Luka 19 - Tokelauan New Testament

Ko Iehu ma Hakaio

¹ Kua pa atu ia Iehu ki Ieliko, oi kui atu ai i loto o te fenua.

² Nae i kinā he takitaki aolāfoga e igoa ki a Hakaio, he tino maukoloa.

³ Na fia ia kiteagia pe ko he tino vēhea ia Iehu, kae ona ko ia ko he tino pukupuku na hēki ia mafaia ai ona ko te kaifenua.

⁴ Oi vili ai ki mua o te kaifenua, kua kake ki luga o he lākau e igoa ko te hūkāmolu, kae ke ia kitea ia Iehu, tēia ka kui mai i te auala tēnā.

⁵ I te pa atuga o Iehu ki te mea tēnā, oi tagaki ake ai ki luga ma lea vē atu ki a Hakaio, “Hakaio, fanaifo vave nei loa ki lalo, auā ko au e tatau ke nofo i tō fale i te aho nei.”

⁶ Na fanaifo vave loa ia Hakaio ki lalo, ma na talia ai e ia ma te fiafia ia Iehu ki loto o tona fale.

⁷ Ko nā tino uma na ki lātou kiteagia te mea tēnei, kua kāmata oi mūimui ma lea vē, “Ko te tagata tēnei kua fano ki te fale o he tino agahala!”

⁸ Oi tū ai ia Hakaio ki luga oi lea vē atu ki te Aliki, “Te Aliki, kikila! Ka fōki e au te āfa o āku koloa ki nā tino mātitiva, ma kāfai e i ei he tino na kave fakakaihohoa e au ni ana mea, ka fakafa te lahi o nā mea ka toe totogi e au ki ei.”

⁹ Kua lea atu ia Iehu ki ei, “Ko te aho nei kua maua ai e te kāiga tēnei te fakaolataga, auā ko te tagata foki tēnei he lāpuna e o Apelaamo.

¹⁰ Ko te Ataliki o te Tagata na hau ke hakili, ma ke fakaola nā tino kua gagalo.”

Ko te Talafakatuha o nā Tupe Aulo

¹¹ Ka koi fakalogologo atu ki lātou ki nā mea tēnei, oi kāmata ai oi fai e Iehu he talafakatuha. Kua tafapili lele atu ia ki Ieluhalema, ma e manatu lava ia tagata ko ki lātou kua tāli kikila lele ki te Mālō o te Atua.

¹² Oi vāgana atu ai ia Iehu, “Nae i ei he aliki maualuga na fano ki hētahi fenua mamao ke fakauku ia ma tupu, oi toe foki ifo ai kāfai e uma.

¹³ Ka ko hēki fano kehe, na fekau e ia ana kaukauna e toka hefulu, ma fōki ki a te ki lātou tau tokatahi he tupe aulo, ma lea vē atu ki ei, ‘Fakaaogā te tupe tēnei ke toe maua mai ai ni iētahi tupe, ke toe pa mai au.’

¹⁴ Kae ko nā tino o tona fenua nae inoino lele ki ei, ma na uga atu ai e ki lātou he kavefekau ke mulimuli ki a te ia, ma ke lea vē, ‘Ko ki mātou e hē fofou ke fai te tagata tēnei ma o mātou tupu.’

¹⁵ “Na kavea te aliki ma tupu, oi toe foki mai ai ki tona mālō. Oi fakatonu ai loa e ia ana kaukauna ke ōake ki a te ia, kae ke ia iloa pe fia ni tupe na ki lātou maua.

¹⁶ Kua hau te tino muamua oi lea vē mai, ‘Te aliki, ko tau tupe aulo e fokotahi kua toe maua mai ai iētahi tupe aulo e hefulu.’

¹⁷ Ma kua lea atu te aliki, ‘Mālō ni, te kaukauna lelei! Ona ko koe kua fakamāoni i nā tamā mea, ka kō tōfia ai koe ke pule i nā kakai e hefulu.’

¹⁸ Kua hau tona lua o kaukauna ma lea vē mai, ‘Te aliki, ko tau tupe aulo e fokotahi kua toe maua mai ai iētahi tupe aulo e lima.’

¹⁹ Kua lea atu te aliki, ‘Ko koe ka pule i nā kakai e lima.’

²⁰ “Kua hau tētahi kaukauna ma lea mai, ‘Te aliki, tēnei tau tupe aulo na fōki mai; na kō mumunia ke galo i he holoholo.

²¹ Ko au nae mataku ia te koe auā ko koe he tagata faigatā. E kave e koe nā mea e hē a koe, ma helehele e koe nā mea e hēki kē totōa.’

²² Kae kua lea atu ki ei te tupu, ‘Ko koe ko he kaukauna kino! Ko nā kupu lava mai tō gutu ka kō fakahalagia ai koe. Ko tēnā e kē iloa ko au he tagata faigatā, e kō kavea nā mea e hē āku, ma kō helehelea nā mea e hēki kō totōa.

²³ He ā la te hēki kē teua ai taku tupe i he faletupe? Moinei ake e foki mai au kua i ei he ola.’

²⁴ “Oi lea vē atu ai ki nā tino nae tutū i kinā, ‘Kave kehe te tupe aulo mai te tino tēnā ma fōki ki te tino e hefulu ana tupe aulo.’

