Luka 10 - Tokelauan New Testament

Kua Uga atu e Iehu te Toka Fituhefulu Lua ke Tālaki

¹ Kua uma atu te mea tēnei, oi filifili ai e te Aliki iētahi tino e toka fituhefulu lua, oi uga ai tau toka lua ke muamua atu ia te ia, ki nā kakai takitahi ma nā nofoaga kua tuku e kui atu ai ia.

² Kua vāgana atu ia Iehu ki a te ki lātou, “E lahi te helehelega kae tokaititi nā tino faigāluega. Tatalo la ki te Aliki e āna te helehelega, ke uga atu ni tino faigāluega ke ki lātou fakaputu maia te helehelega.

³ Olo! Ko koutou e uga atu e au e vē ni punuamāmoe, ki te mea e i ei ai nā luko.

⁴ Nahe kavea ni autou ato tuku tupe, pe ni ato malaga, pe ni hēvae; nahe koutou tutū ke fakafeiloaki he tino i luga o te auala.

⁵ Kāfai koutou e ulu ki loto o he fale, lea muamua vē, ‘Ke i te fale tēnei te fīlēmū.’

⁶ Kāfai e i ei he tino e tauhi ki te fīlēmū e nofo i kinā, ke tūmau i ona luga te fīlēmū kua koutou ofo atua ki ei, kae kāfai e hēai, ka toe fakafoki mai ki a te koutou.

⁷ Nonofo i te fale tēnā, kakai ma inu ki ho he mea e fōki atu e ki lātou, auā ko nā tino faigāluega e tatau ke maua e ki lātou o lātou totogi. Nahe koutou nonofo holo ma oatu i tētahi fale ki tētahi.

⁸ Kāfai koutou e o atu ki he kakai ma talia fiafia ai koutou, kakai ki nā mea e laulau atu mo koutou,

⁹ fakamālōlō nā tauale i te kakai tēnā, ma lea vēnei kinā tino uma i kinā, ‘Ko te Mālō o te Atua kua tāli pa mai ki a te koutou.’

¹⁰ Kae kāfai koutou e oatu ki he kakai kae e hē talia ai koutou, olo ki luga o ona auala ma lea vē,

¹¹ ‘E pa foki lava ki te pefu o te koutou kakai e pipiki ki o mātou vae, e tūtū kehe e ki mātou ke fakailoa ai te hehē o koutou. Kae ke manatua e koutou, ko te Mālō o te Atua kua tāli pa mai ki a te koutou!’

¹² E takutino atu e au ki a te koutou, kāfai e pa ki te Aho Fakamahino, ka hili atu te alofa o te Atua ki a Hotoma i lo ki te kakai tēnā!

Ko nā Kakai hē Talitonu

¹³ “Hāloa koe Kolahini! Hāloa koe Petehaita! Auā anei ake nā vāvega na fai i loto o nā kakai o koulua na fai i Tulo ma Haitonu, e vēnei ake ko nā tino i kinā kua leva te nonofo ki lalo ma fai o lātou kofutaga, ma lūlū ki o lātou luga te pefu, ke fakailoa ai to lātou halamō!

¹⁴ Kae e feoloolo te ikuga o Tulo ma Haitonu i te Aho Fakamahino, i te mea e pa koulua ki ei.

¹⁵ Ma ko koe Kapenaumi, nae i ei nei hō manatu ko koe e mafai ke hiki ake ki luga ki te lagi? Hēai, ko koe ka togi ki lalo ki Heoli!”

¹⁶ Kua vāgana atu ia Iehu ki ona hoko, “Ko ai lava e fakalogo atu ki a te koutou, e fakalogo mai foki ki a te au; ko ai lava e teteke ki a te koutou, e teteke mai foki ki a te au; ma ko ai lava e teteke mai ki a te au, e teteke foki ki tē na ia uga maia au.”

Ko te Toe Foki maiga o te Toka Fituhefulu Lua

¹⁷ Kua foki mai te toka fituhefulu lua ma te fiafia lahi. Kua lea vē atu ki a Iehu, “Te Aliki, ke pa foki lava ki nā tēmoni, nae uhitaki mai kāfai e fakatonu e ki mātou i tō igoa!”

¹⁸ Kua tali atu ia Iehu, “Na kō kitea te pakū ifoga o Hātani mai te lagi e vē ko te napa a te uila.

¹⁹ Kikila, kua uma te kō fōki atua ki a te koutou te pule, ke mafai ai e koutou oi havavali i luga o nā gata ma nā akalava, ma fakatōkilalo ai te mālohi kātoa o te fili ko Hātani, ma e hēai he mea e ogohia ai koutou.

²⁰ Kae ia koutou nahe fiafia ona ko nā agaga kino e uhitaki atu ki a te koutou; kae fiafia auā ko nā igoa o koutou kua tuhituhia i te lagi.”

Kua Fiafia lahi ia Iehu

²¹ I te taimi lava tēnā, na fakatumulia ai ia Iehu e te Agaga Paia i te fiafia lahi ma lea vē ake ai, “Te Tamana, te Aliki o te lagi ma te lalolagi! Ko au e fakafetai atu ki a te koe, auā kua kē fakailoa ki a te ki lātou e hēki akoakoagia, nā mea kua kē mumunia mai ia te ki lātou e popoto ma kua akoakogia. Io, te Tamana, ko te mea lava tēnei na fofou koe ke fai.

