Loma 8 - Tokelauan New Testament

Ola i lalo o te Takitakiga a te Agaga o te Atua

¹ I te taimi nei la, e hēai he fakahalaga mo ki lātou e ola i te māfutaga ma Keliho Iehu.

² Auā ko te tūlāfono a te Agaga o te Atua, tēia e maua ai e ki tātou te ola i te māfutaga ma Keliho Iehu, kua maua ai e au te haolotoga mai te tūlāfono o te agahala ma te oti.

³ Na fai e te Atua te mea e hēki mafai e te Tūlāfono, ona ko te vāivai o te natula fakatetagata. Na taku halagia e ia te agahala i te natula fakatetagata, i te uga maiga e ia o tona Ataliki, tēia na hau ma he natula agahala fakatetagata e vē foki lava ko ki tātou, ke fakauma ai te agahala.

⁴ Na fai e te Atua te mea tēnei, kae ke fakatino kātoatoa ai te tūlāfono ia te ki tātou e mulimuli ki te takitakiga a te Agaga, kae hē ki te takitakiga a te natula fakatetagata.

⁵ Ko nā tino e ola ma mulimuli ki te mea e fakatonu ake e o lātou natula fakatetagata, kua pūlea o lātou māfaufau e nā mea e nanau ki ei te natula fakatetagata. Ka ko nā tino e ola ma mulimuli ki te mea e fakatonu ake e te Agaga, kua pūlea o lātou māfaufau e nā mea e naunau ki ei te Agaga.

⁶ Kāfai te māfaufau e pūlea e te natula fakatetagata, ko te ikuga ko te oti; kāfai e pūlea e te Agaga, ko te ikuga ko te ola ma te fīlēmū.

⁷ Auā ko te māfaufau e pūlea e te natula fakatetagata, e teteke ki te Atua. E hē mafai ke uhitaki ki te tūlāfono a te Atua, e matuā hē mafai lava.

⁸ Ko nā tino e uhitaki ki te natula fakatetagata, e hē ki lātou mafaia oi fai te mea e fiafia ki ei te Atua.

⁹ Kae ko koutou e hē ola ma mulimuli ki te mea e fakatonu atu e te natula fakatetagata ke fai; ko koutou e ola ma mulimuli ki te mea e fakatonu atu e te Agaga ke fai — pe kāfai moni ko te Agaga o te Atua e nofo i loto ia te koutou. Ko ai lava e hē ia te ia te Agaga o Keliho, e hē a Keliho te tino tēnā.

¹⁰ Kae kāfai ia Keliho e ola i loto ia te koutou, ko te Agaga tēnā o te ola mo koutou; auā kua uma te fakalelei o te va o koutou ma te Atua, e ui lava ko outou tino e fano e oti, ona ko te agahala.

¹¹ Kāfai te Agaga o te Atua tē na ia toe fakatūa ia Iehu mai te oti, e ola i loto ia te koutou, ko tona uiga ko tē na ia toe fakatūa ia Keliho mai te oti ka ia fōkiatua foki te ola ki outou tino e fano e oti, e ala i tona Agaga i loto ia te koutou.

¹² Ko te mea ia te kau uho, e i ei to tātou tiute, kae e hē ko te ola e tuha ai ma te natula fakatetagata.

¹³ Auā kāfai koutou e ola e tuha ai ma te fakatetagata, ko koutou la ka pa ki te oti; kae kāfai i te fehoahoani a te Agaga e fakaumatia e koutou outou uiga kino, ko koutou ka ola.

¹⁴ Ko nā tino e takitakia e te Agaga o te Atua, ni fānau ki lātou e a te Atua.

¹⁵ Auā ko te Agaga tēia kua tuku atu e te Atua ki a te koutou, e hē ia faia koutou ma pologa, ma fai ma mea e mātataku ai koutou; kae ko te Agaga te kavea ai koutou ma fānau a te Atua, ma i te mana o te Agaga e kālalaga vē atu ai ki tātou ki te Atua, “Te Tamana, To mātou Tamana!”

¹⁶ Ko te Agaga o te Atua kua fai ma molimau fakatahi ma o tātou agaga, ko ki tātou ko he fānau e a te Atua.

¹⁷ Ona ko ki tātou he fānau e a ia, ka maua ai e ki tātou nā fakamanuiaga e tāofi e ia mo ona tagata, ma ka ia te ki tātou foki fakatahi ma Keliho, nā mea e tāofi e te Atua mo ia; auā kāfai e fakatahi ki tātou ma Keliho i ona puapuagā, ka vēnā foki ona fakatahi ki tātou ma ia i tona mamalu.

Ko te Mamalu o nā Tino o te Atua i te Lumanaki

¹⁸ I toku manatu, ko nā puapuagā e feagai ma ki tātou i te taimi nei, e hē fakatuhatuhagia lele ki te mamalu ka fakailoa mai e te Atua ki a te ki tātou.

¹⁹ Ko nā mea uma lele na gaohia e te Atua, e fakatalitali ma te amanaki lahi, ke fakailoa mai e te Atua tana fānau.

