Maleko 13 - Tokelauan New Testament

Kua Tautala ia Iehu e uiga ki te Fakakinoga o te Mālumalu

¹ E fakahao mai ki fafo ia Iehu i te Mālumalu, kae lea atu tētahi ona hoko ki ei, “Te Faiakoga, kikila! Kai te mānanaia o nā fatu ma nā fale o te Mālumalu!”

² Kua tali mai ia Iehu ki a te ia, “E kē kitea nā fale lalahi iēnei? Ka hē toe i ei he fatu e fokotahi e tū i luga o hētahi fatu; ko nā fatu takitahi uma lele ka togi kehe uma ki lalo.”

Ko nā Puapuagā ma nā Fakahāuāga

³ E nofo ia Iehu i luga o te Mauga o Ōlive, e fakafeagai tonu ma te Mālumalu, kae oatu ia Petelu, ko Iakopo, ko Ioane ma Anitelea nā ko ki lātou, oi lea vē atu ki ei,

⁴ “Taku mai ake ki a te ki mātou pe ko āfea te ka tupu ai te mea tēnei, ma pe ko he ā foki he fakailoga ke iloa ai e ki mātou kua tāli pa ki te taimi e fakataunuku ai nā mea iēnei?”

⁵ Oi lea atu ai ia Iehu ki a te ki lātou, “Koutou ke mataala kae ke nahe fakahehēa ai koutou e he tino.

⁶ E tokalahi nā tino ka ōmamai i toku igoa ma lea vē, ‘Ko au ko te Mehia’ ma ka ki lātou fakahehēa te tokalahi o tagata.

⁷ Ma kāfai e lagona e koutou te faitapiha mai o nā taua e pili mai ma nā fakamatalaga e uiga ki ni taua i nā mea mamao, ia koutou nahe mātataku. Ko nā mea iēnei e tatau lava ke tutupu, kae e hē vēake ai la ko te ikuga kua pa mai.

⁸ Ka hiki taua tētahi fenua ki tētahi fenua, ma tētahi mālō tētahi mālō. Ka i ei nā mafuie i nā koga kehekehe uma, ma ka i ei nā oge. Ko nā mea iēnei e vē lava ko nā tīgā muamua o he fafine e fānau.

⁹ “Koutou lava ke kikila lelei. Ko koutou ka puke ma kave ki te fakamahinoga. Ka kini i loto o nā hūnako; ka tutū i mua o nā kōvana ma nā tupu ona ko au, ke fakailoa atu ki a te ki lātou te Tala Lelei.

¹⁰ Auā ko te Tala Lelei e tatau ke mua tālaki ki mālō uma, ka ko hēki pa mai te ikuga o te lalolagi.

¹¹ Ma kāfai koutou e puke ma kave ki te fakamahinoga, koutou nahe popole pe ka vēhea ake hautou tala e fai ki ei; kāfai e pa ki te taimi tēnā, tautatala lava i nā kupu ka fōki atu ki a te koutou. Auā ko nā kupu e tautatala ai koutou ka hē a koutou, kae ka hau mai te Agaga Paia.

¹² Ka tuku atu e te uho tona uho ke tāmate, ka vēnā oi fai e tamana ki a lātou fānau. Ka fakahaga tau ia fānau ki o lātou mātua ma tuku atu e ki lātou ke tāmate,

¹³ ma ka inohia koutou e tagata uma ona ko au. Ka ko te tino e onohai pea lava ke pa ki te ikuga, ka fakaolagia.

Ko te Mea Matakutia te Kino ma te Inohia

¹⁴ “Ka kitea e koutou ‘Te Mea Matakutia te Kino ma te Inohia’ e fakatū i te mea e hē tatau ke i ei ai.” (Ke mālamalama te tino faitau ki te uiga o te mea tēnei!) “Ko koutou la e nonofo i Iutea, e tatau ke hōhola ki luga o nā mauga.

¹⁵ Ko te tino e i luga o te tuākaukau o tona fale, nahe māumau te taimi ke fanaifo ki lalo ma toe ulu ki loto o te fale ke kave he mea.

¹⁶ Ko te tino e galue i te fatoaga, nahe toe foki ki tona fale ke kaumai tona kofu loloa.

¹⁷ Kai te fakaalofa o te mea e pa ki ei nā fafine e manavakīkī ma nā mātua koi fakahuhu a lātou pepe, kāfai e pa ki nā aho iēnā!

