Luka 1 - Tokelauan New Testament

¹ Ki a Teofilo: E vē ona iloa e koe, e tokalahi nā tino kua taumafai ke ki lātou fakamaumaua ki lalo nā mea kua uma te fakataunukugia.

² Na tūhia e ki lātou nā mea na fakailoa mai ki a te ki mātou e nā tino nae i ei i te kāmataga ma nae ki lātou folafolagia te fekau.

³ Kua manatu ai foki la au, ona kua uma te kō hukehukeagia lelei o nā mea uma iēnei mai te kāmataga, ke kō tuhituhia fakalelei ki lalo nā mea iēnei mo tau afioga,

⁴ kae ke iloa ai e koe te moni o nā mea uma kua akoako ai koe.

Kua Folafola te Fānau mai o Ioane te Papatiho.

⁵ I nā aho o Helota te Tupu o Iutea, nae i ei he ohitāulaga e igoa ki a Hakalia, he tino o te vāega ohitāulaga a Apiaha, ma tana āvaga e igoa ki a Elihapeta, na tupuga mai ia Alona.

⁶ Nae ola ki lāua i he ōlaga e tonu i te kikila a te Atua, ma nae tauhihi lelei ki nā tūlāfono ma nā fakatonuga a te Aliki.

⁷ Kae nae hēai he lā fānau ona ko Elihapeta e hē manava ola, ma kua mātutua lele foki ki lāua.

⁸ I tētahi aho, ko Hakalia nae galue i tana gāluega faka-ohitāulaga i te Mālumalu, ona kua pa te fakahologa o nā gāluega ki te vāega ohitāulaga e i ei ia.

⁹ Na fai te vili e vē ko te tū māhani a nā ohitāulaga, oi na filifilia ai ia Hakalia ke ia fakamūa nā meamanogi i luga o te fata faitāulaga. Oi fano ai ki loto o te potu o te Mālumalu o te Aliki e takua ko te Mea e Paia, oi fakamū te tāulaga meamanogi,

¹⁰ ka ko te tokalahi o tagata, nae tatalo i fafo i te itūlā o nā tāulaga meamanogi.

¹¹ Oi fakakitea ai he agelu a te Atua ki a Hakalia, e tū mai i te itū taumatau o te fata faitāulaga e fakamū ai nā meamanogi.

¹² Na teki lahi ia Hakalia, ma na ia lagona te mataku, i te ia kiteaga o te agelu.

¹³ Kae kua lea atu te agelu ki ei, “Ia koe nā mataku Hakalia, auā kua lagona e te Atua tau tatalo. Ka fānau mai e Elihapeta tau āvaga, he ataliki mo koe, ma ka fakaigoa e koe ki a Ioane.

¹⁴ Ka fakatumulia koe i te fiafia ma te olioli, ma e tokalahi nā tino ka fiafia i tona fānau mai,

¹⁵ auā ko Ioane ka kavea ma tagata tāua i mua o te Aliki. E hē tatau lele ia ke inu ki he uaina, pe he mea mālohi. Ka fakatumulia ia i te Agaga Paia mai te aho e fānau mai ai,

¹⁶ ma ka ia toe fakaliliu maia te tokalahi o tagata Ihalaelu, ki te Aliki to lātou Atua.

¹⁷ Ka muamua atu ia i te Aliki, ma e mākeke ma lototele, e vē ko te pelofeta ko Elia. Ka fakaliliu e ia ia loto o mātua ki a lātou fānau; ka fakaliliu e ia nā tino fakalogo gatā ke toe kui i nā auala o te āmiotonu; ka tāpena e ia nā tino o te Aliki, ke hāuniuni mo ia.”

¹⁸ Kua lea vē atu ia Hakalia ki te agelu, “E vēhea ona kō iloa ko te mea tēnei e taunuku? Ko au kua toeaina, ko taku āvaga foki kua lomatua.”

¹⁹ Kua tali mai te agelu, “Ko au ko Kapelielu. Ko au ko he kaukauna fakapitoa e a te Atua. Ko au na uga mai e te Atua ke tautala atu ki a te koe, ma fakailoa atu te tala lelei tēnei.

²⁰ Kikila, ona ko koe kua hē talitonu ki aku kupu iēia ka taunuku lava i te taimi kua fuafua ka fakataunuku ai, ko koe la ka gūgū ma hē mafai ke tautala, heiloga kua pa ki te aho e taunuku ai nā mea iēnei.”

²¹ I te taimi tēnā, ko nā tino nae fakatalitali ki a Hakalia, kua māfaufau pe he ā te kua tuai mai ai i loto o te potu e fai ai te tāulaga meamanogi.

²² Kae i te hauga o Hakalia ki fafo, kua hē ia mafaia oi tautala atu ki a te ki lātou, oi na ki lātou iloa ai e i ei he fakaaliga na ia kiteagia i loto o te potu. Kua tautalalima lava ki nā tino, ona kua hē ia mafaia oi tautala.

²³ I te umaga o tona toe aho tiute i te Mālumalu, oi fano ai ki tona kāiga.