²⁰ Auā na fai lava e te Atua kae ke nahe i ei he aogā o nā mea na ia gaohia, e hē vē ona na fofou ki lātou ki ei, kae ona ko te mea lava ia na fofou ia ki ei. Na ia faia te mea tēnei ona ko tona fakamoemoe

²¹ ka i ei te aho e fakahaoloto ai nā mea uma na ia gaohia ma ka hē toe pala. Kae ka maua fakatahi e ki lātou te haolotoga fiafia e maua e te fānau a te Atua i to lātou mamalu.

²² Auā e ki tātou iloa, ke pa mai lava ki te taimi nei, ko nā mea uma na gaohia e te Atua, e ōi i te tīgā, e vē ko te tīgā e lagona e he fafine e fānau.

²³ Kae e hē nā ko nā mea na gaohia e te Atua te ōi; ko ki tātou kua ola i te Agaga, te uluaki meaalofa a te Atua, e ōi foki i loto o ki tātou lava, ka koi fakatalitali ki te Atua ke kavea ki tātou ma ana fānau ma fakahaoloto ai o tātou tagata kātoa.

²⁴ Auā ko te fakamoemoe te na fakaola ai ki tātou; kae kāfai e kitea e ki tātou te mea e fakamoemoe ki tātou ki ei, ko tona uiga e hē ko he fakamoemoe te mea tēnā. Auā ko ai he tino e fakamoemoe ki he mea e ia kitea?

²⁵ Kae kāfai ki tātou e fakamoemoe ki he mea e hē ki tātou kitea, ko ki tātou e fakatalitali ki ei ma te onohai.

²⁶ E vēnā foki ona fehoahoani mai te Agaga i nā mea e vāivai ai ki tātou. Auā e hē iloa e ki tātou oi tatalo e vē ona tatau ke tatalo ai ki tātou; ko te Agaga lava ia e ole atu ki te Atua mo ki tātou ma te ōi e hē mafai ke fakamatalagia i ni kupu.

²⁷ Ma ko te Atua, tē e ati tana kikila ki o tātou loto, e ia iloa te mea e i te māfaufau o te Agaga; auā ko te Agaga e ole ki te Atua mo ona tagata, ma e tuha ai ma tona finagalo.

²⁸ E iloa e ki tātou, i mea uma lele, ko te Atua e galue mo te lelei fakatahi ma ki lātou e alolofa ki a te ia, ki lātou kua kalagagia e ia e tuha ma te mea e fofou ia ki ei.

²⁹ Ko ki lātou kua uma te filifilia e te Atua, kua uma foki te tōfia e ia muamua ke kavea ke vē ko tona Ataliki, kae ke kavea ai te Ataliki e vē ko te ulumatua i he kau uho tokatahi.

³⁰ Ma ko ki lātou na muamua tōfia e te Atua, na kalagagia e ia; ma ko ki lātou na kalagagia e ia, na fakaleleia to lātou va ma ia; ma ko ki lātou na ia fakaleleia to lātou va ma ia, na i ei fakatahi ki lātou ma ia i tona mamalu.

Ko te Alofa o te Atua e Ala ia Keliho Iehu

³¹ Ka vēhea ake nei la ki tātou e tuha ai ma te mea tēnei? Kāfai te Atua e kau fakatahi ma ki tātou, ko ai la te mafai oi teteke mai ki a te ki tātou?

³² E hēki tāofia e te Atua tona lava Ataliki, kae na tukulima mai e ia mo ki tātou uma — ka hē ia tukulima maia nei foki la mo ki tātou nā mea uma?

³³ Ko ai te ka ia mōlia ia tagata filifilia o te Atua? E hē mafai e he tino, auā ko te Atua lava ia te na ia fakaleleia to lātou va ma ia!

³⁴ Ko ai la te ka ia taku halagia ki lātou? Ko Keliho Iehu? Hēai! Ko Keliho na oti, oi toe fakatū mai ai i te oti, ma e i te itū taumatau o te Atua, e fautua mo ki tātou!

³⁵ Ko ai la te ka ia vavae kehea ki tātou mai te alofa o Keliho? E mafai nei e nā fakafītāuli, pe ko nā puapuagā, pe ko nā fakahāuāga, pe ko te fiakaia, pe ko te mativa, pe ko te lamatia o te ola, pe ko te oti?

³⁶ E vē oi lea mai te tuhituhiga paia, “Ona ko ki mātou e tautua ki a te koe, kua lamatia ai o mātou ola i taimi uma; ko ki mātou e vē ko nā māmoe kua hāuni ke tāmate.”

³⁷ Hēai. I nā mea uma iēnei, kua kātoatoa to tātou manumālō e ala i tē kua alofa ki a te ki tātou!

³⁸ Auā e mautinoa e au, e hēai he mea e mafai ke ia vavae kehea ki tātou mai tona alofa: e hē mafai e te oti pe ko te ola, e hē mafai e agelu pe ko iētahi mālohiaga i te lagi, e hē mafai e nā mea e i ei i te taimi nei, pe ko nā mea i te taimi koi mua,

³⁹ e hē mafai e he mālohiaga i te lagi i luga, pe i te lalolagi i lalo — e hēai lele he mea e fokotahi na gaohia e te Atua, e ia mafaia oi tuku kehekehe ki tātou ma te alofa o te Atua, e ala ia Keliho Iehu to tātou Aliki.