Luka 6 - Tokelauan New Testament

Ko te Fehili e uiga ki te Hāpati

¹ I tētahi aho Hāpati ka koi havali atu ia Iehu kui loto o he togāhaito, ka kua tau e ona hoko nā uluhaito ma mimili i o lātou lima, oi kai ai.

² Kae kua lea atu ki ei iētahi o te kau Falehaio, “He ā te kua fai ai e koutou te mea e fakahā i te Tūlāfono ke fai i te Hāpati?”

³ Oi tali atu ai ia Iehu, “E hēki faitau nei koutou ki te mea a Tavita na fai i te mauaga i te fia kaia, ko ia ma ki lātou nae fakatahi ma ia:

⁴ i te fanoga ki loto o te fale o te Atua oi kave ma kai nā falaoa kua uma te fakapaia mo te Atua? E hē fakataga i te Tūlāfono ke kai ki ei he tino vaganā nā ohitāulaga, ma na ia fōkia foki ki nā tino nae fakatahi ma ia.”

⁵ Oi lea atu ai ia Iehu ki a te ki lātou, “Ko te Ataliki o te Tagata, ko te pule ia o te Hāpati.”

Ko te Tamāloa e Mate tona Lima

⁶ I tētahi Hāpati, na fano ai ia Iehu ki loto o te hūnako ma akoako atu ki tagata. Nae i loto i kinā he tamāloa nae mate tona lima taumatau.

⁷ Nae i ei ni faiakoga o te Tūlāfono ma ni Falehaio nae hakilikili ke ki lātou mōliagia ia Iehu i hana holitūlāfono, oi nae tautuku lelei e ki lātou pe i na fakamālōlō e ia he tino i te Hāpati.

⁸ Kae kua iloa e Iehu nā mea i o lātou māfaufau, oi vāgana atu ai ki te tamāloa, “Tū ki luga oi hau ki mua i kinei.” Oi tū ake ai te tamāloa ki luga, ma tū ai i kinā.

⁹ Oi lea atu ai ia Iehu ki a te ki lātou, “Ko au e fehili atu: He ā te fakataga i te tātou Tūlāfono ke fai i te Hāpati? Ko te fai o he mea ke fakahao ai he ola, pe ke fakauma ai?”

¹⁰ Kua fakaholo atu tana kikila ki a te ki lātou uma, oi lea atu ai ki te tamāloa, “Fakahako atu tō lima” Kua vēnā ona fai e ia, oi toe lelei ai tona lima.

¹¹ Kae kua fēkakai lele ki lātou ma kāmata oi fakataufai, pe he ā ta ki lātou ka fai ki a Iehu.

Kua Filifili e Iehu nā Apohitolo e toka Hefululua

¹² I nā aho lava iēnā, na fano ai ia Iehu ki luga o he mauga oi tatalo ai; na fano te pō kātoa e tatalo ki te Atua.

¹³ Kua pa ki te taeao, oi lea ai ki nā hoko o ia ke ōmamai ki a te ia, ma na filifili ai e ia he toka hefululua o ki lātou, na ia fakaigoagia ni apohitolo;

¹⁴ ko Himona (na ia fakaigoa ki a Petelu), ma tona uho ko Anitelea; ko Iakopo ma Ioane, ko Filipo ma Patolomaio,

¹⁵ ko Mataio ma Toma, ko Iakopo te ataliki o Alefaio, ma Himona (nae fakaigoa ko te Lotonuku),

¹⁶ ko Iuta te ataliki o Iakopo, ma Iuta te Ihikaliota, te tino na kavea ma fakalata.

Kua Akoako atu ia Iehu ma Fakamālōlō nā Tauale

¹⁷ Kua fanaifo ia Iehu mai te mauga fakatahi ma te kau apohitolo, oi tū ai i he mea laugatahi ma he vāega tokalahi o ona hoko, fakatahi ma he kaifenua e tokalahi na ōmamai mai Iutea ma Ieluhalema, ma nā kakai tū matāfaga ko Tulo ma Haitonu;

¹⁸ na ōmamai oi fakalogologo ki a Iehu, ma ke fakamālōlō ki lātou mai o lātou tauale. Na ōmamai ai foki ma nā tino nae āfāina i nā agaga kino, ma na fakamālōlō ai foki ki lātou uma.

