Luka 8 - Tokelauan New Testament

Ko nā Fafine nae Fehoahoani ki a Iehu

¹ I he taimi mulimuli ake, oi fano ai ia Iehu kua kui atu i nā kakai ma nā nuku, oi tālaki atu te Tala Lelei e uiga ki te Mālō o te Atua. Na olo fakatahi ma ona hoko e toka hefululua,

² vēnā foki ma ni fafine kua uma te fakamālōlō mai ni agaga kino ma ni tauale: ko tētahi o nā fafine iēnei ko Malia (nae takua ko he tino mai Makatala), na tuli kehe mai ai nā tēmoni e fitu;

³ ko Ioana te āvaga a Kouha, te kaukauna pule i te fale o te tupu ko Helota; ko Huihana, ma iētahi fafine e tokalahi nae fakaaogā a lātou tupe ma iētahi a lātou meatōtino, ke fehoahoani ki te tauhiga o Iehu ma ona hoko.

Ko te Talafakatuha o te Tino Lūlū Haito

⁴ Kua gāholo mai pea nā tino mai tēia kakai ma tēia kakai ki a Iehu, ma kua tokalahi lele ai te kaifenua kua fakapotopoto. Oi fai ai e Iehu te talafakatuha tēnei ki a te ki lātou:

⁵ “Nae i ei he tino na fano oi lūlū ni haito i tona fatoaga. I te lūlūga e ia o nā fatu haito, na pakukū ai iētahi fatu haito ki luga o te auala, oi holi ai i nā vae o tagata ma ōmamai nā manulele oi kai.

⁶ Ko iētahi na pakukū ki luga o te kelekele fatufatua, ma i te ola akega oi kāmata ai oi magumagu, ona ko te kelekele e hē huhū.

⁷ Ma ko iētahi fatu haito na pakukū ki te mea e ola ai te vao mātuituia, ma kua ola fakatahi ake ma nā vao mātuituia ma taomia ai nā tamā lākau e nā vao mātuituia, ma hē mafai ai ke ola.

⁸ Ka ko iētahi na pakukū ki luga o te kelekele lelei; kua ola ake nā lākau ma fua mai nā fuāhaito e taki tau helau.” Kua fakauma ia akoakoga a Iehu oi lea vē atu ai, “Kāfai e i ei ni outou taliga, fakalogo mai la!”

Ko te Ala na Fakaaogā ai e Iehu nā Talafakatuha

⁹ Kua fehili atu ona hoko ki ei, pe he ā te uiga o te talafakatuha tēnei,

¹⁰ oi tali vē atu ai, “Kua uma te fakailoa atu ki a te koutou nā mealilo e uiga ki te Mālō o te Atua; kae ko iētahi tino, e fakailoa ki ei e ala i nā talafakatuha, kae ke kikila o lātou mata kae hē ki lātou kitea, ma fakalogo o lātou taliga, kae hē mālamalama.

Kua Fakamālamalama e Iehu te uiga o te Talafakatuha o te Lūlūhaito

¹¹ “Ko tēnei te uiga o te talafakatuha: ko te fatu haito, ko te kupu a te Atua.

¹² Ko nā fatu haito na lūlū ki luga o te auala, e fakatuha ki nā tino e ki lātou lagona te fekau; kae e hau te Tiāpolo oi kave kehe te fekau mai o lātou loto, kae ke hē talitonu ai ki lātou ma hē fakaolagia ai.

¹³ Ko nā fatu haito na lūlū ki luga o te kelekele fatufatua, e fakatuha ki nā tino e ki lātou lagona te kupu ma talia ma te fiafia. Kae e hēai ni o lātou aka; e talitonu oioti i he taimi pukupuku, kae pa mai loa te taimi o nā tofotofoga, e vave lele oi uma to lātou talitonu.

¹⁴ Ko nā fatu haito na lūlū ki te mea e ola ai te vao mātuituia, e fakatuha ki nā tino e ki lātou lagona te kupu; kae ko te mānumanu ki koloa ma fiafiaga o te ōlaga, e taomia ma hē mātutua ai ona fua.

¹⁵ Ka ko nā fatu haito na lūlū ki luga o te kelekele lelei, e fakatuha ki nā tino e ki lātou lagona te kupu ma tāofi mau ki ei ma te fakamāoni ma te loto lelei, ma onohai pea lava ke pa ki te taimi e fua mai ai.

He Mōlī i Lalo o he Tānoa

¹⁶ “E hēai he tino e ia tutua he mōlī, oi tatao ai i he tānoa, pe tuku ki lalo o he hofa. Kae e tuku ki luga o he tugāmōlī, kae ke kitea te mālamalama e nā tino e ulu ki lotofale.

¹⁷ “Auā e hēai he mea e mumuni e hē fakaalia. E hēai foki he mealilo e hē fakailoagia, ma kaumai ki te mea mālama.

