Mataio 10 - Tokelauan New Testament

Ko nā Hoko e toka Hefululua

¹ Kua fakapotopoto mai e Iehu ona hoko e toka hefululua, oi tuku atu ai e ia ki a te ki lātou te pule ke tuli ai ki fafo nā agaga kino, ma ke fakamālōlō ai ia tagata uma kua maua i nā tauale kehekehe.

² Ko nā igoa iēnei o nā apohitolo e toka hefululua: muamua, ko Himona (ko tētahi ona igoa ko Petelu) ma tona uho ko Anitelea; ko Iakopo ma Ioane nā ataliki o Hepetaio;

³ ko Filipo ma Patolomaio; ko Toma ma Mataio te aolāfoga; ko Iakopo te ataliki o Alefaio, ma Tātāio;

⁴ ko Himona te Lotonuku, ma Iuta te Ihikaliota, tē na ia fakalata ia Iehu.

Ko te Gāluega mo te toka Hefululua

⁵ Kua uga atu e Iehu nā tamāloa iēnei e hefululua ma nā fakatonuga e vēnei: “Ko koutou e hē olo ki he fenua o tagata nukukehe pe he kakai o Hāmālia.

⁶ Kae olo ki tagata o Ihalaelu kua vē ni māmoe e gagalo.

⁷ Olo oi tālaki atu, ‘Ko te Mālō o te lagi kua tafapili mai!’

⁸ Fakamālōlō nā tauale, toe fakatutū nā tino kua oti, fakamamā ki lātou e maua i nā tauale kino o te kili, ma tuli ki fafo nā tēmoni. Kua maua e koutou te pule e hēai he totogi, ke vēnā foki oi tuku atu e koutou ki iētahi tino, e hēai he totogi.

⁹ Nahe koutou kavea ni tupe aulo, ni tupe hiliva pe ni tupe apamemea i outou taga;

¹⁰ nahe kavea he ato mo te malaga, pe he kofutino fakaleoleo, pe ni hēvae, pe he tokotoko. Ko nā tino faigāluega e tatau ke fōki ki ei nā mea ke ola ai.

¹¹ “Ma ko ho he kakai pe he nuku e tau atu koutou ki ei, olo oi hakili he tino e fiafia ke ia talia koutou, oi nonofo ai ma ia i tona fale ke pa ki te taimi e olo kehe ai koutou ma te koga tēnā.

¹² Kāfai koutou e ulu ki loto o he fale, oi fakatālofa vē, ‘Ke ia te koutou te fīlēmū.’

¹³ Kāfai e talia koutou e nā tino o te fale, ke tūmau pea te fīlēmū o te Atua ia te ki lātou; kae kāfai koutou e hē ki lātou talia, oi toe fakafoki mai te koutou fakamanuiaga na fai.

¹⁴ Kāfai foki he fale pe he nuku ka hē talia ai koutou pe fia fakalogo atu, olo kehe ma kinā, ma lūlū kehe te pefu mai outou vae.

¹⁵ E takutino atu e au ki a te koutou, kāfai e pa ki te Aho Fakamahino, ka hili atu te alofa o te Atua ki tagata o Hotoma ma Komolo i lo ki nā tino o te kakai tēnā!

Nā Fakahāuāga ka maua ai ki Lātou

¹⁶ “Kikila! Ko koutou e uga atu e au e vē lava ni māmoe ki te mea e i ei ai nā luko. Ko koutou la e tatau ke popoto e vē ko nā gata ma agamalū e vē ko nā lupe.

¹⁷ Koutou ke mataala, auā e i ei nā tino ka ki lātou pukea koutou ma kave ki te fakamahinoga, ma ka ki lātou kinia koutou i loto o nā hūnako.

¹⁸ Ona ko au ka kave ai koutou ki te fakamahinoga i mua o nā kōvana ma nā tupu, ke fakailoa atu ai te Tala Lelei ki a te ki lātou ma tagata nukukehe.

¹⁹ Kāfai koutou e kave e ki lātou ki te fakamahinoga, koutou nahe popole pe ka vēhea ake hautou tala e fai ki ei, ma pe fakakupu vēhea foki; ka pa ki te taimi tēnā, ka fōki atu lava ki a te koutou nā kupu ke tautatala ai koutou.

²⁰ Auā e hē ko koutou te ka tautatala, ka ko te Agaga o te koutou Tamana e tautala, kui atu ia te koutou.

