Maleko 5 - Tokelauan New Testament

Kua Fakamālōlō e Iehu he Tamāloa nae Ulufia e nā Agaga Kino

¹ Kua pa atu ia Iehu ma ona hoko ki tētahi itū o te vaitūloto ko Kalilaia, ki te kogāfenua e igoa ki a Kelaha.

² Ko te taimi lava na tū ake ai ia Iehu mai te vaka, kae fakafetaui atu ki ei he tamāloa e ulufia e he agaga kino; na hau i nā tugamau i te fenuatanu i kinā.

³ Kua nofo mau lava i nā tugamau ma kua hēai he tino e ia mafaia oi noanoa te tamāloa, e pa lava ki te fakaaogāga o nā filifili;

⁴ e lahi nā taimi e noanoa ai nā vae ma nā lima, kae e ia tamotua lava nā filifili ma taihi nā loka ukamea i ona vae. E hēai lele he tino e ia mafaia oi tāofiofi te tamāloa tēnei ona e mākeke lahi.

⁵ E eva i te mea e i ei nā tugamau ma luga o nā mauga i te ao ma te pō, kae taukekē ma takohi tona tino i nā fatu.

⁶ I te ia kitea atuga o Iehu ka koi mamao mālie atu, oi vili atu lava fakapakū ifo ki ona tulivae i mua o Iehu,

⁷ kae kalaga leo lahi lele, “Iehu, te Ataliki o te Atua Hilihilikehe! He ā ko ta koe e fai mai ki a te au? Ko au e fakatagi atu ki a te koe i te igoa o te Atua, nahe kē fakahāuā mai ko ki a te au!”

⁸ Kua māfua te lea vēnā o te tamāloa ona ko Iehu na lea vē, “Te agaga kino, hau ki fafo mai te tamāloa tēnā!”

⁹ Kua fehili atu ia Iehu ki te tamāloa, “Ko ai tō igoa?” Kua tali mai ia, “Ko toku igoa ko ‘Lēkeona’ — e tokalahi ki mātou!”

¹⁰ Oi fakatagi atu ai te tamāloa ki a Iehu ke nahe uga kehea nā agaga kino mai te kogāfenua tēnā.

¹¹ E i ei he lafu puaka lahi nae i kinā, nae kakai i tafa o he mauga.

¹² Oi fakatagi atu ai nā agaga kino ki a Iehu, kua lea vē atu ki ei, “Uga ko ki mātou ki nā puaka iēnā ma fakataga mai ki mātou ke ulu ki ei.”

¹³ Oi fakataga ai ki lātou e ia. Oi olo ai ki fafo nā agaga kino mai te tamāloa ma ulu ki loto o nā puaka. Ko te lafu kātoa e tuha e luaafe fakatahi — kua fētutuli ifo ki lalo i te tafatō o te mauga ki loto o te vaitūloto, ma mālelemu uma ai.

¹⁴ Ko nā tino nae kikilagia nā puaka, kua fētutuli ma fakailoa ki te kakai ma te kogāfenua kātoa te mea tēnei. Oi holo mai ai nā tino oi kikila ki te mea na tupu,

¹⁵ ma i te tau atuga o ki lātou ki a Iehu, na ki lātou kitea ai te tamāloa nae māhani oi ulufia e te tokalahi o tēmoni. E nofo mai kua fai ona kofu ma kua lelei tona māfaufau; oi na mātataku uma ai ki lātou.

¹⁶ Ko nā tino na ki lātou kiteagia kua fakamatala e ki lātou ki nā tino na ōmamai, te mea na tupu ki te tamāloa nae ulufia e nā tēmoni, ma te mea na pa ki ei nā puaka.

¹⁷ Oi na lea ai loa ki lātou ki a Iehu, ke fano kehe mai to lātou fenua.

¹⁸ Ka koi tau hopo ake ia Iehu ki te vaka, ka kua fakatagi mai ki ei te tamāloa nae ulufia e nā tēmoni, “Fanatu ko au i tau kau?”

¹⁹ E hēki talia e Iehu. Ka kua vāgana vē atu ki ei, “Toe liliu ki te fale ki tō kāiga ma lea ki ei ki te lahi o nā mea kua fai e te Aliki mo koe, ma te lahi o tona agalelei ki a te koe.”

²⁰ Oi fano ai te tamāloa kua kui atu i nā Kakai e Hefulu ma takutaku atu ki ei nā mea na fai e Iehu mo ia. Na ofo lele ai ki lātou uma na fakalogo ki ei.

Ko te Afafine o Iāilo ma te Fafine na Tago ki te Kofu Loloa o Iehu

²¹ Kua toe foki ia Iehu i te vaka ki tētahi itū o te vaitūloto. E tokalahi nā tino na ōmamai oi hiko fakatakamilo ia Iehu i kinā i te matāfaga.