²² “Kua fōki mai e toku Tamana ki a te au, nā mea uma lele. E hēai he tino e ia iloa pe ko ai te Ataliki, vaganā te Tamana, ma hēai foki he tino e ia iloa pe ko ai te Tamana, vaganā te Ataliki ma ki lātou kua filifilia e te Ataliki ke fakailoa ki ei.”

²³ Oi liliu atu ai ia Iehu ki ona hoko, ma lea vē atu ki ei nā ko ki lātou, “Amutia koutou e koutou kitea nā mea e kikila koutou ki ei!

²⁴ Auā e lea atu au ki a te koutou, e tokalahi ia pelofeta ma tupu na fofou ke ki lātou kiteagia nā mea kua kitea e koutou, kae e hēki mafai e ki lātou; ma fia fakalogo ki nā mea kua lagona e koutou, kae e hēki mafai e ki lātou.”

Ko te Talafakatuha o te Hāmālia Agalelei

²⁵ Oi hau ai he faiakoga o te Tūlāfono, kua tofotofo e ia ia Iehu ma lea vē atu ki ei, “Te Faiakoga, he ā te tatau ke kō faia, ke maua ai e au te ola e fakavavau?”

²⁶ Kua tali mai ia Iehu, “E vēhea mai la nā Tuhituhiga Paia? E vēhea tau faitau ki ei?”

²⁷ Kua tali atu te tino, “ ‘Alofa ki te Aliki tō Atua ma tō loto kātoa, ma tō agaga kātoa, ma tō mālohi kātoa, ma tō māfaufau kātoa’; ma ‘Alofa ki tō tuākoi e vē oi alofa koe ki a te koe lava.’ ”

²⁸ Kua tali mai ia Iehu, “E hako koe; fai la te mea tēnā, oi maua ai e koe te ola e fakavavau.”

²⁹ Kae kua fofou te faiakoga o te Tūlāfono, ke fakailoa ko ia e mālamalama i nā mea iēnei, oi fehili vē atu ai ki a Iehu, “Ko ai toku tuākoi?”

³⁰ Kua tali mai ia Iehu, “Nae i ei he tamāloa na fanaifo mai Ieluhalema ki Ieliko, oi ohofaki ai e ni tino fāomea; kua hamu uma ana mea kae kini, oi tīaki ai kua tāli mate.

³¹ Na kui ifo i te auala tēnā he ohitāulaga; kae i te ia kitea atuga o te tamāloa tēnei, oi havali ai lava i tētahi itū o te auala.

³² Na kui vēnā ifo foki he ha-Levī, kua fanatu oi kikila ki te tamāloa, oi havali lele ai, kua fano i tētahi itū o te auala.

³³ Kae ko he Hāmālia na malaga atu foki i te auala tēnā, na tau atu ki te tamāloa, oi na tumu lele tona loto i te alofa i te ia kiteaga o te tamāloa.

³⁴ Oi fano ai ki ei oi liligi nā lolo ma te uaina ki nā manuka o te tamāloa ma fuhi; oi fakatiketike ai ki luga o te manu nae tiketike ai ia, ma kave ki he fale talimālō, ma tauhi ai e ia i kinā.

³⁵ Kua pa ki te aho alafaki, oi tōake ai e ia i tana taga nā tēnali e lua, kua fōki ki te tino e o ia te fale talimālō, ma lea vē atu ki ei, ‘Tauhi fakalelei te tino tēnei. Kāfai au e toe foki mai, oi kua totogi atu ai e au ni iētahi tupe fakaopoopo na fakafano e koe mo tona tauhiga.’ ”

³⁶ Oi fehili atu ai ia Iehu, “I tō manatu, ko ai o te toka tolu tēnei, na kavea ma tuākoi lelei ki te tino na kini e nā tino fāomea?”

³⁷ Kua tali mai te faiakoga o te Tūlāfono, “Ko te tino na alofa ki ei.” Oi tali atu ai ia Iehu, “Fano la oi fai vēnā foki e koe.”

Kua Āhiāhi ia Iehu ki a Mafa ma Malia.

³⁸ Ka koi faimalaga atu ia Iehu ma ona hoko, oi tau atu ai ki he nuku e i ei ai he fafine e igoa ki a Mafa, ma na ia taliagia ma te fiafia ia Iehu i loto o tona fale.

³⁹ E i ei te taina o Mafa e igoa ki a Malia, kua nofo ki lalo i tafa o nā vae o te Aliki ma fakalogologo ki ana akoakoga.

⁴⁰ Ka ko Mafa kua hē fiafia ona ko te lahi o nā fekau a ia e fai, oi fano ai ki a Iehu, kua lea vē atu ki ei, “Te Aliki, ko koe e hē fia tokaga lele ki toku uho, ma tana mea kua tīaki mai ai au ke faia tautahi nā fekau? Lea ko ki ei ke hau oi fehoahoani mai ki a te au!”

⁴¹ Kua tali atu ki ei te Aliki, “Mafa, Mafa! Te lahi o nā mea e fakaatu ma popole koe ki ei,

⁴² kae e fokotahi oioti lava te mea e manakomia. Kua filifilia e Malia te mea e lelei, ma ka hē toe kave kehea lele mai ia te ia.”