Mataio 22 - Tokelauan New Testament

Ko te Talafakatuha o te Kaiga o te Fakaipoipoga

¹ Kua toe fakaaogā foki e Iehu nā talafakatuha e akoako atu ai ki tagata.

² “Ko te Mālō o te lagi e fakatuha vēnei. Nae i ei he tupu na ia hāunia he kaiga o te fakaipoipoga a tona ataliki.

³ Kua uga atu e ia ana kaukauna ke logo te kau valakaulia ke ōmamai ki te kaiga; kae kua hē fia ōmamai ki lātou.

⁴ Oi uga ai iētahi kaukauna ma te faifekau tēnei ki te kau valakaulia: ‘Kua uma te tāpena o taku kaiga, kua tāmate aku povi poa ma nā punuapovi pepeti. Ōmamai la ki te kaiga o te fakaipoipoga kua uma te hāunia.’

⁵ Kae e hēai he tino valakaulia e fakalogo ki ei, ka kua fai lava a lātou fekau māhani: kua fano tētahi ki tona fatoaga, ko tētahi ki te fale e fakatau ai ana koloa,

⁶ ka ko iētahi kua puke e ki lātou nā kaukauna, kua kini ma tāmate.

⁷ Kua ita lahi lele te tupu; oi na uga ai e ia ana fitafita, ma na ki lātou fakaumatia nā tino tāmate tino iēnei, ma huhunu to lātou kakai.

⁸ Oi lea atu ai ki ana kaukauna, ‘Ko te kaiga o te fakaipoipoga kua uma te hāuni, ka ko nā tino na valakaulia, e hē agavaka mo te kaiga.

⁹ Olo loa nei ki nā auala lalahi, ma valakaulia nā tino uma e fetaui koutou, ke ōmamai ki te kaiga.’

¹⁰ Oi olo ai nā kaukauna ki nā auala, ma fakapotopoto mai nā tino uma lele na fetaui ki lātou, nā tino lelei ma nā tino kino; ma na fakatumulia ai e tagata, te fale na fai ai te kaiga.

¹¹ “Kae i te hauga o te tupu ki te mea nae fai ai te kaiga ke kikila ki te kau valakaulia, oi kitea ai e ia he tamāloa e hē faia ni ona kofu lelei mo te fakaipoipoga.

¹² Kua fehili atu te tupu ki ei, ‘Te uho, e vēhea ona hau koe ki loto i kinei kae hēai ni o kofu lelei mo te fakaipoipoga?’ Kae e hēki tali ki ei te tamāloa.

¹³ Oi lea atu ai te tupu ki nā kaukauna, ‘Noanoa ona vae ma ona lima oi togi ai ki fafo ki te pōgihā. I kinā, ka tagi ai ma katigū ona nifo.’ ”

¹⁴ Kua fakauma te tautalaga a Iehu oi lea vē atu ai, “E tokalahi e valakaugia, kae tokaititi e filifilia.”

Ko te Fehili e uiga ki nā Lāfoga e Totogi

¹⁵ Kua olo kehe te kau Falehaio ma kua taupulepule ke māilei ia Iehu i ni fehili e fai ki ei.

¹⁶ Oi uga ai e ki lātou ki a Iehu ni tino o nā hoko o ki lātou fakatahi ma ni tino o te vāega e kau ki a Helota. Kua fehili atu ki lātou iēnei ki a Iehu, “Te Faiakoga, e iloa e ki mātou ko koe e tautala i te meamoni. E akoako e koe te meamoni e uiga ki te finagalo o te Atua mo tagata, ma e hē popole lele koe pe i na vēhea ake ni manatu o tagata, auā e tutuha ia tagata uma ia te koe.

¹⁷ Lea mai ake la pe he ā hō lagona? E fakataga i te tātou Tūlāfono ke totogi nā lāfoga ki a Kaihala pe hēai?”

¹⁸ Kae kua uma te iloa e Iehu a lātou taupulepulega kino, oi lea vē atu ai ki ei, “Ko koutou ni tagata fakagutugutulua! He ā te taulamalama ai koutou ki a te au?

¹⁹ Fakahino mai ake te tupe e totogi ai te lāfoga.” Kua fakahino e ki lātou ki a Iehu he tupe hiliva,

²⁰ oi fehili atu ai ia Iehu ki a te ki lātou, “E o ai te ata ma te igoa e tuhi ai?”

²¹ Kua tali mai ki lātou, “E o Kaihala.” Oi lea atu ai ia Iehu ki a te ki lātou, “Fakafoki lava la ia mea a Kaihala ki a Kaihala, ma fakafoki ia mea a te Atua ki te Atua.”

