Luka 5 - Tokelauan New Testament

Ko nā Hoko Muamua na Filifilia e Iehu

¹ I tētahi aho, ko Iehu nae tū i te matāfaga o te Vaitūloto ko Kenehaleta, kae kua nunu atu ia tagata ki a te ia, ke fakalogologo ki te kupu a te Atua.

² Na kitea atu e ia nā vaka e lua e i te matāfaga; ko nā tino faifaiva kua tutū ki lalo oi fufulu o lātou kupega.

³ Kua hopo ia Iehu ki luga o tētahi o nā vaka — e o Himona — kae lea ki a Himona ke hōhō mālie te vaka ki gātai mai te matāfaga. Oi nofo ai ki lalo i luga o te vaka ma akoako mai ki te kaifenua.

⁴ Kua uma tana tautalaga, oi lea vē atu ai ki a Himona, “Tukutuku atu te vaka ki te mea loloto, oi tuku ai ki lalo nā kupega o koutou ke maua he ika.”

⁵ Ka kua tali mai ia Himona, “Te tamana, na fano te pō kātoa e fāgogota ki mātou, kae e hēki maua he mea. Kae kāfai koe kua lea vēnā mai, ka tuku la e au nā kupega ki lalo.”

⁶ Kua tuku o lātou kupega ki lalo, oi maua ai nā ika e lahi, ma kua tau gāhaehae ai nā kupega.

⁷ Oi tālo ai ki o lātou hoa i tētahi vaka, ke ōmamai oi fehoahoani ake ki a te ki lātou. Kua ōmamai o lātou hoa, oi uta ai e ki lātou nā vaka i te ika ma kua tau gōgoto.

⁸ I te kiteaga e Himona Petelu o te mea tēnei kua tupu, oi tōtuli ifo ai i mua o Iehu ma lea vē atu, “Te Aliki, fano kehe ko ma au, auā ko au ko he tino agahala!”

⁹ Na ofo lele ia Himona Petelu ma ki lātou uma nae i ei, ki te lahi o a lātou ika na maua.

¹⁰ Na vēnā foki nā hoa o ia nae i tētahi vaka, ia Iakopo ma Ioane nā ataliki o Hepetaio. Oi lea atu ai ia Iehu ki a Himona, “Koe nahe mataku; e kāmata atu nei, ko koe ka fāgota ke maua e koe ni tino, kae hē ni ika.”

¹¹ Kua toho ake o lātou vaka ki gāuta, oi tuku ai e ki lātou nā mea uma, kae mulimuli ki a Iehu.

Kua Fakamālōlō e Iehu he Tamāloa

¹² Ka koi i tētahi kakai ia Iehu, kae hau ki ei he tamāloa e maua i te lēpela. I te ia kitea atuga o Iehu, oi fakapakū fakapūlou ai i mua o ia, ma talohaga vē atu ki ei, “Te Aliki, kāfai koe e loto ki ei, e kē mafaia oi fakamamā au.”

¹³ Oi papae atu ai ia Iehu, kua paki atu tona lima ki te lēpela ma lea vē atu, “Ko au e loto ki ei. Mamā loa!” Ma ko te taimi lava tēnā na teka ai te lēpela mai ia te ia.

¹⁴ Oi fakatonu ai vēnei e Iehu te tamāloa, “Ko koe e hē lea ki he tino, kae fano oi fakaali tō tino ki he ohitāulaga; ma ofo atu ai he tāulaga mo te fakamamāgia o koe, e vē ona fakatonu mai e Mohe, ke fai ma fakamāoniga ki tagata ko koe kua mamā.”

¹⁵ Kae kua fakaatili ai te halalau o te tala ki a Iehu. Oi holo mai ai te tokalahi o tagata ke fakalogologo ki a te ia, ma ke fakamālōlō ki lātou, mai o lātou tauale.

¹⁶ Kae ko Iehu kua fano ki te vao, oi tatalo ai.

Kua Fakamālōlō e Iehu he Tamāloa e Mate tona Tino kātoa

¹⁷ I tētahi aho nae akoako atu ai ia Iehu, kae nonofo ma fakalogologo mai ki ei ni Falehaio ma ni faiakoga o te Tūlāfono (na ōmamai i nā kakai uma o Kalilaia ma Iutea, vēnā ma Ieluhalema); ma nae ia te ia te mana o te Aliki ke fakamālōlō ai nā tauale.

¹⁸ Oi ōmamai ai ni tamāloa, e hiki mai i luga o he moega he tamāloa e mate tona tino kātoa. Na taumafai ki lātou ke kave ki lotofale, ma fakatakoto i mua o Iehu.

¹⁹ Kae ona ko te tumu o te kaifenua, kua hē maua ai he avanoa ke kave ai te tauale ki loto. Oi hiki ai e ki lātou te tauale ki luga o te tuāfale, ma kua uma te fakapu o te tuākaukau, oi tukutuku ifo ai tona moega ki lototonu o te potopotoga, i mua o Iehu.

