Maleko 6 - Tokelauan New Testament

Kua Teteke e Tagata o Nahaleta ia Iehu

¹ Kua fano kehe ia Iehu mai kinā, ma kua toe foki ki tona nuku, ma mulimuli atu ai ma ona hoko kua olo fakatahi ma ia.

² Kua pa ki te Hāpati oi kāmata ai kua akoako atu ia Iehu i te hūnako. Nae tokalahi nā tino nae i ei; i te ki lātou lagonaga o nā akoakoga a Iehu, na taufai ofo uma ma fehili vē, “Ko fea nei te na maua mai ai e te tagata nei iēnei mea uma? He poto vēhea tēnei kua ia mauagia? E vēhea nei te faiga o ana vāvega?

³ E hē ko ia tēnei te kāmuta, te tama a Malia, te uho o Iakopo, Iohefa, Iuta ma Himona? E hē ko nā tuafafine uma o ia e i kinei ma ki tātou?” Ko te mea ia na teteke ai e ki lātou ia Iehu.

⁴ Oi vāgana atu ai ia Iehu ki a te ki lātou, “E mamalu te pelofeta i ho he mea, kae vaganā ai i loto o tona nuku, ma te mea e i ei ona tagata, ma loto o tona kāiga.”

⁵ E hēki ia mafaia oi fai he vāvega e fokotahi i kinā, kae vaganā ai te fakaeke atuga o ona lima ki luga o ni nai tino nae tauale, oi mālōlō ai ki lātou.

⁶ Ma na ofo lele ia Iehu ki te hē fakatuatua o tagata. Oi fano ai ki nā nuku i te kogāfenua tēnā, ma akoako atu ki tagata.

Kua Uga atu e Iehu ona Hoko e toka Hefululua ke Tālaki

⁷ Kua fakapotopoto mai e Iehu ona hoko e toka hefululua, oi uga atu ai e ia ki lātou ke olo tau toka lua. Na tuku atu e ia ki a te ki lātou te pule ke ki lātou pūlea ai nā agaga kino.

⁸ Kua fakatonu vēnei atu e ia ki lātou, “Nahe kavea e koutou he mea e fokotahi i te koutou malaga, vaganā ai he tokotoko — nahe kavea he falaoa, he ato pe ni tupe i outou taga.

⁹ Fai ni outou hēvae, kae nahe kavea he kofutino fakaleoleo.”

¹⁰ Oi toe vē atu ai tana kupu ki a te ki lātou, “Ko fea lava e talia ai koutou, nonofo i te fale tēnā ke pa ki te taimi e toe olo kehe ai koutou mai te kakai tēnā.

¹¹ Kāfai koutou e tau atu ki he kakai e hē talia ai koutou, ma mumuhu ia tagata oi fakalogo atu ki a te koutou, olo kehe ma kinā ma lūlū kehe te pefu mai outou vae. Ka fai tēnā ma fakailoga ke ki lātou iloa ai te ikuga ka pa ki lātou ki ei.”

¹² Oi olo ai loa kua tālaki atu ki tagata ke liliu kehe mai ia lātou agahala.

¹³ Na ki lātou tuli kehea te tokalahi o nā tēmoni, ma ukua i te lolo ōlive nā tauale e tokalahi ma na mālōlō ai ki lātou mai o lātou tauale.

Ko te Mate o Ioane te Papatiho

¹⁴ Kua lagona e te Tupu ko Helota nā mea iēnei ona kua takutakua lele te igoa o Iehu i ho he nofoaga. Kua lea vē iētahi tino, “Ko Ioane te Papatiho tēnei kua toe ola mai; ko te mea ia e ia mafaia ai oi fai nā vāvega.”

¹⁵ Kae ko iētahi kua lea vē, “Ko Elia tēnei.” Ka ko iētahi kua lea vē, “He pelofeta tēnei, e vē lava ko nā pelofeta i nā aho kua leva.”

¹⁶ Kae i te lagonaga e Helota, oi vēake ai tana kupu, “Ko Ioane te Papatiho na kō fakatonua ke tipi kehe tona ulu, kua toe ola mai!”

¹⁷ Auā na fakatonu e Helota ke puke fakapagotā ia Ioane ma noanoa i loto o te falepuipui. Na fai e ia te mea tēnei ona ko Helotia te āvaga a tona uho ko Filipo, kua fai ma ana āvaga.

¹⁸ Auā ko Ioane na lea vē ki a Helota, “E fakahā i te Tūlāfono ke nofo koe ki te āvaga a tō uho!”

