Mataio 18 - Tokelauan New Testament

Ko Ai te Hili ona Tāua i te Mālō o te Lagi?

¹ I te taimi tēnā, na ōmamai ai te kau hoko ki a Iehu oi fehili vē atu ki ei, “Ko ai te tino e hili ona tāua i te Mālō o te lagi?”

² Oi kalaga atu ai ia Iehu ki he tamaiti ke hau ki a te ia. Kua fakatū e ia te tamaiti i mua o ki lātou,

³ oi vāgana atu ai, “E takutino atu e au ki a te koutou, kāfai koutou e hē hūia ma kavea ke vē ni tamaiti, ka hē mafai lele koutou ke hao atu ki te Mālō o te lagi.

⁴ Ko te tino e hili ona tāua i te Mālō o te lagi, ko te tino e ia mafaia oi loto maulalo ma vē ko te tamaiti tēnei.

⁵ Ko ai lava he tino e ia talia he tamaiti vēnei i toku igoa, kua ia talia foki au.

Ko nā Fakaohoohoga ki te Agahala

⁶ “Ko ai lava he tino e ia faia he mea ke uma ai te fakatuatua mai ki a te au o hētahi o ki lātou iēnei e tamaiti, e hili ai mo te tino tēnā te nonoa o he fatupae lahi lele ki tona ua, ma fakagoto ai ke malemu i te moana loloto.

⁷ Hāloa te lalolagi ona e i ei nā mea e tutupu ke fakaohooho ai ia tagata ki te agahala! Ko nā mea iēnei e tatau lava ke tutupu — kae hāloa la te tino e māfua ai iēnei mea!

⁸ “Ma kāfai ko tō lima pe ko tō vae te māfua ai ona agahala koe, tipi kehe oi tīaki! E hili atu tō hao ki te ola e hē gata kae lima tahi pe vae tahi, i lo te kātoa ona lima ma nā vae, kae togi ai koe ki loto o te afi e hē mafai ke mate.

⁹ Kāfai foki ko tō mata te māfua ai oi agahala koe, hali kehe oi tīaki! E hili atu tō hao ki te ola e hē gata kae mata tahi, i lo te kātoa ona mata kae togi ai koe ki loto o te afi o kēna.

Ko te Talafakatuha o te Māmoe na Galo

^10-11 “Tautuanā ma koutou ke nahe koutou taku fakatauva lele hētahi o ki lātou iēnei e tamaiti; auā e lea atu au ki a te koutou, ko a lātou agelu e i ei pea lava i te mea e i ei ai toku Tamana i te lagi.

¹² “He ā he koutou manatu ki te mea e fai e he tino e i ei ni ana māmoe e helau, kae kua galo te fokotahi? E hē ia tukua nei nā māmoe e iva hefuluiva ke kakai i luga o nā mauga, kae fano oi hakili mai te māmoe kua galo?

¹³ Ma kāfai e ia maua, e lea atu au ki a te koutou, e hili atu tona fiafia ona ko te māmoe tēnei e fokotahi, i lo te iva hefuluiva e hēki gagalo.

¹⁴ E vēnā foki lava oi hē fofou te koutou Tamana i te lagi ke galo hētahi o ki lātou nei e tamaiti.

Kāfai Tō Uho e Agahala

¹⁵ “Kāfai tō uho e fai hana mea kino ki a te koe, fano oi fakahino ki ei tona hehē. Kae fai te mea tēnei nā ko koulua lava toka lua. Kāfai e fakalogo atu ki a te koe, kua toe maua e koe tō uho.

¹⁶ Kae kāfai e hē fakalogo atu ki a te koe, kave he tino e fokotahi pe he toka lua oi olo ma koe, kae ke mafai ai ke ‘fakamāonia ia mōliga takitahi uma i te molimau a ni tino e toka lua pe toka tolu,’ e vēia oi tūhia i te tuhituhiga paia.

¹⁷ Kāfai e hē fakalogo ki a te ki lātou, oi fakailoa ai te mea kātoa ki te Ekalehia. Kāfai la e hē fakalogo foki ki te Ekalehia, oi kavea ai loa ia ke vē he tagata nukukehe, pe he aolāfoga, i tautou māfuta ki ei.

