Maleko 15 - Tokelauan New Testament

Kua Tukulima atu ia Iehu ki a Pilato ke Fakamahino

¹ I te taeaopō o te aho na hohoko ai na fono fakavave ai nā ohitāulaga hili ma nā toeaina, nā faiakoga o te Tūlāfono, ma te Taupulega kātoa, ma na fai ai te lātou tonu. Kua fakatonu e ki lātou ke noanoa ia Iehu ma takitaki kehe mai kinā, ma tukulima atu ki a Pilato ke fakamahino e ia.

² Kua fehili atu ia Pilato ki a Iehu, “Ko koe moni ko te tupu o tagata Iutaia?” Kua tali mai ia Iehu, “Ko koe tēnā e lea ai.”

³ E lahi nā mea na mōlia ai ia Iehu e te kau ohitāulaga hili,

⁴ ko te mea ia na toe fehili ai ia Pilato ki a Iehu, “E hēai lele hau tali e fai mai? Fakalogo atu ake ki te lahi o nā mea kua mōlia ai koe e ki lātou!”

⁵ Kae kua hē fofou ia Iehu ke toe tali ki ei, ma na kavea tēnā ma mea na ofo lele ai ia Pilato.

Kua Fakahala ia Iehu i te Oti

⁶ E i ei te faiga nae māhani ai lava ia Pilato i te taimi o te Kaiga Fakamanatu o te Pāheka, e tatala e ia ho he pagotā e fokotahi, e fofou ia tagata ke ia fakahaolotoa.

⁷ I te taimi tēnā e i te falepuipui ai ni tino o he vāega na ki lātou tāmatea ni tino i te fouga e ki lātou o te mālō. Ko tētahi o ki lātou iēnei, ko he tino e igoa ki a Palapa.

⁸ Kua potopoto ia tagata ma kāmata oi fakatālohaga atu ki a Pilato ki te pagotā e fofou ki lātou ke fakahaoloto,

⁹ oi fehili atu ai ia Pilato ki a te ki lātou, “E fofou koutou ke tatala atu e au ki a te koutou te tupu o tagata Iutaia?”

¹⁰ Auā kua ia iloa lelei lava ko te lotokino o te kau ohitāulaga hili, na ki lātou kavakea ai ia Iehu ki a te ia.

¹¹ Kae kua fakaoho e te kau ohitāulaga hili te kaifenua, ke lea ki a Pilato ke tatala ake ia Palapa ki a te ki lātou.

¹² Kua toe lea atu ia Pilato ki te kaifenua, “He ā la te fofou koutou ke kō faia ki te tino e lea koutou ko te tupu o tagata Iutaia?”

¹³ Oi taukalalaga mai ai ki lātou, “Fakahātaulo te tino tēnā!”

¹⁴ Kae kua fehili atu ia Pilato, “Aiheā, ko he holitūlāfono ā ta ia kua fai?” Ka kua fakaatili ai te taukalalaga leo lahi o ki lātou, “Fakahātaulo te tino tēnā!”

¹⁵ Ko Pilato na fofou ke fakafiafia te kaifenua, oi tatala ai e ia ia Palapa ki a te ki lātou. Kae kua fakatonu e ia ke kini ia Iehu ma tuku atu ai loa ke fakahātaulo.

Kua Fakatauemu nā Fitafita ki a Iehu

¹⁶ Kua kave ia Iehu e nā fitafita ki loto o te lōtoā o te fale o te kōvana, oi fakapotopoto mai ai e ki lātou iētahi fitafita uma o te lātou vāega.

¹⁷ Oi fakakofu ai e ki lātou ia Iehu i he kofu tatao lanu violē ma fai he pale i nā lālā o he lākau tālatala, oi fakapale ai tona ulu.

¹⁸ Oi kāmata ai oi fai a lātou kupu fakatafafai ki a Iehu, kua lea vē atu ki ei, “Ke manuia te Tupu o tagata Iutaia!”

¹⁹ Kua kini e ki lātou ia Iehu ki tona ulu i he mealākau, kua tūfeanu ki a te ia, ma tōtutuli kae ifo ki ei.

²⁰ Kua uma te fai o a lātou mea fakatauemu ki a Iehu, oi toe ui kehe ai e ki lātou te kofu tatao lanu violē na ki lātou fakakofua ai, kae toe fakakofu lava i ona kofu. Oi takitaki ai e ki lātou ki fafo ke fakahātaulo.

Kua Fakahātaulo ia Iehu

²¹ Kua tau atu ki lātou ki he tamāloa e igoa ki a Himona, nae agai mai ki te kakai mai nā nuku i tua, oi fakamālohia ai e nā fitafita ia Himona ke amo e ia te hātaulo o Iehu. (Ko Himona e hau mai Kulene, ko te tamana ia o Alehana ma Lufo.)

²² Kua kave e ki lātou ia Iehu ki te koga e takua ko Kolokota, ko te uiga o te igoa tēnei ko te, “Ulupoko.”

²³ I kinā na taumafai ai ki lātou ke fōki ki a Iehu he uaina kua palu ki ei te vai mai te lākau e igoa ko te mulo, kae e hēki inu ki ei.