²⁴ Kua teka atu nā aho iēnā, oi faitama ai ia Elihapeta tana āvaga, ma e lima ia māhina na nofo ai lava i te fale, kua hē hula ki he mea. Kua lea vē ifo ki a te ia lava,

²⁵ “Ko te mea tēnei kua fai e te Aliki ki a te au, ona kua kikila alofa mai ki a te au, ma kua ia kave keheagia toku mā nae nofo ma au, i te kikila mai a nā tino!”

Kua Folafola te Fānau mai o Iehu.

²⁶ I te ono o māhina talu te faitama o Elihapeta, na uga atu ai e te Atua te agelu ko Kapelielu, ki he koga i Kalilaia e igoa ki a Nahaleta,

²⁷ ma he fekau ki he taupou kua uma te tutuhi ke fakaipoipo ki he taulealea e igoa ki a Iohefa, e tupuga mai i te gafa o te Tupu ko Tavita. Ko tona igoa ko Malia.

²⁸ Kua fanatu te agelu ki te mea e i ei ia Malia, oi lea vē atu ai ki ei, “Tālofa ni te māfine, tē kua alofagia e te Atua. Ko te Aliki e fakatahi ma koe!”

²⁹ Ka ko Malia kua popole lele tona loto, ma kua māfaufau mālie ifo ai, pe he ā te uiga o nā kupu iēnei a te agelu.

³⁰ Kua lea atu te agelu ki ei, “Malia, koe nahe mataku, auā kua alofagia koe e te Atua.

³¹ Kikila, ko koe ka faitama ma fānau mai e koe he pepe tama, ma ka fakaigoa e koe ki a Iehu.

³² Ka kavea ia ma tagata tāua lahi, ma ka takua ia ko te Ataliki o te Atua Hilihilikehe. Ka fai ia ma tupu e te Aliki te Atua, e vē ko tona tupuna ko Tavita,

³³ ma ka kavea ia ma tupu o nā lāpuna o Iakopo, ke pa ki te fakavavau; ma ko tona mālō, ka hē mafai ke fakauma!”

³⁴ Kua lea atu ia Malia ki te agelu, “Ko au ko he taupou. E vēhea la ona mafai he mea vēnā?”

³⁵ Ka kua tali mai te agelu, “Ka fanaifo te Agaga Paia ki ō luga, ma ko te mana o te Hilihilikehe ka fakamalumalu ifo ki ō luga. Ko te mea ia ka paia ai te tama ka fānau mai, ma ka takua ai ko te Ataliki o te Atua.

³⁶ E kē manatua ia Elihapeta, te fafine o te koutou kāiga. Kua matua lele kae kua faitama; ko te ono tēnei o ona māhina, e ui lava nae fai vēia, e hē manava ola.

³⁷ Auā e hēai he mea e fokotahi e hē mafai e te Atua.”

³⁸ Oi lea atu ai ia Malia, “Ko au ko te kaukauna e a te Aliki; ke vēnā lava ona faia ki a te au, e tuha ai ma tau vāgana mai.” Oi tukua ai loa e te agelu ia Malia kae fano.

Kua Āhiāhi ia Malia ki a Elihapeta

³⁹ E hēki mataloa ni aho, oi tū ake ai ia Malia oi fano fakavave ki he kakai i he koga maugā i Iutea.

⁴⁰ Kua ulu atu ki te fale o Hakalia, oi ofoalofa atu ai ki a Elihapeta.

⁴¹ Na lagona atu lava e Elihapeta te ofoalofa mai a Malia, oi gāoioi ake ai foki ma te pepe i tona manava. Kua fakatumulia foki ia Elihapeta i te Agaga Paia,

⁴² oi kalaga leo lahi lele ai vē, “Kua hili atu tō manuia i lo fafine uma, ma ke manuia foki te tama ka fānau mai e koe!

⁴³ Ko ai nei kita, kua āhiāhi mai ai te mātua o toku Aliki ki a au?

⁴⁴ Auā na lagona atu lava e au tau ofoalofa mai, oi gaoi ake ai foki te pepe i toku manava, i tona fiafia.

⁴⁵ Amutia koe e talitonu ko te mea na vāgana atu ai te Aliki ki a te koe, ka fakataunuku lava!”

Ko te Pehe a Malia na Viviki ai ki te Atua

⁴⁶ Oi lea vē ai ia Malia, “E viviki ake toku loto ki te Aliki;

⁴⁷ e fiafia foki toku agaga ona ko te Atua toku Fakaola,

⁴⁸ i te kua ia manatua mai o kita, tana kaukauna fafine fakatauva! E kāmata atu nei, ko augā tupulaga uma, ka fakaamutia mai ki a te au,

⁴⁹ ona kua fai e te Atua Hilihilikehe te Mālohi, nā mea lalahi mo au. Ko tona igoa e paia;

⁵⁰ ma e fakaalia tona alofa fakahao ki a te ki lātou e mātataku ia te ia mai tēia tupulaga ki tēia tupulaga.

⁵¹ Kua fālō atu tona lima mākeke ma fakatākapekape nā tino fāfifia ma a lātou fuafuaga uma,

⁵² Kua tuku e ia ki lalo nā tupu mālolohi mai o lātou nofoāliki, kae hiki ki luga nā tino fakatauva.