Na Mea e Fakahā ma nā Mea e Fakataga

¹⁸ “E takutino atu e au ki a te koutou uma; ko nā mea e fakahā e koutou i te lalolagi, ka fakahā foki i te lagi, ko nā mea e fakataga e koutou i te lalolagi, ka fakataga foki i te lagi.

¹⁹ “Ko tētahi mea tēnei e lea atu ai au ki a te koutou: ho he taimi lava e mālilie ai he toka lua o koutou i te lalolagi ke tatalo atu ki ei, ka vēnā lava oi fai mo ki lāua e toku Tamana i te lagi.

²⁰ Auā, ho he mea lava e fakatahi ai he toka lua pe he toka tolu i toku igoa, e i ei foki au ma ki lātou.”

Talafakatuha o te Kaukauna Hē Loto Fakamāgalo

²¹ Oi hau ai ia Petelu ki a Iehu kua fehili vē atu ki ei, “Te Aliki, e fakafia nei oi kō fakamāgaloa toku uho kāfai e fai pea lava e ia nā mea kino ki a te au? E fakafitu?”

²² Kua tali mai ia Iehu, “Hēai, e hē fakafitu kae fakafituhefulu ni fitu,

²³ auā ko te Mālō o te lagi e fakatuha vēnei. Nae i ei he tupu kua tonu ia te ia ke hiaki ana tupe nae kaihohoa e nā kaukauna a ia, ona kua fofou ke toe totogi uma ake e ki lātou.

²⁴ Fātoā kāmata atu tana hiakiga kae kaumai ki a te ia te kaukauna e nofo kaitālafu i te hefulu afe tāleni.

²⁵ E hēki lava he tupe a te kaukauna ke totogi ai te tupe e nofo kaitālafu ai, oi fakatonu ai e te tupu ke fakatau atu ma pologa te kaukauna tēnei ma tana āvaga ma tana fānau ma ana mea uma lele, ke totogi ai tana kaitālafu.

²⁶ Oi fakapakū ai te kaukauna ki lalo, kua tōtuli ki mua o te tupu ma ole atu ki ei vēia, ‘Tuku mai ko fakamolemole hoku avanoa ke toe totogi atu ai nā mea uma lele e kaitālafu ai au ki a te koe.’

²⁷ Na lagona e te tupu te alofa, oi fakamāgalo ai e ia te kaitālafu a tana kaukauna oi tuku ai ke fano.

²⁸ “Oi fanatu ai te kaukauna tēnei, kua fetaui ma tona hoā kaukauna e nofo kaitālafu ake ki a te ia i he helau tupe hiliva. Kua tago atu oi tāofi mai tona hoā kaukauna ma kāmata titina te ua ma lea vē atu ki ei, ‘Totogi mai nei lava taku tupe e kaitālafu e koe!’

²⁹ Kua fakapakū tōtuli ki lalo tona hoā kaukauna ma ole atu ki ei vē atu, ‘Tuku mai ko fakamolemole he avanoa oi toe totogi atu ai!’

³⁰ Ka kua hē ia taliagia; oi fakatonu ai e ia ke kave tona hoā kaukauna oi loka i te falepuipui ke pa ki te taimi e totogi kātoa ai tana kaitālafu.

³¹ I te kiteaga o te mea tēnei e iētahi kaukauna, oi tīgā lahi ai o lātou loto ma olo ai kua taku ki te tupu nā mea uma lele iēnei.

³² Oi fekau ai e te tupu te kaukauna ma lea vē atu ki ei, ‘Ko koe he kaukauna kino. Na fakamāgalo koe e au i te tupe kātoa e kaitālafu mai ai koe ki a te au, ona ko koe na ole mai ki a te au.

³³ Na tatau foki la ke vēia tō alofa ki tō hoā kaukauna e vēia ko toku alofa na fai atu ki a te koe.’

³⁴ Kua ita lahi lele te tupu, oi fakatonu ai e ia ke kave te kaukauna ke kini i te falepuipui, ke pa lava ki te taimi e uma ai te totōgiga o tana kaitālafu kātoa.”

³⁵ Kua fakauma te tautalaga a Iehu oi lea vē atu ai, “Ka vēnā foki lava te mea e fai e toku Tamana i te lagi ki a te koutou uma tau tokatahi, kāfai e hē kē fakamāgaloa tō uho ma te loto fakamāoni.”