Luka 13 - Tokelauan New Testament

Toe Liliu ki te Atua

¹ Nae i ei ni tino nae i kinā i te taimi tēnā, na ki lātou takua ki a Iehu e uiga ki nā tino Kalilaia na fakamaligi o lātou toto e Pilato, ka koi ofo atu a lātou tāulaga mu ki te Atua.

² Kua tali atu ia Iehu ki a te ki lātou, “I te koutou kikila, e hili atu nei te kino lahi o nā agahala a nā tino Kalilaia iēnei i lo iētahi tino Kalilaia, ona na tāmate i he auala vēnei?

³ E lea atu au, e hēai! Kae kāfai koutou e hē halamō i autou agahala, ko koutou uma e feoti foki vēnā.

⁴ Kae e vēhea nā tino e toka hefuluvalu na holo ki luga o ki lātou te fale maualuga i Hiloma, ma na feoti ai? I te koutou kikila, e hili atu nei to lātou holi tūlāfono i lo iētahi tino uma lele nae nonofo i Ieluhalema?

⁵ E lea atu au, e hēai! Kae kāfai koutou e hē halamō i autou agahala, ko koutou uma e feoti foki vēnā.”

Ko te Talafakatuha o te Mati e Hē Fua

⁶ Oi fai ai e Iehu te talafakatuha tēnei: “E i ei he tamāloa na ia totōa he mati i loto o tona tōvine; ma kua fano oi kikila pe i ei ni fuāmati, kae e hēki ia maua he mea.

⁷ Oi lea vē atu ai ki tana tino tauhi tōvine, ‘Kikila mai ake, kua tolu nei ia tauhaga e tauahiahi mai e au te mati pe i ei ni fua, kae e hēai he mea e fokotahi. Ta ki lalo! He ā te ka fakamāumau ai te kelekele ki ei?’

⁸ Kua tali atu te tauhi tōvine, ‘Te toeaina, tuku vē ko mo he tahi tauhaga lava e fokotahi, ke fano au oi keli fakatāmilo, ma togi ki loto ni mea fakalelei kelekele.

⁹ Kāfai e fua mai ni ona fua i te tauhaga ka ala, kai te gali; kae kāfai e hēai, oi kua ta ai loa ki lalo.’ ”

Kua Fakamālōlō e Iehu he Fafine i te Hāpati

¹⁰ Ko Iehu nae akoako atu i hētahi hūnako, i te Hāpati.

¹¹ Ma nae i kinā he fafine, kua kātoa te hefulu valu tauhaga e fakapipili e he agaga kino. Na punou lahi lele ki lalo ma e hēki mafai ke toe tū hako ki luga.

¹² I te kiteaga e Iehu o te fafine, oi kalaga atu ai ki ei ke fanake, ma lea vē atu ai ki ei, “Te māfine, ko koe kua mālohi i tō tauale!”

¹³ Kua fakauta atu ona lima ki luga o te fafine, ma ko te taimi lava tēnā na tū hako ake ai loa ki luga te fafine, ma viviki ake ki te Atua.

¹⁴ Kae ko te takitaki o te hūnako, kua ita ona kua fakamālōlō e Iehu he tauale i te Hāpati. Kua lea vē atu ki nā tino, “E ono ia aho e tatau ke fai ai nā gāluega; ōmamai i nā aho iēnā ke fakamālōlō ai koutou, kae hē ko te Hāpati!”

¹⁵ Oi tali atu ai te Aliki ki ei, “Ko koutou ni tagata āmio pepelo! E hē tatalā moni nei e he tino o koutou tana povi, pe ko tana āhini mai te falemanu i te Hāpati, ma takitaki kehe ke fakainu?

¹⁶ Ka ko te lāpuna tēnei o Apelaamo, kua kātoa te hefulu valu tauhaga e noanoatia e Hātani; e hē tatau nei ke tatala i te Hāpati?”

¹⁷ Ko tana tali tēnei na lagona ai te māhiahi e nā tino nae feita ki a te ia; ka ko te kaifenua kātoa kua fiafia lahi, ona ko nā mea lelei uma na ia faia.

Ko te Talafakatuha o te Hīnapi

¹⁸ Oi fehili atu ai ia Iehu, “Ko te Mālō nei o te Atua e vēhea? He ā nei he mea ka fakatuha e au ki ei?

