Luka 20 - Tokelauan New Testament

Ko te Fehili e uiga ki te Pule a Iehu

¹ I tētahi aho, e akoako atu ia Iehu ki tagata i loto o te Mālumalu ma folafola atu te Tala Lelei, kae ōmamai ki a te ia te kau ohitāulaga hili, nā faiakoga o te Tūlāfono ma te kau toeaina

² oi lea vē mai ki ei, “Taku mai ake ki a te ki mātou pe a ai te pule e fai ai e koe nā mea iēnei? Ko ai te na ia fōki atua ki a te koe te pule tēnei?”

³ Kua tali atu ia Iehu ki a te ki lātou, “Ko au foki la ka fehili atu ki a te koutou. Lea mai ake,

⁴ ko te pule a Ioane na fai ai tana papatihoga na hau mai te Atua pe mai tagata?”

⁵ Kua kāmata oi fai fīnauga ki lātou ma lea vē tētahi ki tētahi, “Kāfai ki tātou e lea, ‘E mai te Atua,’ ka lea mai nei, ‘He ā la te hēki talitonu ai koutou ki a Ioane?’

⁶ Kae kāfai ki tātou e lea, ‘E mai tagata,’ e fetogi nei ki tātou e nā tino, auā e talitonu ki lātou ko Ioane ko he pelofeta.”

⁷ Oi na tali atu ai vēnei ki lātou, “E hē ki mātou iloa pe na hau mai fea.”

⁸ Oi vāgana atu ai ia Iehu ki a te ki lātou, “Ka hē kō taku atua foki la ki a te koutou, pe a ai te pule e kō faia ai nā mea iēnei.”

Ko te Talafakatuha o nā Nofolihi i te Tōvine

⁹ Oi fai ai e Iehu te talafakatuha tēnei ki nā tino: “E i ei he tino na fano oi totō he tōvine e o ia, oi tuku ai e ia ke lihi e ni nofolihi, kae fano i hana malaga ki hētahi atunuku mo he taimi mataloa lele.

¹⁰ Kua pa ki te taimi e tau ai te tōvine, oi uga ai e ia hētahi o ana kaukauna ki nā nofolihi, ke kaumai tona vāega o te helehelega. Kae kua kini e nā nofolihi te kaukauna ma uga ai vē e aunoa ma he mea.

¹¹ Oi toe uga ai e ia hētahi kaukauna, kae kua kini foki e nā nofolihi te kaukauna ma fai ki ei nā āmioga mātagā, oi uga ai ke toe fano e aunoa ma he mea.

¹² Oi uga ai e ia tona tolu o kaukauna, ma na kini e ki lātou ma fakamanuka, oi togi ai ki fafo o te tōvine.

¹³ Oi vē ake ai te kupu a te tino e o ia te tōvine, ‘He ā nei ta aku ka fai? Ka uga e au toku ataliki fakapelepele; e tatau lava ke amanakia e ki lātou!’

¹⁴ Kae i te kitea atuga o te ataliki e nā nofolihi, oi lea vē ai tētahi ki tētahi, ‘Ko te ataliki tēnei o te tino e o ia te tōvine; tātou olo oi tāmate, ma kave ai tona tofi i te fenua o tona tamana mo ki tātou!’

¹⁵ Oi togi ai e ki lātou te ataliki ki fafo o te tōvine ma tāmate.” Kua fehili atu ia Iehu, “He ā nei ta te tino e o ia te tōvine ka fai?

¹⁶ Ka hau nei oi tāmate nā tamāloa iēnā, ma tuku atu te tōvine ki ni iētahi nofolihi.” I te lagona atuga e nā tino te mea tēnei, oi lea vē atu ai, “E hē tatau lele ke vēnā!”

¹⁷ Kua kikila atu ia Iehu ki a te ki lātou oi fehili vē atu ai ki ei, “He ā la te uiga o te tuhituhiga paia e lea mai: ‘Ko te fatu na tīaki e nā faufale e hē aogā kua kavea ma fatu e pito hili atu ona tāua.’

¹⁸ Ho he tino e pakū ki luga o te fatu tēnā, ka tipi likiliki tona tino; ma kāfai te fatu e pakū ki luga o he tino, ka nuti momoia lele te tino tēnā.”

Ko te Fehili e uiga ki te Totogi o nā Lāfoga

¹⁹ Na taumafai nā faiakoga o te Tūlāfono ma nā ohitāulaga hili, ke puke fakapagotā ia Iehu i te taimi lava tēnā, auā kua ki lātou hāfia ko te talafakatuha tēnei na fai fakatatau ki a te ki lātou; kae nae mātataku i nā tino.

²⁰ Oi tau hakilikili ai loa e ki lātou he avanoa ke puke ai e ki lātou ia Iehu. Kua totogi e ki lātou ni tamāloa ke faia ni fehili fakatagāfai ki a Iehu, kae ke puke ai e ki lātou ma tukulima atu ki te pule a te Kōvana Loma.

²¹ Kua lea vē atu nā tamāloa tau fakalata iēnei ki a Iehu, “Te Faiakoga, e iloa e ki mātou ko nā mea e lea mai ai koe ma au akoakoga, e hako. E iloa e ki mātou e hē kē amanakia he tino ona ko hona tūlaga, kae e akoako lava e koe te meamoni e uiga ki te Atua ma tona finagalo mo tagata.

