Maleko 16 - Tokelauan New Testament

Ko te Toetū o Iehu

¹ Kua teka te Hāpati, oi olo ai ia Malia te Makatala, ko Halome, ma Malia te mātua o Iakopo, oi fakatau mai nā mea manogi ke kave oi uku ai te tino o Iehu.

² I te taeaopō o te aho Hā, kua hopo ake te la, oi olo ai ki te tugamau.

^3-4 Kua lea vē atu tētahi ki tētahi, “Ko ai nei te ka ia fuli kehea te fatupae i te gutu o te tugamau?” (Ko he fatupae lahi lele.) Kae kikila atu ki lātou ko te fatupae kua uma te fuli kehe.

⁵ Oi ulu atu ai ki lātou ki loto o te tugamau ma ki lātou kitea atu he taumalo e nofo mai i te itū taumatau, e kofu i he kofu tatao paepae loloa e pa ki ona tapuvae; oi na mātataku lele ai ki lātou.

⁶ “Koutou nahe popole,” kua lea vē mai te taumalo. “E iloa e au ko Iehu te Nahaleta tēia na fakahātaulo, ta koutou e hakili. E hē i kinei — kua toe tū mai i te oti! Kikila ki te mea nae tuku ai tona tino.

⁷ Olo loa oi fai te fekau tēnei ki ona hoko ma Petelu: ‘Ko ia e muamua atu ia te koutou ki Kalilaia; ka koutou kitea ia i kinā, e vē lava ko te mea na lea atu ai ki a te koutou.’ ”

⁸ Oi olo ai ki fafo nā fafine, kua fētutuli kehe mai te tugamau auā kua maua ki lātou i te loto popole ma te atuatuvale. E hēki takua foki e ki lātou ki he tino, auā kua mātataku. [

KO TE FAKAIKUGA LOA O TE MAU A MALEKO E UIGA KI TE TALA LELEI Kua Fakakitea ia Iehu ki a Malia te Makatala

⁹ I te toe tū maiga o Iehu mai te oti i te taeaopō o te aho Hā, na fakakitea muamua ki a Malia te Makatala, tēia na ia tuli kehea mai ai nā tēmoni e toka fitu. Kua olo nā fafine ki a Petelu ma ona hoa, oi taku ki ei nā mea uma lele na lea ake ai ia Iehu ki a te ki lātou.

¹⁰ Oi fano ai ia Malia oi taku ki nā tino nae fakatahi ma Iehu, nae faitatagi i to lātou loto fakanoanoa. Kua uma atu te mea tēnei, oi fakahalalau ai e Iehu, mai hahae ki hihifo, te fekau paia ma te moni e uiga ki te fakaolataga e fakavavau, e ala i ona hoko.]

¹¹ Kae i te ki lātou lagonaga ko Iehu kua toe ola, na kitea e Malia, e hēki talitonu ki ei.

Kua Fakakitea ia Iehu ki nā Hoko e Toka Lua

¹² Kua uma atu te mea tēnā, oi fakakitea ai ia Iehu i he tūlaga e kehe mai i te fakakiteaga muamua, ki ni hoko e toka lua ka koi havavali kehe atu ki lāua mai te kakai.

¹³ Na toe liliu te toka lua ki Ieluhalema oi taku ki iētahi o te kau hoko, kae e hēki talitonu he tino ki ei.

Kua Fakakitea ia Iehu ki nā Hoko e toka Hefulutahi.

¹⁴ Mulimuli ake oi fakakitea ai ia Iehu ki nā hoko e toka hefulutahi ka koi fai te lātou katiga. Oi munaia ai e ia ki lātou ona ko to lātou hē fakatuatua ma te loto makaka, kua hē talitonu ai ki nā tino na ki lātou kiteagia ia talu tona toe tū mai i te oti.

¹⁵ Oi vāgana atu ai ki a te ki lātou, “Olo ki itū uma o te lalolagi oi tālaki atu te Tala Lelei ki tagata uma.

¹⁶ Ko ai lava e talitonu ma papatihogia, ka fakaolagia; ka ko ai lava e hē talitonu, ka fakahalagia.

¹⁷ Ko nā tino kua talitonu ka ia te ki lātou te pule e fai ai nā vāvega; ka ki lātou tuli kehea nā tēmoni; ka tautatala i nā gagana kehe;

¹⁸ kāfai e hiki ki luga e ki lātou nā gata, pe inu ki ho he meakona, ka hē āfāina ai ki lātou; kāfai e fakauta o lātou lima ki luga o nā tauale, ka mālōlō ai nā tauale.”

Kua Hikitia ake ia Iehu ki te Lagi

¹⁹ Kua uma te vāgana atu o te Aliki ko Iehu ki a te ki lātou, oi hikitia ake ai ki te lagi ma nofo i te itū taumatau o te Atua.

²⁰ Oi olo ai nā hoko oi tālaki atu te Tala Lelei ki nā itū uma o te lalolagi; nae gālulue fakatahi foki ki lātou ma te Aliki, ma na fakamāonia te moni o ta lātou tālakiga i nā vāvega nae ki lātou faia.] [