Mataio 16 - Tokelauan New Testament

Ko te Fakatagi mo he Fakailoga Ofoofogia

¹ Ko iētahi o te kau Falehaio ma te kau Hatukaio kua ōmamai ke tofotofo ia Iehu, oi na lea ai ki ei ke fai he fakailoga ofoofogia mo ki lātou, ke iloa ai pe kua ia te ia moni te pule mai te Atua.

² Kae kua tali mai ia Iehu ki a te ki lātou, “Kāfai te la e goto, e lea koutou, ‘e laofie te tau, auā te lagi e kukula.’

³ I te taeaopōpō e lea koutou, ‘E ua ma matagi te aho auā te lagi e kukula ma fakauli.’ E koutou mafaia oi fakamatala te tau kāfai koutou e kikila ki te lagi, kae e hē koutou mafaia oi fakamatala nā fakailoga o nā mea e tutupu i te taimi nei!

⁴ Kai te kino ma te hē talitonu ki te Atua o tagata o nā aho nei. Ko koutou e lea mai ke fai he fakailoga ofoofogia? Hēai! Oioti lava te fakailoga e fai mo koutou ko te fakailoga ofoofogia na fai ki a Iona.” Oi fano kehe ai loa mai kinā.

Ko te Mea Fakafefete a te Kau Falehaio ma te Kau Hatukaio

⁵ Kua taunuku atu te kau hoko ki tētahi itū o te vaitūloto, ka kua puli ke kave ni a lātou falaoa.

⁶ Kua vāgana atu ia Iehu ki a te ki lātou, “Koutou ke mataala ma fakaeteete lele i te mea fakafefete a te kau Falehaio ma te kau Hatukaio.”

⁷ Oi kāmata ai kua fakataufai te kau hoko nā ko ki lātou ma lea vē tētahi ki tētahi, “E lea mai vēnei auā e hēki kaumaia ni a tātou falaoa.”

⁸ Kua iloa e Iehu nā mea e fakataufai ai ki lātou, oi lea vē atu ai ki ei, “Kai te taigole ātili lele o te koutou fakatuatua! He ā te fakataufai ai koutou ki te hēai o ni falaoa?

⁹ Ko hēki koutou hāfia moni nei lava? E hē koutou manatua nā falaoa e lima na kō tavaevaea mo nā tino e lima afe? E fia ia polapola na fakatūtumu e koutou?

¹⁰ Kae a nā falaoa e fitu mo te fa afe o tagata? E fia ia polapola na fakatūtumu e koutou?

¹¹ E vēhea ona hē mālamalama koutou ko au nae hē tautala atu ki a te koutou e uiga ki ni falaoa? Koutou ke fakaeteete lelei i te fefete a te kau Falehaio ma te kau Hatukaio.”

¹² Oi na fātoā mālamalama ai te kau hoko e hē ko te fefete e fakafefete ai te falaoa tēia e lea ake ai ia Iehu ke fakaeteete ai, ka ko nā akoakoga a te kau Falehaio ma te kau Hatukaio.

Ko te Takutinoga a Petelu e uiga ki a Iehu

¹³ Kua fano ia Iehu ki te kogāfenua e pili ki te kakai e igoa ki a Kaihaleia Filipi, ma i kinā na lea atu ai ki ona hoko, “Ko ai te lea nā tino ko te Ataliki o te Tagata?”

¹⁴ Kua tali mai te kau hoko, “Ko iētahi tino e lea ko koe ko Ioane te Papatiho, ko iētahi e lea ko koe ko Elia, ma iētahi e lea ko koe ko Ielemia pe ko hētahi o te kau pelofeta.”

¹⁵ Kua lea atu ia Iehu ki a te ki lātou, “Kae e vēhea ake la koutou? E lea koutou ko ai au?”

¹⁶ Kua tali mai ia Himona Petelu, “Ko koe ko te Mehia, te Ataliki o te Atua tē e ola pea lava.”

¹⁷ Kua lea atu ia Iehu, “Amutia koe Himona te ataliki o Ioane! Auā ko te mea tēnei e hēki iloa e koe mai he tino ola, kae na fakailoa hako atu ki a te koe e toku Tamana i te lagi.

¹⁸ Ko au la e lea atu ki a te koe, Petelu; ko koe he papa, i luga o te papa tēnei ka fakatū ai taku Ekalehia, ma e pa lava ki te mālohi o te oti e hē mafai e ia oi fakaumatia.

¹⁹ Ka kō tuku atua ki a te koe nā kī o te Mālō o te lagi; ko nā mea e fakahā e koe i te lalolagi ka fakahā foki i te lagi, ko nā mea e fakataga e koe i te lalolagi ka fakataga foki i te lagi.”

²⁰ Oi fakatonu ai e Iehu ona hoko, ke nahe ki lātou takua lele ki he tino ko ia ko te Mehia.

Kua Tautala ia Iehu e uiga ki ona Puapuagā ma tona Mate

²¹ Mai te taimi tēnā, na kāmata ai oi fakamālamalama e Iehu ki ona hoko te mea ka pa ia ki ei, kua lea vē atu ki a te ki lātou, “Ko au e tatau ke fano ki Ieluhalema ke puapuagā au i lima o toeaina, nā ohitāulaga hili ma faiakoga o te Tūlāfono. Ka ki lātou tāmatea au, kae i tona tolu o aho, ka toe fakatū mai ai au mai i te oti.”

²² Oi tataki kehe ai e Petelu ia Iehu, ma kāmata oi tautala mālohi ki ei, kua lea vē atu, “Te Aliki, ke alofa te Atua ke nahe pa lele koe ki he mea vēnā!”

²³ Kae kua māfuli atu ia Iehu ki ona tua ma lea vē atu ki a Petelu, “Hātani, fano kehe koe ma au! Ko koe kua fai ma fakalavelave ki a te au, auā ko ō manatu e hē mai te Atua, kae ni manatu fakatetagata.”

²⁴ Oi vāgana atu ai ia Iehu ki ona hoko, “Kāfai he tino e fia mulimuli mai ki a te au, e tatau ke tīaki e ia nā mea e fiafia ia ki ei, kae amo tona hātaulo ma mulimuli mai ki a te au.

²⁵ Auā ko ai lava e mānumanu ki tona ola, ka hē ia mauagia; kae ko ai lava e māumau tona ola ona ko au, ka maua e ia.

²⁶ He ā nei te aogā kāfai e maua e he tino te lalolagi kātoa kae māumau ai tona ola? Pe he ā foki he mea e mafai e he tino ke fōki kae ke toe ia maua ai tona ola?

²⁷ Auā kua tāli hau te Ataliki o te Tagata i te mamalu o tona Tamana ma ana agelu, ka ia kavatua te taui ki tagata tau tokatahi e tuha ai ma a lātou gāluega nae fai.

²⁸ E takutino atu e au ki a te koutou, e i ei nā tino ka ki lātou kiteagia te Ataliki o te Tagata kāfai ka hau ko ia ko te Tupu, ka ko hēki feoti ki lātou.”