¹⁸ “Kikila fakalelei la pe lagona vēhea e koutou te kupu; auā ko nā tino kua i ei ni mea ka toe fōki ki ei iētahi mea, kae ko nā tino e hēai ni mea ka kave kehe mai ia te ki lātou ke pa lava ki he tamāmea e manatu ki lātou e ia te ki lātou.”

Ko te Mātua ma nā Uho o Iehu

¹⁹ Kua ōmamai te mātua ma nā uho o Iehu ki a te ia, kae e hēki mafai ke pa ki te mea e i ei ai ona ko te kaifenua.

²⁰ Oi lea atu ai he tino ki a Iehu, “Ko tō mātua ma ō uho e tutū mai i fafo, e fia kikila ki a te koe.”

²¹ Ka kua vāgana atu ia Iehu ki a te ki lātou uma, “Ko toku mātua ma oku uho, ko ki lātou iēnā e lagona te kupu a te Atua, ma uhitaki ki ei”

Kua Fakamālū e Iehu he Afā

²² I tētahi aho na hopo ai ia Iehu ki luga o he vaka fakatahi ma ona hoko, oi lea vē atu ai ki ei, “Tātou olo ki tētahi itū o te vaitūloto.” Oi kāmata ai kua fano to lātou vaka.

²³ E tele atu to lātou vaka, ka ko Iehu kua moe. Nā lava e teki he matagi mālohi kua kikini i loto o te vaitūloto, ma kua kāmata oi hopokia te vaka, ma kua pa ai ki lātou ki he tūlaga fakahētonu lahi.

²⁴ Oi olo ai te kau hoko oi fafagu ia Iehu ma lea vē atu ki ei, “E te tamana! Ko ki tātou ka feoti!” Kua nofo ake ki luga ia Iehu, oi fakatonu ai e ia te matagi ma nā galu; ma na toku ai loa te matagi ma toka ma te tai, ma kua tokihi te malino.

²⁵ Oi lea atu ai ia Iehu ki ona hoko, “Tēfea te koutou fakatuatua?” Kae kua ofo lele ma mātataku ki lātou, ma lea vē tētahi ki tētahi, “Ko ai te tagata tēnei? E fakatonu e ia te matagi ma nā galu, ma e uhitaki foki lava ki a te ia!”

Kua Fakamālōlō e Iehu he Tino e Ulufia e nā Tēmoni

²⁶ Na fakaauau pea te malaga a Iehu ma ona hoko, oi taunuku atu ai ki te kogāfenua e igoa ki a Kelaha, e i tētahi itū o te vaitūloto, e fakafehagai ma Kalilaia.

²⁷ E tū ake ia Iehu ki gāuta, kae fakafetaui atu ki ei he tamāloa e hau i te kakai, e ulufia e nā tēmoni. Kua lahi lele nā aho e eva vē ai e hēai ni ona kie, ma kua hē nofo i he fale, kae kua nofo lava i nā tugamau.

²⁸ I te ia kitea atuga o Iehu, oi kekē lahi ai kae fakapakū ki tafa o ona vae, ma taukalaga vē, “Iehu, te Ataliki o te Atua Hilihilikehe! He ā ko ta koe e fai mai ki a te au? Ko au e fakatagi atu ke nahe kē fakahāuā mai ko ki a te au!”

²⁹ Ko te tamāloa na lea vēnei, ona na fakatonu e Iehu te agaga kino, ke fano ki fafo o ia. Kua lahi nā taimi e ulufia ai te tamāloa, ma e ui lava nae noanoa nā lima ma nā vae i nā filifili ukamea, ka nae tamotu lava e ia nā filifili ukamea, ma tuli e te tēmoni ki te vao.

³⁰ Kua fehili atu ia Iehu ki te tamāloa, “Ko ai tō igoa?” Kua tali mai ia, “Ko toku igoa ko ‘Lēkeona,’” — ona e tokalahi nā tēmoni kua ulufia ai ia.

³¹ Oi fakatagi atu ai ki lātou ki a Iehu ke nahe ia fakatonua ke uga ki lātou ki lalo ki te lua e hēai he gataga o tona loloto.

³² E i ei he lafu puaka lahi nae i kinā, nae kakai i tafa o he mauga. Oi fakatagi atu ai nā tēmoni ki a Iehu, ke tuku ake ki lātou ke olo oi ulu ki nā puaka, oi fakataga ai ki lātou e ia.

³³ Oi olo ai nā tēmoni ki fafo mai te tamāloa ma ulu ki loto o nā puaka. Kua fētutuli ifo te lafu puaka ki lalo i te tafatō ki loto o te vaitūloto, ma mālelemu uma ai.

³⁴ I te kitea atuga e nā tino nae kikilagia nā puaka te mea kua tupu, oi fētutuli ai ma fakailoa te mea tēnei ki te kakai ma te kogāfenua kātoa tēnā.

³⁵ Oi olo ai ia tagata oi kikila ki te mea na tupu, ma i te tau atuga o ki lātou ki a Iehu, na ki lātou maua atu te tamāloa na olo kehe mai ai nā tēmoni, e nofo i tafa o nā vae o Iehu, kua fai ona kofu ma kua lelei tona māfaufau; oi na mātataku uma ai ki lātou.

