Maleko 11 - Tokelauan New Testament

Kua Tali Fiafia ia Iehu e Tagata i te Ulufale atuga ki loto o Ieluhalema

¹ Kua agai atu ki lātou ki Ieluhalema, kua pili ki nā kakai ko Petehake ma Petania, oi tau atu ai ki te Mauga o Ōlive. I kinā na uga ai e Iehu iētahi ona hoko e toka lua ke muamua

² ma te fakatonuga e vēnei, “Olo ki te nuku tēnā i mua atu. Ko te taimi lava e taunuku atu ai koulua ka koulua kitea he punua āhini poa ko hēki tiketike lele ai he tino, e tau i kinā. Tatala te āhini oi kaumai ki kinei.

³ Ma kāfai he tino e lea atu, ‘He ā ta koulua e fai?’ oi lea vē ki ei, ‘Ko te Aliki, e fofou mai ki ei, ma e toe fakafoki vave mai lele.’ ”

⁴ Oi olo ai te toka lua ma na ki lā maua atu te punua āhini poa e tau ki te faitotoka o he fale. Ka koi tau tatala e ki lāua te āhini,

⁵ kae fehili atu ki ei iētahi tino nae tutū i kinā, kua vē atu, “He ā ta koulua e tatala ai te punua āhini poa?”

⁶ Na tali atu ki lāua ki ei e vē lava ko te leaga ki ei o Iehu, oi tuku ai ki lāua e nā tino ke olo.

⁷ Kua kaumai e ki lāua te punua āhini poa ki a Iehu ma togi o lā peleue tatao ki luga ke tatao ai, oi hopo ai ki luga ia Iehu.

⁸ Ma e tokalahi ia tagata kua fola o lātou peleue tatao ki luga o te auala, kae ko iētahi kua tatipi mai e ki lātou nā lālā mai nā lākau i nā fatoaga ma fola ki luga o te auala.

⁹ Ko nā tino nae i mua, ma ki lātou nae mulimuli mai i tua, kua kāmata oi taufai kālalaga, “Ke vīkia te Atua! Ke fakamanuia e te Atua ki tē e hau i te igoa o te Aliki!

¹⁰ Ke fakamanuia e te Atua te mālō ka pa mai o te Tupu ko Tavita, tō tātou tamana! Ke vīkia te Atua!”

¹¹ Kua pa atu ia Iehu ki loto o Ieluhalema, oi fano ai ki loto o te Mālumalu. Kua fakaholoholo tana kikila ki nā mea uma lele i loto. Kae ona kua pōgia, na olo ai ki Petania ma ona hoko e toka hefululua.

Kua Fetū e Iehu te Mati

¹² I te aho alafaki, kua toe liliu ifo ki lātou mai Petania, kae kua lagona e Iehu te fia kaia.

¹³ Na ia kitea mamao atu he mati e tū mai ma ona lau e lahi. Oi havali ai ki ei ke kite pe i nā ia maua ai ni fuāmati. Kae pa atu ki ei, ni lau oioti lava te i ei, ona ko hēki pa ki nā aho o te fuata mati.

¹⁴ Oi lea atu loa ia Iehu ki te mati, “E hēai lele he tino e toe kai ki he fuāmati mai ia te koe!” Ma na lagona e ona hoko tana kupu tēnei.

Kua Fano ia Iehu ki te Mālumalu

¹⁵ Oi taunuku atu ai ki lātou ki Ieluhalema. Oi fano ai ia Iehu ki loto o te Mālumalu ma kāmata oi tuli uma ki fafo nā tino nae fai a lātou fefakatauakiga koloa i loto. Kua tafuli e ia nā laulau a nā tino huitupe, ma nā nofoa o nā tino fakatau lupe;

¹⁶ ma e hēki ia fakatagagia foki he tino ke amo hana mea kui loto o te Mālumalu.

¹⁷ Oi akoako atu ai e ia ki nā tino, kua lea vēnei atu, “E tūhia i nā Tuhituhiga Paia, ko te Atua na vāgana vē, ‘Ko toku fale ka takua he fale tatalo e o tagata o mālō uma.’ Kae kua koutou faia ma ana o tagata kaihohoa!”

¹⁸ I te lagonaga e nā ohitāulaga hili ma nā faiakoga o te Tūlāfono te mea tēnei, oi kāmata ai kua tau hakili e ki lātou he auala ke tāmate ai ia Iehu. Kua mātataku ki lātou ia Iehu, ona ko te kaifenua kua ofo uma lele ki ana akoakoga.

¹⁹ Kua pa ki te afiafipō, oi olo kehe ai ia Iehu ma ona hoko mai te kakai.

Ko te Akoakoga mai te Mati

²⁰ I te taeaopō o te aho na hohoko ai, e havavali atu i te auala kae ki lātou kitea te mati kua mate kātoa ke pa ki nā aka.

²¹ Kua manatua e Petelu te mea na tupu oi lea vē atu ai ki a Iehu, “Te Faiakoga, kikila atu ki te mati na fetū e koe, kua mate!”

²² Kua tali mai ia Iehu ki ona hoko, “Fakatuatua ki te Atua.

²³ E lea atu au ki a te koutou, ko ai lava e lea atu ki te mauga tēnei ‘fakamahiki ki luga oi togi ki te tai’ e aunoa ma he māhalohalo o tona loto kae talitonu ko te mea e lea ai ia ka taunuku, ka vēnā lava ona fai mo ia.

²⁴ Ko te mea ia e lea atu ai au ki a te koutou: Kāfai koutou e tatalo ma gogō atu ki he mea, talitonu kua maua e koutou, oi ka fōki atu ai ki a te koutou ho he mea lava e gogō atu koutou ki ei.

^25-26 Kāfai koutou e tutū ki luga oi tatalo, fakamāgalo ho he tino na fai kino atu ki a te koutou, kae ke fakamāgalo ai koutou e te koutou Tamana i te lagi, i autou mea hehē kua fai.”

Ko te Fehili e uiga ki te Pule a Iehu

²⁷ Kua toe taunuku atu ki lātou ki Ieluhalema. Ma e havalivali ia Iehu i loto o te Mālumalu, kae ōmamai nā ohitāulaga hili, nā faiakoga o te Tūlāfono ma te kau toeaina

²⁸ oi fehili vē mai ki ei, “E āi te pule e fai ai e koe nā mea iēnei? Ko ai te na ia fōki atua ki a te koe te pule tēnei?”

²⁹ Kua tali atu ia Iehu ki a te ki lātou, “Ka fehili atu foki la au, ma kāfai e tali mai koutou, oi ka taku atu ai foki e au pe āi te pule e fai ai e au nā mea iēnei.

³⁰ Ko te pule a Ioane na fai ai tana papatihoga na hau mai fea: na hau mai te Atua pe mai tagata?”

³¹ Kua kāmata oi fai fīnauga ki lātou ma lea vē tētahi ki tētahi, “Kāfai ki tātou e lea, ‘E mai te Atua,’ ka lea mai nei, ‘He ā la te hēki talitonu ai koutou ki a Ioane?’

³² Kae kāfai ki tātou e lea, ‘E mai tagata…’ ” (Nae mātataku ki lātou i nā tino, auā e talitonu uma nā tino, ko Ioane ko he pelofeta moni lava.)

³³ Oi tali atu ai loa vēnei ki lātou ki a Iehu, “E hē ki mātou iloa.” Oi vāgana atu ai ia Iehu ki a te ki lātou, “Ka hē kō taku atua foki la ki a te koutou, pe āi te pule e kō faia ai nā mea iēnei.”