²² Na ofo lele ki lātou i te ki lātou lagonaga o te mea tēnei; ma na olo kehe ai loa mai kinā.

Ko te Fehili e uiga ki te Toetū

²³ I te aho lava tēnā, na ōmamai ai ni tino o te kau Hatukaio ki a Iehu ma to lātou talitonuga, e hē mafai nā tino ke toe tutū mai i te oti.

²⁴ Kua lea atu ki lātou, “Te Faiakoga, e lea mai ia Mohe kāfai he tamāloa e oti kae hēai hana fānau, e tatau tona uho ke fakaipoipo ma te fafine kae ke maua ai he fānau e mafai ke takua e a tona uho kua oti.

²⁵ E vēnei la, nae i ei te kau uho tama e toka fitu nae nonofo i kinei. Na fakaipoipo te uho matua kae na oti kae hēki i ei hana fānau, oi na tuku ai e ia te fafine ki tona uho.

²⁶ Na vēnā foki te mea na tupu ki te uho tona lua, ma tona tolu, ma na pa lava ki te kau uho uma e toka fitu.

²⁷ Mulimuli ake, oi oti ai foki te fafine.

²⁸ Kāfai la e pa ki te aho e toe tutū ai ia tagata mai te oti, ko ai la o te kau uho ka takua ko te āvaga a te fafine? Ko te toka fitu uma tēnei na fakaipoipo ki te fafine.”

²⁹ Kua tali atu ia Iehu ki a te ki lātou, “Kai te hehē lele o koutou! E māfua ona e hē koutou iloa nā Tuhituhiga Paia ma te mālohi o te Atua.

³⁰ Auā kāfai nā tino oti e toe tutū mai te oti, ka vē ki lātou ko nā agelu i te lagi ma ka hē fakaipoipo ki lātou.

³¹ Kae vē la ki nā tino oti e toe fakatutū; e hēki faitau lele nei koutou ki te mea na lea atu ai te Atua ki a te koutou? Na lea te Atua,

³² ‘Ko au ko te Atua o Apelaamo, te Atua o Ihaako, ma te Atua o Iakopo.’ Ko ia ko te Atua o tagata ola kae hē o tagata oti.”

³³ I te lagonaga e te kaifenua te mea tēnei, oi na ofo lahi lele ai ki lātou ki ana akoakoga.

Ko te Fakatonuga e Hili te Tāua

³⁴ I te lagonaga e te kau Falehaio ko te kau Hatukaio kua hē mautala ki a Iehu, oi na fakamāopoopo ai lava ki lātou,

³⁵ ma ko tētahi o ki lātou, he faiakoga o te Tūlāfono, kua fai tana fehili ke tofotofo ai ia Iehu.

³⁶ Kua lea vē atu ki a Iehu, “Te Faiakoga, tēfea te fakatonuga e pito hili atu te tāua i nā Tūlāfono?”

³⁷ Kua tali atu ia Iehu, “ ‘Alofa ki te Aliki tō Atua ma tō loto kātoa, ma tō agaga kātoa ma tō māfaufau kātoa.’

³⁸ Ko te fakatonuga tēnei e pito hili te tāua ma e fakamuamua.

³⁹ Ko tona lua o fakatonuga e pito hili te tāua e vēnei; ‘Alofa ki tō tuākoi e vē ona alofa koe ki a te koe lava.’

⁴⁰ Ko te Tūlāfono kātoa a Mohe ma nā akoakoga a te kau pelofeta, e fakavae uma i nā fakatonuga iēnei e lua.”

Ko te Fehili e uiga ki te Mehia

⁴¹ Ka koi tau fakapotopoto te kau Falehaio, kae fehili atu ia Iehu ki ei,

⁴² “He ā he koutou manatu e uiga ki te Mehia? Ko he lāpuna e o ai?” Kua tali mai ki lātou, “He lāpuna e o Tavita.”

⁴³ Oi lea atu ai ia Iehu ki ei, “He ā la te na fakaohofia ai ia Tavita e te Agaga ke lea ko te Mehia ko te ‘Aliki’? Ko Tavita na lea vē,

⁴⁴ ‘Ko te Aliki te Atua na vāgana ki toku Aliki; Nofo i toku itū taumatau, ke pa ki te taimi e tuku ai e au nā fili o koe ki lalo o ō vae.’

⁴⁵ Kāfai la ko Tavita na lea ko te Mehia ko te ‘Aliki,’ e vēhea la ona kavea he lāpuna o Tavita ma Mehia?”

⁴⁶ E hēki i ei he tino na ia mafaia oi tali ki a Iehu, ma na kāmata mai i te aho tēnā, e hēki toe i ei lele he tino na toe fia toa ke fai hana fehili ki a te ia.