Loma 7 - Tokelauan New Testament

Ko he Fakatakitakiga e maua mai i te Fakaipoipoga

¹ Te kau uho, e mālamalama lele koutou i te mea ka lea atu ai au, auā kua iloa e koutou uma te tūlāfono. Ko te tūlāfono e pule oioti ki tagata i te taimi ka koi ola ai ki lātou.

² Mo he fakatakitakiga: Ko he fafine kua fakaipoipo, e fuhia i te tūlāfono ki tana tāne; kae e oti loa tana tāne, oi kua haoloto ai loa ia mai te tūlāfono e fuhia ai ia ki tana tāne.

³ Kāfai la te fafine e nonofo ma hētahi tamāloa ka koi ola tana tāne, ka takua ia ko he fafine mulilua. Kae kāfai kua oti tana tāne, kua haoloto la ia i te tūlāfono, ma ka hē mulilua ia kāfai e toe fakaipoipo ki hētahi tamāloa.

⁴ Ko koutou foki la e tatau ke vēnei, oku uho. E tuha ai ma te Tūlāfono, ko koutou kua oti, auā ko koutou ko he itūtino o te tino o Keliho; ma i te taimi nei, ko koutou e a Iehu, tē na toe fakatū mai i te oti, kae ke fua mai ai ni fua ia te ki tātou mo te Atua.

⁵ Auā i te taimi nae ola ai ki tātou e tuha ai ma o tātou natula fakatetagata, ko nā tuinanauga kino na fakaohofia e te Tūlāfono nae galue i loto o ki tātou, ke maua ai ni fua mo te oti.

⁶ Kae i te taimi nei, ko ki tātou kua haoloto mai te Tūlāfono a Mohe. Ko ki tātou kua oti ma kua hē toe haihaitia i te Tūlāfono. Ko te mea ia, ko ki tātou kua hē toe tautua ki te Atua e ala i te mulimuli ki te tūlāfono tuai e vē ona tuhituhia, kae e ala i te faiga fou e fakaali mai e te Agaga o te Atua.

Ko te Tūlāfono e iloa ai e ki tātou te Agahala

⁷ Ka vēhea ake nei la ki tātou? Ka lea nei ki tātou ko te Tūlāfono e kino? Hēai! Ka na hē kō iloa te Tūlāfono e vēnei ake e hēki kō iloa foki te agahala. Kana hē lea mai te Tūlāfono, “Nahe kē mānumanu ki nā mea a hētahi tino,” e vēnei ake e hēki kō iloa he lagona vēnei.

⁸ Kae ona ko te fakatonuga tēnā a te Atua, na maua ai te avanoa o te agahala ke fakatupu ai nā itūkāigā lagona fakapito kehekehe ia te au. Ka na hēai he tūlāfono, e hēai foki he agahala.

⁹ Nae i ei foki te taimi nae ola ai au e aunoa ma te kō iloa o te tūlāfono; kae i te pa maiga o te fakatonuga a te Atua, na ola ai te agahala

¹⁰ kae oti au. Ma ko te fakatonuga a te Atua na tatau ke maua ai te ola, kae mo au, na maua ai oti.

¹¹ Na maua e te agahala te avanoa, ma e ala i te fakatonuga a te Atua, na ia fakahehēa ai au, ma maua ai au i te oti.

¹² Ko te mea ia, ko te Tūlāfono lava ia e paia, ma ko nā fakatonuga a te Atua e paia, ma hako, ma lelei.

¹³ Ko tona uiga la ko toku oti na māfua i he mea e lelei? Hēai, e hē vēnā! Ko te agahala te na māfua ai; na fakaaogā e te agahala te mea e lelei ke maua ai au i te oti, kae ke iloa ai e tagata te natula moni o te agahala. Ma e ala i te fakatonuga a te Atua, kua fakaalia ai te hēai o he gataaga o te kino o te agahala.

Ko nā Fekehekeheakiga i loto ia te ki Tātou

¹⁴ E iloa e ki tātou ko te Tūlāfono e mai te Atua; kae ko au kua nā ko he tagata, na fakatau ke fai ma pologa a te agahala.

¹⁵ Ko au e hē mālamalama i aku mea e fai; auā e hē kō faia nā mea e fofou au ki ei, kae e fai e au nā mea e inoino au ki ei.

¹⁶ Ona la ko nā mea e kō faia ko nā mea ia e hē fofou au ki ei, e fakaali mai i kinā e talia e au, ko te Tūlāfono e hako.

¹⁷ Ko te mea ia, kua hē ko au te faia te mea tēnei, kae ko te agahala e nofo i loto ia te au.

¹⁸ E iloa e au e hēai he mea lelei e nofo i loto ia te au — i toku natula fakatetagata. Auā e ui lava ko te loto naunau ke fai te mea e lelei e ia te au, kae e hē kō mafaia oi fai.

¹⁹ E hē kō faia te mea lelei e fofou au ki ei, kae e fai e au te mea kino e hē fofou au ke kō faia.

²⁰ Kāfai e fai e au te mea e hē fofou au ke fai, tona uiga kua hē toe ko au te fai e ia, kae ko te agahala e nofo i loto ia te au.

²¹ Ma kua iloa e au ko te tūlāfono tēnei te māfua ai; kāfai au e fofou ke fai te mea e lelei, ko te kino lava te mea e iku ake e fai e au i taimi uma.

²² Ko toku loto e fiafia lahi lele ki te tūlāfono a te Atua.

²³ Kae e kō kitea e kehe te tūlāfono e galue i loto ia te au — he tūlāfono e teteke ki te Tūlāfono tēia kua talia e au i toku māfaufau. Kua fai au e ia ma pagotā a te tūlāfono e uiga ki te agahala, tēia e galue i loto o oku.

²⁴ Ko au la te fakanoanoa lahi. Ko ai nei te ka ia laveakia au mai te natula fakatetagata e iku ai au ki te oti?

²⁵ Tātou fakafetai ki te Atua, tē e ia faia te mea tēnei e ala ia Iehu Keliho! Ko tēnei la te tūlaga e i ei au: ko au e tautua ki te Tūlāfono a te Atua i toku māfaufau oioti, kae e tautua toku natula fakatetagata ki te tūlāfono e iku ki te agahala.