Luka 7 - Tokelauan New Testament

Kua Fakamālōlō e Iehu te Kaukauna a he Takitakikau Loma

¹ Ina kua uma te lea atu o Iehu ki tagata i nā mea uma iēnei, oi fano ai loa ki Kapenaumi.

² Nae i kinā he takitakikau Loma, e i ei hana kaukauna fakamoemoegia lahi nae tauale ma kua tāli oti.

³ I te ia lagonaga o te tala e uiga ki a Iehu, oi uga ai e ia ni toeaina Iutaia, ke lea ki ei ke hau oi fakamālōlō tana kaukauna.

⁴ Oi ōmamai ai nā tino iēnei ki a Iehu, kua fakatagi vē atu ki ei ma te agaga naunau, “Ko te tino tēnei he tino lelei, ma e tatau koe ke fehoahoani ki ei.

⁵ He tino e alofa ki o tātou tagata, ma na fau foki e ia te tātou hūnako.”

⁶ Oi fano ai ia Iehu kua olo ma nā toeaina. Kua hē mamao ia Iehu ma te fale, kae uga mai e te takitakikau ni uō e a ia, ke lea vē ki ei, “Te Aliki, koe nahe fakafītā. Ko au ko he tino fakatauva ma e hē talafeagai ke ulu koe ki loto o toku fale,

⁷ pe ko toku fanatu foki ki a te koe. Kae tau lava ko hau kupu, ma ka mālōlō ai taku kaukauna.

⁸ Auā ko au foki ko he tino kua tuku ki lalo o te pule a nā takitakikau e maualuluga atu ia te au, ma e i ei foki nā fitafita ei lalo o taku pule. Ma kāfai au e lea ki te tino te, ‘Fano vē!’ oi e fano; kāfai au e lea ki tētahi tino, ‘Hau!’ oi e hau foki; ma kāfai au e lea ki taku kaukauna, ‘Fai te mea te!’ oi e vēnā lava oi fai e ia.”

⁹ Na ofo lele ia Iehu i te ia lagona atuga o te mea tēnei; oi na liliu ai ki ona tua ma vāgana atu ki te kaifenua e tau mulimuli mai ki a te ia, “E lea atu au ki a te koutou, e hēki kō iloa lele he tino i Ihalaelu e vēnei hona fakatuatua!”

¹⁰ Kua toe liliu nā kavefekau ki te fale o te takitakikau, ma na maua atu e ki lātou ko te kaukauna kua mālōlō.

Kua Fakaola e Iehu te Ataliki o he Fafine kua Oti tana Āvaga

¹¹ E hēki mataloa oi fano ai ia Iehu ki he kakai e takua ko Naina, ma mulimuli atu ai foki ki a te ia ona hoko ma he kaifenua tokalahi.

¹² Na pa atu lava ia Iehu ki te faitotoka o te kakai, kae fakahao mai te holo, e hiki mai he tino kua oti. Ko te tamāloa kua oti, he tama tautahi e a he fafine kua oti tana āvaga, ma nae fakatahi ma te mātua he kaifenua e tokalahi mai te kakai.

¹³ I te kitea atuga e te Aliki te fafine, oi fakatumulia ai tona loto i te alofa, ma lea vē atu ki ei, “Koe nahe tagi.”

¹⁴ Oi havali atu ai ia Iehu kua tago ki te fata e hiki ai te oti, oi tutū ai nā taulelea nae ki lātou hikia. Oi vāgana atu ai ia Iehu, “Te taumalo, ko au e lea atu ki a te koe, nofo ki luga!”

¹⁵ Na nofo ake loa ki luga te tamāloa na oti ma kāmata oi tautala, oi tuku atu ai e Iehu ki tona mātua.

¹⁶ Na mātataku uma lele ki lātou, ma viviki ake ai ki te Atua. Kua lea vē ki lātou, “Ko he pelofeta tāua tēnei kua kikila ki tātou ki ei! Ko te Atua kua hau ke fakaola ona tagata!”

¹⁷ Kua halalau te tala tēnei ki a Iehu, ki Iutea kātoa, vēnā foki ma nā fenua e tuākoi ki ei.

