Luka 4 - Tokelauan New Testament

Ko nā Fakaohoohoga o Iehu

¹ Kua toe foki ifo ia Iehu mai te Iolitana, ma kua fakatumulia i te Agaga Paia; oi tataki ai e te Agaga ki te vao,

² ma ko kinā te na fakaohooho ai e te Tiāpolo i nā aho e fagafulu. E hēki kai lele i te taimi kātoa tēnei, ma i te umaga, na lagona e ia te fia kaia.

³ Kua lea atu te Tiāpolo ki ei, “Kāfai koe ko te Ataliki o te Atua, fakatonu la te fatu tēnei, ke liu ma falaoa.”

⁴ Ka kua tali atu ia Iehu, “Lea mai te tuhituhiga paia, ‘E hē ko nā meakai oioti e ola ai te tagata’ ”

⁵ Oi kave ai ia Iehu e te Tiāpolo ki he mea maualuga, ma fakakikila ki nā mālō uma o te lalolagi, mo he taimi pukupuku.

⁶ Kua lea atu te Tiāpolo ki a Iehu, “Ka fōki atu e au ki a te koe te pule ki nā mālō uma iēnei, vēnā ma o lātou mamalu; auā kua uma te tuku mai ki a te au, ma e kō mafaia oi fōki ki ho he tino e loto au ki ei.

⁷ Kāfai la koe e ifo mai ki a te au, ko nā mea uma lele iēnei, ka e a koe.”

⁸ Kua tali mai ia Iehu, “E lea mai te tuhituhiga paia, ‘Ifo atu ki te Aliki tō Atua, ma kaukauna oioti ki a te ia!’ ”

⁹ Oi kave ai ia Iehu e te Tiāpolo ki Ieluhalema, kua fakatū i luga o te mea pito maualuga o te Mālumalu, oi lea vē atu ai te Tiāpolo ki ei, “Kāfai ko koe ko te Ataliki o te Atua, oho la ki lalo mai kinei,

¹⁰ auā lea mai te tuhituhiga paia, ‘Ka fakatonu e te Atua ana agelu, ke ki lātou tauhia koe, ma puipuia koe:’ ma

¹¹ ‘Ka ki lātou hapahapaia koe i o lātou lima, ke nahe tokai ō vae ki he fatu.’ ”

¹² Ka kua tali atu ia Iehu ki ei, “E lea mai te tuhituhiga paia, ‘Nahe kē tofotofoa te Aliki tō Atua.’ ”

¹³ Kua uma te fakaohooho o Iehu e te Tiāpolo i nā mea uma iēnei, oi fano kehe ai kae kua tuku ia Iehu, ke pa ki hētahi taimi.

Kua Kāmata te Gāluega a Iehu i Kalilaia

¹⁴ Oi toe foki ai ia Iehu ki Kalilaia, ma nae fakatahi ma ia, te mana o te Agaga Paia. Kua halalau foki te tala e uiga ki a te ia, ki te kogāfenua kātoa tēnā.

¹⁵ Na akoako atu ia ki nā tino i loto o nā hūnako, ma na vīkia ai ia e ki lātou uma lele.

Kua Teteke e Tagata o Nahaleta ia Iehu

¹⁶ Oi fano ai ia Iehu ki Nahaleta, te nuku na ola ake ai. Kua pa ki te Hāpati, oi fano ai ki te hūnako, e vē ko tana māhani. Na tū ki luga ke ia faitaua nā Tuhituhiga Paia,

¹⁷ oi tuku atu ai ki ei te tuhi a te pelofeta ko Ihaia. Kua fofola e ia te tuhitākai, oi maua ai e ia te mea e tuhi ai,

¹⁸ “Ko te Agaga o te Aliki e i luga o oku, auā kua ia fakaukua au, ke tālakia te tala lelei ki nā tino mātitiva. Kua ia uga maia au ke folafola te fakahaolotoga o tagata e nonofo haihaitia ma te fakapupulaga o mata o tāuaho, ke fakahaoloto nā tino e fai kino ki ei ia tagata,

¹⁹ ma fakailoa atu kua pa mai te taimi, ka fakaola ai e te Aliki ona tagata.”

²⁰ Kua toe tākai e Iehu te tuhitākai, oi fōki ai ki te tino nae ia kikilagia te hūnako, kae nofo ki lalo. Ko mata o tagata uma i loto o te hūnako, na tuku uma ki a Iehu,

²¹ i te leaga vēia ki a te ki lātou, “Ko te vāega tēnei o te tuhituhiga paia kua taunuku i te aho nei, i te fakalogoga o koutou ki te faitau atuga.”

²² Na fiafia lahi ki lātou uma, ma ofo lele ki te lelei o ana fakakupuga nae tautala ai. Kua vē ake te lātou kupu, “E hē ko ia tēnei te ataliki o Iohefa?”

²³ Kua lea atu ia Iehu ki a te ki lātou, “E hē taumate ka koutou fai maia ki a te au te alagākupu tēnei, ‘Te fomai, mua fakamālōlō lava koe e koe!’ Ka lea mai foki koutou, ‘Fai foki i kinei i tō nuku, nā mea na fakalogo ki mātou na fai e koe i Kapenaumi.’ ”

²⁴ Oi toe lea atu ai ia Iehu, “E takutino atu e au ki a te koutou te meamoni, e hēai he pelofeta e talia i tona lava nuku.