²⁰ Kua kitea e Iehu te lahi o to lātou fakatuatua, oi vāgana atu ai ki te tamāloa, “Te uho, ko au agahala kua fakamāgalo.”

²¹ Oi kāmata ai kua fakataufai nā faiakoga o te Tūlāfono ma te kau Falehaio, ma fehili vē, “Ko ai tēnei tagata e fai kupu fāifāi ki te Atua? Nā ko te Atua oioti lava te ia mafaia oi fakamāgalo nā agahala!”

²² Kua iloa e Iehu nā mea i o lātou māfaufau, oi vāgana atu ai ki ei, “He ā te māfaufau ai koutou ki ni mea vēnā?

²³ Tēfea te mea e faigōfie, ko toku lea, ‘Ko au agahala kua fakamāgalo,’ pe ko toku lea, ‘Tū ki luga oi havali’?

²⁴ Ka kō fakamāonia atu la ki a te koutou, e i te Ataliki o te Tagata te pule i te lalolagi, ke fakamāgalo ai nā agahala.” Oi vāgana atu ai ki te tamāloa e mate tona tino kātoa, “Ko au e lea atu ki a te koe, tū ki luga, hiki tō moega ma fano ki tō kāiga!”

²⁵ Ko te taimi lava tēnā na tū loa lava te tamāloa ki luga i mua o ki lātou uma, kua kave te moega nae takoto ai, oi fano ai ki tona fale, ma viviki ake ki te Atua.

²⁶ Na taufai ofo ki lātou uma lele, ma viviki ake ki te Atua. Kua fakatumulia foki ki lātou i te mātataku, ma kua lea vē, “Kai te ofoofogia o nā mea kua kitea e ki mātou i te aho nei!”

Kua Kalaga ia Iehu ki a Levi.

²⁷ Kua uma atu te mea tēnā, oi fano kehe ai ia Iehu. Na ia kitea atu he aolāfoga e igoa ki a Levi, e nofo mai i loto o tona ofiha. Kua vāgana atu ai Iehu ki ei, “Mulimuli mai ki a te au.”

²⁸ Na tuku loa e Levi ana mea uma lele, kae kua tū ki luga oi mulimuli ki a Iehu.

²⁹ Oi fai ai te kaiga lahi a Levi i tona fale mo Iehu, ma e tokalahi nā aolāfoga ma iētahi tino na fakatahi atu ki ei.

³⁰ Ko iētahi o te kau Falehaio ma iētahi o faiakoga o te Tūlāfono, kua faitio ki ona hoko. Kua lea vē atu ki ei, “He ā te kakai ma inu fakatahi ai koutou ma nā aolāfoga ma iētahi tino inohia?”

³¹ Kua tali atu ia Iehu ki a te ki lātou, “Ko nā tino e mālōlō e hē ki lātou manakomia he fomai, kae vaganā ai nā tino e tauaale.

³² Ko au e hēki hau ke kalaga ki nā tino lelei kae ki nā tino e inohia e tagata, ke halamō.”

Ko te Fehili e uiga ki te Fakalāina

³³ Kua lea atu iētahi tino ki a Iehu, “Ko nā hoko o Ioane e fakalāina ho ma fai a lātou tatalo, oi vēnā foki nā hoko o te kau Falehaio; kae ko nā hoko o koe e kakai ma feinu.”

³⁴ Kua tali mai ia Iehu ki a te ki lātou, “E koutou mafaia oi fakalāina te kau valakaulia i he fakaipoipoga, ka koi i ei te tama fakaipoipo fakatahi ma ki lātou? E hē mafai!

³⁵ Kae e hau te aho e kave kehe ai te tama fakaipoipo mai ia te ki lātou, oi fātoā fakalāina ai ki lātou.”

³⁶ Na fai foki e Iehu te talafakatuha tēnei ki a te ki lātou: “E hēai he tino e hahae e ia he meakie mai he peleue fou ke fono ai he peleue tuai. Kāfai e ia faia, ka hahae e ia te peleue fou, ma ko te meakie fou ka hē fetaui ma te meakie tuai.

³⁷ E hē utua foki e he tino he uaina fou, ki loto o ni fagu pakumanu uaina kua uma te fakaaogā, auā ka gāpāpā nā fagu pakumanu uaina i te uaina fou, ka gogolo ki fafo te uaina, ma ko nā fagu pakumanu uaina ka fakakino.

³⁸ Kae ko te uaina fou e tatau ke utu ki loto o ni fagu pakumanu uaina fou.

³⁹ Ma e hēai he tino e uma te inu ki te uaina tuai, e toe fia inu ki te uaina fou, auā e lea vē, ‘E hili atu te lelei o te uaina tuai.’ ”