Ko nā Kavefekau mai ia Ioane te Papatiho

¹⁸ Kua fakamatala atu ki a Ioane nā mea uma iēnei e ona hoko, oi kalaga atu ai ki ni hoko e toka lua ke ōake,

¹⁹ oi uga ai ki lāua e ia ki te Aliki ke fehili vē ki ei, “Ko koe nei te tino na folafola e Ioane e hau, pe i ei hētahi tino e fakatalitali ki mātou ki ei?”

²⁰ Kua oatu ki lāua ki a Iehu, oi lea vē atu ai ki ei, “Ko ki māua na uga mai e Ioane te Papatiho, ke fehili atu pe ko koe te tino tēia e tuku e hau, pe ko ki mātou e fakatalitali ki hētahi tino?”

²¹ I te taimi tēnā, na fātoā uma te fakamālōlō e Iehu o nā tino e tokalahi mai nā tauale, nā fāmai pēhi, nā agaga kino, ma fakapupula nā mata o nā tāuaho e tokalahi.

²² Oi tali atu ai ia Iehu ki a te ki lāua, “Olo oi taku ki a Ioane, nā mea kua kikila ma fakalogo koulua ki ei: kua pupula ia mata o tāuaho, kua havavali nā tino e hē kātoatoa nā itūtino, kua fakamamāgia ki lātou e maua i nā tauale kino o te kili, kua logo ia taliga o nā tutuli, kua toe fakatutū nā tino oti, ma ko te Tala Lelei kua folafola ki tagata mātitiva.

²³ Amutia nā tino e hē māhalohalo mai ki a te au!”

²⁴ Kua olo kehe nā kavefekau a Ioane, oi kāmata ai oi tautala atu ia Iehu ki te kaifenua, e uiga ki a Ioane: “I te koutou ologa ki a Ioane i te vao, he ā te nae fia kikila koutou ki ei? He lau mutia e agina i te matagi?

²⁵ He ā la te na olo koutou ke kikila ki ei? He tamāloa e lākei i ni lākei uiga kehe te gali? Ko nā tino e lākei i nā lākei vēnei ma ola i he ōlaga taugatā, e nonofo i nā fale o nā tupu!

²⁶ Lea mai ake, he ā te na olo koutou ke kikila ki ei? He pelofeta? Io e hako, ka ko te tino na koutou kiteagia e hili atu tona tāua i lo he pelofeta.

²⁷ Auā ko Ioane te fakatatau ki ei te tuhituhiga paia e vē mai: ‘Kua vāgana te Atua, kikila, ka uga atu e au taku kavefekau ke muamua atu ia te koe, ke hāuni e ia te auala mo koe.’

²⁸ E lea atu au ki a te koutou, i nā tino kua fānanau mai ki te lalolagi, e hēai he tino e hili atu tona tāua i lo Ioane. Kae ko te tino e pito hili ona hē tāua i te Mālō o te Atua, e hili atu la tona tāua i lo Ioane.”

²⁹ Ko nā tino uma lele nae fakalogologo ki a Ioane; ma e pa foki lava ki nā aolafoga, na uhitaki ki te Atua ma na ki lātou faia te mea e hako i te kua oatu ke papatiho ki lātou e Ioane.

³⁰ Kae kua teteke e te kau Falehaio ma nā faiakoga o te Tūlāfono, te fuafuaga a te Atua mo ki lātou, ma e hēki ki lātou talia ai ke papatiho ki lātou e Ioane.

³¹ Kua toe lea vē atu ia Iehu, “He ā nei te ka kō fakatuhagia ki ei nā tino o tēnei tupulaga? E vē nei ni a?

³² E vē ki lātou ko nā tamaiti e nonofo i te māketi ma e taukalalaga atu tētahi vāega ki tētahi, ‘Nae ta atu e ki mātou nā pehe fiafia mo koutou, kae e hē hihiva koutou! Nae uhu atu e ki mātou nā haumate, kae e hē faitatagi koutou!’

³³ I te hauga o Ioane te Papatiho, nae fakalāina ma hēki inu ki he uaina, kae kua lea vē koutou, ‘E ulufia e he tēmoni!’