¹⁹ Ko nā tino uma lele, nae taumafai ke pa atu o lātou lima ki a Iehu, ona ko te mana nae fano ki fafo mai ia te ia, na fakamālōlō uma ai ki lātou.

Ko te Fiafia ma te Fakanoanoa

²⁰ Kua kikila atu ia Iehu ki ona hoko, oi lea atu ai vēnei ki ei, “Amutia koutou nā tino e mātitiva; auā e o koutou te Mālō o te Atua!

²¹ Amutia koutou iēnā e fia kakaia nei; auā ka fakamaliegia kātoatoa koutou! Amutia koutou iēnā e faitatagi nei; auā koutou ka faikakata!

²² “Amutia koutou kāfai ia tagata e feita atu ki a koutou, pe teteke, pe fakamātagā koutou, ma fakakino outou igoa, ona ko te Ataliki o te Tagata!

²³ Koutou ke olioli i te aho tēnā ma tūtaoho ki luga i te fiafia, auā e i te lagi te koutou taui lahi. Nae fai foki lava e o lātou tupuna nā mea iēnei ki nā pelofeta.

²⁴ Kae hāloa la koutou iēnā e maukoloa nei; auā kua uma te koutou mauagia o te ōlaga fīlēmū!

²⁵ Kae hāloa la koutou iēnā e mākokona nei; auā ka fia kakai koutou! Kae hāloa la koutou iēnā e faikakata nei; auā ka fakanoanoa ma faitatagi koutou!

²⁶ “Kae hāloa la koutou, kāfai koutou e taku leleia e tagata uma; auā ko te mea foki tēnā na fai e o lātou tupuna ki nā pelofeta pepelo.

Alolofa ki nā Tino e fai Koutou ma o lātou Fili

²⁷ “Kae ko au e lea atu ki a te koutou e fia fakalogo mai ki a te au: alolofa ki nā tino e fai koutou ma o lātou fili, ma fai lelei ki a te ki lātou e ita atu ki a te koutou,

²⁸ fakamanuia ki a te ki lātou e fetūa koutou, ma tatalo mo ki lātou e fakahāuā atu ki a te koutou.

²⁹ Kāfai tō pakōkō e po e he tino, fufuli foki ki ei tētahi pakōkō; kāfai tō peleue tatao e kave e he tino, fōki ki ei ma tō kofutino.

³⁰ Fōki ki ho he tino e gogō atu ki hau mea; ma kāfai hau mea e kave e he tino, koe nahe lea ki ei ke toe kaumai.

³¹ Ma ko nā mea e fofou koutou ke fai e iētahi tino ki a te koutou, ke vēnā foki lava ona fai e koutou ki a te ki lātou.

³² “Kāfai koutou e alolofa oioti ki nā tino e alolofa atu ki a te koutou, he ā te ka maua tauanoa ai he koutou fakamanuiaga? E pa foki lava ki nā tino agahala, e alolofa ki nā tino e alolofa ake ki a te ki lātou!

³³ Ma kāfai koutou e fehoahoani oioti ki nā tino e fehoahoani atu ki a te koutou, he ā te ka maua tauanoa ai he koutou fakamanuiaga? E pa foki lava ki nā tino agahala, e fai e ki lātou te mea tēnā!

³⁴ Ma kāfai e fōki oioti autou mea ki a te ki lātou e fakamoemoe koutou e ki lātou toe fakafoki atua, he ā te ka maua tauanoa ai he koutou fakamanuiaga? E pa foki lava ki nā tino agahala, e fōki a lātou tupe ki nā tino agahala, kae ke toe maua mai ai lava te tupe kātoa na fōki ki ei!

