Maleko 8 - Tokelauan New Testament

Kua Fafaga e Iehu te Toka Fa Afe

¹ E hēki mataloa, kae toe fakapotopoto mai foki te kaifenua e tokalahi. Ona kua hēai ni meakai ma tagata ke kakai ai, na kalaga atu ai loa ia Iehu ki ona hoko ke ōake ki a te ia, oi lea vē atu ai ki ei,

² “Ko au te alofa ki nā tino iēnei auā ko te tolu tēnei o aho koi kinei lava ki lātou ma au, ma kua hēai ni a lātou mea ke kai.

³ Kāfai nei ka uga e au ke olo ka ko hēki i ei he lātou mea e kai, e matapogia nei ni tino i te auala auā ko iētahi tino e mamao lele nā koga na ōmamai ai.”

⁴ Kua fehili atu ona hoko ki ei, “Ko fea nei i te togāvao tēnei ke maua ai e he tino ni meakai e lava, ke fafaga ai nā tino uma lele iēnei?”

⁵ “E fia autou falaoa?” kua fehili atu ia Iehu. “E fitu ia falaoa,” kua tali mai ki lātou.

⁶ Na fakatonu loa e Iehu te kaifenua ke nonofo ki lalo. Oi tago ai ki nā falaoa e fitu, kua fakafetai ki te Atua, oi tavaevae ai e ia ma fōki ki ona hoko ke tufa ki te kaifenua; na vēnā lava oi fai e te kau hoko.

⁷ Nae i ei foki ni nai ika taigogole a ki lātou. Kua fakafetai ia Iehu ki te Atua mo nā mea iēnei, oi fōki ai ki nā hoko ke tufa foki ki tagata.

⁸ Kua kakai ia tagata uma ma kua mākokona; oi fakaputu ai e te kau hoko nā tōega ma na tūtumu ai nā polapola e fitu. E tuha e toka fa afe ia tino nae i ei.

⁹ Oi uga ai loa e Iehu nā tino ke olo,

¹⁰ kae hohopo ma ona hoko ki he vaka ma olo ki te itūmālō ko Talamanuta te igoa.

Kua Fofou te kau Falehaio ki he Fakailoga Ofoofogia

¹¹ Kua ōmamai ni tino o te kau Falehaio ki a Iehu ma kāmata fīnau ki ei. Nae fofou ke ki lātou tofotofoa ia Iehu, oi na lea ai ki ei ke fai he fakailoga ofoofogia ke iloa ai pe kua ia te ia moni te pule mai te Atua.

¹² Ka kua mānava lahi ia Iehu oi lea vē atu ai, “He ā nei te fofou ai nā tino o nā aho nei ki he fakailoga ofoofogia? E lea atu au e hēai! E hēai he fakamāoniga vēnei e fai ki nā tino iēnei!”

¹³ Na tukua loa e ia nā tino iēnei, kae toe hopo ki te vaka ma fano agai ki tētahi itū o te vaitūloto.

Ko te Mea Fakafefete a te kau Falehaio ma Helota

¹⁴ Na pupuli nā hoko ke kave ke lava ni a lātou falaoa, ma e fokotahi oioti lava te falaoa na olo ma ki lātou i te vaka.

¹⁵ Kua apoapoaki atu ia Iehu ki a te ki lātou, “Koutou ke mataala ma fakaeteete lele i te mea fakafefete a te kau Falehaio, ma te mea fakafefete a Helota.”

¹⁶ Oi kāmata ai kua fakataufai te kau hoko nā ko ki lātou ma lea vē tētahi ki tētahi, “E lea mai vēnei auā e hēai ni a tātou falaoa.”

¹⁷ Kua iloa e Iehu nā mea e fakataufai ai ki lātou, oi lea vē atu ai ki ei, “He ā te fakataufai ai koutou ki te hēai o ni falaoa? Ko hēki koutou hāfia moni nei lava pe mālamalama? Ko outou loto nei ko e makaka?

¹⁸ E fai outou mata kae e hē koutou kitea? E fai outou taliga kae e hē koutou lagona? E hē koutou manatua

¹⁹ te tavaevaega e au o nā falaoa e lima mo nā tino e toka lima afe? E fia ia polapola na tūtumu i nā tōega na koutou aoa?” Kua tali mai te kau hoko, “E hefululua.”

²⁰ Kua toe fehili atu ia Iehu, “I te tavaevaega e au o nā falaoa e fitu mo nā tino e toka fa afe, e fia ia polapola na tūtumu i nā tōega na koutou aoa?” Kua tali mai te kau hoko, “E fitu.”

