Luka 2 - Tokelauan New Testament

Ko te Fānau mai o Iehu

¹ Ko nā aho lava iēnā, na fai ai te fakatonuga a te Kaihala Aukuho, ke fai he tuhigāigoa a tagata uma o te lalolagi, e i lalo o te pūlega a Loma.

² Ko te tuhigāigoa muamua lava tēnei, ma na fakataunuku i nā aho nae kōvana ai ia Kulenio i Hulia.

³ Oi olo ai nā tino uma lele, kua fano lava te tino ki te kakai na fānau mai ai, oi tuhi ai tona igoa.

⁴ Na vēnā foki la ia Iohefa, na fanatu mai te kakai ko Nahaleta i Kalilaia, ki te kakai ko Peteleema i Iutea, te mea na fānau mai ai te Tupu ko Tavita. Na fano ki ei ona ko ia na tupuga mai ia Tavita.

⁵ Na olo ma Malia, tēia kua uma te fakamau ke fakaipoipo ki ei, ke tuhi o lā igoa. Ko Malia kua faitama.

⁶ Ka koi i Peteleema ki lāua kae fakatīgā ia Malia,

⁷ ma na fānau mai ai e ia tana ulumatua, ko he tama. Na āfīfī e ia te pepe i ni meakie, oi fakatakoto ai ki loto o he kumete fāgaimanu, auā kua hē maua ho lātou avanoa i te fale talimālō.

Ko nā Leoleomāmoe ma nā Agelu

⁸ Nae i te kogāfenua foki tēnā ni leoleomāmoe, nae taukikila a lātou māmoe i te vao, i te pō tēnā.

⁹ Oi kitea ai e ki lātou he agelu a te Aliki, ma kua huluia fakatāmilo ki lātou i te mamalu o te Aliki. Na mātataku lahi lele ki lātou,

¹⁰ kae kua lea atu te agelu ki a te ki lātou, “Koutou nahe mātataku! Kikila, ko au kua hau ma he tala lelei mo koutou, he tala e maua ai e tagata uma te fiafia lahi.

¹¹ Auā ko te aho lava tēnei na fānau mai ai i te kakai o Tavita, te koutou Fakaola — ko te Mehia te Aliki!

¹² Ma ko tēnei te mea ka fakamāonia ai ki a te koutou: ka maua atu e koutou he pepe e āfīfī i ni meakie, ma e fakatakoto i loto o he kumete fāgaimanu.”

¹³ Kae teki lava kua i ei fakatahi ma te agelu, he vāega agelu tokalahi mai te lagi, e pepehe i nā vīkiga ki te Atua:

¹⁴ “Ko te vīkiga ki te Atua Hilihilikehe, ma te fīlēmū i te lalolagi, mo ki lātou kua fiafia ia ki ei!”

¹⁵ I te toe fokiga o nā agelu ki te lagi, oi fakataufai ai nā leoleomāmoe, kua lea vē tētahi ki tētahi, “Tātou olo ki Peteleema oi kikila ki te mea tēnei kua tupu, e vē ona fakailoa mai e te Aliki ki a te ki tātou.”

¹⁶ Oi olo fakavave ai nā leoleomāmoe, ma na ki lātou maua atu ia Malia ma Iohefa, ma te pepe e takoto i loto o te kumete fāgaimanu.

¹⁷ I te kiteaga e ki lātou o te pepe, oi taku ai e ki lātou ki nā tino, te mea na lea ake ai te agelu ki a te ki lātou e uiga ki te pepe.

¹⁸ Ko nā tino uma lele na fakalogo ki ei, na ofo lele ki te mea na lea ake ai nā leoleomāmoe.

¹⁹ Ka ko Malia, kua teu uma e ia nā kupu iēnei i tona loto, ma māfaufau loloto ki ei.

²⁰ Oi toe fōki ai nā leoleomāmoe ma pepehe i nā vīkiga o te Atua, ona ko nā mea uma lele na fakalogo ma kikila ki lātou ki ei, e vē lava oi lea ake ai te agelu.

Kua Fakaigoa te Pepe ki a Iehu

²¹ Kua teka nā aho e valu talu te fānau mai o te pepe, ko te aho ia e pelitome ai, oi fakaigoa ai ki a Iehu, te igoa na fakaigoa ai e te agelu, ka ko hēki to ia Malia.

Kua Tuku atu ia Iehu ke Fakapaia mo te Atua i te Mālumalu.

²² Kua pa ki te aho e fakatino ai e Iohefa ma Malia te hāuniga tau ki te fakamamāgia e vē ona fakatonu mai e te Tūlāfono a Mohe. Oi kave e ki lāua te pepe ki Ieluhalema, ke tuku atu ke fakapaia i mua o te Aliki,

²³ e vē ona tūhia i te tūlāfono a te Aliki: “Ko nā tamaiti tāne ulumatua uma lele, e fakapaia mo te Aliki.”

²⁴ Na olo foki oi ofo atu te lā tāulaga, e tuha ai ma te tūlāfono a te Aliki, “he luagamata lupe, pe ni lupe pepe e lua.”

²⁵ I te vāitaimi tēnā, nae i ei he tino nae igoa ki a Himeona nae nofo i Ieluhalema. Ko he tino lelei ma mataku i te Atua, ma nae fakatalitali ke laveaki e te Atua ia Ihalaelu. Nae fakatahi te Agaga Paia ma ia,

²⁶ ma na fakailoa ki ei e te Agaga Paia, ko ia e hē oti heiloga kua ia kitea te Mehia, na folafola e te Aliki.