²⁵ Kae kua tali mai ki lātou ki a te ia, ‘Te aliki, kua hefulu ia tupe aulo a ia!’

²⁶ Ka kua tali atu te tupu, ‘E lea atu au ki a te koutou, ko nā tino i ei ni a lātou mea, ka hili atu te lahi o iētahi mea e toe fōki ki ei; kae ko nā tino e hēai ni a lātou mea, ke pa lava ki he tamā mea kua ia te ki lātou, ka kave kehe mai ia te ki lātou.

²⁷ Kae vē la ki nā fili o oku nae hē fofou ke kavea au ma o lātou tupu, kaumai ki kinei ki oku mua oi tāmate ai!’ ”

Kua Tali Fiafia ia Iehu e Tagata i te Auala ki Ieluhalema

²⁸ Kua uma te lea atu o Iehu i te mea tēnei, oi muamua atu ai ia i mua o ki lātou, agai ki Ieluhalema.

²⁹ Kua pili atu ia Iehu ki Petehake ma Petania i te Mauga o Ōlive, oi uga ai e ia nā hoko e toka lua ke muamua

³⁰ ma te fakatonuga e vēnei, “Olo ki te nuku tēnā i mua atu; kāfai koulua e pa atu, ka koulua kitea he punua āhini poa ko hēki tiketike lele ai he tino, e tau i kinā. Tatala te āhini oi kaumai ki kinei.

³¹ Kāfai he tino e lea atu pe he ā ta koulua e tatala ai te āhini, oi lea ki ei ko te Aliki e fofou mai ki ei.”

³² Oi olo ai te toka lua, ma na maua atu e ki lāua nā mea uma lele e vē lava ko te lea akega o Iehu.

³³ Ka koi tau tatala e ki lāua te punua āhini poa, kae lea atu ki ei nā tino e a lātou, “He ā ta koulua e tatala ai te punua āhini poa?”

³⁴ Kua tali atu ki lāua, “Ko te Aliki e fofou mai ki ei.”

³⁵ Oi kaumai ai e ki lāua te punua āhini poa ki a Iehu. Kua togi o lā peleue tatao ki luga o te punua āhini poa, ma fakatiketike ki luga ia Iehu.

³⁶ Ka koi malaga atu ia Iehu i luga o te āhini, ka kua fola e nā tino o lātou peleue tatao ki luga o te auala.

³⁷ Kua tafapili atu nei ia Iehu ki Ieluhalema, kua i te mea tonu e kāmata oi fakaifoifo ai ki lalo te auala mai te Mauga o Ōlive. Ko te kaifenua kātoa o tagata kua talitonu ki a Iehu, kua fiafia lahi ma viviki leo lahi ake ki te Atua, ona ko nā mea uiga kehe uma na kikila ki lātou ki ei.

³⁸ “Ke fakamanuia e te Atua te tupu e hau i te igoa o te Aliki! Ke i ei te fīlēmū i te lagi ma ke vīkia te Atua!”

³⁹ Oi lea atu ai iētahi o te kau Falehaio nae i te kaifenua ki a Iehu, “Te Faiakoga, fakatonu o hoko ke nahe piha!”

⁴⁰ Kua tali atu ia Iehu, “E lea atu au ki a te koutou, kāfai ka hē tautatala ki lātou, ko nā fatu ka kāmata oi taukalalaga ake.”

Kua Tagi ia Iehu ona ko Ieluhalema

⁴¹ Kua tafapili lele ia Iehu ki te kakai, ma i te ia kitea atuga o te kakai, oi tagi ai i tona alofa ki ei,

⁴² ma lea vē, “Māumau pe kana kē iloa i te aho nei, te mea e kē maua ai te fīlēmū! Kae nei kua mumuni ke nahe kitea e ō mata!

⁴³ E hau te taimi e hiko fakatāmilo ai koe e ō fili, ma poloka koe ki loto ma ohofaki koe mai nā itū uma.

⁴⁴ Ka ki lātou tuki momoia koe ki lalo, ko koe ma au fānau i loto i ō pa; ka hēai he fatu e fokotahi e ki lātou fakatotoea i luga o he tahi fatu, auā e hēki iloa e koe te taimi na āhiāhi mai ai te Atua, ke laveaki koe!”

Kua Fano ia Iehu ki te Mālumalu

⁴⁵ Oi fano ai ia Iehu ki loto o te Mālumalu, ma kāmata oi tuli ki fafo nā tino nae fakatau a lātou koloa i loto.

⁴⁶ Kua lea vē atu ki a te ki lātou, “E tūhia i nā Tuhituhiga Paia, ko te Atua na vāgana vē, ‘Ko toku fale ka fai ma fale tatalo.’ Kae kua koutou faia ma ana o tagata kaihohoa!”

⁴⁷ Nae akoako atu e Iehu ia tagata i te Mālumalu, i nā aho takitahi uma. Na fofou lele nā ohitāulaga hili, nā faiakoga o te Tūlāfono ma nā takitaki o tagata Iutaia, ke tāmate ia Iehu,

⁴⁸ kae e hēki ki lātou maua he avanoa ona ko tagata uma lele nae fia fakalogologo pea lava ki a Iehu ma hē fofou ke mihi e ki lātou he kupu e fokotahi e tautala ai.