²¹ Oi vē atu ai loa tana fehili, “Ko koutou la ko hēki mālamalama lava?”

Kua Fakamālōlō e Iehu he Tāuaho i Petehaita

²² Kua taunuku atu ia Iehu ma ona hoko ki Petehaita, oi ōmamai ai nā tino oi kaumai he tāuaho ki a Iehu. Kua fakatagi atu ki lātou ki a Iehu ke paki ake ona lima ki te tāuaho.

²³ Na puke atu loa ia Iehu ki te lima o te tāuaho oi tataki ai e ia ki fafo o te kakai. Kua feanu ia Iehu ki nā mata o te tāuaho ma fakauta atu ona lima ki ona luga, kae fehili vē atu ki ei, “E kē kitea he mea?”

²⁴ Kua tagaki ake te tino ki luga oi tali vē atu ai, “Io, kua kō kitea nā tino, kae e vē ni lākau e hāvavali.”

²⁵ Na toe tuku atu nā lima o Iehu ki nā mata o te tāuaho; oi pupula hako loa nā mata o te tāuaho ki mua oi kitea lelei ai e ona mata, kua manino lelei tana kikila ki mea uma.

²⁶ Oi uga ai e Iehu te tino tēnei ke toe foki ki tona kāiga ma te fakatonuga e vēnei, “Ia koe nahe kui atu i te kakai.”

Ko te Takutinoga a Petelu e uiga ki a Iehu

²⁷ Oi olo ai ia Iehu ma ona hoko ki nā nuku e pili ki Kaihaleia Filipi. E havalivali atu i to lātou auala, kae fehili vēnei atu ia Iehu ki ona hoko, “Ko nā tino e lea, ko ai au?”

²⁸ Kua tali mai ki lātou, “Ko Ioane te Papatiho; kae ko iētahi tino e lea ko koe ko Elia, ka ko iētahi e lea ko koe he tino lava e o te kau pelofeta.”

²⁹ Ma kua fehili atu ia Iehu ki a te ki lātou, “Kae e vēhea ake la koutou? E lea koutou ko ai au?” Kua tali mai ia Petelu, “Ko koe ko te Mehia.”

³⁰ Oi fakatonu ai ki lātou e Iehu vēnei, “Nahe koutou lea lele ki he tino e uiga ki a te au.”

Kua Tautala ia Iehu e uiga ki ona Puapuagā ma tona Mate

³¹ Oi kāmata ai oi akoako atu vēnei e Iehu ki ona hoko, “Ko te Ataliki o te Tagata e tatau ke maua i nā puapuagā e lahi ma teteke ki ei nā toeaina, nā ohitāulaga hili, ma nā faiakoga o te Tūlāfono. Ka ki lātou tuku atua ia ke tāmate, kae i tona tolu o aho, ka toe tū ia mai te oti.”

³² Na fakamanino lelei lava e Iehu te mea tēnei ki a te ki lātou. Oi tataki kehe ai e Petelu ia Iehu, ma kāmata oi tautala mālohi ki ei.

³³ Kae kua māfuli atu ia Iehu ki ona tua, ma ia kitea atu ona hoko. Oi tautala mālohi ai ki a Petelu, kua lea vē atu ki ei, “Hātani, fano kehe koe ma au! Auā ko ō manatu e hē mai te Atua, kae ni manatu fakatetagata!”

³⁴ Oi kalaga atu loa ia Iehu ki tagata ma ona hoko ke ōake ki a te ia, oi vāgana atu ai ki ei, “Kāfai he tino e fia mulimuli mai ki a au, e tatau ke tīaki e ia nā mea e fiafia ia ki ei, kae amo tona hātaulo ma mulimuli mai ki a te au.

³⁵ Auā ko ai lava e mānumanu ki tona ola, ka hē ia mauagia; kae ko ai lava e māumau tona ola ona ko au ma te Tala Lelei, ka maua e ia.

³⁶ He ā nei he aogā kāfai e maua e he tino te lalolagi kātoa, kae māumau ai tona ola?

³⁷ He ā te mafai e he tino ke fōki kae ke toe ia maua ai tona ola?

³⁸ Auā ko ai lava he tino i tēnei tupulaga hē talitonu ma te agahala, e mā ia te au ma aku akoakoga, ka vēnā foki oi mā te Ataliki o te Tagata i te tino tēnā, kāfai e hau i te mamalu o tona Tamana fakatahi ma te kau agelu paia.”