²⁷ Kua tataki ia Himeona e te Agaga Paia, ma ulu atu ai ki loto o te Mālumalu; ma i te kaumaiga o te pepe ko Iehu e nā mātua ki loto o te Mālumalu, ke fai mo ia nā mea māhani e tuha ai ma te Tūlāfono,

²⁸ oi puke atu ai ia Himeona ki te pepe, kua hiki i ona lima, ma fakafetai ki te Atua:

²⁹ “Te Aliki, keina tuku mai ko tau kaukauna ke fano ma te fīlēmū, e tuha ai ma tau folafolaga ki a te au.

³⁰ Auā kua kitea e oku mata tau fakaolataga,

³¹ tēia kua kē hāuniagia i mua o tagata uma lele o te lalolagi:

³² He mālamalama ke fakakitea ai tō finagalo ki tagata nukukehe, ma maua ai he vīkiga mo ō tagata Ihalaelu.”

³³ Na ofo lele te tamana ma te mātua, ki nā kupu kua tautala ai ia Himeona e uiga ki te lā pepe.

³⁴ Oi fakamanuia ai ki lātou e Himeona, ma lea vē atu ki a Malia, te mātua o te pepe, “Kikila, ko te pepe tēnei kua filifilia e te Atua mo te fakaumatiaga ma te fakaolataga o tagata Ihalaelu. Ka fai ia ma fakailoga mai te Atua e teteke ki ei te tokalahi o tagata,

³⁵ kae ke fakailoa ai o lātou manatunatuga lilo — ma ko te fakanoanoa e vē he pelu kakaha, ka tuia ai lava tō loto.”

^36-37 Nae i ei he pelofeta fafine matua lele e igoa ki a Anā, te afafine o Fanouele o te puikāiga o Ahela. E fitu oioti ia tauhaga na nofotāne ai, ma kua valuhefulu fa nei ona tauhaga. Kua hē fano kehe lele ma te Mālumalu; e tatalo ma tāpuaki ki te Atua i te pō ma te ao, ma fakalāina.

³⁸ Ko te taimi tonu foki lava tēnā na taunuku atu ai te pelofeta fafine tēnei ki te Mālumalu, ma kāmata oi viviki ake ki te Atua ma fakailoa atu e uiga ki te pepe, kinā tino nae fakatalitali ki te Atua ke ia fakahaolotoa ia Ieluhalema.

Ko te toe Fokiga ki Nahaleta

³⁹ Kua uma te fakataunuku e Iohefa ma Malia nā mea uma nae tatau ke ki lā faia e tuha ai ma te Tūlāfono a te Aliki, oi toe foki ai ki to lā nuku ko Nahaleta i Kalilaia.

⁴⁰ Kua tuputupu ake te tamaiti, kua mālohi; kua fakatumulia i te poto, ma fakamanuiagia e te Atua.

Ko Iehu i te Mālumalu ka koi Tamaiti ai

⁴¹ I tauhaga uma, ko nā mātua o Iehu e olo ki Ieluhalema, mo te Kaiga Fakamanatu o te Pāheka.

⁴² Kua kātoa te hefululua tauhaga o Iehu, oi olo ai foki ma ona mātua ki te Kaiga Fakamanatu o te Pāheka, e vē lava ko te mea kua māhani ai ki lātou.

⁴³ Kua uma te Pāheka, oi kāmata ai kua toe foki ki to lātou kāiga, ka ko Iehu kua nofo i Ieluhalema, kae e hē iloa e ona mātua.

⁴⁴ Nae vēake lava nā mātua ko Iehu e i loto o te lātou kau malaga. Na kātoa te aho e faimalaga ai ki lātou, kae fātoā kāmata oi hakili ia Iehu e ona mātua ki nā kāiga o ki lāua ma a lā uō.

⁴⁵ E hēki ki lā maua te lā tama, oi toe foki ai ki lāua ki Ieluhalema oi hakili.

⁴⁶ Ko tona tolu o aho na maua ai e ki lāua ia Iehu i te Mālumalu, e nofo i te mea e i ei nā faiakoga, e fakalogologo ki ei, ma fai ki ei ana fehili.

⁴⁷ Na tēteki lele nā tino uma na fakalogo ki fakamatalaga a Iehu, ona ko te poto o ana tali.

⁴⁸ Na ofo lele foki ona mātua i te ki lā kiteaga o Iehu, oi lea vē atu ai tona mātua ki ei, “Taku tama, he ā te kua fai ai e koe te mea tēnei ki a te ki māua? Kikila, ko koe nae hakili e ki māua ma tō tamana, ma ko ki māua na popole lele.”

⁴⁹ Ka kua vē atu ki ei tana tali, “He ā te na hakili ai au e koulua? E hē koulua iloa ko au e tatau ke i te fale o toku Tamana?”

⁵⁰ Kae e hēki ki lā hāfia te uiga o tana tali.

⁵¹ Oi olo fakatahi ai ia Iehu ma ona mātua ki Nahaleta, ma nae uhitaki lele ki a te ki lāua. Na teu i te loto o tona mātua nā mea uma iēnei.

⁵² Kua tuputupu ake ia Iehu i te tino ma te māfaufau, ma na alofagia e te Atua vēnā foki ma tagata.