Mataio 25 - Tokelauan New Testament

Ko te Talafakatuha o nā Tautiti e toka Hefulu

¹ “I te taimi tēnā, ko te Mālō o te lagi ka fakatuha vēnei. Nae i ei ni tautiti e toka hefulu na kave a lātou lāmepa ma olo ki fafo ke fakafeiloaki ki te tama fakaipoipo.

² E toka lima ki lātou e vālelea ma toka lima e popoto.

³ Ko nā tautiti vālelea kua kave a lātou lāmepa kae kua hē kavea ma ni a lātou huāū fakaleoleo,

⁴ ka ko nā tautiti popoto kua kave a lātou lāmepa ma kave a lātou huāū fakaleoleo.

⁵ Kua tuai mai te tama fakaipoipo, oi kāmata ai oi tulemomoe nā tautiti ma iku ai kua momoe.

⁶ “Kua ta te vaeluaga o te pō kae hau loa te kalaga, ‘Tēnei kua pa mai te tama fakaipoipo. Ōmamai oi feiloaki ki ei!’

⁷ Kua āla ki luga nā tautiti e toka hefulu ma kī ki luga a lātou lāmepa.

⁸ Oi lea atu ai nā tautiti vālelea ki nā tautiti popoto, ‘Kaumai ko ni a mātou huāū, auā a mātou lāmepa ka mamate.’

⁹ ‘E hēai he mea vēnā,’ kua tali atu nā tautiti popoto, ‘E hē lava mo ki mātou ma koutou. Olo ki te fale koloa oi fakatau mai ni autou huāū.’

¹⁰ Oi olo ai nā tautiti vālelea oi fakatau mai a lātou huāū; ma i te taimi tēnā na olo ai, kae taunuku mai loa te tama fakaipoipo. Ko nā tautiti e toka lima nae nofo hāuni, kua olo ma ia ki loto ki te kaiga o te fakaipoipoga ma na tapuni ai loa te faitotoka.

¹¹ “Mulimuli ake oi taunuku mai ai iētahi tautiti ma taukalalaga ki te tama fakaipoipo, ‘Te aliki, Te aliki, oatu ko ki mātou ki loto!’

¹² Kae kua tali mai te tama fakaipoipo, ‘E hēai he mea vēnā, e hē kō iloa koutou.’ ”

¹³ Kua fakauma te tautalaga a Iehu, oi lea vē atu ai, “Koutou la ke mataala, auā e hē koutou iloa te aho pe ko te itūlā.

Ko te Talafakatuha o nā Kaukauna e Toka Tolu

¹⁴ “I te taimi tēnā ko te Mālō o te lagi ka fakatuha vēnei. Nae i ei he tamāloa na hāuni e fano i hana malaga; kua fakamāopoopo mai e ia ana kaukauna ma tuku atu ai e ia ki a te ki lātou, nā meatōtino a ia ke ki lātou kikilagia.

¹⁵ Kua tuku atu e ia ki a te ki lātou tau tokatahi, e fua lava ki te iloa ma te mālamalama o te tino; ki tētahi na tuku atu e ia ki ei te lima tāleni, ki tētahi e lua tāleni, ma tētahi e fokotahi te tāleni. Oi fano ai loa i tana malaga.

¹⁶ Ko te kaukauna na tuku ki ei nā tāleni e lima, kua fano fakavave oi fakagalue te tupe ma toe maua mai ai iētahi tāleni e lima.

¹⁷ Na vēnā foki te mea na fai e te kaukauna na tuku ki ei nā tāleni e lua, ma na toe maua mai ai iētahi tāleni e lua.

¹⁸ Ka ko te kaukauna na tuku ki ei te tāleni e fokotahi, kua fano oi keli te pu i te kelekele ma mumuni ai nā tupe a tona matai.

¹⁹ “Kua teka atu he taimi mataloa, oi toe foki mai ai te matai ma kua fia iloa e ia pe ni a ta ana kaukauna na fai ki ana tupe.

²⁰ Ko te kaukauna na tuku ki ei te lima tāleni, kua hau ki loto ma tuku atu ki tona matai tētahi lima tāleni fakaopoopo. ‘Toku matai, na tuku mai e koe ki a te au nā tāleni e lima. Kikila, iēnei iētahi tāleni e lima.’

²¹ Kua lea atu ki ei tona matai, ‘Mālō ni, te kaukauna lelei ma te fakamāoni, ko koe kua fakamāoni i nā tamā mea. Ka kō tōfia koe ke pule i nā mea e lahi. Ulu mai loa ki loto nei, ta fiafia fakatahi ai!’

²² “Oi hau ai ki loto te kaukauna na tuku ki ei nā tāleni e lua ma lea vē atu ki tona matai, ‘Toku matai, na tuku mai e koe ki a te au nā tāleni e lua. Kikila, iēnei iētahi tāleni e lua na maua i aku taumafaiga.’

²³ Kua lea atu ki ei tona matai, ‘Mālō ni, te kaukauna lelei ma te fakamāoni. Kua fakamāoni koe i te kikilaga o ni mea e hē lahi, ka kō tōfia ai la koe ke pule i nā mea e lahi. Ulu mai loa ki loto nei, ta fiafia fakatahi ai!’

