Maleko 9 - Tokelauan New Testament

¹ Oi toe vāgana atu ai ia Iehu ki a te ki lātou, “E takutino atu e au ki a te koutou, e i ei nā tino ka ki lātou kiteagia te Mālō o te Atua kāfai ka pa mai ma te mālohi o tana pule, ka ko hēki feoti ki lātou.”

Ko te Hūiga ki te Tino o Iehu

² Kua teka atu nā aho e ono, oi kave ai e Iehu ia Petelu, ko Iakopo, ma Ioane kua olo ma ia ki luga o he mauga maualuga nā ko ki lātou. Oi hūia ai te tino o Iehu kae kikila atu ki lātou,

³ ma ko ona kofu kua gigila tāhinahina — kua hili atu tona paepae hihina i lo te paepae e mafai ke fakapaepae ki ei he mea, i te lalolagi kātoa.

⁴ Oi kitea atu ai foki e ki lātou ia Elia ma Mohe e faitatala ma Iehu.

⁵ Oi lea atu ai ia Petelu ki a Iehu, “Te Faiakoga, te lelei ko ki mātou e i kinei! Ka fakatutū la e ki mātou ni fakamalumalu e tolu; ko tētahi mo koe, ko tētahi mo Mohe, ma tētahi mo Elia.”

⁶ Ko te mātataku o Petelu ma tētahi toka lua, kua hē hāfia lele ai e Petelu pe ka vēhea ake hana kupu.

⁷ Oi hula mai ai he ao ma malutū ai ki lātou, ma he leo e fanaifo mai te ao e vē ifo, “Ko toku Ataliki pele tēnei — fakalogo ki ei!”

⁸ Kae teki lava e kikila atu ki lātou kua hēai hētahi tino e i ei ma ki lātou kae nā ko Iehu oioti.

⁹ Ka koi ōifo ki lātou ki lalo o te mauga ka kua fakatonu vēnei atu e Iehu te toka tolu, “Nahe koutou takua lele ki he tino te mea na koutou kitea, heiloga kua toe tū te Ataliki o te Tagata mai te oti.”

¹⁰ Na uhitaki ki lātou ki te fakatonuga a Iehu, kae kua kāmata oi fakataufai ki lātou lava, “He ā nei te uiga o tana kupu, ‘toe tū mai i te oti?’ ”

¹¹ Oi fehili atu ai ki lātou ki a Iehu, “He ā te lea ai nā faiakoga o te Tūlāfono e tatau ke mua hau ia Elia?”

¹² Kua tali mai ia Iehu, “E hako ko Elia e hau muamua ke toe tukutuku tonu ia mea uma. Ka ko he ā nei foki la te tūhia ai i nā Tuhituhiga Paia, ko te Ataliki o te Tagata e tatau ke maua i nā puapuagā e lahi ma teteke e tagata?

¹³ Kae ko au e lea atu ki a te koutou, ko Elia kua hau, ma na ki lātou faia ki a te ia ho he mea lava na fofou ki lātou ki ei, e vē lava oi tūhia i nā Tuhituhiga Paia e uiga ki a te ia.”

Kua Fakamālōlō e Iehu he Taumalo e Ulufia e he Agaga Kino

¹⁴ Kua pa ifo ki lātou ki lalo ki te mea e i ei iētahi hoko o ia, oi kitea ai e ki lātou he kaifenua tokalahi i kinā ma ni faiakoga o te Tūlāfono e fai fīnauga ma ona hoko.

¹⁵ Na tēteki lele ia tagata i te kitea atuga e ki lātou o Iehu, oi fētutuli ai oi fakafeiloaki ki ei.

¹⁶ Oi fehili atu ai ia Iehu ki ona hoko, “He matākupu a te fai fīnauga ai koutou ma nā tino iēnā?”

¹⁷ Kua tali mai he tamāloa i te kaifenua ki a Iehu, “Te Faiakoga, ko au na hau oi kaumai toku ataliki ki a te koe ona e ulufia e he agaga kino ma hē mafai ke tautala.