²⁵ “Kae ko te meamoni, nae tokalahi ia fafine kua oti a lātou āvaga i Ihalaelu i nā aho o Elia, i te taimi na hēki i ei ai he ua e to i te tolu ma te āfa tauhaga, ma na oge lahi lele ai te fenua kātoa.

²⁶ Oi ka ko Elia e hēki ugāgia ki he tino e fokotahi o ki lātou, kae na uga ki he fafine kua oti tana āvaga, nae nofo i Halefata, i te itūmālō o Haitonu.

²⁷ Ma nae tokalahi nā lēpela i Ihalaelu i nā aho o te pelofeta ko Elihaia; kae e hēai lele he tino o ki lātou iēnā na fakamālōlō, kae vaganā ai ia Namanu te Hulia.”

²⁸ I te lagona atuga e nā tino nae i loto o te hūnako te mea tēnei, oi tīgā lele ai o lātou loto.

²⁹ Oi tutū ai ki luga oi toho ia Iehu ki fafo o te kakai, ma kave ki te tafatō o te mea maugā e tū i luga to lātou kakai. Ko te mea nae i o lātou māfaufau, ko Iehu e ki lātou togia ki lalo o te tafatō,

³⁰ kae kua havali atu ia Iehu i loto o te tumutumu o te kaifenua, ma fano kehe ai ma kinā.

He Tamāloa nae Ulufia e he Agaga Kino

³¹ Oi fano ai ia Iehu ki Kapenaumi, he kakai i Kalilaia, ma akoako atu ki tagata i te Hāpati.

³² Na ofo lele nā tino ki te faiga o ana akoakoga, ona nae tautala ma te pule.

³³ Nae i te hūnako he tamāloa nae ia te ia te agaga o he tēmoni kino lahi; nae taukekē leo lahi vēia,

³⁴ “Iehu te Nahaleta, he ā ko ta koe e fai mai ki a te ki mātou? Ko koe kua hau ke fakatāugā ki mātou? E kō iloa koe: ko koe ko te kavefekau paia a te Atua!”

³⁵ Kae kua muna atu ki ei ia Iehu, kua lea vē atu, “Te piha kae hau loa ki fafo o te tino tēnā!” Na togi loa e te tēmoni te tamāloa ki lalo i mua o ki lātou, oi fano ai ki fafo kae e hēki ia faia he mea ke āfāina ai te tamāloa.

³⁶ Na ofo lele ia tagata uma, ma kua lea vē tētahi ki tētahi, “Ni itūkāigā kupu a iēnei? Ko te tagata tēnei e ia te ia te pule ma te mana, ma e ia fakatonua nā agaga kino, ma ōmamai ai lava ki fafo!”

³⁷ Oi halalau ai te tala ki a Iehu, ki nā itū uma o te kogāfenua tēnā.

Kua Fakamālōlō e Iehu nā Tino e Tokalahi.

³⁸ Kua fano kehe ia Iehu mai te hūnako, oi fano ai ki te fale o Himona. Ko te mātua o te āvaga a Himona, e tauale i te fiva maualuga, oi fakataumuna ai ki lātou ki a Iehu e uiga ki te fafine.

³⁹ Oi fano ai ia Iehu, kua tū i tafa o te moega o te fafine kae fakatonu te fiva ke fano kehe mai te fafine. Kua fano kehe te fiva mai te fafine, oi tū ake ai loa ki luga i te taimi lava tēnā, oi laulau te lātou meakai.

⁴⁰ I te gotoga o te la, ko ki lātou uma lele nae i ei ni o lātou tino nae maua i nā itūkāigā tauale kehekehe, kua ōmamai ma kaumai ki a Iehu: kua fakauta ona lima ki luga o ki lātou tau tokatahi, oi mālōlō ai ki lātou uma.

⁴¹ Na olo foki ki fafo nā tēmoni mai nā tino e tokalahi, ma taukalalaga vēia, “Ko koe ko te Ataliki o te Atua!” Kae kua fakatonu atu e Iehu nā tēmoni ke nahe ki lātou tautatala, auā e iloa e nā tēmoni, ko Iehu ko te Mehia.

Kua Tālaki e Iehu te Tala Lelei i loto o nā Hūnako

⁴² Kua malama te taeao, oi tukua ai e Iehu te kakai kae fano ki he kogāfenua e hēai ni tino e nonofo ai. Kua kāmata oi hakili e tagata ia Iehu, ma i te mauaga o ia e ki lātou, oi taumafai ai ki lātou ke tāofi ia Iehu, ke nahe fano kehe ma kinā.

⁴³ Kae kua lea atu ia Iehu ki a te ki lātou, “E tatau foki ke kō tālakia te Tala Lelei e uiga ki te Mālō o te Atua ki iētahi kakai, auā ko tēnei te mea na uga mai au e te Atua ke fai.”

⁴⁴ Oi tālaki atu ai lava e ia te Tala Lelei i loto o nā hūnako, i Iutea kātoa.