²⁴ “Oi hau ai te kaukauna na tuku ki ei te tāleni e fokotahi ma lea vē atu ki tona matai, ‘Toku matai, na iloa e au ko koe he tino faigatā; e tau e koe ia fua o nā lākau fatoaga i te mea e hēki totōa e koe ki ei ni fatu lākau, ma helehele e koe te mea e hēki lūlūa e koe.

²⁵ Ko au na mataku, oi fano ai au oi mumuni tau tupe i lalo o te kelekele. Kikila, ko te tupe la tēnei a koe.’

²⁶ “Kua lea atu tona matai ki ei, ‘Ko koe he kaukauna kino ma te paiē. Oi e kē iloa ni e kō taua nā fua o nā lākau fatoaga i te mea e hēki kō totōa ai ni fatu lākau, ma kō helehelea te mea e hēki kō lūlūagia?

²⁷ Na tatau lava la ke teu e koe taku tupe i he faletupe, kae ke maua uma ai e au fakatahi ma te ola, kāfai au e toe foki mai.

²⁸ Kave kehe loa nei te tupe mai ia te ia, ma fōki ki te tino e hefulu ana tāleni.

²⁹ Auā ko ho he tino e i ei hana mea, ka toe fakaopoopo ki ei ma ka lahi lele ai ma totoe mo ia; kae ko te tino e hēai hana mea, e pa lava ki te tamā mea a ia, ka kave kehe mai ia te ia.

³⁰ Kae vē la ki te kaukauna kino tēnei — togi ki fafo ki te pōuli; i kinā ka tagi ai ma te katigū o ona nifo.’

Ko te Aho Fakamahino

³¹ “Kāfai te Ataliki o te Tagata e hau i tona mamalu fakatahi ma ana agelu uma, oi ka nofo i tona nofoāliki mamalu,

³² ma ka ōmamai ia tagata o mālō uma ki a te ia. Oi vāevāe ai e ia ki lātou ki ni vāega e lua, e vē lava oi tuku kehekehe e te leoleomāmoe nā māmoe ma nā oti.

³³ Ka tuku e ia nā tino e vē ko nā māmoe ki tona itū taumatau, ma tuku nā tino e vē ko nā oti ki tona itū tauagavale.

³⁴ Oi ka lea atu ai te Tupu ki nā tino i tona itū taumatau, ‘Ōmamai, koutou iēnā kua fakamanuiagia e toku Tamana! Ōmamai oi fai mo koutou te tofi ki te mālō, kua uma te hāunia mo koutou, mai te kāmataga o te lalolagi.

³⁵ Auā, na fia kaia au, oi fafaga ai au e koutou; na fia inua au, oi fakainu ai au e koutou; na fai au ma tagata kehe, oi talia ai au e koutou ki loto o nā fale o koutou,

³⁶ na hē lavalavā au, oi fakakofu ai au e koutou; na tauale au, oi āhi atu ai au e koutou; na falepuipui au, oi oatu ai koutou oi kikila au.’

³⁷ “Oi ka tali vēnei mai nā tino āmiotonu ki ei, ‘Te Aliki, ko anafea nei na ki mātou kitea ai koe e fia kaia, oi fafaga ai koe e ki mātou, pe fia inua, oi kavatu ai e ki mātou he vai inu?

³⁸ Ko anafea te na ki mātou kitea ai ko koe he tagata kehe, oi talia ai koe e ki mātou ki loto o nā fale o ki mātou, pe hē lavalavā, oi fakakofu ai koe?

³⁹ Ko anafea nei foki te na ki mātou kitea ai koe e tauale pe ei loto o te falepuipui, oi oatu ai ki mātou oi āhi koe?’

⁴⁰ Ma ka tali vē atu te Tupu ki ei, ‘E takutino atu e au ki a te koutou: ho he taimi lava na koutou faia ai te mea tēnei ki hētahi o ki lātou nei oku uho e pito hili te fakaalofa, na koutou faia te mea tēnā ki a te au!’

⁴¹ “Oi ka lea vē atu ai ki nā tino i tona itū tauagavale, ‘Olo kehe ma au, koutou nā tino kua fakamālaiagia e te Atua. Olo ki te afi e hē mate kua uma te hāunia mo Hātani ma ana agelu!

⁴² Auā na fiakaia au, kae hēki fafaga au e koutou, na fia inua au, kae hēki fakainua au e koutou;

⁴³ na fai au ma tagata kehe, kae e hēki talia au i loto o nā fale o koutou; na hē lavalavā au, kae hēki fakakofua au e koutou; na tauale ma i loto au o te falepuipui, kae e hēki koutou āhi atua au.’

⁴⁴ “Oi ka tali mai ki lātou ki a te ia, ‘Te Aliki, ko anafea nei te na ki mātou kitea ai koe e fia kaia pe fia inu, pe he tagata kehe, pe hē lavalavā, pe tauale pe i te fale puipui, kae hēki fehoahoani atu ki mātou ki a te koe?’

⁴⁵ Ka tali vē atu te Tupu ki ei, ‘E takutino atu e au ki a te koutou: ho he taimi lava e hēki fehoahoani ai koutou ki hētahi o ki lātou nei e pito hili te fakaalofa, e hēki fehoahoani mai koutou ki a te au.’

⁴⁶ Ko nā tino la iēnei, ka kave ki te fakahalaga e pa ki te fakavavau, ka ko nā tino āmiotonu ka maua e ki lātou te ola e fakavavau.”