Mataio 17 - Tokelauan New Testament

Ko te Hūiga ki te Tino o Iehu

¹ Kua teka atu nā aho e ono, oi kave ai e Iehu ia Petelu ma te kau uho ko Iakopo ma Ioane kua olo ki luga o he mauga maualuga nā ko ki lātou.

² Oi hūia ai te tino o Iehu kae kikila atu ki lātou; ko ona fōliga kua pupula e vē ko te la, ma nā kofu kua paepae hihina.

³ Oi kitea atu ai foki e ki lātou ia Mohe ma Elia e faitatala ma Iehu.

⁴ Oi lea atu ai ia Petelu ki a Iehu, “Te Aliki, te lelei ko ki mātou e i kinei! Kāfai koe e loto ki ei, ka kō fakatutūa ni fakamalumalu e tolu i kinei, ko tētahi mo koe, ko tētahi mo Mohe ma tētahi mo Elia.”

⁵ Ka koi tautala vēnei atu ia Petelu, kae hau he ao pupula ma malutū ai ki lātou, ma he leo e fanaifo mai te ao e vē ifo, “Ko toku Ataliki pele tēnei, e fiafia lahi au ki ei — fakalogo ki ei!”

⁶ I te lagonaga e nā hoko te leo, oi mātataku lahi lele ai ma fakapakukū fakapūlou ki luga o te kelekele.

⁷ Kae kua hau ia Iehu kua paki atu tona lima ki a te ki lātou ma lea vē atu, “Tutū ki luga, koutou nahe mātataku!”

⁸ Oi kikila ake ai ki lātou ki luga ka kua hēai hētahi tino e i ei kae nā ko Iehu oioti.

⁹ Ka koi ōifo ki lātou ki lalo o te mauga ka kua fakatonu vēnei atu e Iehu te toka tolu, “Nahe koutou takua lele ki he tino e uiga ki te fakaaliga na kikila ki ei outou mata, heiloga kua toe fakatū te Ataliki o te Tagata mai te oti.”

¹⁰ Oi fehili ai nā hoko ki a Iehu, kua lea vē atu, “He ā te lea ai nā faiakoga o te Tūlāfono e tatau ke mua hau ia Elia?”

¹¹ Kua tali mai ia Iehu, “E hako ko Elia e hau muamua, ma ka ia toe tukutuku tonua ia mea uma.

¹² Kae ko au e lea atu ki a te koutou, ko Elia kua hau kae e hēki matea e tagata, ma na ki lātou faia ki a te ia ho he mea lava na fofou ki lātou ki ei. Ka vēnā foki lava oi puapuagā te Ataliki o te Tagata i a lātou faiga.”

¹³ Oi na fātoā mālamalama ai nā hoko ko Iehu nae tautala ake ki a te ki lātou e uiga ki a Ioane te Papatiho.

Kua Fakamālōlō e Iehu he Taumalo e Ulufia e he Tēmoni

¹⁴ Kua taunuku ifo ki lātou ki te mea e i ei te kaifenua, oi hau ai he tamāloa ki a Iehu, kua tōtuli i mua o ia

¹⁵ ma lea vē atu, “Te Aliki, alofa mai ko ki toku ataliki auā e maua i te tauale tete ma e tīgāina lahi lele. Kāfai e oho tona tauale, e tete lahi lele tona tino oi e māhani pakū ki loto o te afi pe ki loto o te vai.

¹⁶ Na kaumai e au ki nā hoko o koe kae e hēki mafai e ki lātou oi fakamālōlō.”

¹⁷ Kua vāgana atu ia Iehu, “Kai te hē talitonu ma te āmio pikopiko o tagata o tēnei tupulaga! He ā nei te mataloa e tatau ke māfuta ai pea au ma koutou? He ā nei te mataloa ka onohai ai pea au! Kaumai te tamaiti ki a te au!”

¹⁸ Oi fai ai te fakatonuga a Iehu ki te agaga kino, ma na fano ai loa te tēmoni ki fafo o te tamaiti. I te taimi lava tēnā na mālōlō ai te tamaiti.

¹⁹ Oi ōmai ai nā hoko nā ko ki lātou, oi lea vē atu ki a Iehu, “He ā nei te hēki mafai ai e ki mātou oi tuli ki fafo te tēmoni?”

^20-21 Kua tali mai ia Iehu “E hēki mafai e koutou, ona e hē lava te koutou fakatuatua. Auā e lea atu au ki a te koutou, kana ia te koutou he fakatuatua e vē ko te lahi o he fatu hīnapi, e mafai ke lea koutou ki te mauga tēnei, ‘fano vē ki ko,’ oi e fano. E mafai e koutou oi fai ho he mea.”

Kua toe Vāgana ia Iehu e uiga ki tona Mate

²² I te maopoopoga fakatahi o te kau hoko i Kalilaia, oi vāgana atu ai ia Iehu ki ei, “Ko te Ataliki o te Tagata ka tukulima atu ki lalo o te pule a tagata,

²³ ma ka ki lātou tāmatea. Kae ka toe fakatū mai ia i te oti, i tona tolu o aho.” Oi lagona ai e te kau hoko te fakanoanoa lahi.

Ko Iehu ma te Lāfoga mo te Mālumalu

²⁴ Kua taunuku atu ia Iehu ma ono hoko ki Kapenaumi, oi ōmai ai nā aolāfoga mo te Mālumalu ki a Petelu ma lea vē ki ei, “E totogi nei he lāfoga mo te Mālumalu a te faiakoga o koe?”

²⁵ “Io, e totogi,” kua tali atu ia Petelu. I te ulu atuga o Petelu ki lotofale, oi fakataumuna muamua ai ki ei ia Iehu, “Himona, he ā nei hō manatu? Ko ai te totōgia nā tiute pe ko nā lāfoga ki nā tupu o mālō o te lalolagi? Ko tagata tōtino o te fenua pe ko tagata nukukehe?”

²⁶ “Ko tagata nukukehe,” kua tali mai ia Petelu. Oi tali atu ai ia Iehu, “Tona uiga la, ko tagata tōtino o te fenua e hē totōgia e ki lātou.

²⁷ Ka ko ki tātou e hē fofou ke fai he mea ke ita ai nā tino iēnei. Ko te mea ia, fano ki te vaitūloto oi lalafo ai tō uka. Ko tau ika muamua lava e hi, ka maua e koe i loto o te gutu he tupe hiliva e lava ke totogi ai taku lāfoga mo te Mālumalu vēnā ma tau lāfoga. Kave oi totogi ai a tā lāfoga.”