Loma 9 - Tokelauan New Testament

Ko te Atua ma ona Tagata kua Ia Filifilia

¹ Ko au e tautala i te meamoni; ko au e a Keliho ma ko au e hē pepelo. Ko te Agaga Paia tē e pūlea toku lotofuatia, e ia fakamāonia foki ko au e hē pepelo

² kāfai au e lea atu ki te lahi o toku fakanoanoa ma te tīgā o toku loto e hē uma

³ ki oku tagata, oku kanofi ma oku toto! Na hili ai pe kana fetū au e te Atua ma kave kehea mai ia Keliho, pe kāfai ko te mea ia e maua ai e oku tagata he fehoahoani.

⁴ Na filifilia ki lātou e te Atua ke fai ma ona tagata, ma fakakikila ki lātou ki tona mamalu; na ohi ana feagaiga ma ki lātou ma tuku atu ki ei nā Tūlāfono; kua iloa e ki lātou te faiga o nā tāpuakiga; kua maua e ki lātou nā folafolaga a te Atua;

⁵ na tupuga mai ki lātou i nā tino Epelu takutakua, ma na tupuga mai ai foki ia Keliho. Ke vīkia te Atua tē e aoao tana pule, ke pa lava ki te hēgata. Amene.

⁶ E hē vēakē la ko te folafolaga a te Atua kua hē fakataunukua; auā e hē ko tagata uma na tupuga mai ia Ihalaelu ni tagata e o te Atua.

⁷ E hē ko tagata uma foki na tupuga mai ia Apelaamo ni fānau e a te Atua. Na vāgana atu te Atua ki a Apelaamo, “Ka tupuga mai ia Ihaako nā lāpuna na folafola atu e au ki a te koe.”

⁸ Ko tona uiga, e hē ko nā fānau e fānanau i te fakatetino te kavea ma fānau a te Atua, kae ko nā fānau na fānanau ona ko te folafolaga.

⁹ Auā ko iēnei nā kupu o te folafolaga a te Atua, “I te taimi tēnei kāfai au e toe hau, ka i ei te pepe tama a Hala.”

¹⁰ E hē ko tēnei oioti foki. Ko nā ataliki e toka lua o Lepeka e mai he tamana e fokotahi, ko Ihaako to tātou tupuna.

^11-12 Kae ko hēki fānanau mai foki lava ki lāua pe kua ki lā faia he mea lelei pe he mea kino, kae kua uma te lea o te Atua ki a Lepeka, ko tona ataliki matua ka fai ma kaukauna a te ataliki tamaiti. Na lea vēnei te Atua kae ke kitea ai e fai lava e ia ana tonu, ma e hēki faia ona ko he mea a he tino o ki lāua na fai.

¹³ E vē oi tūhia i te tuhituhiga paia, “Ko au e alofa ki a Iakopo kae inoino ki a Ehau.”

¹⁴ Ka lea nei la ki tātou ko te Atua e hē fai meatonu? E hēai.

¹⁵ Auā na vāgana te Atua ki a Mohe, “Ka fakaalia toku alofa fakahao ki ho he tino e loto au ki ei; ka fakaalia toku tīgā alofa ki ho he tino e loto au ki ei.”

¹⁶ Ko te mea ia, ko nā mea uma lele e hē fakalagolago ki te mea a te tagata e fai pe ko te mea e fofou ki ei, kae e fakalagolago oioti ki te alofa fakahao o te Atua.

¹⁷ Auā i te tuhituhiga paia, ko te Atua na vāgana ki te tupu o Aikupito, “Na kō faia koe ma tupu kae ke fakaaogā ai koe ke fakailoa ai toku mālohi, ma ke takutaku atu ai toku igoa ki te lalolagi kātoa.”

¹⁸ Ko te mea ia, ko te alofa fakahao o te Atua e fakaalia ki ho he tino e loto ia ki ei, ma fakamakaka e ia te loto o ho he tino e loto ia ki ei.

