Maleko 7 - Tokelauan New Testament

Ko Akoakoga a nā Tupuna

¹ Ko iētahi o te kau Falehaio fakatahi ai ma ni faiakoga o te Tūlāfono na ōmamai mai Ieluhalema, kua fakapotopoto ki tafa o Iehu.

² Oi ki lātou kitea atu ai iētahi hoko e kakai ma o lātou lima e hē mamā — ko tona uiga e hēki fafanoa o lātou lima e vē ko te fakahinoga a te kau Falehaio ki tagata ke mulimuli ki ei.

³ (Auā ko te kau Falehaio ma tagata Iutaia uma, e tauhihi lava ki nā akoakoga na ki lātou maua mai i o lātou tupuna; e hē mafai ke kakai heiloga e mua fafano o lātou lima, e vē ko te tu tau tāpuakiga kua māhani ai.

⁴ E hē mafai foki ke kakai ki ho he mea e kaumai i te māketi heiloga ke fufulu muamua. E mulimuli foki ki te lahi o iētahi tūlāfono, e vē ko te faiga tonu e fufulu ai nā ipuinu, nā ulo, nā ipu apamemea ma nā moega.)

⁵ Kua fehili atu te kau Falehaio ma nā faiakoga o te Tūlāfono ki a Iehu, “He ā te hē mulimuli ai nā hoko o koe ki nā akoakoga na tuku mai e o tātou tupuna, kae kakai vē lava ma o lātou lima hē mamā?”

⁶ Ka kua tali mai ia Iehu ki ei, “Te hako lele o Ihaia i tana vāloaga na fai e uiga ki a te koutou! Ko koutou ni tagata āmio pepelo, e vē ona tūhia e ia: ‘Ko nā tino iēnei, kua vāgana ai te Atua, e viviki mai ki a te au ia lātou kupu, ka ko o lātou loto e mamao lele ma au.

⁷ E hēai he aogā e tāpuaki mai ai ki lātou ki a te au, auā e ki lātou akoakoa ia tūlāfono a tagata, e vēia ni tūlāfono e a āku!’

⁸ “Kua tuku kehe e koutou nā fakatonuga a te Atua, kae uhitaki ki nā akoakoga a tagata.”

⁹ Kua toe vāgana atu ia Iehu, “Kua teteke e koutou te tūlāfono a te Atua kae ke mulimuli ai pea koutou ki autou akoakoga.

¹⁰ Auā na fakatonu mai e Mohe ke, ‘Āva ki tō tamana ma tō mātua,’ ma, ‘Ko ai lava e faia ni kupu kino ki tona tamana pe ki tona mātua, e tatau ke tāmate.’

¹¹ Kae e akoako e koutou kāfai ni tino e i ei ni a lātou mea e ono mafai ke fehoahoani ai ki o lātou tamana pe ko o lātou mātua, ka kua lea koutou, ‘Ko te mea tēnei kua Kōpana’ (ko tona uiga, e mo te Atua),

¹² kua fakahā e koutou ke fehoahoani ki nā tamana pe ko nā mātua o ki lātou.

¹³ Kua fai autou akoakoga iēnei ki nā tino, ma mea kua fakahēaogā ai e koutou te kupu a te Atua. E lahi foki iētahi mea vēnei e fai e koutou.”

Ko nā Mea e hē Mamā ai he Tino

¹⁴ Oi toe kalaga atu ai ia Iehu ki te kaifenua ke ōake ki a te ia, oi vāgana atu ai ki ei, “Fakalogo mai koutou uma ki a te au, ke mālamalama koutou.

^15-16 E hēai he mea e fano mai fafo ki loto o he tino, e hē mamā ai i nā tu tau tāpuakiga. Kae ko te mea e hau ki fafo mai he tino te hē mamā ai.”

¹⁷ Kua tukua e Iehu te kaifenua kae ulu atu ki loto o te fale, oi fehili atu ai ona hoko ki ei ke fakamālamalama ake ki a te ki lātou te talafakatuha tēnei.