²¹ “Ka tuku atu e te uho tona uho ke tāmate, ka vēnā foki oi fai e tamana ki a lātou fānau. Ka fakahaga tau ia fānau ki o lātou mātua ma tuku atu e ki lātou ke tāmate,

²² ma ka inohia koutou e tagata uma ona ko au. Ka ko te tino e onohai pea lava ke pa ki te ikuga, ka fakaolagia.

²³ Kāfai koutou e hāuāgia i he kakai, hōhola ki hētahi kakai. Auā e takutino atu e au ki a te koutou, e pa atu ki te taimi e hau ai te Ataliki o te Tagata, ko hēki hoko lava tautou gāluega i nā kakai uma o Ihalaelu.

²⁴ “E hēai he tamaiti akoga e hili atu i lo tona faiakoga; e hēai he pologa e hili atu i lo tona matai.

²⁵ Ko te mea ia e tatau ai i te tamaiti akoga ke fiafia oi kavea ia ke vē ko tona faiakoga, ma te pologa ke vē ko tona matai. Kāfai te ulu o te kāiga e fakaigoa ki a Pelehepulo, ka hē hili atu nei la te kino o nā igoa ka fakaigoa ai nā tino o te kāiga!

Ko te Tino e Tatau ke Mātataku Ai

²⁶ “Koutou la nahe mātataku i tagata; auā e hēai he mea e tatao ke galo ka hē toe kitea, pe mumuni ka hē toe iloa.

²⁷ Ko nā mea e lea atu ai au ki a te koutou i te pōuli, e tatau ke tautatala ai koutou i te ao teatea, ma ko nā mea e lagona muhumuhu e koutou, e tatau ke vākai i loto o te malae.

²⁸ Ma ia koutou nahe mātataku i nā tino e tāmate e ki lātou te tino o te tagata, kae hē ki lātou mafaia oi tāmate te agaga; kae mātataku i te Atua e ia mafaia oi fakaumatia te tino fakatahi ma te agaga i te afi o kēna.

²⁹ E hē lua nei ni tamā manulele e mafai ke fakatau atu i he pene e fokotahi? Kae e hēai he tamā manulele e pakū tauanoa ki te kelekele, kāfai e hē loto ki ei te koutou Tamana i te lagi.

³⁰ Kae e pa foki lava kinā laulu i outou ulu, kua uma te faitau.

³¹ Koutou la nahe mātataku; e hili lele atu te tāua o koutou i te Atua i lo nā tamā manulele e lahi.

Ko te Talia pe ko te Teteke o Keliho

³² “Auā ko nā tino e folafola e ki lātou i mua o tagata ko ki lātou e āku, ka vēnā foki oi fai e au i mua o toku Tamana i te lagi.

³³ Kae ko ai lava ia tetekea au i mua o tagata, ka vēnā foki oi teteke e au i mua o toku Tamana i te lagi.

E Hē ko te Fīlēmū kae ko he Pelu

³⁴ “Koutou nā vēakē ko au kua hau ke kaumai te fīlēmū ki te lalolagi. Hēai, ko au e hēki hau ke kaumai te fīlēmū, kae ko he pelu.

³⁵ Ko au kua hau ke fakahagatau ai te ataliki ki tona tamana, te afafine ki tona mātua, te fafine āvaga ki loto o te kāiga, ki tona fai mātua;

³⁶ ko nā fili e hili te kino o he tino, ko nā tino lava o tona kāiga.

³⁷ “Ko ai lava te hili tona alofa ki tona tamana pe ko tona mātua i lo au, e hē aogā ia ke kavea ma oku hoko; ko ai lava te hili tona alofa ki tona ataliki pe ko tona afafine i lo au, e hē aogā ia ke kavea ma oku hoko.

³⁸ Ko te tino e hē ia amoa tona hātaulo ma mulimuli mai ki a te au, e hē aogā ia mo au.

³⁹ Ko te tino e mānumanu ki tona ola, ka hē ia mauagia; kae ko te tino e māumau tona ola ona ko au, ka maua e ia.

Ko nā Taui

⁴⁰ “Ko ai lava e ia talia koutou, kua ia talia foki au, ma ko ai lava e ia talia au kua ia talia foki tē na ia uga maia au.

⁴¹ Ko ai lava e ia talia he pelofeta ona ko he pelofeta e a te Atua, ka maua fakatahi to lā taui. Ko ai lava e ia talia he tino āmiotonu ona ko he tino āmiotonu, ka maua fakatahi to lā taui.

⁴² Ko ai lava e ia tuku atua, e tuha lava pe he ipu vai malūlū, ki hētahi o oku hoko iēnei e hili te fakatauva ona ko he hoko e ōku, e takutino atu e au ki a te koutou, ka maua lava e ia tona taui.”