Luka 22 - Tokelauan New Testament

Ko nā Taupulepulega ke Tāmate ia Iehu

¹ Kua tāli pa ki nā aho o te Fakamanatuga o te Falaoa Hē Fakafefetea, e fakaigoa ko te Pāheka.

² Ko nā ohitāulaga hili ma nā faiakoga o te Tūlāfono nae mātataku i tagata, ko te mea ia nae hakilikili ai e ki lātou he auala ke tāmate munimuni ai ia Iehu.

Kua Malie ia Iuta ke Fakalata e ia ia Iehu

³ Oi ulufia ai e Hātani te loto o Iuta te Ihikaliota, he tino o te kau hoko e toka hefululua.

⁴ Oi fano ai ia Iuta oi lea ki nā ohitāulaga hili fakatahi ma nā takitaki o nā leoleo o te Mālumalu, e ia mafai oi fakalata ia Iehu.

⁵ Na fiafia lele nā ohitāulaga hili, oi na tonu ai ke totogi e ki lātou ia Iuta i ni tupe.

⁶ Oi na malie ki ei ia Iuta, ma kāmata ai loa oi tautuku e ia he avanoa ke ia tukulima atua ai ia Iehu ki a te ki lātou, kae hē iloa e tagata.

Kua Hāuni atu ia Iehu mo te Kaiga Fakamanatu o te Pāheka

⁷ Kua pa ki te aho e tāmate ai nā punuamāmoe mo te Pāheka, ka koi fakaauau lava te Fakamanatuga o te Falaoa Hē Fakafefetea.

⁸ Oi uga ai e Iehu ia Petelu ma Ioane ma te fakatonuga tēnei, “Olo oi tapena te kaiga o te Pāheka ke kakai ai ki tātou.”

⁹ Kua lea mai ki lāua, “Ko fea te fofou koe ke hāuni ai e ki māua te kaiga?”

¹⁰ Kua tali atu ia Iehu, “Kāfai koulua e olo ki te kakai, ka i ei he tamāloa e amo he fagu vai e fetaui koutou. Olo oi mulimuli ki ei ke pa ki loto o te fale e fano ki ei,

¹¹ oi lea ai ki te tino e o ia te fale, ‘Ko te Faiakoga e lea atu ki a te koe, Tēfea te potu ka kakai ai au ma oku hoko i te kaiga o te Pāheka?’

¹² Ka fakahino atu e ia ki a te koulua he potu lahi i te falealuga, kua i ei nā meāfale, ma tapena ai e koulua i kinā nā mea uma.”

¹³ Oi olo ai ki lāua, ma na ki lā maua atu nā mea uma lele e vē lava ona lea ake ai ia Iehu; ma na hāuni ai loa e ki lāua te kaiga o te Pāheka.

Ko te Kaiga a te Aliki

¹⁴ Kua pa ki te taimi o te kaiga, oi nofo ai ki lalo ia Iehu i te laulau fakatahi ma te kau apohitolo.

¹⁵ Kua vāgana atu ia Iehu ki a te ki lātou, “Ko au kua fofou lahi lele ke kakai fakatahi ki tātou i te kaiga tēnei o te Pāheka, ka ko hēki pa mai oku puapuagā!

¹⁶ Auā e lea atu au ki a te koutou, ka hē toe kai lele au ki ei, ke pa ki tona fakatinoga kātoatoa i te Mālō o te Atua.”

¹⁷ Oi tago ai ia Iehu ki te ipu, kua fakafetai ki te Atua, ma vāgana vē atu ai, “Kavatu te ipu tēnei oi feinu uma koutou ki ei.

¹⁸ E lea atu au ki a te koutou, e kāmata atu i te aho nei, ko au ka hē toe inu lele ki te uaina tēnei, ke pa mai te Mālō o te Atua.”