¹⁸ Tatalo ki te Atua ke nahe tutupu nā mea iēnei i te taumālūlū!

¹⁹ Auā ko nā puapuagā ka pa ki ei i nā aho iēnā, ka hili lele atu te kino i lo ni iētahi puapuagā na kua pa ki ei ia tagata, mai te taimi na fai ai e te Atua te lalolagi i te kāmataga, ke pa mai lava ki te taimi nei. Ka hē toe mafai lele foki ke toe tupu he mea vēnei.

²⁰ Kae kua uma te fakaitiitia e te Aliki te nūmela o nā aho; anei ake e hēki ia faia te mea tēnei, e hēai he tino fokotahi e mafai ke ola. Kae ona ko te alofa o te Atua ki ona tagata kua uma te ia filifilia, kua fakaitiitia ai e ia te nūmela o nā aho iēnā.

²¹ “Kāfai la he tino e lea atu ki a te koutou, ‘Kikila, tēnei te Keliho’ pe lea vē, ‘Kikila, tēnā te Keliho!’ — koutou nahe talitonu ki ei.

²² Auā ka ōmamai nā Keliho pepelo ma nā pelofeta pepelo. Ka ki lātou faia ni vāvega ma ni mea ofoofogia ke fakahehē ai ia tagata, ke pa lava ki tagata kua filifilia e te Atua, pe kāfai e mafai.

²³ Koutou la ke mataala! Kua fakailoa atu e au ki a te koutou nā mea uma ka ko hēki pa mai te taimi.

Kāfai te Ataliki o te Tagata e Haele mai

²⁴ “I nā aho kāfai ka uma nā fakahāuāga, ka gaholo loa e pōuli te la, ka hē toe huhulu te māhina,

²⁵ ka pakukū ia fetu mai te lagi, ma ko nā mālohiaga o te vāteatea, ka lūlū kehe mai o lātou alāvaka tūmau.

²⁶ Ma ka kitea atu te Ataliki o te Tagata e haele mai i nā ao, ma te mana, ma te mamalu hilihili kehe.

²⁷ Ka uga atu e ia nā agelu ke fakamāopoopo mai nā tino kua uma te ia filifilia mai nā itū e fa o te lalolagi, mai tētahi itūlagi ki tētahi.

Ko te Akoakoga mai te Mati

²⁸ “Ke kavea te mati ke maua ai he akoakoga mo koutou. E kāmata loa oi lanu meamata ma vavai nā lālā, ma kāmata oi tutupu ake ona lau, e iloa e koutou ko te tau māfanafana kua tāli pa mai.

²⁹ E vēnā foki lava kāfai e koutou kitea nā mea iēnei e tutupu, ka koutou iloa ai kua tāli pa mai te taimi, kua hāuni ka kāmata.

³⁰ E takutino atu e au ki a te koutou, ko nā mea uma iēnei e tutupu, ka ko hēki feoti uma nā tino o te tupulaga tēnei.

³¹ E mou kehe atu te lagi ma te lalolagi, ka ko aku kupu e tūmau pea lava.

E hēai he Tino e ia iloa te Aho ma te Itūlā

³² “Kae e hēai he tino e ia iloa, pe pa mai āfea te aho tēnā pe ko te itūlā — e hē iloa e nā agelu i te lagi, e hē iloa foki e te Ataliki, kae nā ko te Tamana oioti te ia iloa.

³³ Koutou la ke mataala, auā e hē koutou iloa pe ko āfea e pa mai ai te taimi.

³⁴ Ka fakatuhagia ki he tamāloa e tukua tona fale mo hana malaga, ma tuku ana mea ke kikila e ana kaukauna; ka kua uma ai te ia fakatonua ia gāluega tau tokatahi a ana kaukauna e fai, ma fakatonu te leoleo faitotoka ke taukikila fakalelei.

³⁵ Koutou la ke mataala, auā e hē koutou iloa pe hau āfea te matai e o ia te fale — pe hau i te afiafipō, pe ko te tūlua o pō, pe ko te hēki tafa mai o te ata, pe ko te hopo ake o te la.

³⁶ Kāfai e hau fakafuaheki, e hē tatau ke ia maua mai koutou e momoe.

³⁷ Ko te mea e lea atu ai au ki a te koutou, ko te mea foki ia e lea ai au ki tagata uma: Mataala!”