²² Kua pa atu ki kinā ia Iāilo, ko hētahi o takitaki o te hūnako ma i te ia kitea atuga o Iehu, oi fakapakū ai ki tafa o ona vae,

²³ ma fakatagi ki ei vēia, “Ko toku afafine tamaiti e tauale tīgāina lahi. Hau ko fakamolemole oi fakaeke o lima ki ona luga, kae ke toe mālōlō ai ma ola!”

²⁴ Oi fano ai ia Iehu kua olo ma Iāilo. Ko te tokalahi o nā tino nae mulimuli ki a Iehu, kua nunu lele atu ai ia tagata ki nā itū uma o ia.

²⁵ Nae i ei he fafine kua kātoa te hefululua tauhaga e tauale i te punatoto,

²⁶ e ui lava e tokalahi ia fomai nae ki lātou togafitia. Kua mole ana tupe, kae hē gaholo lele e feoloolo kae gaholo e tīgāina lahi.

²⁷ Kua lagona e ia te tala ki a Iehu, oi hau ai i loto o te kaifenua i tua o Iehu,

²⁸ ma kua lea vē ifo ki a te ia lava, “Tau lava ko au ke paki atu ki ona kofu, e mālōlō ai lava au.”

²⁹ Kua paki atu te fafine ki te kofu loloa o Iehu, ma ko te taimi foki lava tēnā na uma ai te punatoto; kua ia lagona foki ki ona tino, ko ia kua mālōlō i tona tauale.

³⁰ Ko te taimi foki lava tēnā na lagona ai e Iehu te fanatu o tona mana mai ia te ia, oi liliu atu ai ki ona tua ki te kaifenua ma fehili vē atu, “Ko ai te na paki mai ki oku kofu?”

³¹ Ka kua tali atu ona hoko, “E kē kitea ko tagata kua nunu mai ki a te koe kae fehili vēnā mai koe?”

³² Ka kua taukikila lava ia Iehu pe ko ai te tino na paki ake ki a te ia.

³³ Na hāfia e te fafine te mea kua tupu ki a te ia, oi hau ai, e tete i tona mataku, kua tōtuli i tafa o nā vae o Iehu ma taku kātoa ki ei te meamoni.

³⁴ Oi vāgana atu ai ia Iehu ki ei, “Toku afafine, ko tō fakatuatua kua mālōlō ai koe. Fano la, ma ke ia te koe te fīlēmū. Ko koe kua mālōlō i tō tauale.”

³⁵ Ka koi tautala vēnei atu ia Iehu, kae taunuku mai ni kavefekau mai te fale o Iāilo, ma kua lea vē atu ki lātou ki a Iāilo, “Ko tō afafine kua oti. He ā la te toe fakalavelave tauanoa ai ki te Faiakoga?”

³⁶ Kae e hēki fia tokaga ia Iehu kinā mea kua lea ai ki lātou, ka kua lea vē atu ki a Iāilo, “Ia koe nā mataku; talitonu oioti.”

³⁷ Oi vavao ai e Iehu ke nahe i ei he tino e toe mulimuli ake i tana kau ki te fale o Iāilo, kae vaganā ai ia Petelu, ma Iakopo ma Ioane te uho o Iakopo.

³⁸ Kua taunuku atu ki lātou ki te fale o Iāilo, oi kitea ai e Iehu te vevehi ma lagona te faitatagi ma te lauē o tagata.

³⁹ Na ulu atu loa ia Iehu ki te fale ma vāgana vē atu ki nā tino, “He ā te vevehi ai koutou ma faitatagi? Ko te tamaiti e hēki oti, kae e moe!”

⁴⁰ Ka kua kāmata oi fakatauemu ki lātou ki a Iehu. Oi tuli ai e ia ki lātou uma ki fafo o te fale, kae kave oioti te tamana ma te mātua o te tamaiti, ma ona hoko e toka tolu, kua olo ma ia ki loto o te potu e i ei te tamaiti.

⁴¹ Kua tago atu ia Iehu ki te lima o te tamaiti ma vāgana atu ki ei, “Tālita, kumi,” ko tona uiga, “Te Tautiti, ko au e lea atu ki a te koe, tū ki luga!”

⁴² Oi na tū ake ai loa ki luga i te taimi lava tēnā, ma kāmata oi havalivali. (Kua hefululua ona tauhaga.) Na ofo lahi lele nā tino ki te mea tēnei.

⁴³ Ka kua vavao mālohi atu ki lātou e Iehu ke nahe ki lātou takua lele ki he tino, ma vē atu tana kupu, “Fōki he mea ma te tamaiti ke kai.”