¹⁹ Oi tago ai ki te falaoa, kua fakafetai ki te Atua, oi tavaevae ai ma fōki ki te kau apohitolo, ma lea vē atu, “Ko toku tino tēnei, kua fōki atu mo koutou. Fai te mea tēnei e koutou, ke fai ma fakamanatuga ki a te au.”

²⁰ Na vēnā foki oi tuku atu e ia te ipu i te umaga o te kakai, ma vāgana vē atu, “Ko te ipu tēnei o te feagaiga fou a te Atua, kua fakamau fakailoga i toku toto kua fakamaligi mo koutou.

²¹ “Kae, kikila! Ko te tino ka ia fakalatagia au, e i kinei i te laulau fakatahi ma au!

²² Auā ko te Ataliki o te Tagata e oti lava e vē ona finagalo ki ei te Atua, kae hāloa la te tino e ia fakalatagia!”

²³ Oi kāmata ai oi fakataufai ki lātou, pe ko ai to ki lātou ka ia faia te mea tēnei.

Ko te Fīnauga pe ko Ai te Hili te Tāua

²⁴ Kua fai te fīnauga a te kau hoko, pe ko ai to ki lātou e hili te tāua.

²⁵ Oi lea atu ai ia Iehu ki ei, “Ko tupu o tagata nukukehe, e kātoatoa te lātou pule ki o lātou tagata uma, ma ko o lātou takitaki, e fofou ke iloa ki lātou ni ‘Ni tino alolofa.’

²⁶ Kae ko koutou e hē vēnā; ko te tino e hili te maualuga o tona tūlaga ia te koutou, e tatau ke kavea ia ke vē ko te tino e pito hili ona maulalo tona tūlaga, ma ko te takitaki e tatau ke vē ko he kaukauna.

²⁷ Ko ai te hili, ko te tino e nofo ki lalo oi kai, pe ko te tino e tautua ki ei? E hē ko te tino nei e nofo ki lalo oi kai? Kae i te taku māfutaga ma koutou, ko au ko he tino e tautua.

²⁸ “Ko koutou iēnā te nae tūmau pea lava ma au, i nā taimi o oku puapuagā;

²⁹ ma e vē oi tuku mai e toku Tamana ki a te au te avanoa ke pule ai, ka vēnā foki oi tuku atu e au ki a te koutou te avanoa tēnā,

³⁰ kae ke mafai ai koutou ke kakai ma inu fakatahi ma au i toku Mālō, ma nonofo i luga o nā nofoāliki, ke pūlea ai e koutou nā puikāiga e hefululua o Ihalaelu.

Kua Vavalo e Iehu te Fakafiti a Petelu

³¹ “Himona, Himona! Kikila, kua ia Hātani te fakatagaga mai te Atua ke ia tofotofoa ai koutou uma, ma tuku kehekehe nā tino lelei mai nā tino kino, e vē oi tuku kehekehe e te faifatoaga te haito mai te atigi haito.

³² Kae ko au kua tatalo mo koe Himona, ke nahe uma tō fakatuatua; ma kāfai e toe liliu mai koe ki a te au, ke mafai ke fakamākeke koe ki ō uho.”

³³ Kua tali atu ia Petelu, “Te Aliki, ko au kua hāuni ke olo ma koe ki te falepuipui, ma ke oti fakatahi ma koe!”

³⁴ Kua lea atu ia Iehu, “E takutino atu e au ki a te koe Petelu, ka hē vivini lele ia moa i te pō nei, heiloga koe kua fakafiti fakatolu, e hē kē iloa au.”

Taga tupe, Ato malaga, ma he Pelu

³⁵ Oi fehili atu ia Iehu ki ona hoko, “I te kō uga atuga o koutou e aunoa ma he taga tupe, he ato malaga pe ni hēvae, e i ei nei he mea na fofou koutou ki ei kae e hēki koutou mauagia?” Kua tali mai ki lātou, “E hēki i ei lele he mea e fokotahi.”