²⁴ Oi fakahātaulo ai e ki lātou ia Iehu ma fai te lātou vili ke iloa ai te mea kofu o Iehu e maua e te tino, oi tufatufa ai vēnā e ki lātou nā kofu o Iehu.

²⁵ Ko te iva i te taeao na ki lātou fakahātauloa ai ia Iehu.

²⁶ Ko te fakakupuga i te tuhi na tūhia ai nā mōliga o ia, e vēnei, “Ko te Tupu o Tagata Iutaia.”

^27-28 Na ki lātou fakahātauloa foki ni tino kaihohoa e toka lua fakatahi ma Iehu, ko tētahi i tona itū taumatau ma tētahi i tona itū tauagavale.

²⁹ Ko nā tino na kui ake i kinā, kua lūlū o lātou ulu ma vēnei a lātou kupu fakatauemu ki a Iehu, “Ko koe tēnā na lea e kē talepea ki lalo te Mālumalu oi toe fakatū ai i nā aho e tolu!

³⁰ Fanaifo la ki lalo mai te hātaulo ma fakaola lava koe e koe!”

³¹ Kua vēnā foki oi fai kupu fakatauemu nā ohitāulaga hili ma nā faiakoga o te Tūlāfono ki a Iehu. Kua vē atu tētahi ki tētahi, “Na fakaola e ia iētahi tino, ka ko tēia e hē ia mafaia oi fakaola ia ia lava!

³² Tātou kikila la ki te Keliho, te tupu o Ihalaelu, ke fanaifo ki lalo o te hātaulo i te taimi nei, kae ke talitonu ai ki tātou ki a te ia!” Kua vēnā foki oi fakatauemu ki a Iehu te toka lua na fakahātaulo fakatahi ma ia.

Ko te Mate o Iehu

³³ Kua ta te itūlā e hefululua i te aoauli, oi pōulitia uma ai te lau fenua kātoa ke pa ki te tolu i te afiafi.

³⁴ I te tolu i te afiafi, na kalaga leo lahi ai ia Iehu, “Eloi, Eloi, lama hapatani?” ko tona uiga, “Toku Atua, toku Atua, he ā te kua kē tuku tiakia ai au?”

³⁵ Ko iētahi tino nae i kinā, na ki lātou lagona atu ana kupu na kalaga ai ma kua lea vē, “Fakalogo atu ake, e taukalaga ki a Elia!”

³⁶ Oi vili atu ai hētahi o ki lātou ma he oma kua uma te lolō ki he uaina taugōfie; kua tuku e ia ki te pito o he mealākau, ma hiki ake ke fakainu ai ia Iehu ma vē atu tana kupu, “Fakatali! Tātou kikila pe i na hau ia Elia oi tuku ifo ia ki lalo mai te hātaulo!”

³⁷ Oi kalaga leo lahi ai ia Iehu, ma to ai loa tana mānava.

³⁸ Oi haelua ai te kie pupuni i loto o te Mālumalu, mai luga ke pa ki lalo.

³⁹ Ko te takitakikau o te toka helau nae tū i mua o te hātaulo, ma na ia te kitea te otiga o Iehu, oi lea vē ai, “E hako lava, ko te tagata tēnei ko te Ataliki o te Atua!”

⁴⁰ Nae i ei nā fafine i kinā nae taukikila mamao atu. Nae i ei ai ia Malia te Makatala, ko Malia te mātua o Iakopo tamaiti ma Iohefa, ma Halome.

⁴¹ Ko ki lātou iēnei nae mulimuli ki a Iehu ka koi i Kalilaia ai, ma nae fehoahoani ki ei. E tokalahi iētahi fafine nae i kinā, na ōmamai fakatahi ma Iehu ki Ieluhalema.

Ko te Tanuga o Iehu

^42-43 Ko te afiafipō na taunuku ifo ai ia Iohefa, he tino e hau mai Alimatea. He tino o te Taupulega e fakaaloalogia lele e tagata, ma ko he tino foki nae fakatalitali ma tona amanaki ki te taimi e fakataunuku ai te pule a te Atua. I te aho tēnei o Tāpenapenaga (te aho e hohoko ki ei te Hāpati), na fano ai ia Iohefa ma te lototele ki a Pilato, ke tuku ake te tino o Iehu ke kave e ia.

⁴⁴ Na teki ia Pilato i te ia lagona atuga ko Iehu kua oti, oi fekau ai e ia te takitakikau o te toka helau ma fehili ai ki ei pe ko Iehu kua oti.

⁴⁵ I te ia iloaga ko Iehu kua oti, oi na fakataga ai e ia ke kave te tino o Iehu e Iohefa.

⁴⁶ Kua fakatau mai e Iohefa he kie vavae, oi tuku ifo ai e ia te tino o Iehu ki lalo mai te hātaulo, kua āfīfī i he kie vavae, oi tuku ai ki loto o he tugamau na keli ki loto o he itū-mauga papa. Oi fuli ai e ia he fatupae lahi, kua pupuni ai te gutu o te tugamau.

⁴⁷ Ko Malia te Makatala ma Malia te mātua o Iohefa, nae kikila atu ki ei, oi na ki lā kiteagia te mea na teu ai te tino o Iehu.