¹⁹ Ko te mea ia nae ita ai pea lava ia Helotia ki a Ioane ma fofou ke tāmate, kae nae hē mafai ke fai hana mea ki ei ona ko Helota.

²⁰ Ko Helota nae mataku ia Ioane, ona na ia iloagia ko he tino āmiotonu ma mālohi tona fakatuatua ki te Atua, ko te mea ia nae ia kikila lelei ai ke nahe i ei he mea e tupu ki ei. Nae fiafia lele oi fakalogologo ki a Ioane e ui lava e ia lagona te popole o tona loto i taimi uma e ia lagona ai ia Ioane e tautala.

²¹ Kae iku ake, na maua te avanoa o Helotia ke tāmate ai ia Ioane. Kua pa ki te aho fānau o Helota, oi fai ai e ia he kaiga na fakatahi atu ki ei nā ulu o te mālō, nā ulu takitakikau, ma nā ulu o nofonofoga a tagata i Kalilaia.

²² Ko te tama teine a Helotia na hau ki loto oi hiva i te kaiga, oi na fai ma mea na fiafia lahi lele ai ia Helota ma te kau valakaulia. Oi lea atu ai ia Helota ki te teine, “He ā he mea e fia maua e koe? E fōki atu e au ki a te koe ho he mea lava e fofou koe ki ei.”

²³ Na fai tana tautōga ki te teine e vē, “Ko au e tautō atu e kō fōki atua mo koe ho he mea lava e fofou koe ki ei, e tuha lava pe ko te āfa o toku mālō!”

²⁴ Oi fano ai te teine ki fafo oi fehili vē atu ki tona mātua, “He ā nei he mea ke lea au ki ei?” “Lea ki te ulu o Ioane te Papatiho,” kua tali mai tona mātua.

²⁵ Na foki fakavave loa te teine ki te tupu ma lea vē atu ki ei, “Ko au e fofou ke fōki mai e koe nei lava, te ulu o Ioane te Papatiho i luga o he peleti lahi!”

²⁶ Na fakanoanoa lahi lele te tupu i te mea tēnei, kae ona ko tana tautōga na fai i mua o te kau valakaulia, e hēki ia mafaia ai oi teteke ki te mea kua lea ake ai te teine.

²⁷ Ko te mea ia na ia uga atua ai loa lava he fitafita ma te fakatonuga ke kaumai te ulu o Ioane. Oi fano ai te fitafita ki te falepuipui oi tipi kehe te ulu o Ioane;

²⁸ Oi kaumai ai e ia i luga o he peleti lahi ma fōki ki te teine, oi tuku atu ai e te teine ki tona mātua.

²⁹ I te lagonaga e nā hoko o Ioane te tala tēnei, oi ōmamai ai oi kave tona tino oi tanu.

Kua Fafaga e Iehu he Kaifenua e Tokalahi

³⁰ Kua toe liliu mai te kau apohitolo ma feiloaki ma Iehu, oi taku ai e ki lātou ki a te ia nā mea uma na fai ma akoako e ki lātou.

³¹ Ko te tokalahi o tagata nae holo mai ki a Iehu ma ona hoko, e oatu ni tino kae ōmamai ni tino, kua hē maua lele ai ho lātou avanoa ke kakai ai. Oi lea atu ai ia Iehu ki ona hoko, “Tātou olo ki hētahi mea nā ko ki tātou, kae ke mālōlō tahi foki koutou.”

³² Oi olo ai i he vaka nā ko ki lātou, ki he kogāfenua e tū fua.

³³ Kae e tokalahi nā tino na kiteagia te ologa ma mateagia ki lātou; ko te mea ia na mātuku atu ai loa ia tagata mai nā kakai uma, kua fētutuli kui gāuta ma taunuku muamua ki te mea e fakatū atu ki ei ia Iehu ma ona hoko.

³⁴ Koi fanake ia Iehu ki gāuta mai te vaka, kae ia kitea atu te tokalahi o te kaifenua, oi na tumu ai tona loto i te alofa ki a te ki lātou, auā e vē ki lātou ni māmoe e hēai ho lātou leoleomāmoe. Na kāmata loa oi akoako atu e ia nā mea e lahi.

³⁵ Kua fakaafiafi, oi ōmamai ai ona hoko ki a te ia ma lea vē mai ki ei, “Ko kinei ko he kogāfenua e tū fua, ma kua pō te aho.

