Mataio 14 - Tokelauan New Testament

Ko te Mate o Ioane te Papatiho

¹ Ko te taimi tēnā, na logotala ai ia Helota te tupu o Kalilaia ki nā mea ofoofogia a Iehu nae fai.

² Oi lea vē atu ai ki ana kaukauna, “Ko Ioane te Papatiho tēnei kua toe ola mai; ko te mea ia e ia mafaia ai oi fai nā vāvega.”

³ Auā na fakatonu e Helota ke puke fakapagotā ia Ioane ma noanoa, oi togi ai ki loto o te falepuipui. Na fai e ia te mea tēnei mo Helotia te āvaga a tona uho ko Filipo,

⁴ ona ko Ioane na lea vē ki a Helota, “E hē fakataga i te Tūlāfono ke fai ia Helotia ma au āvaga!”

⁵ Nae fofou lele ia Helota ke tāmate ia Ioane ka nae mataku i nā tino Iutaia, auā nae manatu ki lātou, ko Ioane ko he pelofeta.

⁶ I te fakamanatuga o te aho fānau o Helota, na hiva ai te tamateine a Helotia i mua o te tupu ma te kau valakaulia uma. Na fiafia lahi lele ai ia Helota,

⁷ oi na fai ai tana folafolaga ki te teine e vēnei, “Ko au e tautō atu ka kō fōki atua mo koe ho he mea lava e fofou koe ki ei!”

⁸ Na lea atu ai loa te teine ki a Helota e vē ona fakatonugia ai ia e tona mātua, “Kaumai la nei ki a te au i luga o he peleti lahi, te ulu o Ioane te Papatiho!”

⁹ Na lagona e te tupu te fakanoanoa, kae ona ko tana tautōga kua uma te fai i mua o te kau valakaulia na fakatonu ai e ia ke fai te mea e fofou ki ei te teine.

¹⁰ Oi fakatonu ai e ia ke tipi kehe te ulu o Ioane i loto o te falepuipui.

¹¹ Kua kaumai te ulu i luga o he peleti lahi ma fōki ki te teine, oi kave ai e te teine ki tona mātua.

¹² Oi ōmai ai nā hoko o Ioane kua kave tona tino oi tanu, ma olo ai kua taku ki a Iehu.

Kua Fafaga e Iehu he Kaifenua Tokalahi

¹³ Kua fakalogo ia Iehu ki te mea kua tupu ki a Ioane, oi fano kehe ai mai kinā, kua fano i he vaka ki he kogāfenua e tū fua. Kua iloa e tagata te mea kua fano ki ei ia Iehu, oi tukua ai e ki lātou nā kakai e nonofo ai kae olo kui gāuta oi mulimuli ki ei.

¹⁴ Kua fanake ia Iehu ki gāuta mai te vaka, oi ia kitea atu ai te tokalahi o te kaifenua. Na tumu tona loto i te alofa ki a te ki lātou, ma fakamālōlō ai e ia nā tino o ki lātou nae maua i nā tauale.

¹⁵ Kua fakaafiafi, oi ōmai ai ona hoko ki a te ia ma lea vē mai ki ei, “Ko kinei ko he kogāfenua e tū fua, ma kua pō foki te aho. Keina uga ko nā tino ke olo ki nā nuku e tafapili mai, ke fakatau mai ni a lātou mea ke kai.”

¹⁶ Kae kua lea atu ia Iehu ki a te ki lātou, “E hē tatau ke olo, fōki ifo e koutou he lātou mea ke kai!”

¹⁷ Kua tali mai ki lātou, “Oioti lava a tātou meakai i kinei, e lima ia falaoa ma nā ika e lua.”

¹⁸ “Kaumai la ki kinei ki a te au,” kua lea vē atu ia Iehu.

¹⁹ Oi fakatonu ai e ia nā tino ke nonofo ki luga o te mutia; oi tago ai ki nā falaoa e lima ma nā ika e lua, kua tepa ake ki te lagi, ma fakafetai ki te Atua. Kua tavaevae e ia nā falaoa ma fōki ki ona hoko ke tufatufa ki tagata.

²⁰ Kua kakai ia tagata uma ma kua mākokona. Oi ao ai e te kau hoko nā toegā meakai, ma na tūtumu ai nā polapola e hefulu lua.

²¹ Ko te nūmela o ki lātou na kakai e lima afe ia taulelea, kae hē faitaua ai ia fafine ma tamaiti.

Kua Havali ia Iehu i luga o te Kilitai

²² Oi fakatonu ai e Iehu ona hoko ke olo ki luga o he vaka ma ke muamua ki tētahi itū o te vai, kae kua uga e ia ia tagata ke olo ki o lātou kāiga.

²³ Kua mātuku atu ia tagata, oi fano tautahi ai ia Iehu ki luga o he mauga ke tatalo ai. Kua pa ki te afiafipō kae koi i ei tautahi lava ia Iehu i kinā;

²⁴ ka ko te taimi tēnā ko te vaka kua mamao atu ki loto o te vai ma e tuki e galu, auā ko te matagi e hau tonu lava i te muāvaka.

²⁵ I te va o te tolu ki te ono i te vaveao, na fanaifo ai ia Iehu ki nā hoko o ia, e havali i luga o te kilitai.

²⁶ Kae i te kitea atuga o ia e ki lātou e havali i luga o te kilitai, oi mātataku lahi lele ai ki lātou ma lea vē, “E, he aitu!”

²⁷ I te taimi lava tēnā, na vāgana mai ai ia Iehu ki a te ki lātou, kua vē mai, “Fakamākeke! Ko au tēnei. Koutou nahe mātataku!”

²⁸ Oi lea atu ai ia Petelu, “Te Aliki, kāfai e moni ko koe, lea mai la ke fanatu au i luga o te kilitai ki a te koe.”

²⁹ “Hau la!” kua tali mai ia Iehu. Oi tū ifo ai loa lava ia Petelu ki lalo mai te vaka kua kāmata oi havali ki a Iehu i luga o te kilitai.

³⁰ Kae i te ia kitea atuga ko te matagi e mālohi, oi lagona ai loa e ia te mataku ma kāmata ai oi goto ki lalo o te vai. Oi kalaga ai vē, “Te Aliki, fakaola ko au!”

³¹ Na papae atu ai loa lava ia Iehu i te taimi tēnā oi tāofi mai te lima o Petelu ma lea vē atu ki ei, “Kai te taigole ātili lele o tō fakatuatua! He ā te na māhalohalo ai koe?”

³² Kua hohopo ake ki lāua ki te vaka oi toku ai loa foki te matagi.

³³ Oi ifo atu ai ki a Iehu nā hoko o ia nae i luga o te vaka ma lea vē atu ki ei, “E moni lava ko koe ko te Ataliki o te Atua.”

Kua Fakamālōlō e Iehu nā Tauale i Kenehaleta

³⁴ Kua pa atu ki lātou ki tētahi itū o te vaitūloto, ma kua taunuku atu ki Kenehaleta.

³⁵ I te mateaga o Iehu e nā tino i kinā, oi logo ai e ki lātou nā tino i nā koga uma e tuākoi mai, ke kaumai nā tauale uma ki a Iehu.

³⁶ Kua talohaga foki nā tino ki a Iehu ke mafai nā tauale ke tau lava kua paki ake ki te pito o tona kofu loloa; ko ki lātou uma foki na paki ki ei na fakamālōlōgia.