¹⁹ E fakatuha ki he fatu hīnapi na kave e he tamāloa oi totō i tona fatoaga; ma kua ola ake ma kavea ma lākau, ma ōmamai ai nā manulele oi fai o lātou ōfaga i ona lālā.”

Ko te Talafakatuha o te Mea Fakafefete

²⁰ Kua toe lea atu ia Iehu, “Ko he ā nei te ka fakatuha e au ki ei te Mālō o te Atua?

²¹ E vēnei. Na kave e he fafine ni fefete oi palu ki ni fuagā falaoa e tolu ke pa lava ki te taimi kua fefete uma ai te paluga kātoa.”

Ko te Faitotoka Vāiti

²² Kua kui atu ia Iehu i nā tamā kakai ma nā nuku i tana malaga ki Ieluhalema, ma akoako atu ki tagata.

²³ Oi lea vē atu ai he tino ki ei, “Te aliki, e tokaititi nei nā tino e mafai ke fakaola?” Kua tali atu ia Iehu ki a te ki lātou,

²⁴ “Taumafai ke kui koutou ki loto i te faitotoka vāiti; auā e lea atu au ki a te koutou, e tokalahi nā tino ka taumafai ke kui ai, kae ka hē mafai.

²⁵ E pa loa ki te taimi e tū ai ki luga te tino e o ia te fale oi tapuni te faitotoka, ko koutou ka kāmata oi tutū i fafo ma tukituki te faitotoka ma lea vē, ‘Te aliki, tatala mai ko te faitotoka ki a te ki mātou!’ oi ka tali vē atu ki a te koutou, ‘E hē kō iloa koutou pe ōmamai i fea!’

²⁶ Oi ka lea vē atu koutou ki ei, ‘Ko ki mātou nae kakai ma inu fakatahi ma koe; ko koe nae akoako atu ki tagata i luga ona auala o tō mātou nuku!’

²⁷ Kae ka toe lea vē atu, ‘E hē kō iloa pe ko koutou e ōmamai i fea! Olo kehe ma au, koutou uma nā tino āmiokino!’

²⁸ Ka lauē ma katigū outou nifo kāfai e koutou kitea atu ia Apelaamo, ia Ihaako ia Iakopo, ma nā pelofeta uma lele i te Mālō o te Atua, i te taimi e togi ai koutou ki fafo!

²⁹ Ma ka ōmamai nā tino mai hahae ma hihifo, mai mātū ma toga, oi nonofo ki lalo i te kaiga lahi i te Mālō o te Atua.

³⁰ Ma ko nā tino e mulimuli i te taimi nei, ka kavea ma muamua, ma ko nā tino e muamua i te taimi nei, ka kavea ma mulimuli.”

Ko te Alofa o Iehu ki Ieluhalema

³¹ I te taimi lava tēnā na ōmamai ai iētahi Falehaio ki a Iehu, ma lea vē mai ki ei, “Fano kehe ma kinei, auā ko Helota e fofou ko koe ke tāmate.”

³² Oi tali atu ai ia Iehu ki a te ki lātou, “Olo oi lea ki te ālope tēnā, ‘Kikila, e kō tulia ki fafo nā tēmoni ma fakamālōlō nā tauale i te aho nei, ma taeao, ma ko tona tolu o aho ka fakauma ai aku gāluega.’

³³ Kae e tatau lava ke fakaauau taku malaga i te aho nei, taeao, ma te aho e hohoko mai; auā e hē tatau ke tāmate he pelofeta i hētahi mea, vaganā ai i Ieluhalema.

³⁴ “Ieluhalema, Ieluhalema! Kua tāmate e koe nā pelofeta ma fetogi nā kavefekau kua uga atu e te Atua ki a te koe! E lahi lele nā taimi na fia ōpoipoi mai ai i oku lima au fānau, e vē oi fakamāopoopo mai e te kaumatua moa tana ōfaga ki lalo o ona kapahau, kae ko koutou e mumuhu!

³⁵ Ma ko te mea ia ka tīaki ai te Mālumalu o koe. Ma e takutino atu e au ki a te koe, ka hē toe kē kiteagia au, heiloga kua pa ki te taimi e lea vē ai koe, ‘Ke fakamanuia e te Atua tē e hau i te igoa o te Aliki!’ ”