³⁶ Uga ko nā tino ke olo ki nā fatoaga ma nā nuku e tafapili mai, ke fakatau ai ni a lātou mea ke kai.”

³⁷ Kae kua tali atu ia Iehu ki a te ki lātou, “Fōki ifo e koutou he lātou mea ke kai.” Oi lea atu ai ki lātou ki a te ia, “Ka olo nei la ki mātou oi fakatau mai ni falaoa e tuha ma te luahelau tēnali te tau, ke fafaga ai nā tino?”

³⁸ Oi kua fehili atu ia Iehu, “E fia autou falaoa? Olo oi kikila pe fia.” I te ki lātou iloaga, oi ōmamai ai oi lea vē atu ki a Iehu, “E lima ia falaoa ma nā ika e lua.”

³⁹ Oi lea ai ia Iehu ki ona hoko ke fakanonofo fai vāega nā tino uma lele ki luga o te mutia.

⁴⁰ Kua nonofo ki lalo nā tino i ni vāega, e tau toka helau iētahi, kae tau toka lima hefulu iētahi.

⁴¹ Oi tago ai ia Iehu ki nā falaoa e lima ma nā ika e lua, kua tepa ake ki te lagi ma fakafetai ki te Atua. Kua tavaevae e ia nā falaoa ma fōki ki ona hoko ke tufatufa ki nā tino. Na tavaevae foki e ia nā ika e lua mo nā tino uma lele.

⁴² Kua kakai ia tagata uma ma kua mākokona.

⁴³ Oi ao ai e te kau hoko nā toegā falaoa ma nā toegā mea ika, ma na tūtumu ai nā polapola e hefulu lua.

⁴⁴ Ko te nūmela o te kau tagata na fafaga e toka lima afe.

Kua Havali ia Iehu i luga o te Kilitai

⁴⁵ Na fakatonu loa lava e Iehu ona hoko ke olo ki luga o he vaka ma ke muamua ki Petehaita i tētahi itū o te vai, kae kua uga e ia te kaifenua ke olo ki o lātou kāiga.

⁴⁶ Kua mātuku atu ia tagata, oi fano ai ia Iehu ki luga o he mauga ke tatalo ai.

⁴⁷ E pa ki te afiafipō ko te vaka kua i lototonu o te vaitūloto, ka ko Iehu koi nofo tautahi i gāuta.

⁴⁸ Kua ia kitea atu te fītatā o ona hoko i te tau aloga o to lātou vaka, ona ko te matagi e hau tonu lava i te muāvaka. I te va o te tolu ki te ono i te vaveao, na fanaifo ai ia Iehu ki nā hoko o ia, e havali i luga o te kilitai. Na fofou ke ia fakahaoa te vaka,

⁴⁹ kae kua ki lātou kitea atu ia e havali i luga o te kilitai. “E, he aitu!” kua vēake ki lātou i o lātou māfaufau.

⁵⁰ Na mātataku uma ki lātou i te ki lātou kiteaga o ia. I te taimi lava tēnā na vāgana mai ai ia Iehu ki a te ki lātou, “Fakamākeke! Ko au tēnei. Koutou nahe mātataku!”

⁵¹ Oi hopo ake ai ia Iehu ki luga o te vaka kae toku loa foki te matagi. Na ofo lahi lele te kau hoko,

⁵² auā ko hēki mālamalama lava ki lātou ki te uiga moni o te fafagaga o te toka lima afe; e faigatā ke talia e o lātou māfaufau.

Kua Fakamālōlō e Iehu nā Tauale i Kenehaleta

⁵³ Kua pa atu ki lātou ki tētahi itū o te vaitūloto, ki he fenua e igoa ko Kenehaleta, oi tau ai i kinā te vaka.

⁵⁴ I te olo kehega o ki lātou mai te vaka, kae matea mai loa e tagata ia Iehu.

⁵⁵ Oi taufetuli ai ia tagata kinā itū fenua uma; ko te kogāfenua lava e ki lātou lagona e i ei ia Iehu, e ki lātou tahikia ki ei nā tauale i luga o nā moega o ki lātou.

⁵⁶ Ho he mea lava e fano ki ei ia Iehu, ki nā nuku, nā kakai, pe ko nā nofoaga i nā fenua i tua, e kave e tagata nā tauale ki nā māketi ma fakatagi ki a Iehu ke tau lava ko nā tauale ke paki ake ki te pito o tona kofu loloa. Ko nā tino uma foki nā paki ki ei, na fakamālōlōgia.