³⁶ Oi lea atu ai ia Iehu, “Ka ko te taimi nei la, ko te tino e i ei hana taga tupe pe he ato malaga, oi kave; ma ko te tino e hēai hana pelu, e tatau ke fakatau atu tona peleue tatao, ke maua mai ai he tupe ke fakatau ai hana pelu.

³⁷ Auā e lea atu au ki a te koutou, ko te tuhituhiga paia e lea mai, ‘Na faitau fakatahi ia ma nā tino holi tūlāfono,’ e tatau ke taunuku ki a te au, auā ko te mea tēnei na tūhia e uiga ki a te au, e taunuku lava.”

³⁸ Kua lea atu te kau hoko, “Te Aliki, kikila, iēnei nā pelu e lua!” Oi tali atu ai ia Iehu, “Hoia loa!”

Kua Tatalo ia Iehu i te Mauga o Ōlive

³⁹ Kua fano kehe ia Iehu mai te kakai, oi fano ai ki te Mauga o Ōlive, e vē lava ko te mea kua māhani ai ia; ma na mulimuli atu ki a te ia ono hoko.

⁴⁰ Kua pa atu ia ki ei, oi lea atu ai ki ona hoko, “Tatalo ke nahe maua koutou i ni fakaohoohoga.”

⁴¹ Oi tūmuli atu ai ia Iehu ki he mea e hē mamao lahi atu ma ki lātou, kua tōtuli ki lalo ma tatalo.

⁴² Kua lea vē, “Te Tamana, kāfai koe e finagalo ki ei, kave kehe ko te ipu tēnei o puapuagā mai ia te au. Kae nahe faia toku loto, ka ko tō finagalo.”

⁴³ Oi fakakitea ai he agelu mai te lagi ki a Iehu, ma fakamākeke ki a te ia.

⁴⁴ Ko te popole lahi o tona loto, na ātili ai oi tatalo fakatauanau; ko tona āfu kua vēia ni motimoti toto e pakukū ifo ki te kelekele.

⁴⁵ Kua uma tana tatalo, oi tū ai ki luga kua toe liliu ki ona hoko, ma na ia maua atu e momoe ona kua fai vāivai i to lātou loto fakanoanoa.

⁴⁶ Oi lea vē atu ai ki ei, “He ā te momoe ai koutou? Nonofo ki luga oi tatalo ke nahe pa koutou ki ni fakaohoohoga”

Kua Puke Fakapagotā ia Iehu

⁴⁷ Ka koi tautala atu ia Iehu kae pa mai he kaifenua, e takitaki mai e Iuta, tētahi o te kau hoko e toka hefululua. Kua hau ki tafa o Iehu ke hogi ia ki ei.

⁴⁸ Kae kua lea vē atu ia Iehu ki ei, “Iuta, e fakalata e koe te Ataliki o te Tagata i he hogi?”

⁴⁹ I te kitea atuga e nā hoko nae fakatahi ma Iehu te mea ka tupu, oi fehili vē atu ai, “Te Aliki, ka fakaaogā a mātou pelu?”

⁵⁰ Oi ta ai e hētahi o ki lātou hētahi o kaukauna a te Ulu Ohitāulaga, ma motu ai te taliga taumatau.

⁵¹ Kae kua vāgana atu ia Iehu, “Hoia loa!” Oi tago ai ki te taliga o te kaukauna ma na toe lelei ai.

⁵² Oi lea atu ai ia Iehu ki te kau ohitāulaga hili, nā leoleo o te Mālumalu, ma te kau toeaina na ōmamai ke puke ia, “Ko au nei he tino kaihohoa kua ōmamai ai koutou ma nā pelu ma nā pōvai?

⁵³ I aho uma ko au e fakatahi ma koutou i loto o te Mālumalu, kae e hēki koutou pukea au i kinā. Kae ko tēnei te taimi e fakatino ai e koutou te pule a te pōgihā.”