¹⁸ Ko taimi uma lava e ulufia ai, e ato lava ia e ia ki lalo, ma hau te takāpia i nā gutu, e gugu ona nifo ma mākeketū tona tino kātoa. Na lea au ki ō hoko ke ki lātou tulia ki fafo te agaga kino, kae e hēki ki lātou mafaia.”

¹⁹ Oi tali atu ai ia Iehu ki a te ki lātou, “Kai te hē talitonu o tagata o tēnei tupulaga! He ā nei te mataloa e tatau ke fakatahi ai pea au ma koutou? He ā nei te mataloa ka onohai ai pea au? Kaumai te taumalo ki a te au!”

²⁰ Oi kaumai ai loa e ki lātou te taumalo ki a Iehu. Na kitea atu lava ia Iehu e te agaga kino, fakatete loa lava e ia te tino o te taumalo, oi pakū ai te taumalo ki te kelekele kua takafilifili ai, ka kua hau te takāpia i nā gutu.

²¹ Na fehili atu loa ia Iehu ki te tamana o te taumalo, “He ā nei te mataloa talu te tauale vēnei?” Kua tali mai te tamana, “Na tauale vēnei mai lava ka koi tamaiti lele.

²² E lahi nā taimi e taumafai ai te agaga kino ke tāmate toku ataliki oi e ia togia ki loto o te afi ma ki loto o te vai. Alofa ko ma fehoahoani mai ki a te ki māua kāfai e kē mafaia!”

²³ Kua lea atu Iehu ki ei, “He ā te lea vē ai koe, ‘Kāfai e kē mafaia’? E mafai ia mea uma e te tino e fakatuatua.”

²⁴ Ko te taimi lava tēnā na tagi ai te tamana, ma lea vē atu ki a Iehu, “Ko au e fakatuatua, kae e hē lava. Fehoahoani mai ko ki a te au kae ke fakalahi ātili ai toku fakatuatua!”

²⁵ Kua kitea atu e Iehu te kaifenua kua kāmata nunu atu ki te mea e i ei ki lātou, oi fakatonu loa e ia te agaga kino vēnei, “Ko au e lea atu ki a te koe, te agaga e tutuli ma gūgū ai te taumalo, hau nei loa ki fafo, e hā foki koe oi toe ulu ki a te ia!”

²⁶ Na taukekē loa te agaga kino ma fakatete lahi te taumalo oi hau ai ki fafo. Kua tatia te taumalo e vē he tino kua oti, ko te mea ia na lea vē ai te tokalahi o nā tino, “Ko te taumalo kua oti!”

²⁷ Ka kua tago atu ia Iehu ki te lima o te taumalo kua fakatū ki luga, oi tū ai ki luga.

²⁸ Kua fano ia Iehu ki loto o te fale, kua nā ko ia ma ona hoko, oi fehili atu ai ona hoko ki ei, “He ā nei te hēki mafai ai e ki mātou oi tuli ki fafo te agaga kino?”

²⁹ Oi tali atu ai ia Iehu, “Ko te tatalo oioti lava te mafai ke tuli kehe ai ki fafo te itūkāigā agaga kino tēnei.”

Kua toe Tautala ia Iehu e uiga ki tona Mate

³⁰ Kua olo kehe ia Iehu ma ona hoko mai kinā, oi olo ai kui loto atu i Kalilaia. E hēki fofou ia Iehu ke iloa e he tino te mea e i ei ai ia,

³¹ ona e fai ai nā akoakoga a ia ki ona hoko. Kua lea vē atu ki ona hoko, “Ko te Ataliki o te Tagata ka tukulima atu ki lalo o te pule a tagata, ma ka ki lātou tāmatea. Kae e teka nā aho e tolu, oi ka toe fakatū ai mai i te oti.”

³² Kae e hēki mālamalama ki lātou i te uiga o te fakakupuga tēnei, ma nae mātataku foki oi fehili e uiga ki ei.