¹⁸ Ka kua vāgana atu ia Iehu ki ei, “Kua tutuha lava te koutou hē mālamalama ma iētahi tino. E hē koutou iloa e hēai he mea e fano ki loto o he tino kui atu i te gutu, e hē mamā tauanoa ai i te tūlāfono,

¹⁹ auā e hē fano ki tona loto kae fano ki loto o tona manava oi fano ai ki fafo o te tino.” (I tana tautalaga tēnei, na fakailoa ai e Iehu ko nā meakai uma lele e lelei ke kakai ki ei.)

²⁰ Kua toe vēnei atu te kupu a Iehu, “Ko te mea e hau ki fafo mai te loto o he tino te hē mamā ai ia.

²¹ Auā ko te loto o te tagata e puna mai ai nā manatu kino ma tataki ai ke fai nā āmio kino, te kaihohoa, te tāmate tino,

²² te mulilua, te manako lahi, ma te fai o nā itūkāigā āmio kino uma, te talapepelo, te faiamio, te lotokino, te faitala fakakino, te fāfia ma te āmio valea.

²³ Ko nā mea kino uma iēnei e puna mai i te loto o he tino ma fai ma mea e hē mamā ai ia.”

Ko te Fakatuatua o he Fafine

²⁴ Kua fano kehe ia Iehu mai kinā ka kua fano ki te kogāfenua e pili ki te kakai ko Tulo. Kua ulu atu ki loto o he fale ma e hēki fofou ke iloa e he tino ko ia ei kinā, kae na iloa lava.

²⁵ E i ei he fafine nae ulufia tana tama teine e he agaga kino. Na lagona lava e ia te fakamatalaga e uiga ki a Iehu, oi fano ai ki ei i te taimi lava tēnā, kua tōtuli i mua o Iehu.

²⁶ Ko te fafine ko he Eleni, na fānau i Foinike i Hulia. Kua fakatagi ki a Iehu ke tuli kehe te tēmoni e ulufia ai tana tama teine.

²⁷ Ka kua tali atu ia Iehu ki ei, “Muamua fafaga e ki tātou ia tamaiti, auā e hē ko he mea tatau ke kave te meakai a tamaiti oi togi ma nā kulī.”

²⁸ Kae kua tali mai te fafine, “Io e hako te Aliki, kae e pa foki lava ki nā kulī i lalo o te laulau, e kakai ki nā matutuga a tamaiti e malili ki lalo!”

²⁹ Oi vāgana atu ai ia Iehu ki te fafine, “Ona ko tau tali tēnā, fano la ki tō fale, ko te tēmoni kua fano kehe mai tau tama teine!”

³⁰ Na fano loa te fafine ki tona fale, oi ia maua atu ai tana tama teine e tautakafili i luga o te moega; ma e hako lava ko te tēmoni kua fano kehe ma ia.

Kua Fakamālōlō e Iehu he Tutuli e Gūgū.

³¹ Na tukua e Iehu te kogāfenua o Tulo, kae toe foki ki te Vaitūloto ko Kalilaia kui atu i Haitonu ma nā kogāfenua o nā Kakai e Hefulu.

³² Kua kaumai e ni tino ki a te ia he tamāloa e tutuli ma tau hē mafai ke tautala. Kua fakatagi atu ki lātou ki a Iehu ke fakaeke ona lima ki luga o te tutuli.

³³ Oi tataki kehe ai e Iehu te tutuli mai te kaifenua, kua nā ko ki lāua toka lua. Oi tuku ai nā muamuālima o Iehu ki loto o nā taliga o te tutuli, kua feanu, oi paki atu ai foki ona muamuālima ki te laulaufaiva.

³⁴ Oi kikila ake ai ia Iehu ki te lagi, kua mānava lahi, kae lea vē atu ki te tino, “Efata,” ko tona uiga, “Matala loa!”

³⁵ Oi matala ai ona taliga ma kave kehe te mea nae lave ai tana tautala, ma na lelei lele ai tana tautala.

³⁶ Oi fakatonu ai e Iehu ia tagata ke nahe ki lātou takua lele ki he tino te mea na tupu; kae na vē lava e lea atu ke fakaatili ai te ki lātou tālakia o te tala.

³⁷ Ko nā tino uma na fakalogo ki te tala tēnei, na ofo lahi lele ma lea vē, “Kai te lelei o te faiga o nā gāluega a ia! E pa lava ki nā tutuli ma nā gūgū kua toe taligalogo ma tautatala!”