Mataio 2 - Tokelauan New Testament

Nā Tino Malaga mai Hahae

¹ Na fānau mai ia Iehu i te kakai ko Peteleema i Iutea, i nā aho o te nofoakiga a te tupu ko Helota. E hēki mataloa talu te fānau mai o Iehu, kae taunuku ifo ki Ieluhalema ni taulelea hukehuke ki nā fetu, na ōmamai i he fenua i Hahae

² ma na fehili vē ki lātou, “Tēfea te pepe kua fānau mai ke kavea ma tupu o tagata Iutaia? Na kitea e ki mātou tona fetu i te oho akega i hahae, oi ko ki mātou kua ōmamai ke ifo ki ei.”

³ I te lagonaga e Helota o te tala tēnei, oi tupu ai tona popole lahi, ma kua vēnā foki ia tagata uma o Ieluhalema.

⁴ Na fakapotopoto ai e ia nā ohitāulaga hili ma nā faiakoga o te Tūlāfono oi fehili atu ai ki ei, “Ko fea nei te koga ka fānau mai ai te Mehia?”

⁵ Kua tali mai ki lātou, “I te kakai ko Peteleema i Iutea, auā na tūhia e te pelofeta:

⁶ ‘Peteleema i te fenua o Iuta, ko koe ko hētahi o kakai pito tāua o Iuta; auā mai ia te koe ka hau ai he takitaki ka ia takitakia oku tagata Ihalaelu.’ ”

⁷ Na fekau ai loa e Helota nā tino malaga mai Hahae, oi na iloa ai e ia i te lātou fono na fai munimuni, te taimi tonu na tū mai ai te fetu.

⁸ Oi uga ai e Helota nā tino malaga ki Peteleema ma te fakatonuga e vēnei, “Olo oi hakili fakalelei te mea e i ei te tamaiti; kāfai e maua e koutou, oi taku mai ki a te au kae ke fanatu foki au oi ifo ki ei.”

⁹ Oi olo ai nā tino malaga, kae kua toe kitea foki e ki lātou te fetu na ki lātou kiteagia i Hahae, e muamua atu ia te ki lātou ma kua tū mai tonu i luga o te mea e i ei te tamaiti.

¹⁰ I te kiteaga e ki lātou o te fetu, na fiafia lahi lele ai ki lātou.

¹¹ Kua ulu atu ki lātou ki loto o te fale, oi kitea ai e ki lātou te tamaiti ma tona mātua ko Malia. Na tōtutuli ai loa ki lātou ki lalo kua ifo ki ei. Kua tōake foki ki luga a lātou meaalofa ko te aulo, ko te pulu lipano ma te pulu mulo, kua tuku atu ki a te ia.

¹² Oi toe foki ai ki to lātou nuku kui atu i hētahi auala, auā na fakailoa e te Atua ki a te ki lātou i he miti, ke nahe toe olo ki a Helota.

Ko te Holaaga ki Aikupito

¹³ Kua olo kehe nā tino malaga, oi kitea ai e Iohefa he agelu a te Atua i he miti, e lea vē ake, “Ka hakili e Helota te tamaiti ke tāmate. Ko te mea ia, tū loa ki luga kave te tamaiti ma tona mātua oi hōhola ki Aikupito. Nonofo pea i kinā ke toe lea atu au.”

¹⁴ I te pō lava tēnā, na tū ai ki luga ia Iohefa oi kave te tamaiti ma tona mātua, kua olo ki Aikupito,

¹⁵ ma na nonofo ai lava i kinā ke pa ki te taimi na oti ai ia Helota. Ko te mea tēnei na taunuku ai te vāgana a te Aliki na kui mai i te pelofeta, “Na kalaga au ki toku ataliki ke hau mai Aikupito.”

Ko te Tāmatega o nā Tamaiti

¹⁶ I te iloaga e Helota ko ia kua pelogia e nā tino malaga mai Hahae, oi ita lahi lele ai. Na fakatonu ai loa e ia ke tāmate nā tamaiti tāne uma mai te lua tauhaga agai ki lalo te mātutua, i Peteleema ma nā nuku e tuākoi ki ei — ko te tonu tēnei na fai fuafua fakatatau ki nā mea na iloa e ia mai nā tino malaga, e uiga ki te taimi na kitea ai te fetu.

¹⁷ Oi na taunuku ai te kupu a te pelofeta ko Ielemia:

¹⁸ “He leo e lagona i Lama, ko te leo o te tagilauē. Ko Lahela e tagi mo ana fānau; kua hē ia talia ni fakamāfanafanaga, auā kua feoti ki lātou.”

Ko te toe Foki ifoga mai Aikupito

¹⁹ Kae i te otiga o Helota, na fakaali ai he agelu a te Atua ki a Iohefa i he miti i Aikupito

²⁰ kua lea vē ki ei, “Tū ki luga, kave te tamaiti ma tona mātua oi toe foki ki Ihalaelu, auā ko nā tino nae taumafai ke tāmate te tamaiti kua feoti.”

²¹ Oi tū ai ki luga ia Iohefa kua kave te tamaiti ma tona mātua, kua toe foki ki Ihalaelu.

²² Kae i te lagonaga e Iohefa ko Akilao kua hui ki tona tamana ko Helota ma kua kavea ma tupu o Iutea, oi mataku ai ke toe foki. Na toe maua iētahi fakatonuga o ia i he miti, oi fano ai loa ki te itūmālō ko Kalilaia,

²³ ma nofo ai i te kakai e igoa ko Nahaleta. Na taunuku ai te kupu a nā pelofeta: “Ka fakaigoa ia ko he ha-Nahaleta.”