Ko te Tōkahā ma te Alofa Laveaki o te Atua

¹⁹ Kae e ono fehili vē mai hētahi o koutou ki a te au, “Kāfai e vēnā ia faiga a te Atua, he ā la te koi fakamāhinohino ai e ia ki tātou? Ko ai he tino e ia mafaia oi teteke ki te finagalo o te Atua?”

²⁰ Kae ko ai nei koe, he tagata, ke toe tali ai koe ki te Atua? E hē mafai e te ulo ōmea ke lea vē atu ki te tino na ia gaohia ia, “He ā te na gaohi vē ai au e koe?”

²¹ E hē i te tino nei e gaohi e ia nā ulo, te pule ke ia fakaaogā ai te ōmea ki te mea e fofou ia ki ei, ma ke ia gaohia ni ulo e lua mai te palugā ōmea e fokotahi, ko tētahi mo nā aho fakapitoa, ma tētahi mo nā aho uma?

²² E vēhea kāfai te Atua e fofou ke fakaali tona tōkahā ma tona mālohi, kae kua lahi pea lava tona onohai ki nā tino e tatau ke pakū ki ei tona tōkahā, nā tino e tuku e fakaumatia;

²³ ma e vēhea pe kāfai kua ia faia te mea tēnei kae ke fakailoa ai te lahi lele o tona mamalu fakaalia mo ki tātou nā tino e fakaaga ki ei tona alofa fakahao, nā tino o ki tātou kua uma te ia tāpenagia ke maua e ki lātou tona mamalu fakaalia.

²⁴ Auā ko ki tātou ko nā tino ia kua kalaga mai ki ei te Atua, e hē ko nā tino Iutaia oioti, kae vēnā foki ia tagata nukukehe

²⁵ Ko tēnei te kupu a te Atua i te tuhi a Hohea: “Ko nā tino nae hē ni tino e ōku ka takua e au ‘ni tino e ōku.’ Ko te nuku nae hē alofa au ki ei ka takua e au, ‘Ko taku pele fakapelepele.’

²⁶ Ma i te koga tonu lava na lea vē ai te Atua ki a te ki lātou, ‘E hē ni tino koutou e ōku,’ i kinā ka takua ki lātou ni fānau e a te Atua e ola.”

²⁷ Ma ko tēnei te kupu a Ihaia e uiga ki a Ihalaelu: “E tuha lava pe kāfai ia tagata o Ihalaelu e tokalahi e vē ko te lahi o te oneone i te matāfaga, kae ni nai tino lele o ki lātou te ka fakahaogia;

²⁸ auā ka vave lele oi fakatino e te Aliki tana fakahalaga na ia folafolagia ki tagata o te lalolagi.”

²⁹ E vē ko te lea mai a Ihaia muamua, “Anei e hēki fakatotoea e te Aliki Hilihilikehe ni lāpuna mo ki tātou, e vēnei ake ko ki tātou kua vē ko Hotoma ma Komolo.”

Ko Tagata Ihalaelu ma te Tala Lelei

³⁰ He ā la te uiga o te mea tēnei? Ko tona uiga ko tagata nukukehe nae hē taumafai ke fakalelei to lātou va ma te Atua, kae na fakalelei e te Atua e ala i to lātou fakatuatua;

³¹ kae ko tagata Ihalaelu nae hakilikili ki te tūlāfono ke fakalelei ai to lātou va ma te Atua, e hēki maua e ki lātou?

³² Aiheā? Auā nae hē fakalagolago ki te fakatuatua kae nae fakalagolago ki a lātou mea nae fai. Ma ko te mea ia nae tūinoino ai i te “fatu fakatulave”

³³ e vē oi lea mai te tuhituhiga paia: “Kikila, e tuku e au i loto o Hiona he fatu ka tulave ai ia tagata, he fatu ka pakukū ai ki lātou ki lalo. Kae ko ai lava e talitonu ki a te ia, ka hēai he mea e popole ai.”