³⁵ Kae alolofa ki nā fili o koutou ma fai lelei ei; fōki autou mea e aunoa ma he koutou māfaufau, ke toe maua mai he mea. Ka maua ai e koutou he taui lahi, ma kavea ai koutou ma fānau a te Atua Hilihilikehe. Auā ko te Atua e agalelei ki nā tino kino ma hē loto fakafetai.

³⁶ Koutou la ke agalelei ki iētahi tino, e vē ko te koutou Tamana e agalelei.

Ko te Fakamahino atu ki Iētahi Tino

³⁷ “Nahe koutou fakamahino atu ki iētahi tino, oi hē fakamahinoa ai foki koutou e te Atua; nahe koutou fakahalagia iētahi tino, oi hē fakahalagia ai foki koutou e te Atua; fakamāgalo iētahi tino, oi fakamāgalo ai foki koutou e te Atua.

³⁸ Fōki ki iētahi tino, oi fōki atu ai ki a te koutou e te Atua. Ka maua kātoatoa e koutou, he vāega lahi lele e liligi atu ki nā lima o koutou — ki te mea e gata ai te mafai e koutou oi ōpoipoi i outou lima. Auā ko te fua e fakaaogā e koutou, ko te fua foki ia ka fakaaogā e te Atua ki a koutou.”

³⁹ Oi fai ai e Iehu te talafakatuha tēnei ki a te ki lātou: “E hē mafai ke takitaki e he tāuaho hētahi tāuaho, auā ka pakukū uma ai ki lāua ki loto o he utu.

⁴⁰ E hēai he tamaiti akoga e hili atu i lo tona faiakoga, kae ko tamaiti akoga tau tokatahi uma, kāfai e uma lelei ana akoakoga, ka vē lava ko tona faiakoga.

⁴¹ “He ā te kitea ai e koe te mea otaota i loto o te mata o tō uho, kae e hē kē kitea te kogālakau i loto o tō mata?

⁴² E lea vēhea koe ki tō uho, ‘Te uho, tuku mai tō mata ke keu kehe e au te mea otaota i loto,’ kae ko tēnā e hē kē kitea te kogālakau i loto o tō mata? Ko koe ko he tino āmio pepelo! Kave kehe muamua te kogālakau i loto o tō mata, oi kitea lelei ai e koe ke kave kehe te mea otaota i loto o te mata o tō uho.

Ko te Lākau ma ona Fua

⁴³ “Ko te lākau e ola lelei, e hē fua mai ai ni fua kino, e hē fua mai foki i he lākau e ola kino ni fua e lelei.

⁴⁴ Ko nā lākau takitahi uma e iloa i o lātou fua; e hē kē taua ni mati pe ni vine mai ni lākau tālatala.

⁴⁵ Ko te tino lelei, e fakaputu i tona loto nā mea lelei e vē ni koloa tāua, ma e tautala i nā kupu lelei mai te lahi o te lelei i tona loto; ko te tino kino e fakaputu i tona loto nā mea kino e vē ni koloa kino, e tautala i nā kupu kino mai te lahi o te kino i tona loto. Auā e tautala lava te gutu i nā mea e tumu ai te loto.

Ko nā Tino Faufale e Toka Lua.

⁴⁶ “He ā te lea mai ai koutou ki a te au, ‘Te Aliki, Te Aliki,’ kae e hē koutou faia nā mea e lea atu ai au?

⁴⁷ Ho he tino e hau ki a te au ma fakalogo ki aku kupu, ma uhitaki ki ei — ka taku atu e au ki a te koutou te mea e fakatuha ki ei te tino tēnā.

⁴⁸ Ka vēia ia ko he tino e fau tona fale; e keli e ia fakaloloto te tulagā fale, oi fau ai te fakavae ki luga o te papa. Kua pā te vaitafe, oi tafe mai ai te lolovai ki te fale, kae e hēki māluelue lele auā na lelei te fauga.

⁴⁹ Kae ko te tino e lagona e ia āku kupu kae hē uhitaki ki ei, e vēia ia ko he tino e fau tona fale, kae e hēki kelia he fakavae; kua tafe mai te lolovai ki te fale oi pakū ai ki lalo, kua matuā fakahēaogā lava!”