Luka 21 - Tokelauan New Testament

Ko te Tāulaga a te Fafine kua oti tana Āvaga

¹ Ko Iehu nae i te Mālumalu, oi kitea atu ai e ia nā tino maukoloa, e tuku a lātou tāulaga ki loto o te puha tupe mo nā tāulaga mo te Mālumalu.

² Na ia kitea atu foki he fafine mativa kua oti tana āvaga, kua tuku e ia ki loto ni tupe apamemea e lua.

³ Oi lea atu ai ia Iehu, “E takutino atu e au ki a te koutou, e hili atu te lahi o te tāulaga a te fafine mativa tēnei, i lo iētahi tino uma lele.

⁴ Auā ko iētahi tino na ki lātou ofo atua ma tāulaga, mai nā tupe totoe e lahi mai to lātou tamaokāiga; ka ko te fafine tēnei, e ui lava i tona mativa, kae na ofo atu e ia ana mea uma nae fakamoemoe e ola ai.”

Kua Tautala ia Iehu e uiga ki te Fakakinoga o te Mālumalu

⁵ Ko iētahi o te kau hoko nae faitatala e uiga ki te Mālumalu; ki te mānanaia o nā fatu e fau ai, ma nā meaalofa kua ofo atu mo te Atua. Kua lea atu ia Iehu,

⁶ “Ko nā mea uma iēnei e koutou kitea atu — e hau te taimi ka hē toe i ei he fatu e fokotahi e tū i luga o hētahi fatu; ko nā fatu takitahi uma lele ka togi kehe uma ki lalo.”

Ko nā Puapuagā ma nā Fakahāuāga

⁷ Kua fehili atu ona hoko, “Te Faiakoga, ko āfea te fakataunuku ai te mea tēnei, ma ko he ā foki he fakailoga ke iloa ai e ki mātou kua tāli pa ki te taimi e fakataunuku ai?”

⁸ Oi lea atu ai ia Iehu, “Koutou ke mataala kae ke nahe fakahehēa ai koutou; auā e tokalahi nā tino ka ōmamai i toku igoa, ma lea vē atu, ‘Ko au ko te Mehia!’ ma, ‘Kua pa ki te taimi!’ Kae ia koutou nahe mulimuli ki ei.

⁹ Ma kāfai e lagona e koutou nā fakamatalaga e uiga ki nā taua ma nā vevehiga lahi, koutou nahe mātataku; ko nā mea iēnei e tatau lava ke tutupu, kae e hē vēake ai la ko te ikuga kua tāli pa mai.”

¹⁰ Oi toe lea vē atu ai ki a te ki lātou, “Ka hiki taua tētahi fenua ki tētahi fenua; tētahi mālō ki tētahi mālō.

¹¹ Ka i ei nā mafuie lalahi, nā oge ma nā fāmai pēhi i nā koga kehekehe uma; ma ka kitea ake ki te lagi nā fakailoga tūkehe ma te fakamātakutaku.

¹² Kae ko hēki tutupu nā mea uma iēnei, ko koutou ka puke ma fakahāuāgia; ka tuku atu koutou ke fakamahino i loto o nā hūnako, ma tuku ki loto o nā falepuipui; ka kave koutou ki mua o nā tupu ma nā kōvana, ona ko au.

¹³ Ko tēnei te avanoa ke fakailoa atu ai e koutou te Tala Lelei.

¹⁴ Ke tonu muamua i outou māfaufau ko koutou ke nahe popole pe ka vēhea ake he koutou tali,

¹⁵ auā ka fōki atu e au ki a te koutou nā kupu o te poto; ma ka hē mafai ai e nā fili o koutou oi tali ki ei, pe ki lātou taku hehēa nā mea e lea ai koutou.

¹⁶ Ka tuku atu koutou ki te fakamahinoga e outou mātua, outou uho, outou kāiga ma autou uō; ma ka i ei nā tino o koutou e tāmate.

¹⁷ Ka inohia koutou e tagata uma ona ko au.

¹⁸ Kae e hēai he laulu e fokotahi o outou ulu e pakū kehe.

¹⁹ Ko te koutou onohai, ka maua ai e koutou te ola moni.

