia hētahi o kaukauna a te Ulu Ohitāulaga, ma motu ai te taliga.

⁵² Oi vāgana atu ai ia Iehu ki ei, “Tuku tau pelu ki tona huluga; auā ko ki lātou uma e tago ki te pelu, ka feoti foki i te pelu.

⁵³ E vēake koe e hē kō mafaia oi kalaga ki toku Tamana ki he fehoahoani, ma uga vave mai ai e ia ni lēkeona agelu e hili atu i te hefululua?

⁵⁴ Kae kāfai ia au ka kalaga, oi vēhea ai ona fakataunuku te kupu i nā Tuhituhiga Paia, e lea mai ko te mea tēnei e tatau ke tutupu?”

⁵⁵ Oi vāgana atu ai ia Iehu ki te kaifenua, “Ko au nei he tino kaihohoa kua ōmamai ai koutou ma nā pelu ma nā pōvai oi puke au? I aho uma ko au e nofo i loto o te Mālumalu ma akoako atu ki tagata, kae e hēki koutou pukea au i kinā.

⁵⁶ Kae ko nā mea uma iēnei kua tutupu, kae ke taunuku ai nā mea nā tūhia e te kau pelofeta i loto o nā Tuhituhiga Paia.” Oi tīaki ai ia Iehu e te kau hoko uma, kae fētutuli kehe.

Kua kave ia Iehu ki Mua o te Taupulega

⁵⁷ Kua takitaki ia Iehu e nā tino na ki lātou pukeagia ki te fale o Kaiafa te Ulu Ohitāulaga. Ko kinā kua fakapotopoto ai nā faiakoga o te Tūlāfono ma te kau toeaina.

⁵⁸ Ka ko Petelu kua taumulimuli mamao atu i tua ke pa lava ki te lōtoā o te fale o te Ulu Ohitāulaga. Kua fano ki loto o te lōtoā ma nofo ki lalo i te mea e i ei ai nā leoleo o te Mālumalu, kae ke ia kitea pe ko he ā te ka pa ki ei.

⁵⁹ Oi taumafai ai nā ohitāulaga hili ma te Taupulega kātoa, ke hakili ni molimau pepelo ke mōlia ai ia Iehu, kae ke ki lātou mafaia ai oi tāmate;

⁶⁰ kae e hēki ki lātou maua he mea, e ui lava e tokalahi nā tino na ōmamai oi fai a lātou fakamatalaga pepelo. Mulimuli ake, kua ōmamai nā tamāloa e toka lua

⁶¹ ma lea vē atu, “Ko te tagata tēnei na lea vēia, ‘E kō mafaia oi talepe ki lalo te Mālumalu o te Atua ma toe fakatū ki luga, kāfai e teka nā aho e tolu.’ ”

⁶² Oi tū ai ki luga te Ulu Ohitāulaga ma fehili vē atu ki a Iehu, “E hēai lele hau tali e fai? E hē kē lagona atu te mōliga kua fai e uiga ki a te koe?”

⁶³ Kae ko Iehu kua hē kīkī lele. Oi toe fehili atu ai ki ei te Ulu Ohitāulaga, “Ko au e lea atu nei ki a te koe i te igoa o te Atua ola, taku mai ki a te ki mātou te meamoni: ko koe moni ko te Mehia, te Ataliki o te Atua?”

⁶⁴ Kua tali mai ia Iehu, “Ko tēnā lava e lea ai koe. Kae ko au e lea atu ki a te koutou uma, e kāmata atu nei ka koutou kitea te Ataliki o te Tagata e nofo i te itū taumatau o te Hilihilikehe, ma e hau i luga o nā ao o te lagi.”

⁶⁵ Oi hae ai e te Ulu Ohitāulaga ona kofu ma lea vē atu ki te Taupulega, “Ko te tino tēnei kua fāifāi ki te Atua. He ā te toe fofou ai ki tātou ki ni molimau? Kua fakalogo uma koutou ki ana kupu fāifāi ki te Atua.

⁶⁶ He ā he koutou manatu?” Kua tali mai ki lātou, “Ko te tino tēnā kua tatau ke tāmate.”

⁶⁷ Oi tūfeanu ai ki lātou ki ona mata ma kini i o lātou lima; ma ko nā tino nae ki lātou kinia

⁶⁸ kua lea vē, “Ko koe e lea ko koe ko te Mehia? Mate mai ake la pe na hei tukia koe?”

Kua Fakafiti ia Petelu e Hē ia iloa ia Iehu

⁶⁹ E nofo ia Petelu i fafo i te lōtoā kae hau he kaukauna fafine a te Ulu Ohitāulaga kua lea vē mai ki ei, “Ko koe foki tētahi tino nae i ei fakatahi ma Iehu te tino Kalilaia.”

⁷⁰ Kae kua fakafiti ia Petelu i mua o tagata, kua lea vē atu, “E hē kō iloa te mea e lea ai koe!”

⁷¹ Oi fano ai ia Petelu ki te faitotoka o te lōtoā, kae hau tētahi kaukauna fafine ma kua ia kitea ia Petelu, oi lea vē ai kinā tino nae tutū i kinā, “Ko te tino tēia nae fakatahi ma Iehu te Nahaleta.”

⁷² Ma na toe fakafiti foki ia Petelu ma tali vē atu, “E hē kō iloa te tino tēnā.”

⁷³ I he taimi mulimuli ake, oi ōmamai ai nā tino nae tutū i kinā ma lea vē atu ki a Petelu, “E hako lava ko koe ko he tino e o te vāega tēia. E ki mātou matea i tō hikuleo!”

⁷⁴ Oi lea atu ai ia Petelu, “E tautō atu au ko te mea e lea atu ai au e moni! Ke fakahalagia au e te Atua kāfai au e hē tautala i te meamoni. E hē kō iloa te tino tēnā!” Ko te taimi lava tēnā na vivini ai te moa,

⁷⁵ ma na manatua ai loa e Petelu te kupu a Iehu na fai ake ki a te ia, “Ka ko hēki vivini te moa, ka kua fakafiti fakatolu koe e hē kē iloa au.” Oi fano ai ki fafo, kua tagi aueuē ai.