Ko Ai te Hili ona Tāua?

³³ Kua pa atu ki lātou ki Kapenaumi, kua ulu ki lotofale oi fehili atu ai ia Iehu ki ona hoko, “He matākupu a ko te nae fīnau ai koutou i te auala?”

³⁴ E hēki i ei he tino e vaivaia, auā nae fīnau pe ko ai to ki lātou e pito hili ona tāua.

³⁵ Na nofo ifo loa ki lalo ia Iehu, ma tautapa atu ki ona hoko e toka hefululua ke hōhō ake ki a te ia, oi lea vē atu ai ki ei, “Ko te tino e fia kavea ma muamua, e tatau ke ia tukua ia ia lava ke kavea ma mulimuli, ma fai ma tāvini ki tagata uma.”

³⁶ Oi tago atu ai ia Iehu oi fakatū he tamaiti i mua o ki lātou. Kua ōpoipoi mai e ia te tamaiti i ona lima, ma lea vē atu ki ona hoko,

³⁷ “Ko ai lava he tino e ia talia he tamaiti vēnei i toku igoa, kua ia talia foki au; ma ko ai lava e ia talia au, kua ia talia foki tē na ia uga maia au.”

Ko te Tino e hē Teteke mai e kau ki Tātou

³⁸ Kua lea vē atu ia Ioane ki a Iehu, “Te Faiakoga, na ki mātou kitea he tino na ia tulia ki fafo nā tēmoni i tō igoa, oi vavao ai e ki mātou auā e hē he tino e o ki tātou.”

³⁹ Ka kua vāgana atu ia Iehu ki a te ki lātou, “Nahe vavaoa te tino tēnā; auā e hēai he tino e ia faia he vāvega i toku igoa kae hohoko ai, kua tautala i ni kupu kino e uiga ki a te au.

⁴⁰ Auā ko te tino e hē teteke mai ki a te ki tātou, e kau ma ki tātou.

⁴¹ E takutino atu e au ki a te koutou, ho he tino lava e ia fōki atua he ipu vai ona ko koutou e āku, ka maua lava e ia tona taui.

Ko nā Fakaohoohoga ki te Agahala

⁴² “Ko ai lava he tino e ia faia he mea ke uma ai te fakatuatua mai ki a te au o hētahi o ki lātou iēnei e tamaiti, e hili ai mo te tino tēnā te nonoa o he fatupae lahi lele ki tona ua, ma togi ai ki te tai.

^43-44 Ma kāfai ko tō lima te māfua ai oi uma tō fakatuatua, tipi kehe! E hili atu tō hao ki te ola e hē gata kae lima tahi, i lo te kātoa o nā lima kae togi ai koe ki kēna, te afi e hē mafai ke mate.

^45-46 Ma kāfai ko tō vae te māfua ai oi uma tō fakatuatua, tipi kehe! E hili atu tō hao ki te ola e hē gata kae vae tahi, i lo te kātoa o nā vae kae togi ai koe ki kēna.

⁴⁷ Kāfai foki ko tō mata te māfua ai oi uma tō fakatuatua, hali kehe ki ko! E hili atu tō hao ki te Mālō o te Atua kae mata tahi, i lo te kātoa o nā mata kae togi ai koe ki kēna.

⁴⁸ I kinā, ‘ko nā gāio e kaia ki lātou e hē mamate lele, ma te afi e huhunu ai ki lātou e hē mate lele.’

⁴⁹ “Auā ka fakamamāgia ia tagata tau tokatahi uma i te afi, e vē ona fakamamāgia te tāulaga i te māhima.

⁵⁰ “Ko te māhima e lelei, kae kāfai te māhima kua uma tona kokona, e mafai vēhea nei ke toe fakakokona e koutou? “Ke ia te koutou te māhima ke tūmau ai pea te koutou fealofani ma te fīlēmū, i te va o tētahi ma tētahi.”