²² Lea mai ake, e fakataga i te tātou Tūlāfono ke totogi e ki tātou nā lāfoga ki a Kaihala pe hēai?”

²³ Kae kua hāfia e Iehu te lātou togafiti, oi lea vē atu ai ki ei,

²⁴ “Fakahino mai ake he tupe hiliva ki a te au. E o ai te ata ma te igoa e tuhi ai?” Kua tali mai ki lātou, “E o Kaihala.”

²⁵ Oi lea atu ia Iehu, “Fakafoki lava la ia mea a Kaihala ki a Kaihala, ma fakafoki ia mea a te Atua ki te Atua.”

²⁶ I mua o tagata, e hēki ki lātou lagona he kupu na fai e Iehu ke mōlia ai, kae na ofo lele ki tana tali; oi e hēki toe fia vaivaia lele foki.

Ko te Fehili e uiga ki te Toetū

²⁷ Ko iētahi Hatukaio, te vāega e lea e hēai he toetū, kua ōmamai ki a Iehu ma lea vē mai ki ei,

²⁸ “Te Faiakoga, na tuhi e Mohe te tūlāfono tēnei mo ki tātou: ‘Kāfai he tamāloa e i ei hana āvaga e oti kae e hēai hana fānau, e tatau tona uho ke fakaipoipo ma te fafine, kae ke maua he la fānau e mafai ke takua e a tona uho kua oti.’

²⁹ Nae i ei he kau uho tama e toka fitu; na fakaipoipo te uho matua kae na oti kae hēki i ei hana fānau.

³⁰ Oi fakaipoipo ai te uho tona lua ki te fafine,

³¹ ma vēnā foki ki te uho tona tolu. Na vēnā foki te mea na tupu ki iētahi o te kau uho e toka fitu — na feoti uma kae hēai he fānau.

³² Mulimuli ake, oi oti ai foki te fafine.

³³ Kāfai la e pa ki te aho e toe tutū ai ia tagata mai te oti, ko ai la o te kau uho ka takua ko te āvaga a te fafine? Ko te toka fitu uma tēnei na fakaipoipo ki te fafine.”

³⁴ Kua tali atu ia Iehu, “Ko tamāloloa ma fafine i te lalolagi nei e fakaipoipo,

³⁵ kae ko nā tamāloa ma nā fafine e tatau ke toe fakatutū mai te oti ma ola i te ōlaga fou, ka hē fakaipoipo ki lātou.

³⁶ Ka vē ki lātou ko agelu, ma e hē toe oti. Ko ki lātou ko nā fānau ia a te Atua, auā kua toe tutū mai te oti.

³⁷ Ma na fakamāonia lelei lava e Mohe, ko nā tino oti e toe fakatutū. I nā tuhituhiga e uiga ki te lākau tālatala na mumū, na ia tākua vēia e fakatatau ki te Aliki, ‘ko te Atua o Apelaamo, ko te Atua o Ihaako, ma ko te Atua o Iakopo.’

³⁸ Ko ia ko te Atua o tagata ola, kae hē o tagata oti, auā ki a te ia, ko ki lātou uma ni tino e ola.”

³⁹ Kua lea vē mai iētahi faiakoga o te Tūlāfono, “Te Faiakoga, kai te lelei o tau tali!”

⁴⁰ Auā e hēki toe fia toa ki lātou ke fai ki a te ia ni iētahi fehili.

Ko te Fehili e uiga ki te Mehia

⁴¹ Kua fehili atu ia Iehu ki a te ki lātou, “E vēhea ona lea ko he lāpuna e o Tavita te ka kavea Mehia?

⁴² Auā ko Tavita lava ia e lea i te tuhi o te Halamo, ‘Ko te Aliki te Atua na vāgana ki toku Aliki: Nofo i toku itū taumatau

⁴³ ke pa ki te taimi e kō faia ai ō fili, ma nofoa e mapu ki luga ō vae.’

⁴⁴ Ko Tavita lava ia te na lea ko te Mehia ko te ‘Aliki’; e vēhea la ona kavea he lāpuna o Tavita ma Mehia?”

Kua Lapataki ia Iehu ke Fakaeteete i nā Faiakoga o te Tūlāfono

⁴⁵ Ka koi fakalogologo ia tagata ki a Iehu, ka kua vāgana atu ki ona hoko,

⁴⁶ “Koutou lava ke fakaeteete i nā faiakoga o te Tūlāfono. E fiafia oi eva i o lātou kofuloloa ma fofou ke fakafeiloaki ake ki lātou e tagata i te māketi; e filifili e ki lātou nā nofoa fakapitoa i nā hūnako ma nā nofoa tāua i nā kaiga lalahi mo ki lātou;

⁴⁷ e fakavalea e ki lātou nā fafine kua oti a lātou āvaga, ma kaihohoa o lātou fale; e fakaloloa a lātou tatalo kae ke ofo ai ia tagata. Ka hili lele atu ai lava te mamafa o te lātou fakahalaga!”