⁵³ Kua fafaga mākokona e ia nā tino fia kakaia i nā mea lelei, kae uga kehe vē nā tino maumea e aunoa ma he mea.

⁵⁴ Kua tauhi e ia tana folafolaga na fai ki o tātou tupuna, ma kua hau ke fehoahoani ki tana kaukauna ko Ihalaelu!

⁵⁵ Kua manatua e ia ke fakaali tona alofa fakahao ki a Apelaamo ma ana fānau uma lele ke pa ki te fakavavau!”

⁵⁶ E tai tolu ia māhina na nofo ai ia Malia i te mea e i ei ia Elihapeta, oi toe foki ai ki tona kāiga.

Ko te Fānau mai o Ioane te Papatiho.

⁵⁷ Kua pa ki te māhina o Elihapeta, oi fānau mai ai e ia tana pepe, he tama.

⁵⁸ Kua fakalogo nā tino e tuākoi ki lātou, ma nā kāiga o Elihapeta ki te lahi o te alofa o te Atua ki a Elihapeta, oi fiafia fakatahi ai ki lātou uma lele ma ia.

⁵⁹ I te kātoaga o te valu o aho talu te fānau mai o te pepe, oi ōmamai ai ki lātou ke pelitome te pepe, ma na fofou ke ki lātou fakaigoa te pepe ki a Hakalia, te igoa o tona tamana.

⁶⁰ Kae kua lea atu tona mātua, “Hēai; ko tona igoa ko Ioane.”

⁶¹ Kua lea mai ki lātou, “E hēai he tino e igoa vēnā i te koutou kāiga!”

⁶² Oi tautalalima atu ai nā tino ki a Hakalia, pe ko ai te igoa e fofou ia ke fakaigoa ai tona ataliki.

⁶³ Kua tautalalima mai ia Hakalia, ke kavake he mea ke tuhituhi ia ki luga, oi tuhi ai vēnei e ia ki lalo, “Ko tona igoa ko Ioane.” Na tēteki lele ki lātou uma i te mea tēnei.

⁶⁴ Ko te taimi foki lava tēnā na mafai ai ke toe tautala ia Hakalia, ma na kāmata ai oi viviki ake ki te Atua.

⁶⁵ Na fakatumulia nā tino uma i te pitonuku tēnā i te mātataku, ma kua halalau te tala e uiga ki nā mea iēnei ki nā itū uma o te kogāfenua maugā o Iutea.

⁶⁶ Ko nā tino uma lele na fakalogo ki nā mea iēnei, kua teu e ki lātou i o lātou loto, ma kua lea vēia “Ko te tamaiti nei tēnei e fai ma a, kāfai e matua?” Auā kua ki lātou iloa ko te mana o te Aliki e i te tamaiti.

Ko te Vāloaga a Hakalia

⁶⁷ Oi fakatumulia ai ia Hakalia, te tamana o Ioane, i te Agaga Paia, ma na fai ai tana vāloaga e vēnei;

⁶⁸ “Ke vīkia te Aliki, te Atua o Ihalaelu! Kua hau ke fakaola ona tagata.

⁶⁹ Kua fakatū mai e ia mo ki tātou he Fakaola mākeke, he lāpuna e o tana kaukauna ko Tavita.

⁷⁰ Na folafola e ia e ala i ana pelofeta paia i te kāloā,

⁷¹ ka laveaki e ia ki tātou mai o tātou fili, mai nā lima o ki lātou uma e ita mai ki a te ki tātou.

⁷² Na tākua e ia ka ia fakaalia tona alofa fakahao ki o tātou tupuna, ma ia manatua tana feagaiga paia.

^73-74 I tana tautōga na fai ki to tātou tupuna ko Apelaamo, na folafola e ia e ia laveakia ki tātou mai o tātou fili, ma fakataga ki tātou ke tautua ki a te ia e aunoa ma he mataku,

⁷⁵ kae ke mafai ai ki tātou ke fakapaiagia ma āmiotonu, i mua o ia i aho uma o to tātou ola.

⁷⁶ “Ma ko koe, taku tama, ka takua koe ko he pelofeta e a te Atua Hilihilikehe. Ka muamua atu koe i te Aliki, ke hāuni he auala mo ia,

⁷⁷ ma fakailoa atu ki ona tagata te fakaolataga, e ala i te fakamāgaloga o a lātou agahala.

⁷⁸ Ko te tātou Atua e alofa ma e agamalū. Ka fakatafa e ia ia ata o te mālama o te fakaolataga ki o tātou luga,

⁷⁹ ma fakahuhulu ifo mai te lagi ki luga o nā tino uma e nonofo i te pōuli o te ata o te oti, ke takitaki ai o tātou vae ki te auala o te fīlēmū.”

⁸⁰ Kua tuputupu ake te tamaiti, ma kua maua i te loto mākeke. Nae nofo lava i te vao, ke pa ki te aho na kāmata ai tana gāluega ki tagata o Ihalaelu.