Kua Fakafiti ia Petelu e Hē ia iloa ia Iehu

⁵⁴ Kua puke e ki lātou ia Iehu ma takitaki ki te fale o te Ulu Ohitāulaga; ma ko Petelu kua taumulimuli mamao atu i tua.

⁵⁵ Nae tafu he afi i lototonu o te lōtoā, oi fano ai ki ei ia Petelu ma nofo ki lalo i te mea e i ei ai nā tino i tafa o te afi.

⁵⁶ I te kitea atuga e hētahi o nā kaukauna fafine ko Petelu e nofo i tafa o te afi, oi kikila hako ai ki ei kae lea vē, “Ko te tino foki tēnei nae fakatahi ma Iehu!”

⁵⁷ Kae kua fakafiti ia Petelu, ma lea vē atu, “Te māfine, e hē kō iloa te tino tēnā!”

⁵⁸ E hēki mataloa kae kitea atu e hētahi tamāloa ia Petelu, oi lea atu ai ki ei, “Ko koe foki tētahi tino o ki lātou!” Kae kua tali mai ia Petelu, “Te taulealea, e hē ko au!”

⁵⁹ Mulimuli ake, pe kua kātoa he itūlā, oi fīnau mālohi ai lava hētahi foki tamāloa, kua lea vē, “E mautinoa lelei lava ko te tagata tēnei nae fakatahi ma Iehu, auā ko ia foki ko he Kalilaia!”

⁶⁰ Kae kua tali atu ia Petelu, “Te taulealea, e hē kō iloa te mea tēnā e lea mai ai koe!” Ko te taimi lava tēnā, ka koi tautala ia Petelu, kae vivini te moa.

⁶¹ Kua liliu mai te Aliki ki ona tua, oi kikila hako ki a Petelu, ma na manatua ai loa e Petelu te lea vē akega o te Aliki ki a te ia, “Ka ko hēki vivini te moa i te pō nei, ka kua fakafiti fakatolu koe e hē kē iloa au.”

⁶² Oi fano ai ia Petelu ki fafo, kua tagi aueuē ai.

Kua Fakatauemu nā Tino ki a Iehu ma Kini e ki Lātou

⁶³ Ko nā tino nae leoleo e ki lātou ia Iehu, kua fakatauemu ki ei ma kini e ki lātou.

⁶⁴ Kua nonoa e ki lātou nā mata ma lea vē ki ei, “Lea mai ake la pe na hei tukia koe?”

⁶⁵ E lahi foki iētahi a lātou kupu fāifāi nae fai ki ei.

Kua Kave ia Iehu ki Mua o te Taupulega

⁶⁶ Kua malama te taeao o te aho na hohoko ai, oi fono fakatahi ai ia toeaina, te kau ohitāulaga hili, ma nā faiakoga o te Tūlāfono, ma na kave ai ia Iehu ki mua o te Taupulega.

⁶⁷ Kua lea vē atu ki lātou ki a Iehu, “Kāfai ko koe ko te Mehia, lea mai la ki a te ki mātou?” Kua tali mai ia Iehu, “Kāfai au e tali atu, ko koutou e hē talitonu;

⁶⁸ ma kāfai au e fehili atu au, ka hē tali mai foki koutou.

⁶⁹ Kae e kāmata atu nei, ko te Ataliki o te Tagata ka nofo i te itū taumatau o te Atua Hilihilikehe te Mālohi.”

⁷⁰ Kua lea mai uma ki lātou, “Ko koe la ko te Ataliki o te Atua?” Kua tali atu ia Iehu, “E hako lava te mea e lea ai koutou — ko au.”

⁷¹ Oi lea mai ai loa ki lātou, “Ni molimau auma te toe fofou ki tātou ki ei? Tēnā kua fakalogo uma ki tātou ki tana fakamatalaga na fai mai!”