Luka 15 - Tokelauan New Testament

Ko te Māmoe na Galo

¹ I tētahi aho na ōmamai ai nā aolafoga e tokalahi, ma iētahi tino inohia oi fakalogologo ki nā akoakoga a Iehu,

² ma kua kāmata oi mūimui te kau Falehaio ma nā faiakoga o te Tūlāfono, “Ko te tagata nei e talia e ia nā tino inohia, ma kakai fakatahi ma ki lātou!”

³ Oi fai ai e Iehu te talafakatuha tēnei ki a te ki lātou:

⁴ “Ko ai he tino o koutou e i ei ni ana māmoe e helau, ma kāfai e galo hētahi o ki lātou, e hē ia tukua iētahi māmoe e ivahefulu iva i te vao, kae fano oi hakili te māmoe e fokotahi e galo, ke maua?

⁵ Ma kāfai e ia maua, e hiki e ia ki luga o ona takuau ma te fiafia lahi.

⁶ Ma kāfai e pa ki te fale, ka fakapotopoto mai e ia ana uō ma ona tuākoi ma lea vē atu ki ei, ‘Ōmamai tātou fiafia fakatahi, auā ko taku māmoe na galo, kua toe maua.’

⁷ E lea atu au ki a te koutou, ka vēnā foki oi hili atu te fiafia i te lagi ki he tino agahala e fokotahi e halamō, i lo kini tino e toka ivahefulu iva e manatu ko ki lātou e āmiotonu, ma e hēai he mea e tatau ai ke halamō.”

Ko te Tupe Hiliva na Galo

⁸ Kua fai tētahi talafakatuha e Iehu. “Ko ai he fafine e i ei ni ana tupe hiliva e hefulu, ma kāfai e galo he tupe hiliva e fokotahi, e hē ia tutua he mōlī ma haluhalua te fale, ma hakili fakalelei lele ke maua?

⁹ Ma kāfai e maua e ia, ka fakapotopoto mai e ia ana uō ma ona tuākoi ma lea vē atu ki ei, ‘Ōmamai tātou fiafia fakatahi, auā ko taku tupe hiliva na galo, kua toe maua.’

¹⁰ E lea atu au ki a te koutou, ka fiafia lahi ia agelu a te Atua, ona ko he tino agahala e fokotahi kua halamō.”

Ko te Talafakatuha o te Ataliki Fakamāumau Mea

¹¹ Kua toe vāgana atu ia Iehu, “Nae i ei he tamāloa e toka lua ona ataliki.

¹² Kua lea atu te kimuli ki tona tamana, ‘Toku tamana, tuku mai ko ki a te au i te taimi nei toku tofi.’ Oi vāevāe ai loa e te tamana nā mea a ia, ki ona ataliki e toka lua.

¹³ Kua teka atu ni nai aho, oi fakaputu uma ai e te kimuli ana mea, ma faimalaga atu ai ki he fenua mamao. Na ola i kinā, i he ōlaga hē taupulea, ma fakamāumau ai e ia ana tupe.

¹⁴ Kua mole ana mea uma te ia fakaaogā. Oi tupu ai te oge lahi i te fenua tēnā, ma kua hē maua hana mea ke kai.

¹⁵ Oi fano ai kua galue mo he tino i te nuku tēnā, ma na uga ai ki te fatoaga, ke tauhia nā puaka.

¹⁶ Na fofou lele ke ia kaia nā meakai e fafaga ai nā puaka, kae e hēki fōkia lele ki ei e he tino, hana mea ke kai.

¹⁷ Mulimuli ake, kua toe akoakogia tona māfaufau ma vē ake ai tana kupu, ‘Ko nā tino faigāluega uma a toku tamana e lahi lele nā meakai e kakai ai, ka ko tēnei au, ka mate i te fia kaia!

¹⁸ Ko au ka tū ki luga oi fano ki toku tamana, ma lea vē ki ei, Toku tamana, ko au kua agahala ki te Atua, vēnā ma koe.

¹⁹ Kua hē toe aogā ke takua au, ko he ataliki e o koe; kae kavea au e vē ko hētahi o nā tino faigāluega a koe.’

²⁰ Oi tū ai ki luga, kua toe foki ki tona tamana. “Ka koi mamao lele te mea e havali mai ai, ka kua kitea atu e tona tamana; kua tumu lele te loto o te tamana i te alofa, oi vili atu ai oi ōpoi mai tona ataliki, ma hogi ki ei.

²¹ Kua lea atu te ataliki, ‘Toku tamana, ko au kua agahala ki te Atua vēnā ma koe. Kua hē toe aogā ke takua au, ko he ataliki e o koe.’

²² Kae kua kalaga atu te tamana ki ana kaukauna, ‘Fai vave! Kaumai te kofu tatao e pito hili ona lelei, oi fakakofu ai toku ataliki. Hulu he mama ki te lima, ma hulu ni taka ki ona vae.

²³ Oi olo ai kaumai te punuapovi peti oi tāmate, ma tātou kakai ma fiafia.

²⁴ Auā ko toku ataliki tēnei, na oti kae kua toe ola mai; na galo, kae nei kua toe maua.’ Oi kāmata ai loa te lātou kaiga fiafia.

²⁵ “I te taimi tēnā, ko te ataliki ulumatua nae galue i te fatoaga. I te foki maiga, kua pili mai ki te fale, kae ia lagona atu nā pehe ma nā hiva e fai.

²⁶ Oi kalaga ai ki tētahi kaukauna ke fanake ma fehili ai ki ei pe ko he ā te fai.

²⁷ Kua tali atu te kaukauna, ‘Ko tō uho kua toe foki mai, ma kua tāmate e tō tamana te punuapovi peti, auā kua toe foki mai tona ataliki ma te haogalēmū.’

²⁸ “Kua ita lahi lele te ulumatua, ma kua muhu oi fano ki loto o te fale; oi hau ai ki fafo tona tamana, oi tauanau ke fanake ki lotofale.

²⁹ Kae kua tali vē atu ki tona tamana, ‘Kikila ki nā tauhaga e lahi nae galue ai au mo koe e vē he pologa, ma e hēki i ei lele hau fakatonuga e fokotahi e hēki uhitaki au ki ei. Kae he ā nei ta aku na kua kē fōki maia? E hēai he mea. Kae ke fōki mai foki la he oti ke fai ai haku kaiga ma aku uō!

³⁰ Ka ko tō ataliki tēnei na ia fakamāumaua au mea ki nā fafine talitāne, kua tāmate e koe he punuapovi peti mo ia!’

³¹ Kua tali atu te tamana, ‘Toku ataliki, ko koe ei kinei pea lava ma au, ma ko nā mea uma lele a āku, e a koe.

³² Kae kua tatau ki tātou ke kakai ma fiafia, auā ko tō uho na mate, ka kua toe ola mai; na galo, ka kua toe maua.’ ”