³⁴ I te hauga o te Ataliki o te Tagata, nae kai ma inu, kae kua lea vē koutou, ‘Kikila ki te tagata tēnei! E kai fakaatuatuvale ma konā i te uaina, ma ko he uō e a nā aolāfoga ma iētahi tino inohia!’

³⁵ Ka ko te poto o te Atua e fakaalia te moni, e ala ia te ki lātou uma kua ki lātou taliagia.”

Ko Iehu i te Fale o Himona te Falehaio

³⁶ Na valakaulia e hētahi o te kau Falehaio ia Iehu ke kakai ki lāua i tona fale, i te ōmoe o te afiafi. Oi fano ai ki ei ia Iehu, ma kua hāuni ka kakai.

³⁷ Nae i te kakai tēnā he fafine nae ola i he ōlaga agahala, ma i te ia lagonaga ko Iehu e kai i te fale o te Falehaio, oi fakatau ai e ia he fagu na gaohia i te alapaha, e tumu i nā lolo manogi taugatā.

³⁸ Oi fano ai kua tū i tua i tafa o nā vae o Iehu, kua tagi ma fakahuhū nā vae o Iehu i ona loimata. Oi holo ai e ia nā vae o Iehu i tona laulu ma hogi ki ei, ma liligi ki luga nā lolo manogi taugatā.

³⁹ I te kitea atuga e te Falehaio o te mea tēnei, oi lea vē ifo ai i tona loto, “Kāfai e moni ko te tagata tēnei he pelofeta, kua tatau ke ia iloa pe ko ai te fafine tēnei, kae pe he itūkāigā fafine vēhea foki tēia e pa ake ki a te ia; kua tatau ke ia iloa ko te fafine e ola i he ōlaga agahala!”

⁴⁰ Oi lea atu ai ia Iehu ki ei, “Himona, e i ei te mea e fia lea atu ai au ki a te koe.” Kua lea atu ia Himona, “Io, te Faiakoga, lea mai ake pe he ā.”

⁴¹ Oi vāgana atu ai ia Iehu, “E i ei nā tamāloa e toka lua nae nofo kaitālafu ki he tino e kaitālafu mai ai nā tupe e tagata. Ko tētahi tamāloa nae nofo kaitālafu i he limahelau tēnali, ka ko tētahi nae nofo kaitālafu i he limahefulu tēnali.

⁴² Ona kua hē mafai e te toka lua tēnei oi toe totogi a la kaitālafu, oi na fakamāgalo ai ki lāua e te tino e a ia nā tupe. Ko ai la o te toka lua tēnei ka hili atu tona alofa ki te tino e a ia nā tupe?”

⁴³ Kua tali mai ia Himona, “Hōvē pe ko te tino na lahi tana kaitālafu na fakamāgalo.” Kua tali atu ia Iehu, “E hako koe.”

⁴⁴ Oi liliu atu ai ki te fafine, ma lea vē atu ki a Himona, “E kē kitea te fafine tēnei? Na ulu mai au ki tō fale kae e hēki kē kaumaia ni vai mo oku vae, ka kua fulufulu e te fafine oku vae i ona loimata, ma holo i tona laulu.

⁴⁵ E hēki kē fakafeiloakia au i te hogi, kae talu toku hau kua hē uma te hogi o te fafine nei ki oku vae.

⁴⁶ E hēki kē ukua toku ulu i he lolo ōlive, kae kua ia ukua oku vae i nā lolo manogi.

⁴⁷ Ko au la e lea atu ki a te koe, ko ana agahala e lahi kua uma te fakamāgalo, ona ko te lahi o tona alofa kua fakaalia. Kae ko te tino e hē lahi ana agahala e fakamāgaloa, e hē lahi foki tona alofa e fakaalia.”

⁴⁸ Oi lea atu ai ia Iehu ki te fafine, “Ko au agahala kua fakamāgalo.”

⁴⁹ Ko iētahi tino nae kakai ma ia, kua kāmata oi fakataufai vēia, “Ko ai tēnei tino ke ia mafai oi fakamāgalo nā agahala.”

⁵⁰ Kae kua lea atu ia Iehu ki te fafine, “Ko tō fakatuatua kua ola ai koe; fano la ma te manuia.”