³⁶ Ko nā tino na ki lātou kiteagia, kua fakamatala e ki lātou ki nā tino, te fakamālōlōga o te tamāloa.

³⁷ Oi lea ai nā tino uma na ōmamai i te kogāfenua tēnā ki a Iehu, ke fano kehe, auā ko ki lātou kua mātataku lahi lele. Oi hopo ai ia Iehu ki te vaka, ma fanokehe mai kinā.

³⁸ Kua fakatagi vē atu te tamāloa na ōmamai ai ki fafo nā tēmoni, ki a Iehu, “Fanatu ko au i tau kau.” Ka kua uga e Iehu ke fano, ma lea vē atu ki ei,

³⁹ “Toe liliu ki tō kāiga, ma taku ki ei nā mea kua fai e te Atua mo koe.” Oi fano ai te tamāloa kui loto i te kakai ma takutaku atu ki ei nā mea kua fai e Iehu mo ia.

Ko te Afafine a Iāilo ma te Fafine na Tago ki te Kofu Loloa o Iehu

⁴⁰ I te toe liliuga o Iehu ki tētahi itū o te vaitūloto, na talia fiafia e tagata i kinā, ona nae fakatalitali uma ki lātou ki ei.

⁴¹ Oi hau ai he tamāloa e igoa ki a Iāilo; he takitaki o te hūnako. Kua fakapakū ki tafa o nā vae o Iehu, ma fakatagi ki ei ke fanake ki tona fale,

⁴² auā ko tona afafine fokotahi, kua hefululua ona tauhaga, kua tali oti lele. Koi fanatu ia Iehu agai ki ei, ka kua nunu lele atu te kaifenua ki nā itū uma o ia.

⁴³ Nae i te kaifenua tēnā, he fafine kua kātoa te hefululua tauhaga e tauale i te punatoto; kua mole ana tupe i te totōgiga o nā fomai kae e hēki mafai ke fakamālōlō e he tino.

⁴⁴ Kua hau te fafine i loto o te kaifenua i tua o Iehu ma paki atu ki te pito o te kofu loloa o Iehu, ma ko te taimi foki lava tēnā na uma ai te punatoto.

⁴⁵ Oi kua fehili vē atu ia Iehu, “Ko ai te na paki mai tona lima ki a te au?” Na fakafiti uma ia tagata, oi lea vē atu ai ia Petelu ki ei, “Te tamana, ko tagata kua hiko fakatakamilo ma nunu mai ki a te koe.”

⁴⁶ Kae kua lea atu ia Iehu, “E i ei lava te tino na pa mai tona lima ki a te au; na kō hāfia lava i te māui atuga ki fafo o te mana mai ia te au.”

⁴⁷ Kua iloa e te fafine ko ia kua maua, oi hau ai, e tete ma fakapakū ki tafa o nā vae o Iehu. Na ia takua ki a Iehu i mua o tagata te māfuaaga na paki ake ai tona lima ki a te ia, ma te fakamālōlōga o ia i te taimi lava tēnā.

⁴⁸ Oi vāgana atu ai ia Iehu ki ei, “Toku afafine, ko tō fakatuatua kua mālōlō ai koe. Fano la, ma ke ia te koe te fīlēmū.”

⁴⁹ Ka koi tautala vēnei atu ia Iehu, kae pa mai he faifekau mai te fale o Iāilo, kua lea vē atu ki a Iāilo, “Ko tō afafine kua oti; nahe toe fakalavelave tauanoa la ki te Faiakoga.”

⁵⁰ Kae i te lagona atuga e Iehu o te mea tēnei, oi lea vē atu ai ki a Iāilo, “Ia koe nā mataku; talitonu oioti, oi mālōlō ai tō afafine.”

⁵¹ I te pa atuga o Iehu ki te fale, e hēki fakataga e ia he tino ke fanake i tana kau ki lotofale, vaganā ai ia Petelu, ma Ioane, ma Iakopo, ma te tamana ma te mātua o te tamaiti.

⁵² Ko nā tino uma nae i ei, nae faitatagi ma lauē, ona ko te tamaiti. Kae kua vāgana atu ia Iehu, “Koutou nahe faitatagi; ko te tamaiti e hēki oti, kae e moe!”

⁵³ Ka kua kāmata oi fakatauemu ki lātou ki a Iehu, ona kua ki lātou iloa, ko te tamaiti kua oti.

⁵⁴ Ka kua tago atu ia Iehu ki te lima o te tamaiti ma lea vē atu ki ei, “Te tautiti, nofo ki luga!”

⁵⁵ Oi toe ola ai te tamaiti, ma na tū ake ai loa ki luga i te taimi lava tēnā; oi fakatonu ai e Iehu ki lātou, ke fōki he mea ma te tamaiti ke kai.

⁵⁶ Na ofo lele nā mātua o te teine, kae kua fakatonu atu ki lāua e Iehu, ke nahe takua lele ki he tino te mea na tupu.