Mataio 19 - Tokelauan New Testament

Kua Akoako e Iehu e uiga ki te Tatala Āvaga

¹ Kua uma te tautala o Iehu ki nā mea iēnei, oi fano kehe ai ma Kalilaia, kua fano ki te itūmālō o Iutea i tētahi itū o te vaitafe ko Iolitana.

² Kua mulimuli atu ki a te ia te tokalahi o tagata, oi fakamālōlō ai ki lātou e ia i kinā.

³ Oi ōmai ai te kau Falehaio, kua taumafai ke tofotofo ia Iehu i he fehili. Kua lea vē atu ki lātou, “E fakataga nei i te tātou Tūlāfono he tamāloa ke tatala e ia tana āvaga i ho he māfuaaga e fofou ia ki ei?”

⁴ Kua tali atu ia Iehu, “Ko koutou nei e hēki faitau ki te tuhituhiga paia e lea mai, na fai e te Atua i te kāmataga nā tino, he tamāloa ma he fafine.

⁵ Oi vāgana ai te Atua, ‘Ko te mea ia ka tukua ai e te tamāloa tona tamana ma tona mātua kae fakatahi ma tana āvaga, ma kavea ai ki lāua ma tino e tahi.’

⁶ Ka hē toe toka lua kae kua tino e tahi. Ko te mea la kua tuku fakatahi e te Atua, e hē toe tuku kehekehea e he tino.”

⁷ Kua fehili atu nā Falehaio ki a Iehu, “He ā la na tuku mai ai e Mohe te tūlāfono, e mafai ai e he tamāloa oi kave ki tana āvaga he tuhi e fakailoa ki ei ko te lā āvaga kua tatala, ma uga ai ke fano?”

⁸ Ka kua tali mai ia Iehu, “Na tuku atu e Mohe te fakatagaga ki a te koutou ke tatala ai autou āvaga, auā outou loto e makaka. Ka nae hē vēnā i te kāmataga.

⁹ Ko au la e lea atu ki a te koutou, ko ai lava he tamāloa e tatala e ia tana āvaga i he māfuaaga e kehe mai i lo te kua hē fakamāoni o te fafine, ma fakaipoipo ki hētahi fafine, kua agahala ia i te mulilua.”

¹⁰ Kua lea atu te kau hoko ki a Iehu, “Kāfai ko tēnā te tūlaga i te va o te tamāloa ma tana āvaga, e hili ai la te hē fakaipoipo.”

¹¹ Kua tali mai ia Iehu, “E hē ko tamāloloa uma te ki lātou mafaia oi talia te akoakoga tēnei, kae nā ko ki lātou lava kua uma te tuku atu ki ei e te Atua.

¹² Auā e i ei nā māfuaaga kehekehe e hē mafai ai ia tamāloloa ke āvavaga; ko iētahi e māfua ona na fānanau mai lava e vē; ko iētahi ona ko nā mea na fai ki a te ki lātou e iētahi tino, ma ko iētahi e hē āvavaga kae ke mafai ai ki lātou ke tautua ki te Mālō o te lagi. Ko te tino e ia mafaia oi talia te akoakoga tēnei, oi talia loa.”

Kua Fakamanuia e Iehu nā Tamaiti

¹³ Kua kaumai e ni tino ni tamaiti ki a Iehu ke fakaeke atu ona lima ki o lātou ulu ma tatalo mo ki lātou, kae kua mumuna atu ki ei te kau hoko.

¹⁴ Kua vāgana atu ia Iehu ki ona hoko, “Tuku nā tamaiti ke ōmamai ki a te au, nahe vavaoa, auā ko te Mālō o te lagi e mo ki lātou e vē ko ki lātou iēnei.”

¹⁵ Kua fakaeke atu ona lima ki o lātou ulu, oi fano kehe ai.

Ko te Tamāloa Maumea

¹⁶ Nae i ei he tamāloa na hau ki a Iehu oi fehili vē atu ki ei, “Te Faiakoga, he ā nei he mea lelei e tatau ke kō faia, kae ke maua ai e au te ola e fakavavau?”

¹⁷ Kua tali mai ia Iehu, “He ā te kua fehili mai ai koe ki a te au ki te mea e lelei? E fokotahi oioti lava te tino e lelei ko te Atua. Kāfai e fia maua e koe te ola e fakavavau, tauhi la ki nā fakatonuga.”

¹⁸ Kua fehili atu te tamāloa, “Ni fakatonuga vēhea?” Ma kua tali mai ia Iehu, “Ia koe nahe tāmate tino; ia koe nahe mulilua; ia koe nahe kaihohoa; ia koe nahe molimau pepelo;

¹⁹ āva ki tō tamana ma tō mātua; ma alofa ki tō tuākoi e vē oi alofa koe ki a te koe lava.”

²⁰ Ka kua lea atu te tamāloa ki a te ia, “Ko nā fakatonuga uma iēnei e tauhi au ki ei. He ā la hētahi mea e tatau ke kō faia?”

²¹ Oi vāgana atu ai ia Iehu ki ei, “Kāfai koe e fia lelei kātoatoa, fano oi fakatau au mea uma lele ma fōki te tupe ma nā tino mātitiva, ma ka maua ai e koe nā koloa e lahi i te lagi; oi hau ai oi mulimuli mai ki a te au.”

²² I te lagonaga atuga e te tamāloa o te mea iēnei, oi fano kehe ai ma te loto fakanoanoa, auā ko ia ko he tino maukoloa.

²³ Oi vāgana atu ai ia Iehu ki nā hoko o ia, “E takutino atu e au ki a te koutou, ka faigatā lele mo nā tino maukoloa ke hao atu ki te Mālō o te lagi.

²⁴ Ko au e toe lea vēnei atu ki a te koutou, e faigatā lele atu mo he tino maukoloa ke hao atu ki te Mālō o te lagi, i lo mo he kāmela ke ulu i te pu o he gila.”

²⁵ Na ofo lahi lele te kau hoko i te ki lātou lagonaga o te mea tēnei, oi fehili vē atu ai, “Ko ai nei la te i na mafai ke fakaola?”

²⁶ Kua kikila hako atu ia Iehu ki a te ki lātou ma tali vē atu, “Ko te mea tēnei e matuā hē mafai lava e tagata, kae e mafai ia mea uma e te Atua.”

²⁷ Oi tali atu ai ia Petelu, “Kikila, kua tuku e ki mātou a mātou mea uma lele kae mulimuli atu ki a te koe. He ā nei ta ki mātou ka maua?”

²⁸ Kua vāgana atu ia Iehu ki a te ki lātou, “E takutino atu e au ki a te koutou, i te ōlaga fou koi hau, ko te Ataliki o te Tagata ka nofo i luga o tona nofoāliki mamalu. Ma ko koutou iēnā kua mulimuli mai ki a te au, ka nonofo foki i nā nofoāliki e hefululua, ke pūlea nā puikāiga e hefululua o Ihalaelu!

²⁹ Ma ko ho he tino e ia tukua tona fale, pe ko ona uho, pe ko ona tuafafine, pe ko tona tamana, pe tona mātua, pe ko tana fānau, pe ko ona fenua ona ko au, ka maua e ia he taui e hautua helau, ma vēnā foki oi maua e ia te ola e fakavavau.

³⁰ Kae e tokalahi ki lātou e muamua nei ka kavea ma mulimuli, ma e tokalahi foki ki lātou e mulimuli nei ka kavea ma muamua.”