Kua Tautala ia Iehu e uiga ki te Fakataugāgia o Ieluhalema

²⁰ “Kāfai e koutou kitea ia Ieluhalema kua hiko fakatāmilo e vaegākau, oi ka koutou iloa ai kua pili mai te aho ka fakataugāgia ai.

²¹ Ko koutou la e nonofo i Iutea, e tatau ke hōhola ki luga o nā mauga; ko koutou i loto o te kakai e tatau ke olo kehe, ma ko koutou e i fafo o te kakai, e hē tatau ke toe foki ki ei.

²² Auā ko nā taimi iēnā o nā ‘Aho o te Fakahalaga,’ ke taunuku ai nā mea uma e vē ona tūhia i nā Tuhituhiga Paia.

²³ Kai te fakaalofa o te mea ka pa ki ei nā fafine e manavakīkī ma nā mātua koi fakahuhu a lātou pepe, kāfai e pa ki nā aho iēnā. Auā ka pa mai nā puapuagā ki te lalolagi, ma ka pakū mai te fakahalaga a te Atua, ki luga o ona tagata.

²⁴ Ko iētahi tino ka tāmate i te pelu, ka ko iētahi ka kave fakapagotā ki atunuku uma; ma ko Ieluhalema ka holi ki lalo i vae o tagata nukukehe, ke pa lava ki te aho e uma ai te lātou pule.

Kāfai te Ataliki o te Tagata e Haele mai

²⁵ “Ka i ei nā fakailoga e hē māhani ai, ka kitea ki te la, te māhina ma nā fetu. Ka fakatumulia ia mālō o te lalolagi i te popole ma te atuatuvale i te hou o te moana ma te tāgulu o nā galu.

²⁶ Ka faimatapogia ia tagata i te mātataku ma te fakaatu ki te mea ka pa ki ei te lalolagi kātoa, ona ko nā mālohiaga o te vāteatea ka lūlū kehe mai o lātou alāvaka tūmau.

²⁷ Ma ka kitea atu te Ataliki o te Tagata e haele mai i he ao o te lagi, ma te mana ma te mamalu hilihili kehe.

²⁸ Kāfai nā mea iēnei e kāmata oi tutupu, tutū ki luga ma tepa ake ki te lagi, auā ko te koutou fakaolataga kua tāli pa mai.”

Ko te Akoakoga mai te Mati

²⁹ Oi fai ai e Iehu te talafakatuha tēnei ki a te ki lātou: “Māfaufau ki te mati ma iētahi lākau uma.

³⁰ E kāmata loa oi kitea e koutou ko nā lau kua ola ake, e iloa e koutou ko te tau māfanafana kua tāli pa mai.

³¹ E vēnā foki lava kāfai e koutou kitea nā mea iēnei e tutupu, ka koutou iloa ai ko te Mālō o te Atua kua tāli pa mai.

³² “E takutino atu e au ki a te koutou, ko nā mea uma iēnei e tutupu ka ko hēki feoti uma nā tino o te tupulaga tēnei.

³³ E mou kehe atu te lagi ma te lalolagi, ka ko aku kupu e tūmau pea lava.

Koutou ke Mataala

³⁴ “Kae ia koutou ke mataala, nā ia koutou ka tuahā lahi ki nā faigākai ma nā īnuga vēnā ma popōlega o te ōlaga, kae maua mai koutou e te Aho tēnā

³⁵ e vē ni tino kua popoki i he māilei. Auā ko te Aho tēnā, ka pa mai ki tagata uma lele i ho he itū o te lalolagi.

³⁶ Mataala la i taimi uma ma tatalo ke maua e koutou te mālohi, ke hōhola kehe ai koutou mai nā mea uma iēnei ka tutupu, ma ke tutū ai koutou i mua o te Ataliki o te Tagata.”

³⁷ I nā aho iēnā, ko Iehu nae akoako atu i loto o te Mālumalu i nā aho takitahi, kae kāfai e pa ki te pō, e fano oi nofo i te Mauga o Ōlive.

³⁸ Ma i nā taeaopō o nā aho takitahi, ko tagata uma nae olo ki te Mālumalu, oi fakalogologo ki a te ia.